໖. ເສວນາສຸຕ຺ຕໍ

໖. ຕຕ຺ຣ ໂຂ ອາຍສ຺ມາ ສາຣິປຸຕ຺ໂຕ ຠິກ຺ຂູ ອາມນ຺ເຕສິ…ເປ… ອາຍສ຺ມາ ສາຣິປຸຕ຺ໂຕ ເອຕທໂວຈ –

‘‘ປຸຄ຺ຄໂລປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປິ. ຈີວຣມ຺ປິ, ອາວຸໂສ, ທຸວິເຘນ ເວທິຕພ຺ພໍ – ເສວິຕພ຺ພມ຺ປິ ອເສວິຕພ຺ພມ຺ປິ. ປິຓ຺ຑປາໂຕປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປິ. ເສນາສນມ຺ປິ, ອາວຸໂສ, ທຸວິເຘນ ເວທິຕພ຺ພໍ – ເສວິຕພ຺ພມ຺ປິ ອເສວິຕພ຺ພມ຺ປິ. ຄາມນິຄໂມປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປິ. ຊນປທປເທໂສປິ ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປິ.

‘‘‘ປຸຄ຺ຄໂລປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປີ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຕຕ຺ຖ ຍໍ ຊຎ຺ຎາ ປຸຄ຺ຄລໍ – ‘ອິມໍ ໂຂ ເມ ປຸຄ຺ຄລໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ; ເຍ ຈ ໂຂ ເມ ປພ຺ພຊິເຕນ ຊີວິຕປຣິກ຺ຂາຣາ ສມຸທາເນຕພ຺ພາ ຈີວຣປິຓ຺ຑປາຕເສນາສນຄິລານປຈ຺ຈຍເຠສຊ຺ຊປຣິກ຺ຂາຣາ ເຕ ຈ ກສິເຣນ ສມຸທາຄຈ຺ຉນ຺ຕິ; ຍສ຺ສ ຈມ຺ຫິ ອຕ຺ຖາຍ ອຄາຣສ຺ມາ ອນຄາຣິຍໍ ປພ຺ພຊິໂຕ ໂສ ຈ ເມ ສາມຎ຺ຎຕ຺ໂຖ ນ ຠາວນາປາຣິປູຣິໍ ຄຈ຺ຉຕີ’ຕິ, ເຕນາວຸໂສ, ປຸຄ຺ຄເລນ ໂສ ປຸຄ຺ຄໂລ ຣຕ຺ຕິຠາຄໍ ວາ ທິວສຠາຄໍ ວາ ສງ຺ຂາປິ ອນາປຸຈ຺ຉາ ປກ຺ກມິຕພ຺ພໍ ນານຸພນ຺ຘິຕພ຺ໂພ.

‘‘ຕຕ຺ຖ ຍໍ ຊຎ຺ຎາ ປຸຄ຺ຄລໍ – ‘ອິມໍ ໂຂ ເມ ປຸຄ຺ຄລໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ; ເຍ ຈ ໂຂ ເມ ປພ຺ພຊິເຕນ ຊີວິຕປຣິກ຺ຂາຣາ ສມຸທາເນຕພ຺ພາ ຈີວຣປິຓ຺ຑປາຕເສນາສນຄິລານປຈ຺ຈຍເຠສຊ຺ຊປຣິກ຺ຂາຣາ ເຕ ຈ ອປ຺ປກສິເຣນ ສມຸທາຄຈ຺ຉນ຺ຕິ; ຍສ຺ສ ຈມ຺ຫິ ອຕ຺ຖາຍ ອຄາຣສ຺ມາ ອນຄາຣິຍໍ ປພ຺ພຊິໂຕ ໂສ ຈ ເມ ສາມຎ຺ຎຕ຺ໂຖ ນ ຠາວນາປາຣິປູຣິໍ ຄຈ຺ຉຕີ’ຕິ, ເຕນາວຸໂສ, ປຸຄ຺ຄເລນ ໂສ ປຸຄ຺ຄໂລ ສງ຺ຂາປິ ອນາປຸຈ຺ຉາ ປກ຺ກມິຕພ຺ພໍ ນານຸພນ຺ຘິຕພ຺ໂພ.

