໔. ມິຕ຺ຕກຓ຺ໂຑ

໗໙. ຫິຕກາໂຣ ປໂຣ ພນ຺ຘຸ,

ພນ຺ຘູປິ ອຫິໂຕ ປໂຣ;

ອ ຫິໂຕ ເທຫໂຊ ພ຺ຍາຘິ,

ຫິຕໍ ອຣຎ຺ຎໂມສຘໍ.

໘໐. ປໂຣກ຺ເຂ ຄຸຓ-ຫນ຺ຕາຣໍ,

ປຈ຺ຈກ຺ເຂ ປິຍວາທິນໍ;

ວຊ຺ເຊຍ຺ຍ ຕາທິສໍ ມິຕ຺ຕໍ,

ວິສກຸມ຺ເຠ ຍຖາ ມຘຸໍ.

໘໑. ຘນຫີເນ ຈເຊ ມິຕ຺ໂຕ,

ປຸຕ຺ຕທາຣາ ສໂຫທຣາ;

ຘນວນ຺ຕໍວ ເສວນ຺ຕິ,

ຘນໍ ໂລເກ ມຫາ ສຂາ.

໘໒. ຊາເນຍ຺ຍ ເປເສນ ຠຈ຺ຈໍ,

ພນ຺ຘຸໍ ວາປິ ຠຍາຄເຕ;

ອປ຺ປກາສຸ ຕຖາ ມິຕ຺ຕໍ,

ທາຣຎ຺ຈ ວິຠວກ຺ຂເຍ.

໘໓. ໂສ ພນ຺ຘຸ ໂຍ ຫິເຕ ຍຸຕ຺ໂຕ,

ປິຕໂຣ ໂຫນ຺ຕິ ໂປສໂກ;

ຕໍ ມິຕ຺ຕໍ ຍຕ຺ຖ ວິສ຺ສາໂສ,

ສາ ຠຣິຍາ ຈ ຍສ຺ສ ນິພ຺ພູຕິ.

໘໔. ນ ວິສ຺ສເສ ອ-ວິສ຺ສຕ຺ຕໍ,

ມິຕ຺ຕຎ຺ຈາປິ ນ ວິສ຺ສເສ;

ກທາຈິ ກຸປິໂຕ ມິໂຕ,

ສພ຺ພໍ ໂທສໍ ປກາສເຍ.

໘໕. ສກິໍ ທຸຏ຺ຐຎ຺ຈ ໂຍ ມິຕ຺ຕໍ,

ປຸນ ສນ຺ຘິຕຸມິຈ຺ຉຕິ;

ໂສ ມຈ຺ຈຸໍ ອຸປຄຓ຺ຫາຕິ,

ຄພ຺ຠມສ຺ສຕຣີ ຍຖາ.

໘໖. ວເຫ ອ-ມິຕ຺ຕໍ ຂນ຺ເຘນ,

ຍາວ ກາໂລ ອນາຄໂຕ;

ຕເມວ ອາຄເຕ ກາເລ,

ເສເລ ຠິນ຺ເທ ຆຏໍ ອິວ.

໘໗. ອິຓເສໂສ ອຄ຺ຄິເສໂສ,

ສຕ຺ຣຸເສໂສ ຕເຖວ ຈ;

ປຸນປ຺ປຸນໍ ວິວຑ຺ຒນ຺ຕິ,

ຕສ຺ມາ ເສສໍ ນ ກາຣເຍ.

໘໘. ປທຸມໍວ ມຸຂໍ ຍສ຺ສ,

ວາຈາ ຈນ຺ທນ ສີຕລາ;

ຕາທິສໍ ໂນປເສເວຍ຺ຍ,

ຫທເຍຕຸ ຫລາຫລໍ.

໘໙. ນ ເສເວ ຜຣຸສໍ ສາມິໍ,

ນຈ ເສເວຍ຺ຍ ມຈ຺ຉຣິໍ;

ຕໂຕ ອປຄ຺ຄຓ຺ຫໍ ສາມິໍ,

ເນວ ນິຄ຺ຄຫິຕໍ ຕໂຕ.

໙໐. ສິງ຺ຄີ ປຎ຺ຎາສ ຫຕ຺ເຖນ,

ວຊ຺ເຊ ສເຕນ ວາຊິນໍ;

ຫຕ຺ຖິໍ ທນ຺ຕິໍ ສຫສ຺ເສນ,

ເທສ ຈາເຄນ ທຸຊ຺ຊນໍ.

໙໑. ກຸເທສຎ຺ຈ ກຸມິຕ຺ຕຎ຺ຈ,

ກຸກຸລຎ຺ຈ ກຸພນ຺ຘວໍ;

ກຸທາຣຎ຺ຈ ກຸທາສຎ຺ຈ,

ທູຣໂຕ ປຣິວຊ຺ຊເຍ.

໙໒. ໂຣຄາຕຸເຣ ຈ ທຸພ຺ຠິກ຺ເຂ,

ພ຺ຍສເນ ສຕ຺ຕຸ ວິຄ຺ຄເຫ;

ຣາຊທ຺ວາເຣ ສຸສາເນ ຈ,

ເຍ ຕິຏ຺ຐນ຺ຕິ ສຸມິຕ຺ຕກາ.

໙໓. ສີຕວາໂຈ ພຫຸມິຕ຺ໂຕ,

ຜຣຸໂສ ອປ຺ປມິຕ຺ຕໂກ;

ອຸປມໍ ເອຕ຺ຖ ຎາຕພ຺ພາ,

ຈນ຺ທ-ສູຣິຍ-ຣາຊູນໍ.

ມິຕ຺ຕກຓ຺ໂຑ ນິຏ຺ຐິໂຕ.