໓໕. ຉຏ຺ຐີ

ສາມິສ຺ສຣາທິໂຍເຄ ຉຏ຺ຐີສຕ຺ຕມິໂຍ ຍຖາ ສິຍຸນ຺ຕິ ‘‘ສາມິສ຺ສຣາຘິປຕິທາຍາທສກ຺ຂິປຕິຠູປສຸເຕຫິ ຈ ‘‘ອິຕິ (໒-໓-໓໙) ອາຣທ຺ຘໍ ປເຣຫິ, ຕທາຫ-‘ສາມິ’ຈ຺ຈາທິ, ອຕ຺ຣ ຈ ຊິນິນ຺ທພຸທ຺ຘິນາ ‘‘ສາມ຺ຍາທີນໍ ເຠເທໂນ ປາທານໍ ປຣິຍາຍນ຺ຕຣນິວຕ຺ຍຕ຺ຖມິຫ ມາ ໂຫຕຸ ຄາມສ຺ສ ຣາຊາ’’ຕິ ວຸຕ຺ຕໍ ວາກ຺ຍມຸປນ຺ຍສ຺ຍ ຫສ຺ສາປ຺ຍ ຍຸຕ຺ຕຕ຺ຕມຸປທສ຺ສຍມາຫ-‘ສາມິສ຺ສເຣ’ຈ຺ຈາທິ, ເກນ ນິວາຣີຍເຕ, ນ ເກນາປີຕ຺ຍຕ຺ໂຖ, ວິສຍວຈນິຈ຺ຉາຍໍ ‘ຄາເມ ຣາຊາ’ຕ຺ຍປິ ຠວິຕພ຺ພມິຕ຺ຍເນນາຫ, ‘‘ອາຍຸຕ຺ຕກຸສເລຫ຺ຍາເສວາຍ’’ມີຕິ (໒-໓-໔໐) ອາຣທ຺ຘໍ, ຕທາຫ-‘ອາຍຸຕ຺ເຕ’ຈ຺ຈາທິ, ອາສວາ ຕປ຺ປຣຕາ, ພ຺ຍາວໂຏ ນິຍຸຕ຺ໂຕ, ຕຕ຺ເຖທໍ ສິຍາ ‘‘ອາເສວາຍນ຺ຕິ ວກ຺ຂາມີ ຕ຺ຍວສ຺ສໍ ວຈນມິທມາຣພ຺ຠນີຍມຎ຺ຎຖາ ອີສໍຍຸຕ຺ເຕປິ ‘ອາຍຸຕ຺ໂຕ ໂຄ ສກຏສ຺ສາ’ຕິ ປສຊ຺ຊຕີ’’ຕ຺ຍາສງ຺ກິຍ ນຕ຺ເຖເວຕມ຺ປິ ປໂຍຊນນ຺ຕິ ທສ຺ເສຕຸມາຫ-‘ວິນາປິ’ຈ຺ຈາທິ, ‘‘ສາມິສ຺ສຣາ’’ຕ຺ຍທິກໍ ກຈ຺ຈາຍນສຸຕ຺ຕໍ, ເຕເນວາຕິ ກຈ຺ຈາຍນສຸຕ຺ເຕ ປສູຕສທ຺ທານນ຺ຕຣໍ ກຸສລສທ຺ທນິທ຺ເທເສເນວ, ອິຘາຕິ ໂມຄ຺ຄລ຺ລານວຸຕ຺ຕິຍໍ. ກຈ຺ຈາຍເນນ ‘‘ກມ຺ມກຣຓ ນິມິຕ຺ຕຕ຺ເຖສຸ ສຕ຺ຕມີ’’ (໒-໖-໔໐) ‘‘ປຎ຺ຈມ຺ຍຕ຺ເຖ ຈ’’ (໒-໖-໔໑) ອິຕິ ຈ ສຸຕ຺ຕິຕໍ, ເຕນາຫ-‘ກມ຺ເມ’ຈ຺ຈາທິ, ຄຫຓສ຺ສ ພາຫາ ວິສໂຍຕິ ສມ຺ພນ຺ໂຘ, ກຈ຺ຈາຍນານໍ‘ຠິກ຺ຂູສູ’ຕິອາທີນິ ກມ຺ມຕ຺ເຖ ອຸທາຫຣຓານິ, ຫຕ຺ເຖສູຕິອາທີນິ ກຣຓຕ຺ເຖ, ກທລີສູຕິ ປຎ຺ຈມ຺ຍຕ຺ເຖ. ‘‘ມຓ຺ຑິຕຸສ຺ສຸກ຺ເກສຸ ຕຕິຍາ ເຈ’’ຕິ (໒-໖-໔໕) ກຈ຺ຈາຍນສຸຕ຺ຕໍ, ຕທາຫ ‘ປສນ຺ນຕ຺ເຖ’ຈ຺ຈາທິ, ປສນ຺ນຕ຺ເຖຕິ ມຓ຺ຑິຕຕ຺ເຖ, ອຸສ຺ສຸກ຺ກຕ຺ເຖຕິ ອຸສ຺ສາຫຕ຺ເຖ.