໔. ສມິທ຺ຘິສຸຕ຺ຕໍ

໑໔. ອຖ ໂຂ ອາຍສ຺ມາ ສມິທ຺ຘິ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ສາຣິປຸຕ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອາຍສ຺ມນ຺ຕໍ ສມິທ຺ຘິໍ ອາຍສ຺ມາ ສາຣິປຸຕ຺ໂຕ ເອຕທໂວຈ – ‘‘ກິມາຣມ຺ມຓາ, ສມິທ຺ຘິ, ປຸຣິສສ຺ສ ສງ຺ກປ຺ປວິຕກ຺ກາ ອຸປ຺ປຊ຺ຊນ຺ຕີ’’ຕິ? ‘‘ນາມຣູປາຣມ຺ມຓາ, ຠນ຺ເຕ’’ຕິ. ‘‘ເຕ ປນ, ສມິທ຺ຘິ, ກ຺ວ ນານຕ຺ຕໍ ຄຈ຺ຉນ຺ຕີ’’ຕິ? ‘‘ຘາຕູສຸ, ຠນ຺ເຕ’’ຕິ. ‘‘ເຕ ປນ, ສມິທ຺ຘິ, ກິໍສມຸທຍາ’’ຕິ? ‘‘ຜສ຺ສສມຸທຍາ, ຠນ຺ເຕ’’ຕິ. ‘‘ເຕ ປນ, ສມິທ຺ຘິ, ກິໍສໂມສຣຓາ’’ຕິ? ‘‘ເວທນາສໂມສຣຓາ, ຠນ຺ເຕ’’ຕິ. ‘‘ເຕ ປນ, ສມິທ຺ຘິ, ກິໍປມຸຂາ’’ຕິ? ‘‘ສມາຘິປ຺ປມຸຂາ, ຠນ຺ເຕ’’ຕິ. ‘‘ເຕ ປນ, ສມິທ຺ຘິ, ກິໍອຘິປເຕຍ຺ຍາ’’ຕິ? ‘‘ສຕາຘິປເຕຍ຺ຍາ, ຠນ຺ເຕ’’ຕິ. ‘‘ເຕ ປນ, ສມິທ຺ຘິ, ກິໍອຸຕ຺ຕຣາ’’ຕິ? ‘‘ປຎ຺ຎຸຕ຺ຕຣາ, ຠນ຺ເຕ’’ຕິ. ‘‘ເຕ ປນ, ສມິທ຺ຘິ, ກິໍສາຣາ’’ຕິ? ‘‘ວິມຸຕ຺ຕິສາຣາ, ຠນ຺ເຕ’’ຕິ. ‘‘ເຕ ປນ, ສມິທ຺ຘິ, ກິໍໂອຄຘາ’’ຕິ? ‘‘ອມໂຕຄຘາ, ຠນ຺ເຕ’’ຕິ.

‘‘‘ກິມາຣມ຺ມຓາ, ສມິທ຺ຘິ, ປຸຣິສສ຺ສ ສງ຺ກປ຺ປວິຕກ຺ກາ ອຸປ຺ປຊ຺ຊນ຺ຕີ’ຕິ, ອິຕິ ປຸຏ຺ໂຐ ສມາໂນ ‘ນາມຣູປາຣມ຺ມຓາ, ຠນ຺ເຕ’ຕິ ວເທສິ. ‘ເຕ ປນ, ສມິທ຺ຘິ, ກ຺ວ ນານຕ຺ຕໍ ຄຈ຺ຉນ຺ຕີ’ຕິ, ອິຕິ ປຸຏ຺ໂຐ ສມາໂນ ‘ຘາຕູສຸ, ຠນ຺ເຕ’ຕິ ວເທສິ. ‘ເຕ ປນ, ສມິທ຺ຘິ, ກິໍສມຸທຍາ’ຕິ, ອິຕິ ປຸຏ຺ໂຐ ສມາໂນ ‘ຜສ຺ສສມຸທຍາ, ຠນ຺ເຕ’ຕິ ວເທສິ. ‘ເຕ ປນ, ສມິທ຺ຘິ, ກິໍສໂມສຣຓາ’ຕິ, ອິຕິ ປຸຏ຺ໂຐ ສມາໂນ ‘ເວທນາສໂມສຣຓາ, ຠນ຺ເຕ’ຕິ ວເທສິ. ‘ເຕ ປນ, ສມິທ຺ຘິ, ກິໍປມຸຂາ’ຕິ, ອິຕິ ປຸຏ຺ໂຐ ສມາໂນ ‘ສມາຘິປ຺ປມຸຂາ, ຠນ຺ເຕ’ຕິ ວເທສິ. ‘ເຕ ປນ, ສມິທ຺ຘິ, ກິໍອຘິປເຕຍ຺ຍາ’ຕິ, ອິຕິ ປຸຏ຺ໂຐ ສມາໂນ ‘ສຕາຘິປເຕຍ຺ຍາ, ຠນ຺ເຕ’ຕິ ວເທສິ. ‘ເຕ ປນ, ສມິທ຺ຘິ, ກິໍອຸຕ຺ຕຣາ’ຕິ, ອິຕິ ປຸຏ຺ໂຐ ສມາໂນ ‘ປຎ຺ຎຸຕ຺ຕຣາ, ຠນ຺ເຕ’ຕິ ວເທສິ. ‘ເຕ ປນ, ສມິທ຺ຘິ, ກິໍສາຣາ’ຕິ, ອິຕິ ປຸຏ຺ໂຐ ສມາໂນ ‘ວິມຸຕ຺ຕິສາຣາ, ຠນ຺ເຕ’ຕິ ວເທສິ. ‘ເຕ ປນ, ສມິທ຺ຘິ, ກິໍໂອຄຘາ’ຕິ, ອິຕິ ປຸຏ຺ໂຐ ສມາໂນ ‘ອມໂຕຄຘາ, ຠນ຺ເຕ’ຕິ ວເທສິ. ສາຘຸ ສາຘຸ, ສມິທ຺ຘິ! ສາຘຸ ໂຂ ຕ຺ວໍ, ສມິທ຺ຘິ, ປຸຏ຺ໂຐ [ປຎ຺ຫໍ (ສີ. ສ຺ຍາ. ປີ.)] ປຸຏ຺ໂຐ ວິສ຺ສຊ຺ເຊສິ, ເຕນ ຈ ມາ ມຎ຺ຎີ’’ຕິ. ຈຕຸຕ຺ຖໍ.