໑. ຕິຐານສຸຕ຺ຕໍ

໒໑. ‘‘ຕີຫິ, ຠິກ຺ຂເວ, ຐາເນຫິ ອຸຕ຺ຕຣກຸຣຸກາ ມນຸສ຺ສາ ເທເວ ຈ ຕາວຕິໍເສ ອຘິຄ຺ຄຓ຺ຫນ຺ຕິ ຊມ຺ພຸທີປເກ ຈ ມນຸສ຺ເສ. ກຕເມຫິ ຕີຫິ? ອມມາ, ອປຣິຄ຺ຄຫາ, ນິຍຕາຍຸກາ, ວິເສສຄຸຓາ [ວິເສສຠຸໂນ (ສີ. ສ຺ຍາ. ປີ.)] – ອິເມຫິ ໂຂ, ຠິກ຺ຂເວ, ຕີຫິ ຐາເນຫິ ອຸຕ຺ຕຣກຸຣຸກາ ມນຸສ຺ສາ ເທເວ ຈ ຕາວຕິໍເສ ອຘິຄ຺ຄຓ຺ຫນ຺ຕິ ຊມ຺ພຸທີປເກ ຈ ມນຸສ຺ເສ.

‘‘ຕີຫິ, ຠິກ຺ຂເວ, ຐາເນຫິ ເທວາ ຕາວຕິໍສາ ອຸຕ຺ຕຣກຸຣຸເກ ຈ ມນຸສ຺ເສ ອຘິຄ຺ຄຓ຺ຫນ຺ຕິ ຊມ຺ພຸທີປເກ ຈ ມນຸສ຺ເສ. ກຕເມຫິ ຕີຫິ? ທິພ຺ເພນ ອາຍຸນາ, ທິພ຺ເພນ ວຓ຺ເຓນ, ທິພ຺ເພນ ສຸເຂນ – ອິເມຫິ ໂຂ, ຠິກ຺ຂເວ, ຕີຫິ ຐາເນຫິ ເທວາ ຕາວຕິໍສາ ອຸຕ຺ຕຣກຸຣຸເກ ຈ ມນຸສ຺ເສ ອຘິຄ຺ຄຓ຺ຫນ຺ຕິ ຊມ຺ພຸທີປເກ ຈ ມນຸສ຺ເສ.

[ກຖາ. ໒໗໑] ‘‘ຕີຫິ, ຠິກ຺ຂເວ, ຐາເນຫິ ຊມ຺ພຸທີປກາ ມນຸສ຺ສາ ອຸຕ຺ຕຣກຸຣຸເກ ຈ ມນຸສ຺ເສ ອຘິຄ຺ຄຓ຺ຫນ຺ຕິ ເທເວ ຈ ຕາວຕິໍເສ. ກຕເມຫິ ຕີຫິ? ສູຣາ, ສຕິມນ຺ໂຕ, ອິຘ ພ຺ຣຫ຺ມຈຣິຍວາໂສ – ອິເມຫິ ໂຂ, ຠິກ຺ຂເວ, ຕີຫິ ຐາເນຫິ ຊມ຺ພຸທີປກາ ມນຸສ຺ສາ ອຸຕ຺ຕຣກຸຣຸເກ ຈ ມນຸສ຺ເສ ອຘິຄ຺ຄຓ຺ຫນ຺ຕິ ເທເວ ຈ ຕາວຕິໍເສ’’ຕິ. ປຐມໍ.