໑໙. ຈຕ຺ເຖ

ສມຸຈ຺ຈີຕິ ປິຓ຺ຑີກຣຓໍ, ໂກ ໂສຕິ ອາຫ- ‘ສາຘນເມກ’ມິຈ຺ຈາທິ. ເອກໍ ສາຘນໍ ເອກໍ ກິຣິຍໍ ວາ ປຏິຈ຺ຈ ຈີຍມານຕາຕິ ສມ຺ພນ຺ໂຘ, ເກສນ຺ຕິ ອາຫ- ‘ກິຣິຍາສາຘນານ’ນ຺ຕິ, ເກນາຕິ ອາຫ- ‘ອຕ຺ຕຣູປເຠເທນາ’’ຕິ. ຕຕ຺ຖ ເທວທຕ຺ໂຕ ຠຸຎ຺ຊຕິ ຕິຏ຺ຐຕິ ປຈຕິຈາຕິ ສາຘນມ຺ປຏິຈ຺ຈ ກິຣິຍານໍ ອຕ຺ຕຣູປເຠເທນ ຈີຍມານຕາ ເວທິຕພ຺ພາ, ຘເວ ຈ ຂທິເຣ ຈ ປລາເສ ຈ ຉິນ຺ທາຕິ ກິຣິຍມ຺ປຏິຈ຺ຈ ອຕ຺ຕຣູປເຠເທນ ສາຘນານໍ ຈີຍມານຕາ ເວທິຕພ຺ພາ.

ໂສຕິ ສມຸຈ຺ຈໂຍ ຠວຕີຕິ ເສໂສ, ເກສນ຺ຕິ ອາຫ- ‘ຕຸລ຺ຍ ພລານ’ມິຈ຺ຈາທິ.

ຕຸລ຺ຍພລານນ຺ຕິ ອິມິນາ ວິສຸໍ ປຘານຠາເວນ ກິຣິຍາຠິສມ຺ພນ຺ຘາ ອຎ຺ຎມຎ຺ຎານເປກ຺ຂຕ຺ຕມາຫ.

ອນິຍຕກ຺ກມໂຍຄປຊ຺ຊານນ຺ຕິ ກໂມ ຈ ໂຍຄປຊ຺ຊຎ຺ຈ, ອນິຍຕໍ ກມໂຍຄປຊ຺ຊໍ ເຍສໍ ສທ຺ທານໍ ເຕສໍ, ຍເຖຕ຺ຍາທິນາ ຕຕ຺ໂຖທາຫຣຓໍ ທສ຺ເສຕິ, ເອຕ຺ຖາຍມຘິປ຺ປາໂຍ ‘‘ເອຕ຺ຖ ຄວາທີນໍ ວິສຸໍ ປຘານຠາເວນານຍນກິຣິຍາຠິສມ຺ພນ຺ຘາ ຕຸລ຺ຍພລຕາ ຄວາທີນໍ ວຸຕ຺ຕກ຺ກເມເນວ ນຍນາຠາວາ ອນິຍຕກ຺ກມຕາ ຄວາທີນໍ ຍຸຄປທິ ນຍນາຠາວາ ອນິຍຕ ໂຍຄປຊ຺ຊຕາ ຈ ໂຫຕິ, ຕຖາ ອຎ຺ຎໍ ຕາທິສມ຺ປີ’’ຕິ. ອນຸ ປຈ຺ຉາ ປຘານານຸໂຣເຘນ (ຈຍນໍ) ອນ຺ວາຈໂຍ, ຕໍ ພ຺ຍຎ຺ຊຍຕິ ‘ຍຕ຺ເຖ’ຈ຺ຈາທິ, ຕທນຸໂຣເຘນາຕິ ຕທນຸຄຸເຓນ, ອຸທາຫຣຕິ ‘ຍເຖ’ຈ຺ຈາທິ, ຠິກ຺ຂາຄມນເມຕ຺ຖ ປຘານມນ຺ຕຣງ຺ຄຕ຺ຕາ, ເນຕຣໍ ພຫິຣງ຺ຄຕ຺ຕາ, ຕໍ ກຣເຓ ຍທິ ຄາໂວປິ ປສ຺ສຕິ ຕາປ຺ຍານຍຕິ, ເອຕ຺ຖ ຕຸ ໂຄສ຺ສານຍນໍ ຠິກ຺ຂາຏນມເປກ຺ຂເຕ, ເນຕຣມິຕຣສ຺ສ… ວິນາປິ ເຕນ ຕທນຸຏ຺ຐານໂຕ. ອິຕຣສ຺ສ ອິຕເຣນ ໂຍ ໂຄ ອິຕເຣຕຣໂຍໂຄ, ໂສ ຈ ເອຕາທິໂສຕິ ອາຫ- ‘ອຎ຺ຎມຎ຺ເຎ’ຈ຺ຈາທິ.

