ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ໂລກນີຕິ

໑. ປຓ຺ຑິຕກຓ຺ໂຑ

໑. ໂລກນີຕິໍ ປວກ຺ຂາມິ,

ນານາສຕ຺ຖສມຸທ຺ຘຏໍ;

ມາຄເຘເນວ ສງ຺ເຂປໍ,

ວນ຺ທິຕ຺ວາ ຣຕນຕ຺ຖຍໍ.

໒. ນີຕິໂລເກ ປຸຣິສສ຺ສ ສາໂຣ,

ມາຕາ ປິຕາ ອາຈຣິໂຍຈ ມິຕ຺ໂຕ;

ຕສ຺ມາ ຫິ ນີຕິໍ ປຸຣິໂສ ວິຊຎ຺ຎາ,

ຎາຓີ ມຫາ ໂຫຕິ ພຫຸສ຺ສຸໂຕຈ.

໓. ອລສສ຺ສ ກຸໂຕ ສິປ຺ປໍ,

ອສິປ຺ປສ຺ສ ກຸໂຕ ຘນໍ;

ອຘນສ຺ສ ກຸໂຕ ມິຕ຺ຕໍ,

ອມິຕ຺ຕສ຺ສ ກຸໂຕ ສຸຂໍ;

ອສຸຂສ຺ສ ກຸໂຕ ປຸຎ຺ຎໍ,

ອປຸຎ຺ຎສ຺ສ ກຸໂຕ ວຣໍ.

໔. ສິປ຺ປາ ສມໍ ຘນໍ ນຕ຺ຖິ,

ສິປ຺ປໍ ໂຈຣາ ນຄຓ຺ຫເຣ;

ອິຘ ໂລເກ ສິປ຺ປໍ ມິຕ຺ຕໍ,

ປຣໂລເກ ສຸຂາວຫໍ.

໕. ອປ຺ປກໍ ນາຕິມຎ຺ເຎຍ຺ຍ,

ຈິຕ຺ເຕ ສຸຕໍ ນິຘາປເຍ;

ວມ຺ມິໂກທກພິນ຺ທູວ,

ຈິເຣນ ປຣິປູຣຕິ.

໖. ຂຸທ຺ໂທຕິ ນາຕິມຎ຺ເຎຍ຺ຍ,

ວິຊ຺ຊໍ ວາ ສິປ຺ປເມວ ວາ;

ເອກມ຺ປິ ປຣິໂຍທາຕໍ,

ຊີວິຕກປ຺ປກາຣຓໍ.

໗. ເສເລ ເສເລ ນ ມາຓິກໍ,

ຄເຊ ຄເຊ ນ ມຸຕ຺ຕິກໍ;

ວເນ ວເນ ນ ຈນ຺ທນໍ,

ຐາເນ ຐາເນ ນ ປຓ຺ຑິຕໍ.

໘. ປຓ຺ຑິໂຕ ສຸຕສມ຺ປນ຺ໂນ,

ຍຕ຺ຖ ອຕ຺ຖີຕິ ເຈ ສຸໂຕ;

ມຫຸສ຺ສາເຫນ ຕໍ ຐານໍ,

ຄນ຺ຕພ຺ພໍວ ສຸເຕສິນາ.

໙. ສິເນ ສິປ຺ປໍ ສິເນ ຘນໍ,

ສິເນ ປພ຺ພຕມາຣຸຫໍ;

ສິເນ ກາມສ຺ສ ໂກຘສ຺ສ,

ອິເມ ປຎ຺ຈ ສິເນ ສິເນ.

໑໐. ສຸຕິ ສມ຺ມຸຕິ ສງ຺ຂ຺ຍາຈ,

ໂຍຄາ ນີຕິ ວິເສສກາ;

ຄນ຺ຘພ຺ພາ ຄຓິກາ ເຈວ,

ຘນຸ ເພທາ ຈ ປູຣຓາ.

໑໑. ຕິກິຈ຺ຉາ ອິຕິຫາສາ ຈ,

ໂຊຕິ ມາຍາ ຈ ຉນ຺ທຕິ;

ເກຕຸ ມນ຺ຕາ ຈ ສທ຺ທາ ຈ,

ສິປ຺ປາຏ຺ຐາຣສກາ ອິເມ.

໑໒. ອປຸຏ຺ໂຐ ປຓ຺ຑິໂຕ ເຠຣີ,

ປຊ຺ຊຸນ຺ໂນ ເມ ໂຫຕິ ປຸຈ຺ຉິໂຕ;

ພາໂລ ປຸຏ຺ໂຐ ອປຸຏ຺ໂຐປິ,

ພຫຸມ຺ປິ ຠຓເຕ ສທາ.

