໕. ອິຕ຺ຖິກຓ຺ໂຑ

໙໔. ໂກກິລານໍ ສທ຺ທໍ ຣູປໍ,

ນາຣີຣູປໍ ປຕິພ຺ພຕາ;

ວິຊ຺ຊາ ຣູປໍ ອ-ຣູປານໍ,

ຂມາ ຣູປໍ ຕປສ຺ສິນໍ.

໙໕. ອິຕ຺ຖີນຎ຺ຈ ຘນໍ ຣູປໍ,

ປຸຣິສານໍ ວິຊ຺ຊາ ຘນໍ;

ຠິກ຺ຂູນຎ຺ຈ ຘນໍ ສີລໍ,

ຣາຊານຎ຺ຈ ຘນໍ ພລໍ.

໙໖. ຕປສ຺ສິໂນ ກິສາ ໂສຠາ,

ຖູລາ ໂສຠາ ຈຕຸປ຺ປທາ;

ປຸຣິສາ ວິຊ຺ຊວາ ໂສຠາ,

ອິຕ຺ຖີ ໂສຠາສ ສາມິກາ.

໙໗. ປຎ຺ຈ ຣຕ຺ຍາ ສຸຄນ຺ຘພ຺ພາ,

ສຕ຺ຕ ຣຕ຺ຍາ ຘນຸຄ຺ຄຫາ;

ເອກ ມາສາ ສຸຠຣິຍາ,

ອຑ຺ຒ ມາສາ ສິສ຺ສາ ມລາ.

໙໘. ຫິໍ ຣມຕິ ປງ,

ຫງ ຣມຕິ ໂປກ.

ຖີ ຣມຕິ ປຸ,

ຂຸ ຣມຕິ ຘໍ.

໙໙. ຊິຓ຺ຓມນ຺ນໍ ປສໍເສຍ຺ຍ,

ທາຣຎ຺ຈ ຄຕໂຍພ຺ພນໍ;

ຣຓາ ປຸນາຄຕາ ສູຣໍ,

ສສ຺ສຎ຺ຈ ເຄຫມາຄຕໍ.

໑໐໐. ທ຺ວຕ຺ຕິ-ປຕິກາ ນາຣີ ຈ,

ຠິກ຺ຂຸ ທ຺ວຕ຺ຕິ-ວິຫາຣິໂກ;

ທ຺ວຕ຺ຕິ-ປາສ-ມຸຕ຺ໂຕ ປກ຺ຂີ,

ກຕ-ມາຍາ ພຫູຖຣໍ.

໑໐໑. ທຸຊ຺ຊນໍ ປຫາຣາທເມ,

ມິຕ຺ຕໍ ທເມ ອ-ຠາຓິກາ;

ອິຕ຺ຖິຎ຺ຈ ພ຺ຍສນາ ທເມ,

ຣາຄິນໍ ອປ຺ປ ໂຠຊນາ.

໑໐໒. ນ ຣຕ຺ຕິ ວິນາ ຈນ຺ທິມາ,

ວີຈິໍ ວິນາ ຈ ອຓ຺ຓໂວ;

ຫໍສໍ ວິນາ ໂປກ຺ຂຣຓີ,

ປຕິໍ ກຎ຺ຎາຈ ໂສຠເຕ.

໑໐໓. ປຕິນາ ຊນິໂຕ ໂຠໂຄ,

ອິຕ຺ຖິຍາວ ສໍໂຄປ຺ປິໂຕ;

ປຸຣິໂສວ ຫິ ປຘາໂນ,

ອິຕ຺ຖີ ສຸຕ຺ຕໍວ ສູຈິຍາ.

໑໐໔. ສພ຺ພານທີ ວງ຺ກນທີ,

ສພ຺ເພ ກຏ຺ຐມຍາ ວນາ;

ສພ຺ພິຕ຺ຖິໂຍ ກເຣ ປາປໍ,

ລຠມາເນ ນິວາຕເກ.

໑໐໕. ວິວາທສີລິໍ ອຸສູຍຠາຓິນິໍ,

ສມ຺ປສ຺ສຕຓ຺ຫິໍ ພຫຸປາກຠຸຕ຺ຕິນິໍ;

ອຄ຺ຄນ຺ຕຠຸຕ຺ຕິໍ ປຣເຄຫວາສິນິໍ,

ນາຣິໍ ຈເຊ ປຸຕ຺ຕສຕມ຺ປິ ປູມາ.

໑໐໖. ຠຸຕ຺ເຕສຸ ມຓ຺ເຑສຸ ຊນີວ ກນ຺ຕິນີ,

ຄຸຍ຺ເຫຈ ຐາເນ ຠຄິນີວ ຫິຣິຓີ;

ກມ຺ເມສຸ ປຕ຺ເຕສຸ ກໂຣຕິ ທາສີວ,

ຠເຍສຸ ມນ຺ຕີ ສຍເນສຸ ຣາມເຍ;

ຣູປີສຸ ສິກ຺ຂີ ກຸປເນສຸ ຂນ຺ຕິນີ,

ສາ ນາຣີ ເສຏ຺ຐາຕິ ວທນ຺ຕິ ປຓ຺ຑິຕາ;

ກາຍສ຺ສ ເຠທາຈ ທິເວຠເວຍ຺ຍ ສາ.

໑໐໗. ສາມາ ມິຄກ຺ຂີ ຕນຸມຊ຺ຌຄຕ຺ຕາ,

ສູຣູ ສຸເກສີ ສມທນ຺ຕປນ຺ຕີ;

ຄມ຺ຠີຣນາຠີ ຍຸວຕີ ສຸສີລີ,

ຫີເນ ກຸເລ ຊາຕາປິ ວິວາຫ຺ຍາ.

໑໐໘. ສຣທໍຣຕຸ-ກາລານໍ,

ຠຣິຍານໍ ຣູປວຕີ;

ເຊຏ຺ໂຐ ປຘານໍ ປຸຕ຺ຕານໍ,

ທິສານໍ ອຸຕ຺ຕຣາທິສາ.

໑໐໙. ຍາ ອິຈ຺ເຉ ປຸຣິໂສ ໂຫຕຸໍ,

ຊາຕິ ຊາຕິ ປຸນປ຺ປຸນໍ;

ສາມິກໍ ອປຈາເຍຍ຺ຍ,

ອິນ຺ທໍວ ປາຣິຈາຣິກາ.

໑໑໐. ໂຍ ອິຈ຺ເຉ ປຸຣິໂສ ໂຫຕຸໍ,

ຊາຕິ ຊາຕິ ປຸນປ຺ປຸນໍ;

ປຣທານໍ ວິວຊ຺ເຊຍ຺ຍ,

ໂຘຕປາໂທວ ກທ຺ທມໍ.

໑໑໑. ອຕິກ຺ກນ຺ຕ ວໂຍ ໂປໂສ,

ອາເນຕິ ຕິມ຺ພຣຸຕ຺ຕນິໍ;

ຕສ຺ສາ ອິສ຺ສາ ອສທ຺ຘາຕິ,

ຕໍ ປຣາຠວໂຕ ມຸຂໍ.

ອິຕ຺ຖິກຓ຺ໂຑ ນິຏ຺ຐິໂຕ.