ອວຍວປ຺ປຘາໂນ ຈາຕິ ສາຠາວິກາຠິຘານສາມຕ຺ຖິເຍນາປຸຖຸຠູໂຕ ຈ, ວຸຕ຺ຕິວເຍນ ສາຣິປຸຕ຺ຕສທ຺ໂທ ໂມຄ຺ຄລ຺ລານຕ຺ໂຖ ໂຫຕິ ໂມຄ຺ຄລ຺ລານສທ຺ໂທ ສາຣິປຸຕ຺ຕຕ຺ໂຖປີຕິ ອຎ຺ຎມຎ຺ຎຕ຺ເຖ ປຘານໂຕ ຍຸຄປທ຺ຍຘິກຣຓວຈເນ ສຕິ ຈຕ຺ຖ ສມາໂສຕິ ໂສ-ຍມຘິກຣຓ ສມຸທາໂຍ ອຸຠຍປທານຸຄຕອຸຠຍຕ຺ຖວເສນ ຈຕຸພ຺ພິໂຘປິ ຍຸຄປທິ ພຸທ຺ຘິຍາ ຄຍ຺ຫມາໂນ ກທາຈິ ອຸພ຺ຠູຕາວຍວເຠໂທ ເຕເນວ ສາຠາວິກາຠິຘານສາມຕ຺ຖິເຍເນຈ຺ເຈວມວຍວປ຺ປຘາໂນ ຈ, ນນຸ ຈ ຊນນມຣຓານີຕິ ວິຣຸທ຺ຘານໍ ກຖເມເກນາຠິຘານນ຺ຕິ ວຸຈ຺ຈເຕ- ສພ຺ໂພປິ ສທ຺ໂທ ປຍຸຊ຺ຊມາໂນ (ອິຕຣີ) ຕເຣນາວຘາຣຓໍ ວຕ຺ຕເຕ, ເຕນ ເອເກໂກ ສທ຺ໂທ ເອເກກສ຺ສຕ຺ຖສ຺ສ ວາຈໂກ, ຕຖາປິ ຍຖາ ສາຣິປຸຕ຺ຕໂມຄ຺ຄລ຺ລານາຕິ ເອຕ຺ຖ ພຫຸວຈນສ຺ສຎ຺ຎຖານຸປປຕ຺ຕິຍາ ຍຸຄປທ຺ຍຘິກຣຓວຈນຕາ ໂຫຕີ, ຕຖາຕ຺ຣາປິ ພຫຸວຈນສ຺ສຎ຺ຎຖານຸປປຕ຺ຕິລກ຺ຂເຓນ ສາມຕ຺ຖິເຍນ ເອເກນາປ຺ຍຠິຘານໍ ໂຫຕິ. ອິຕິ ເຫຕຸມ຺ຫິ, ຍໂຕ ເອວມວຍວປ຺ປຘາໂນ ຕໂຕຕິ ອຕ຺ໂຖ.