໑໓. ໂປຕ຺ຖເກສຸ ຈ ຍໍ ສິປ຺ປໍ,

ປຣຫຕ຺ເຖສຸ ຍໍ ຘນໍ;

ຍຖາກິຈ຺ເຈ ສມຸປ຺ປນ຺ເນ,

ນ ຕໍ ສິປ຺ປໍ ນ ຕໍ ຘນໍ.

໑໔. ຊລປ຺ປມາຓໍ ກຸມຸທ຺ທນາລໍ,

ກຸລປ຺ປມາຓໍ ວິນໂຍ ປມາຓໍ;

ພ຺ຍຕ຺ຕິປ຺ປມາຓໍ ກຖີຕວາກ຺ຍໍ,

ປຖວິຍາ ປມາຓໍ ຕິຓ ມິລາຕໍ.

໑໕. ອປ຺ປສ຺ສຸໂຕ ສຸຕໍ ອປ຺ປໍ,

ພຫຸໍ ມຎ຺ຎຕິ ມານວາ;

ສິນ຺ຘູທກໍ ອປສ຺ສນ຺ໂຕ,

ກູເປ ໂຕຍໍວ ມຓ຺ຑຸໂກ.

໑໖. ປຖມໍ ປຣາຊເຍ ສິປ຺ປໍ,

ທຸຕິຍໍ ປຣາຊເຍ ຘນໍ;

ຕຕິຍໍ ປຣາຊເຍ ຘມ຺ມໍ,

ຈຕຸຕ຺ຖໍ ກິໍ ກຣິສ຺ສຕິ.

໑໗. ພ຺ຍຕ຺ຕ ປຸຕ຺ຣ ກິມລໂສ,

ອພ຺ຍຕ຺ໂຕ ຠາຣຫາຣໂກ;

ພ຺ຍຕ຺ຕໂກ ປູຊິໂຕ ໂລເກ,

ພ຺ຍຕ຺ຕ ປຸຕ຺ຣ ທິເນ ທິເນ.

໑໘. ມາຕາ ເວຣີ ປິຕາ ສຕ຺ຣຸ,

ເກນ ພາເລ ນ ສິກ຺ຂິຕາ;

ສຠາມຊ຺ເຌ ນ ໂສຠນ຺ຕິ,

ຫໍສມຊ຺ເຌ ພໂກຍຖາ.

໑໙. ກຓ຺ຏກໍ ຄິຣິ ໂກ ຕິກ຺ຂຕິ,

ໂກ ອຎ຺ຊນໍ ມິຄກ຺ຂິກໍ;

ອຸປ຺ປຖໍ ປລ຺ລເລ ໂກ ສຸຄນ຺ຘໍ,

ກຸລ-ປຸຕ຺ຕ-ຣູໂປ ໂກ ປວຕ຺ຕຕິ;

ສາມໍ-ຠາໂວ.

໒໐. ນ ຣສໍ ອໂກຕມ຺ພຸລໍ,

ອຘນສ຺ສ, ລງ຺ກຕມ຺ປິ;

ອໂລນກນ຺ຕຸ ພ຺ຍຎ຺ຊນໍ,

ພ຺ຍາກຣຓໍ ອສິປ຺ປສ຺ສ.

໒໑. ສຸສ຺ສຸສາ ສຸຕສມ຺ປນ຺ໂນ,

ສຸຕາປຎ຺ຎາຍ ປວຑ຺ຒຕິ;

ປຎ຺ຎາຍ ອຕ຺ຖໍ ຊານາຕິ,

ຎາໂຕ ອຕ຺ໂຖ ສຸຂາວໂຫ.

໒໒. ໂຠຊນໍ ເມຖຸນໍ ນິທ຺ທາ,

ໂຄເຓ ໂປເສປິ ວິຊ຺ຊຕິ;

ວິຊ຺ຊາ ວິເສໂສ ໂປສສ຺ສ,

ຕໍ ຫີໂນ ໂຄສໂມ ຠເວ.

໒໓. ນຕ຺ຖິ ວິຊ຺ຊາສມໍມິຕ຺ຕໍ,

ນຈ ພ຺ຍາຘິສໂມ ຣິປຸ;

ນຈ ອຕ຺ຕສມໍ ເປມໍ,

ນຈ ກມ຺ມສມໍ ພລໍ.