‘‘ຕຕ຺ຖ ຍໍ ຊຎ຺ຎາ ປຸຄ຺ຄລໍ – ‘ອິມໍ ໂຂ ເມ ປຸຄ຺ຄລໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ; ເຍ ຈ ໂຂ ເມ ປພ຺ພຊິເຕນ ຊີວິຕປຣິກ຺ຂາຣາ ສມຸທາເນຕພ຺ພາ ຈີວຣປິຓ຺ຑປາຕເສນາສນຄິລານປຈ຺ຈຍເຠສຊ຺ຊປຣິກ຺ຂາຣາ ເຕ ຈ ກສິເຣນ ສມຸທາຄຈ຺ຉນ຺ຕິ; ຍສ຺ສ ຈມ຺ຫິ ອຕ຺ຖາຍ ອຄາຣສ຺ມາ ອນຄາຣິຍໍ ປພ຺ພຊິໂຕ ໂສ ຈ ເມ ສາມຎ຺ຎຕ຺ໂຖ ຠາວນາປາຣິປູຣິໍ ຄຈ຺ຉຕີ’ຕິ, ເຕນາວຸໂສ, ປຸຄ຺ຄເລນ ໂສ ປຸຄ຺ຄໂລ ສງ຺ຂາປິ ອນຸພນ຺ຘິຕພ຺ໂພ ນ ປກ຺ກມິຕພ຺ພໍ.

‘‘ຕຕ຺ຖ ຍໍ ຊຎ຺ຎາ ປຸຄ຺ຄລໍ – ‘ອິມໍ ໂຂ ເມ ປຸຄ຺ຄລໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ; ເຍ ຈ ໂຂ ເມ ປພ຺ພຊິເຕນ ຊີວິຕປຣິກ຺ຂາຣາ ສມຸທາເນຕພ຺ພາ ຈີວຣປິຓ຺ຑປາຕເສນາສນຄິລານປຈ຺ຈຍເຠສຊ຺ຊປຣິກ຺ຂາຣາ ເຕ ຈ ອປ຺ປກສິເຣນ ສມຸທາຄຈ຺ຉນ຺ຕິ; ຍສ຺ສ ຈມ຺ຫິ ອຕ຺ຖາຍ ອຄາຣສ຺ມາ ອນຄາຣິຍໍ ປພ຺ພຊິໂຕ ໂສ ຈ ເມ ສາມຎ຺ຎຕ຺ໂຖ ຠາວນາປາຣິປູຣິໍ ຄຈ຺ຉຕີ’ຕິ, ເຕນາວຸໂສ, ປຸຄ຺ຄເລນ ໂສ ປຸຄ຺ຄໂລ ຍາວຊີວໍ ອນຸພນ຺ຘິຕພ຺ໂພ ນ ປກ຺ກມິຕພ຺ພໍ ອປິ ປນຸຊ຺ຊມາເນນ [ປຓຸຊ຺ຊມາເນນ (?)]. ‘ປຸຄ຺ຄໂລປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປີ’ຕິ, ອິຕິ ຍໍ ຕໍ ວຸຕ຺ຕໍ, ອິທເມຕໍ ປຏິຈ຺ຈ ວຸຕ຺ຕໍ.

‘‘‘ຈີວຣມ຺ປິ, ອາວຸໂສ, ທຸວິເຘນ ເວທິຕພ຺ພໍ – ເສວິຕພ຺ພມ຺ປິ ອເສວິຕພ຺ພມ຺ປີ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຕຕ຺ຖ ຍໍ ຊຎ຺ຎາ ຈີວຣໍ – ‘ອິທໍ ໂຂ ເມ ຈີວຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕີ’ຕິ, ເອວຣູປໍ ຈີວຣໍ ນ ເສວິຕພ຺ພໍ. ຕຕ຺ຖ ຍໍ ຊຎ຺ຎາ ຈີວຣໍ – ‘ອິທໍ ໂຂ ເມ ຈີວຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕີ’ຕິ, ເອວຣູປໍ ຈີວຣໍ ເສວິຕພ຺ພໍ. ‘ຈີວຣມ຺ປິ, ອາວຸໂສ, ທຸວິເຘນ ເວທິຕພ຺ພໍ – ເສວິຕພ຺ພມ຺ປິ ອເສວິຕພ຺ພມ຺ປີ’ຕິ, ອິຕິ ຍໍ ຕໍ ວຸຕ຺ຕໍ, ອິທເມຕໍ ປຏິຈ຺ຈ ວຸຕ຺ຕໍ.