ພຫຸຕ຺ຕາຕິ ກິຎ຺ຈາປິ ວາກ຺ເຍ ເນສໍ [ວາກ຺ເຍເນເວສໍ (ໂປຕ຺ຖເກ)] ວິສຸໍ ພຫ຺ວຕ຺ຖຕາ, ນ ຫິ ສາຣິປຸຕ຺ຕມານຍາຕິ ວຸຕ຺ເຕ ໂມຄ຺ຄລ຺ລານສ຺ສາປິ ສມ຺ປຈ຺ຈໂຍ ຠວຕິ, ຕຖາປິ ຍໂຕ ວຸຕ຺ຕິວິສເຍ ສຫຠູຕານເມເວສໍ ວິສຸໍ ພຫ຺ວຕ຺ຖຕາ, ຕໂຕ ຕຕ຺ຖ ວຈນີຍສ຺ສ ອຕ຺ຖສ຺ສ ສງ຺ຂ຺ຍາເຕເທນ ພຫຸຕ຺ຕໍ. ສມາຫຣຓໍ ປິຓ຺ຑີກຣຓວເສນ ສໍຫຣຓໍ ສມາຫາໂຣ, ໂສ ເຈວໍ ເວທິຕພ຺ໂພຕິ ທສ຺ເສຕຸມາຫ ‘ອຎ຺ຎມຎ຺ເຎ’ຈ຺ຈາທິ.

ເອຕ຺ຖ ຈ ກິຎ຺ຈາປິ ອິຕຣີຕຣໂຍຄສ຺ສ ສມາຫາຣສ຺ສ ຈ ຠາວຣູປຕ຺ຕາ ອທພ຺ພຣູປຕາ, ຕຖາປີຕຣີຕຣໂຍເຄ ຕຸ ຍຖາ ຄຸຓວຈ ນານໍ ສຸກ຺ກໍ ວຕ຺ຖໍ ສຸກ຺ໂກ ກມ຺ພໂລ ສຸກ຺ກາ ຄາວີຕິ ນິສ຺ສຍເຠທໂຕ ລິງ຺ຄວຈນສິທ຺ຘິ, ຕຖາ ຕທ຺ຘມ຺ມານມຠິຘານໂຕ ນິສ຺ສຍໂຕ ລິງ຺ຄວຈນ ສິທ຺ຘິ ເວທິຕພ຺ພາ, ສໍຫຕິປ຺ປຘານຕ຺ຕາເຈກວຈນນ຺ຕິ ຍທາ ພຫຸນ຺ນໍ ສມຸທາໂຍ ຕິໂຣຫິຕາວຍວເຠໂທ ສໍຆາໂຕ ປກ຺ກມີຍເຕ, ຕທາ ສມາຫາໂຣຈ຺ເຈວ ສໍຫຕິປ຺ປຘານຕ຺ຕາ ເອກວຈນໍ ໂຫຕີຕິ ອຕ຺ໂຖ. ຕທນຸຏ຺ຐານໂຕຕິ ຕສ຺ສ ກຣຓໂຕ. ພ຺ຍຕິກໂຣ ມິສ຺ສຕາ, ພ຺ຍຕິກຣໍ ທສ຺ເສຕິ ປາຓິຈ຺ຈາທິນາ, ປຈ຺ເຈກໍ ປຣິສມຕ຺ຕິຍໍ ວາກ຺ຍພຫຸຕ຺ຕໍ ທສ຺ເສຕິ ‘ຕຕ຺ຖ ຫິຈ຺ຈາທິ.

