໑໑໐. ຘາສໍ

ສງ຺ຂ຺ຍາວາຈິໂນ ສທ຺ທາ ສງ຺ຂ຺ຍາສທ຺ເທນ ຄຫິຕາຕິ ອາຫ- ‘ອຕ຺ເຖ’ຈ຺ຈາທິ. ປກາໂຣ ທພ຺ພຄຸຓຘິສໂຍປິ ອຕ຺ຖິ, ຕຕ຺ຖ ຍທິ ໂສປິ ຄຍ຺ເຫຍ຺ຍ ທພ຺ພ ຄຸຓານໍ ລິງ຺ຄສງ຺ຂ຺ຍາຫິ ໂຍຄາ ຘາປ຺ປຈ຺ຈຍນ຺ຕ(ມ຺ປິ ຕພ຺ພິສໂຍເຍເວຕິ) [ເຈຕ຺ຖ (ໂປຕ຺ຖເກ] (ປກາຣວາຈກລິງ຺ຄສງ຺ຂ຺ຍາຫິ ໂຍຄາ) ອລິງ຺ຄມສງ຺ຂ຺ຍຎ຺ຈ [ຘາປ຺ປຈ຺ຈຍນ຺ຕມລິງ຺ຄມສງ຺ຂ຺ຍຎ຺ຈ-ອິຕິ ກາສິກາວຸຕ຺ຕິປຎ຺ຊກາຍໍ] ນ ສິຍາ, ເອວຎ຺ຈ ສຕ຺ຍພ຺ຍຍຕ຺ຕມຠິມຕນ຺ຕສ຺ສ ນ ສິຍາ, ຕຎ຺ຈິຏ຺ຐໍ, ກິຣິຍາວິສເຍ ຕຸ ຕສ຺ມິໍ ຄຍ຺ຫມາເນ ເອກຘາຠຸຎ຺ຊຕິ ທ຺ວິຘາຠຸຎ຺ຊຕິ ທ຺ວິຘາຄຈ຺ຉຕິຈ຺ຈາໂທ ໂຠຊນ ຄມນາທິກິຣິຍາຍ ສພ຺ພຖາ ລິງ຺ຄສງ຺ຂ຺ຍາຫິ ໂຍຄາຠາວາ ຍຖາວຸຕ຺ຕ ໂທໂສ ນ ສິຍາຕິ ປາຓິນີຍວຸຕ຺ຕິກາເຣນ ຊຍາທິຈ຺ເຈນ ກິຣິຍາ ວິສໂຍເຍເວຕ຺ຖ ປກາໂຣ ຄຫິໂຕ. ຕມ຺ປຕິ ອາຫ- ‘ທພ຺ເພ’ຈ຺ຈາທິ. ກສ຺ມາ ປເນວມາຫາຕິ ອາຫ- ‘ນວຘາທພ຺ພ’ມິຈ຺ຈາທິ. ‘‘ນວຘາ ທພ຺ພໍ, ພຫຸຘາ ຄຸໂຓ’’ຕິ ເວເສສິການໍ ສງ຺ເກໂຕ.

ຕຕ຺ຖ ປຸຖພ຺ຍາໂປເຕໂຊວາຍ຺ວາກາສກາລທິສາຕ຺ຕມນານີຕິ ນວ ທພ຺ພານິ. ຣູປ ຣສ ຄນ຺ຘ ຜສ຺ສ ສງ຺ຂ຺ຍາປຣິມາຓ ປຸຖຸຕ຺ຕສໍໂຍຄວິຠາຄ ປຣຕ຺ຕາປຣຕ຺ຕພຸທ຺ຘິສຸຂທຸກ຺ເຂຈ຺ຉາໂທສປຍຕນາ ຈ ຄຸຓາ, ຈສທ຺ເທນ ຄຸຣຸຕ຺ຕ ທວຕ຺ຕສິເນຫສງ຺ຂາຣຘມ຺ມາຘມ຺ມສທ຺ທາ ເຈຕິ ຈຕຸພ຺ພີສຕິ ພຫຸຘາ ຄຸໂຓ. ອຕ຺ຣາປິ ຍຖາວຸຕ຺ຕກາສິກາວຸຕ຺ຕິຍາ ປຎ຺ຈິກາກາເຣນ ຊິນິນ຺ທພຸທ຺ຘິນາ ນວຘາ ທພ຺ພໍ ພຫຸຘາ ຄຸໂຓຕ຺ຍຕ຺ຣາປິ ‘‘ກິຣິຍາຊ຺ຌາຫຣິຕພ຺ພາ ນວຘາ ທພ຺ພໍ ພຫຸຘາ ຄຸໂຓ ອຸປທິສີຍຕິ ວິຎ຺ຎາຍຕິ ພ຺ຍາຂ຺ຍາຍເຕ ວິຊ຺ຊເຕວາ’’ຕິ ກິຣິຍາວິສໂຍເຍວ ປກາໂຣ ປຏິປາທິໂຕ, ປໂຍຄທສ຺ສນໂຕ ພ຺ຍວຈ຺ເຉຊ຺ຊຠາວາ ສພ຺ພຕ຺ຖ ກິຣິເຍເວຕິ ວິເສສໂນປາທານມຍຸຕ຺ຕນ຺ຕິ ສມ຺ພນ຺ໂຘ.