‘‘‘ປິຓ຺ຑປາໂຕປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປີ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຕຕ຺ຖ ຍໍ ຊຎ຺ຎາ ປິຓ຺ຑປາຕໍ – ‘ອິມໍ ໂຂ ເມ ປິຓ຺ຑປາຕໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕີ’ຕິ, ເອວຣູໂປ ປິຓ຺ຑປາໂຕ ນ ເສວິຕພ຺ໂພ. ຕຕ຺ຖ ຍໍ ຊຎ຺ຎາ ປິຓ຺ຑປາຕໍ – ‘ອິມໍ ໂຂ ເມ ປິຓ຺ຑປາຕໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕີ’ຕິ, ເອວຣູໂປ ປິຓ຺ຑປາໂຕ ເສວິຕພ຺ໂພ. ‘ປິຓ຺ຑປາໂຕປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປີ’ຕິ, ອິຕິ ຍໍ ຕໍ ວຸຕ຺ຕໍ, ອິທເມຕໍ ປຏິຈ຺ຈ ວຸຕ຺ຕໍ.

‘‘‘ເສນາສນມ຺ປິ, ອາວຸໂສ, ທຸວິເຘນ ເວທິຕພ຺ພໍ – ເສວິຕພ຺ພມ຺ປິ ອເສວິຕພ຺ພມ຺ປີ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຕຕ຺ຖ ຍໍ ຊຎ຺ຎາ ເສນາສນໍ – ‘‘ອິທໍ ໂຂ ເມ ເສນາສນໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕີ’ຕິ, ເອວຣູປໍ ເສນາສນໍ ນ ເສວິຕພ຺ພໍ. ຕຕ຺ຖ ຍໍ ຊຎ຺ຎາ ເສນາສນໍ – ‘ອິທໍ ໂຂ ເມ ເສນາສນໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕີ’ຕິ, ເອວຣູປໍ ເສນາສນໍ ເສວິຕພ຺ພໍ. ‘ເສນາສນມ຺ປິ, ອາວຸໂສ, ທຸວິເຘນ ເວທິຕພ຺ພໍ – ເສວິຕພ຺ພມ຺ປິ ອເສວິຕພ຺ພມ຺ປີ’ຕິ, ອິຕິ ຍໍ ຕໍ ວຸຕ຺ຕໍ, ອິທເມຕໍ ປຏິຈ຺ຈ ວຸຕ຺ຕໍ.

‘‘‘ຄາມນິຄໂມປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປີ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຕຕ຺ຖ ຍໍ ຊຎ຺ຎາ ຄາມນິຄມໍ – ‘ອິມໍ ໂຂ ເມ ຄາມນິຄມໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕີ’ຕິ, ເອວຣູໂປ ຄາມນິຄໂມ ນ ເສວິຕພ຺ໂພ. ຕຕ຺ຖ ຍໍ ຊຎ຺ຎາ ຄາມນິຄມໍ – ‘ອິມໍ ໂຂ, ເມ ຄາມນິຄມໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕີ’ຕິ, ເອວຣູໂປ ຄາມນິຄໂມ ເສວິຕພ຺ໂພ. ‘ຄາມນິຄໂມປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປີ’ຕິ, ອິຕິ ຍໍ ຕໍ ວຸຕ຺ຕໍ, ອິທເມຕໍ ປຏິຈ຺ຈ ວຸຕ຺ຕໍ.

‘‘‘ຊນປທປເທໂສປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປີ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຕຕ຺ຖ ຍໍ ຊຎ຺ຎາ ຊນປທປເທສໍ – ‘ອິມໍ ໂຂ ເມ ຊນປທປເທສໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕີ’ຕິ, ເອວຣູໂປ ຊນປທປເທໂສ ນ ເສວິຕພ຺ໂພ. ຕຕ຺ຖ ຍໍ ຊຎ຺ຎາ ຊນປທປເທສໍ – ‘ອິມໍ ໂຂ ເມ ຊນປທປເທສໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕີ’ຕິ, ເອວຣູໂປ ຊນປທປເທໂສ ເສວິຕພ຺ໂພ. ‘ຊນປທປເທໂສປິ, ອາວຸໂສ, ທຸວິເຘນ ເວທິຕພ຺ໂພ – ເສວິຕພ຺ໂພປິ ອເສວິຕພ຺ໂພປີ’ຕິ, ອິຕິ ຍໍ ຕໍ ວຸຕ຺ຕໍ, ອິທເມຕໍ ປຏິຈ຺ຈ ວຸຕ຺ຕ’’ນ຺ຕິ. ຉຏ຺ຐໍ.