ຈກ຺ຂຸຎ຺ຈ ໂສຕຎ຺ຈ, ມຸຂຎ຺ຈ ນາສິກາ ຈ, ຫນຸ ຈ ຄີວາ ຈ, ຉວິ ຈ ມໍສຎ຺ຈ ໂລຫິຕຎ຺ຈ, ນາມຎ຺ຈ ຣູປຎ຺ຈ, ຊຣາ ຈ ມຣຓຎ຺ຈາຕິ ວິຄ຺ຄຍ຺ຫ ສມາໂສ, ‘‘ສມາຫາເຣ ນປຸໍສກ’’ນ຺ຕິ (໓-໒໐) ສພ຺ພຕ຺ຖ ນປຸໍສກລິງ຺ຄໍ, ສ຺ຍາທິມ຺ຫິ ມຸຂ ນາສິກນ຺ຕິອາທີສຸ ‘‘ສ຺ຍາທີສຸ ຣສ຺ໂສ’’ຕິ (໓-໒໓) ຣສ຺ໂສ. ອລຠຕາ ໂຄມຸຂໍ ຑິຓ຺ຑິໂມ ເຠຣິວິເສສາ, ອາຬມ຺ພຣໍ ປຓໂວ, ມຸຣໂຊ ມຸທງ຺ໂຄ, ມທ຺ທໂວ ມຸທງ຺ໂຄ. ມທ຺ທວວາທນໍ ປຓວວາທນຎ຺ຈ ສິປ຺ປມສ຺ສ ມທ຺ທວິໂກ ປາຓວິໂກ, ສມ຺ມໍ ກໍສຕາຬໍ, ຕາຬໍ ຫຕ຺ຖຕາຬໍ, ອລສຕາ ຈ ອາຬມ຺ພໂຣ ຈ, ມຸຣໂຊ ຈ, ໂຄມຸໂຂ ຈ, ສງ຺ໂຂ ຈ ຑິຓ຺ຑິໂມ ຈ, ມທ຺ທວິໂກ ຈ, ປາຓວິໂກ ຈ, ຄີຕຎ຺ຈ ວາທິຕຎ຺ຈ, ສມ຺ມຎ຺ຈ ຕາຬຎ຺ຈາຕິ ວິຄ຺ຄໂຫ. ຍຸຄສ຺ສ ຫິຕາ ໂຍຄ຺ຄາ ໂຄຓາ, ເຕສມິທໍ ໂຍຄ຺ຄໍ ກສິກມ຺ມໍ, ຕສ຺ສ ອງ຺ຄໍ. ເຕນາຫ- ‘ກສິຠຓ຺ຑານ’ນ຺ຕິ, ຜາໂລກສໂກ, ປາຈນໍ ປໂຕໂທ, ຍຸໂຄ ຈ ນງ຺ຄລຎ຺ຈາຕິ ວິຄ຺ຄໂຫ. ປິຓ຺ຑມາຍຸຘວິເສໂສ, ອສິ ຈ ສຕ຺ຕິ ຈ ໂຕມຣຎ຺ຈ ປິຓ຺ຑຎ຺ຈາຕິ ວິຄ຺ຄໂຫ. ຈມ຺ມໍ ສຣວາຣຓຜລກໍ, ກລາໂປ ຕູຓີຣໍ, ປຫຣຓຎ຺ຈ ອາວຣຓຎ຺ຈາຕິ ວິຄ຺ຄໂຫ. ອຫິ ຈ ນກຸໂລ ຈ, ພີຬາໂຣ ຈ ມູສິໂກ ຈ, ກາໂກ ຈ ອຸລູໂກ ຈ, ນາໂຄ ຈ ສຸປຓ຺ໂຓຈາຕິ ວິຄ຺ຄໂຫ. ສງ຺ຂ຺ຍາ ຈ ປຣິມາຓຎ຺ຈ ສງ຺ຂ຺ຍາປຣິມາຓໍ, ຕຕ຺ຖ ປຣິມາຓສຎ຺ຎານໍ ຍຖາທີໂຆ ຈ ມຊ຺ຌິໂມ ຈ ທີຆມຊ຺ຌິມໍ. ເອກກຎ຺ຈ ທຸກຎ຺ຈາຕິ ວິຄ຺ຄໂຫ, ທຸກຕິກາທີສຸປິ ເອເສວນໂຍ.

ຂຸທ຺ທຊນ຺ຕຸ ສິຍາ- ນຏ຺ຐິ, ອຖວາ ຂຸທ຺ທໂກວ ໂຍ;

ສຕໍ ວາ ປສເຕ ເຍສໍ, ເກຈິ ອານກຸລາ ອປິ.