ນວຘາ ທພ຺ພໍ ພຫຸຘາ ຄຸໂຓຕິ ປໂຍຄທສ຺ສນໂຕ ທພ຺ພຄຸຓວິສຍານມ຺ປກາຣານໍ ຄຍ຺ຫຸປຄຕ຺ຕາ ພ຺ຍວຈ຺ເຉທຍິຕພ຺ພານໍ ທພ຺ພຄຸຓວິສຍານມ຺ປກາຣານໍ ຠາວາ ສພ຺ພສ຺ມິໍ ທພ຺ພຄຸຓວິສເຍ ຊິນິນ຺ທພຸທ຺ຘິນາ ວຸຕ຺ຕນເຍນ ກິຣິຍາ ອຕ຺ເຖວາຕິ ກິຣິຍາວິສໂຍວ ປກາໂຣ ຄຍ຺ຫຕີຕິ ວຸຕ຺ຕິກາຣ ປຎ຺ຊິກາກາຣານໍ ວິເສສໂນປາທານມຍຸຕ຺ຕນ຺ຕິ ອຕ຺ໂຖ.

ຕໂຕເຍວາຕິ ຍໂຕ ວິເສສໂນປາທານມຍຸຕ຺ຕໍ ຕໂຕເຍວ ທ຺ວີຫິຈ຺ຈາທິກມາເຫຕິ ອຕ຺ໂຖ. ອຍເມຕ຺ຖາຘິປ຺ປາໂຍ ‘‘ທ຺ວິຘາ ກໂຣຕີຕິ ກິຣິຍາປໂຍເຄປິ ປກາໂຣ ທພ຺ພຄຸຓວິສໂຍ… ທພ຺ພວິສຍສ຺ສ ຄຸຓວິສຍສ຺ສ ວາ ທ຺ວິຘາຠາວສ຺ສ ກຣີຍມານຕ຺ຕາ, ນຕຸ ກິຣິຍາວິສໂຍ… ທ຺ວິຘາຠາວສ຺ສ ກຣຓກິຣິຍາວິສຍສ຺ເສຕ຺ຖ ວຕ຺ຕຸມນິຈ຺ຉິຕຕ຺ຕາ. ຕໂຕເຍວ ກິຣິຍາປກາໂຣປາທາເນ [ປກາໂຣຕິສຍເນ (ໂປຕ຺ຖເກ)] ອຕ຺ຣ ຘາປ຺ປຈ຺ຈຍນ຺ຕປ຺ປໂຍໂຄ ນ ສິຍາຕິ ວິຎ຺ຎາເປຕຸໍ ‘ທ຺ວີຫິ’ຈ຺ຈາທິກມາເຫ’’ຕິ ເຕນາຫ‘ອຕ຺ເຣ’ຈ຺ຈາທິ.

ທພ຺ພຄຸຓວິສເຍ ປກາເຣ ຄຍ຺ຫມາເນ ໂຍຍໍ ໂທໂສ ສມ຺ຠາວິໂຕ ປເຣຫິ, ຕໍ ທານິ ນິຣາກຕ຺ຕຸມາຫ ‘ສຕິປິເຈ’ຈ຺ຈາທິ. ສຠາວໂຕ ອລິງ຺ຄມສງ຺ຂ຺ຍຎ຺ຈາຕິ ສມ຺ພນ຺ໂຘ, ສງ຺ຂ຺ຍນ຺ຕຣາປາທເນ ຄມ຺ຍມາເນ ຘາປ຺ປຈ຺ຈໂຍ ວິຫິໂຕ ປາຓິນິເຍຫິ, ຕທາຫ- ‘ທພ຺ພສ຺ເສ’ຈ຺ຈາທິ ສງ຺ຂ຺ຍານ຺ຕຣາປາທເນປີຕິ ປຸພ຺ພໍ ຍາ ວວຕ຺ຖິຕາ ສງ຺ຂ຺ຍາ, ຕໂຕ- ຎ຺ຎໍ ສງ຺ຂ຺ຍານ຺ຕຣໍ ຕສ຺ສາປາທນໍ ກຣຓໍ ສງ຺ຂ຺ຍນ຺ຕຣາປາທນໍ, ຕສ຺ມິມ຺ປີຕິ ອຕ຺ໂຖ.