໖. ຠຍສຸຕ຺ຕໍ

໕໖. ‘‘‘ຠຍ’ນ຺ຕິ [ຈູຬນິ. ຂຄ຺ຄວິສາຓສຸຕ຺ຕນິທ຺ເທສ ໑໓໗], ຠິກ຺ຂເວ, ກາມານເມຕໍ ອຘິວຈນໍ. ‘ທຸກ຺ຂ’ນ຺ຕິ, ຠິກ຺ຂເວ, ກາມານເມຕໍ ອຘິວຈນໍ. ‘ໂຣໂຄ’ຕິ, ຠິກ຺ຂເວ, ກາມານເມຕໍ ອຘິວຈນໍ. ‘ຄຓ຺ໂຑ’ຕິ, ຠິກ຺ຂເວ, ກາມານເມຕໍ ອຘິວຈນໍ. ‘ສລ຺ລ’ນ຺ຕິ, ຠິກ຺ຂເວ, ກາມານເມຕໍ ອຘິວຈນໍ. ‘ສງ຺ໂຄ’ຕິ, ຠິກ຺ຂເວ, ກາມານເມຕໍ ອຘິວຈນໍ. ‘ປງ຺ໂກ’ຕິ, ຠິກ຺ຂເວ, ກາມານເມຕໍ ອຘິວຈນໍ. ‘ຄພ຺ໂຠ’ຕິ, ຠິກ຺ຂເວ, ກາມານເມຕໍ ອຘິວຈນໍ. ກສ຺ມາ ຈ, ຠິກ຺ຂເວ, ‘ຠຍ’ນ຺ຕິ ກາມານເມຕໍ ອຘິວຈນໍ? ຍສ຺ມາ ຈ ກາມຣາຄຣຕ຺ຕາຍໍ, ຠິກ຺ຂເວ, ຉນ຺ທຣາຄວິນິພທ຺ໂຘ ທິຏ຺ຐຘມ຺ມິກາປິ ຠຍາ ນ ປຣິມຸຈ຺ຈຕິ, ສມ຺ປຣາຍິກາປິ ຠຍາ ນ ປຣິມຸຈ຺ຈຕິ, ຕສ຺ມາ ‘ຠຍ’ນ຺ຕິ ກາມານເມຕໍ ອຘິວຈນໍ. ກສ຺ມາ ຈ, ຠິກ຺ຂເວ, ‘ທຸກ຺ຂ’ນ຺ຕິ…ເປ… ‘ໂຣໂຄ’ຕິ… ‘ຄຓ຺ໂຑ’ຕິ… ‘ສລ຺ລ’ນ຺ຕິ… ‘ສງ຺ໂຄ’ຕິ… ‘ປງ຺ໂກ’ຕິ… ‘ຄພ຺ໂຠ’ຕິ ກາມານເມຕໍ ອຘິວຈນໍ? ຍສ຺ມາ ຈ ກາມຣາຄຣຕ຺ຕາຍໍ, ຠິກ຺ຂເວ, ຉນ຺ທຣາຄວິນິພທ຺ໂຘ ທິຏ຺ຐຘມ຺ມິກາປິ ຄພ຺ຠາ ນ ປຣິມຸຈ຺ຈຕິ, ສມ຺ປຣາຍິກາປິ ຄພ຺ຠາ ນ ປຣິມຸຈ຺ຈຕິ, ຕສ຺ມາ ‘ຄພ຺ໂຠ’ຕິ ກາມານເມຕໍ ອຘິວຈນໍ’’.

‘‘ຠຍໍ ທຸກ຺ຂຎ຺ຈ ໂຣໂຄ ຈ, ຄຓ຺ໂຑ ສລ຺ລຎ຺ຈ ສງ຺ໂຄ ຈ;

ປງ຺ໂກ ຄພ຺ໂຠ ຈ ອຸຠຍໍ, ເອເຕ ກາມາ ປວຸຈ຺ຈນ຺ຕິ;

ຍຕ຺ຖ ສຕ຺ໂຕ ປຸຖຸຊ຺ຊໂນ.

‘‘ໂອຕິຓ຺ໂຓ ສາຕຣູເປນ, ປຸນ ຄພ຺ຠາຍ ຄຈ຺ຉຕິ;

ຍໂຕ ຈ ຠິກ຺ຂຸ ອາຕາປີ, ສມ຺ປຊຎ຺ຎໍ [ສມ຺ປຊຎ຺ໂຎ (ສ຺ຍາ. ກ.) ສໍ. ນິ. ໔.໒໕໑ ປສ຺ສິຕພ຺ພໍ] ນ ຣິຈ຺ຈຕິ.

‘‘ໂສ ອິມໍ ປລິປຖໍ ທຸຄ຺ຄໍ, ອຕິກ຺ກມ຺ມ ຕຖາວິໂຘ;

ປຊໍ ຊາຕິຊຣູເປຕໍ, ຜນ຺ທມານໍ ອເວກ຺ຂຕີ’’ຕິ. ຉຏ຺ຐໍ;