ກີໂຏ ຈ ປຕງ຺ໂຄ ຈ, ກຸນ຺ໂຖ ຈ ກິປິລ຺ລິໂກ ຈ, ຑໍໂສ ຈ ມກໂສ ຈ, ມກ຺ຂິກາ ຈ ກິປິລ຺ລິກາຈາຕິ ວິຄ຺ຄໂຫ. ປຈນຈຓ຺ຑາລາຕິ ໂອ ຣພ຺ຠິກາທີນໍ ຣຸຬ຺ຫີສຎ຺ຎາ. ອຸຣພ຺ເຠ ຫນ຺ຕ຺ວາ ຊີວຕີຕິ ໂອຣພ຺ຠິໂກ, ເອວໍ ເສເສສຸ. ສານໍ ສຸນຂໍ ປຈຕີຕິ ສປາໂກ, ເວນາ ຕຈ຺ຉກາ, ຣຖກາຣາ ຈມ຺ມກາຣາ. ສາຘາຣຓາ ສມານາ, ຈຣຓສທ຺ໂທ- ຍໍ ອິຘ ຄຍ຺ຫຕີຕິ ສມ຺ພນ຺ໂຘ, ຍຖາ ສກມຊ຺ຌຍນາຍ ຈຣີຍນ຺ຕິ ວຕານ຺ເຍເຕສູຕິ ຈຣຓານິ, ກຐາທິວາຌານ຺ຍຊ຺ຌຍນານິ ສາຂາສຎ຺ຎການິ. ຍສ຺ມາ ເອເຕຫິ ຈຣຕິ ອຣິຍສາວໂກ ຄຈ຺ຉຕິ ອມຕໍ ທິສໍ, ຕສ຺ມາ ຈຣຓານິ ສີລາທໂຍ ປຓ຺ຓຣສ ຘມ຺ມາ. ເຕນາຫ- ‘ກຐາທີຫີ’ຕິອາທິ, ກຐາທີຫີຕິ ປສິທ຺ຘິວເສນ ກມາຕິກ຺ກເມນາປິ ວຸຕ຺ຕໍ, ຕໂຕ ອາທິສທ຺ເທນ ອຕິສາທໂຍ ຄຍ຺ຫນ຺ຕິ. ອຕິເສນ ຠາຣທ຺ວາເຊນ ກເຐນ ວຸຕ຺ຕໍ ວິທນ຺ຕ຺ຍຘີຍນ຺ຕິ ວາຕິ ‘‘ອຎ຺ຎສ຺ມິ’’ຕິ (໔-໑໒໑) ໂຓ, ‘‘ໂລໂປ’’ຕິ (໔-໑໒໓) ໂລໂປ ອຕິສາ ຠາຣທ຺ວາຊາ ກຐາ. ກລາປິນາ ວຸຕ຺ຕໍ ວິທນ຺ຕ຺ຍຘີຍນ຺ຕິ ວາຕິ, ເຕເນວ ໂຓ, ກລາປາ, ກຐາ ອາທິ ເຍສໍ ເຕ ກຐາທໂຍ, ເຕຫິ ອຊ຺ເຌນວິເສເສ ຈ ປຸຣິເສ ຈ ອຸປຈາຣາຕິ ສມ຺ພນ຺ໂຘ.

ສີລາທໂຍຕິອາທິສທ຺ເທນ ອິນ຺ທ຺ຣິຍສໍວຣາທໂຍ ຄຍ຺ຫນ຺ຕິ. ສີລຎ຺ຈ ປຎ຺ຎາຓຎ຺ຈ, ສມໂຖ ຈ ວິປສ຺ສນາ ຈ ວິຊ຺ຊາ ຈ ຈຣຓຎ຺ຈາຕິ ວິຄ຺ຄໂຫ. ເອກໂຕ ອຊ຺ຌຍນເມເຕສູຕິ ເອກຊ຺ຌຍນານິ, ປກຐານິ ວຈນານິ ປາວຈນານິ ສທ຺ຘມ຺ໂມ, ເອກຊ຺ຌຍນານິ ຈ ຕານິ ປາວຈນານິ ຈ ເຕສໍ, ທີໂຆ ຈ ທີຆາຄໂມ ຈ ມຊ຺ຌິໂມ ຈ ມຊ຺ຌິມາຄໂມ ຈ, ເອກຸຕ຺ຕໂຣ ຈ ອງ຺ຄຸຕ຺ຕຣາຄໂມ ຈ ສໍຍຸຕ຺ຕາຄໂມ ຈ, ຂນ຺ຘໂກ ຈ ວິຠງ຺ໂຄຈາຕິ ວິຄ຺ຄໂຫ.