໒໔. ຫໍໂສ ມຊ຺ເຌ ນ ກາການໍ,

ສີໂຫ ຄຸນ຺ນໍ ນ ໂສຠເຕ;

ຄທ຺ຣຠມຊ຺ເຌ ຕຸຣງ຺ໂຄ,

ພາລມຊ຺ເຌ ຈ ປຓ຺ຑິໂຕ.

໒໕. ຍາວຊີວມ຺ປິ ເຈ ພາໂລ,

ປຓ຺ຑິຕໍ ປຍິຣຸປາສຕິ;

ນ ໂສ ຘມ຺ມໍ ວິຊານາຕິ,

ທພ຺ພິ ສູປຣສໍ ຍຖາ.

໒໖. ມຸຫຸຕ຺ຕມປິ ເຈ ວິຎ຺ຎູ,

ປຓ຺ຑິຕໍ ປຍິຣຸປາສຕິ;

ຂິປ຺ປໍ ຘມ຺ມໍ ວິຊານາຕິ,

ຊິວ຺ຫາ ສູປຣສໍ ຍຖາ.

໒໗. ວິນາ ສຕ຺ຖໍ ນ ຄຈ຺ເຉຍ຺ຍ,

ສູໂຣ ສງ຺ຄາມຠູມິຍໍ;

ປຓ຺ຑິຕ຺ວາທ຺ຘຄູ ວາຓິໂຊ,

ວິເທສຄມໂນ ຕຖາ.

໒໘. ຘນນາສໍ ມໂນຕາປໍ,

ຆເຣ ທຸຈ຺ຈຣິຕານິ ຈ;

ວຎ຺ຈນຎ຺ຈ ອວມານໍ,

ປຓ຺ຑິໂຕ ນ ປກາສເຍ.

໒໙. ປຕ຺ຕານຸຣູປກໍ ວາກ຺ຍໍ,

ສຠາວຣູປກໍ ປິຍໍ;

ອຕ຺ຕານຸຣູປກໍ ໂກຘໍ,

ໂຍ ຊານາຕິ ສ ປຓ຺ຑິໂຕ.

໓໐. ອ-ຘນສ຺ສ ຣສໍ ຂາທາ,

ອ-ພລສ຺ສ ຫຖາ ນຣາ;

ອ-ປຎ຺ຎສ຺ສ ວາກ຺ຍ-ກຖາ,

ອຸມ຺ມຕ຺ຕກ-ສມາ ອິເມ.

໓໑. ອນວ຺ຫາຍໍ ຄມຍນ຺ໂຕ,

ອ-ປຸຈ຺ຉາ ພຫຸ-ຠາສໂກ;

ອຕ຺ຕ-ຄຸຓໍ ປກາເສນ຺ໂຕ,

ຕິ-ວິຘໍ ຫີນ-ລກ຺ຂຓໍ.

໓໒. ອປ຺ປ-ຣູໂປ ພຫຸໍ ຠາໂສ,

ອປ຺ປ-ປຎ຺ໂຎ ປກາສິໂຕ;

ອປ຺ປ-ປູໂຣ ຆໂຏ ໂຂເຠ,

ອປ຺ປ-ຂີຣາ ຄາວີ ຈເຖ.

໓໓. ມຓ຺ຑູເກປິ ອຸກ຺ເຣ ສີເຫ,

ກາກຄ຺ຄເຫ ປິເຍ ປິເຍ;

ອ-ປຓ຺ຑີປິ ປຓ຺ຑີ ຫຸຕ຺ວາ,

ຘີຣາ ປຸຈ຺ເຉ ວເຍ ວເຍ.

໓໔. ມຓ຺ຑູເກປິ ອຸກ຺ເຣ ສີເຫ,

ສູກເຣປິ ອຸເຫ ທີເປ;

ພິຬາເຣ ສທິເສ ພ຺ຍຄ຺ເຆ,

ສພ຺ພ ຘີເຣ ສິປ຺ປ-ສເມ.

໓໕. ນ ຕິຕ຺ຕິ ຣາຊາ ຘນມ຺ຫິ,

ປຓ຺ຑິໂຕປິ ສຸ-ຠາສິເຕ;

ຈກ຺ຂຸໍປິ ປິຍ-ທສ຺ສເນ,

ຊເລ ສາຄໂຣ ນ ຕິຕ຺ຕິ.

໓໖. ຣູປ-ໂຍພ຺ພນ-ສມ຺ປນ຺ນາ,

ວິສາຖ-ກຸຖ-ສມ຺ຠວາ;

ວິຊ຺ຊາ-ຫີນາ ນ ໂສຠນ຺ຕິ,

ນິຄນ຺ຘາ ອິວ ກິໍສຸກາ.