ເຕສນ຺ຕິ ອິມິນາ ລິງ຺ຄວິເສສານນ຺ຕິ ຉຏ຺ຐິຍນ຺ຕຕໍ ທີເປຕິ, ອິຕ຺ຖີ ຈ ປຸມາ ຈ, ທາສີ ຈ ທາໂສ ຈ, ຈີວຣຎ຺ຈ ປິຓ຺ຑປາໂຕ ຈ ເສນາສນຎ຺ຈ ຄິລານປຈ຺ຈໂຍ ເຠສຊ຺ຊປຣິກ຺ຂາໂຣ ຈ, ຕິຓຎ຺ຈ ກຏ຺ໂຐ ຈ ສາຂາ ຈ ປລາໂສ ຈາຕິ ວິຄ຺ຄໂຫ. ເຉໂກ ທກ຺ໂຂ, ປຸພ຺ພາ ຈ ປຣາຈາຕິອາທິນາ ວິຄ຺ຄໂຫ.

ປຸພ຺ພທກ຺ຂິຓນ຺ຕິອາທີສຸ ‘‘ພ຺ຍຎ຺ຊເນ ທີຆຣສ຺ສາ’’ຕິ (໑-໓໓) ຣສ຺ໂສ. ກາໂສ ຈ ກຸໂສ ຈ ອຸສິໂຣ ຈ ພີຣຓຎ຺ຈ, ມຸຎ຺ຊຎ຺ຈ ພພ຺ພຊຎ຺ຈາຕິ ວິຄ຺ຄໂຫ. ຂທິໂຣ ຈ ປລາໂສຈາຕິອາທິນາ ຈ, ຄໂຊ ຈ ຄວໂຊ ຈາຕິອາທິນາ ຈ, ຫຕ຺ຖີ ຈ ໂຄຈ ອສ຺ໂສ ຈ ວຬວາຈາຕິ ຈ, ຫໍໂສ ຈ ພລາວາ ຈາຕິອາທິນາ ຈ, ພໂກ ຈ ພລາກາຈາຕິ ຈ. ຫິຣຎ຺ຎຎ຺ຈ ສຸວຓ຺ໂຓ ຈ, ມຓິ ຈ ສງ຺ໂຂ ຈ ມຸຕ຺ຕາ ຈ ເວຬຸຣິໂຍ ຈ ຊາຕຣູປຎ຺ຈ ຣຊຕຎ຺ຈາຕິ ຈ, ສາລິ ຈ ຍວໂກຈາຕິອາທິນາ ຈ, ສາກຎ຺ຈ ສຸວຎ຺ຈາຕິອາທິນາຈ, ກາສິໂຍ ຈ ໂກສລາຈາຕິອາທິນາ ຈ ວິຄ຺ຄໂຫ, ຊນປທວາຈິນາ ຈ ພຫຸວຈນນ຺ຕາ.

ເອກວີສຕິຈ຺ຈາທິໂນ ເອກຎ຺ຈ ຕໍ ວີສຕິຈາຕິ ວິເສສນສມາໂສ ວາ ສິຍາ, ເອກຎ຺ຈ ວີສຕິ ຈ ເອກວີສຕີຕິ ຈຕ຺ຖສມາໂສ ວາ, ສມາຫາເຣ ນປຸໍສກຕ຺ຕນ຺ຕຸ ນ ປປ຺ໂປຕິ, ‘‘ນານຸສາສນີຍໍ ລິງ຺ຄໍ ໂສກນິສ຺ສຍຕ຺ຕາ ລິງ຺ຄສ຺ເສ’’ຕິ ໂລເກ ນປຸໍສກລິງ຺ຄສ຺ເສຫານຠິຘານໂຕ ນປຸໍສກລິງ຺ຄໍ ນ ຠວິສ຺ສຕີຕ຺ຍຘິປ຺ປາໂຍ, ສຠາປຣິສາຍາຕິ ຎາປກໂຕ ວາ ສມາຫາເຣ ນປຸໍສກລິງ຺ຄມຕ຺ຣ ພ຺ຍຠິຈຣຕີຕິ ທຏ຺ຐພ຺ພໍ.

ປຸພ຺ພປ຺ປໂຍໂຄ-ຠິມໂຕຕິ ອຸປສຊ຺ຊນສຎ຺ຎກສ຺ສ ສ຺ຍາທີຕິ ປຐມາຍ ນິທ຺ທິຏ຺ຐສ຺ສ ສມາເສ ປຸພ຺ພນິປາໂຕ ‘‘ອຸປສຊ຺ຊນໍ ປຸພ຺ພ’’ມິຈ຺ຈເນນ (໒-໒-໓໑) ອິຏ຺ໂຐ ກມສ຺ສ ປຘານຠາເວນ ວຕ຺ຕຸມິຏ຺ຐຕ຺ຕາຕິ ‘‘ສ຺ຍາທິສ຺ຍາທິເນກຕ຺ຖ’’ນ຺ຕິ (໓-໑) ເອຕ຺ຖ ສ຺ຍາທີຕິ ປຐມານິທ຺ທິຏ຺ຐສ຺ສາສງ຺ຂ຺ຍາທິໂນ ປຸພ຺ພມວຏ຺ຐານໂຕ ສ຺ຍາທິເນຕິ ຕຕິຍານິທ຺ທິຏ຺ຐສ຺ສ ປຈ຺ຉາວຏ຺ຐານໂຕ ‘‘ສ຺ຍາທິສ຺ຍາທິນາ’’ຕິ ສຸຕ຺ເຕ ປຏິປາຏິຍາ ປຘານຠາເວນ ວຕ຺ຕຸມິຏ຺ຐຕ຺ຕາ.

ປຣປ຺ປໂຍໂຄ-ຠິມໂຕຕິ ເຫຏ຺ຐາ ວຸຕ຺ຕສຸຕ຺ເຕນ ປຸພ຺ພນິປາເຕ ປຕ຺ເຕ ‘‘ຣາຊທນ຺ຕາທີສຸ ປຣ’’ນ຺ຕີມິນາ (໒-໒-໓໐) ປຣນິປາໂຕ-ຠິມໂຕ, ວຈເນນາຕິ- ‘‘ພຫຸລ’’ນ຺ຕິ ວຈເນນ, ປຸພ຺ພກາ ລຍຸຕ຺ຕສ຺ສ ປຣປ຺ປໂຍໂຄ-ຠິມໂຕຕິ ຣາຊທນ຺ຕາທິປາຐໂຕ ເອວາ-ຠິມໂຕ.

ກມມ຺ປຈ຺ຈນາທຣາຕິ ອິມິນາ ປຘານຠາເວນາ-ກ຺ກມສ຺ສ ວຕ຺ຕຸມິຏ຺ຐຕ຺ຕມາຫ. ສໂຣ ອາທິ ຍສ຺ສ ຕໍ ສຣາທິ, ສງ຺ໂຂ ຈ ທຸນ຺ທຸຠິ ຈ ວີຓາ ຈ, ອຸທຸກ຺ຂລຎ຺ຈ ມຸສໂລ ຈ, ຘນປຕິ ຈ ຣາໂມ ຈ ເກສໂວຈາຕິ ວິຄ຺ຄໂຫ. ຊໍທໍສທ຺ທາ ຊາຍາສທ຺ທສມານຕ຺ຖາ ອສງ຺ຂ຺ຍາ-ຊຎ຺ຈ ປຕິ ຈ, ທຎ຺ຈ ປຕິຈາຕິ ວິຄ຺ຄໂຫ, ອວນ຺ຕໂຍ ຈ ອສ຺ສກາຈ, ອຄ຺ຄິ ຈ ອິນ຺ໂທຈາຕິ ວິຄ຺ຄໂຫ, ຕໍນິວາສິມ຺ຫິ ຄຫິເຕ ອວນ຺ຕິ ຈ ອສ຺ສໂກຈາຕິ ເອກຕ຺ເຕນປິ ວິຄ຺ຄໂຫ ວຕ຺ຕຕິ. ທ຺ວນ຺ທສມາໂສ- ຍໍ ທ຺ວນ຺ທສທິສຕ຺ຕາ ທ຺ວນ຺ໂທ, ທ຺ເວ ຈ ທ຺ເວ ຈ ປທານິ ທ຺ວນ຺ທານີຕິ ຫິ ອຸຠຍຕ຺ຖປ຺ປຘາໂນ- ຍໍ ທ຺ວນ຺ທສທ຺ໂທ.