໕. ທານູປປຕ຺ຕິສຸຕ຺ຕໍ

໓໕. [ທີ. ນິ. ໓.໓໓໗] ‘‘ອຏ຺ຐິມາ, ຠິກ຺ຂເວ, ທານູປປຕ຺ຕິໂຍ. ກຕມາ ອຏ຺ຐ? ອິຘ, ຠິກ຺ຂເວ, ເອກຈ຺ໂຈ ທານໍ ເທຕິ ສມຓສ຺ສ ວາ ພ຺ຣາຫ຺ມຓສ຺ສ ວາ ອນ຺ນໍ ປານໍ ວຕ຺ຖໍ ຍານໍ ມາລາຄນ຺ຘວິເລປນໍ ເສຍ຺ຍາວສຖປທີເປຍ຺ຍໍ. ໂສ ຍໍ ເທຕິ ຕໍ ປຈ຺ຈາສີສຕິ [ປຈ຺ຈາສິໍສຕິ (ສີ. ສ຺ຍາ. ກໍ. ປີ.)]. ໂສ ປສ຺ສຕິ ຂຕ຺ຕິຍມຫາສາເລ ວາ ພ຺ຣາຫ຺ມຓມຫາສາເລ ວາ ຄຫປຕິມຫາສາເລ ວາ ປຎ຺ຈຫິ ກາມຄຸເຓຫິ ສມປ຺ປິເຕ ສມງ຺ຄີຠູເຕ ປຣິຈາຣຍມາເນ. ຕສ຺ສ ເອວໍ ໂຫຕິ – ‘ອໂຫ ວຕາຫໍ ກາຍສ຺ສ ເຠທາ ປຣໍ ມຣຓາ ຂຕ຺ຕິຍມຫາສາລານໍ ວາ ພ຺ຣາຫ຺ມຓມຫາສາລານໍ ວາ ຄຫປຕິມຫາສາລານໍ ວາ ສຫພ຺ຍຕໍ ອຸປປຊ຺ເຊຍ຺ຍ’ນ຺ຕິ! ໂສ ຕໍ ຈິຕ຺ຕໍ ທຫຕິ, ຕໍ ຈິຕ຺ຕໍ ອຘິຏ຺ຐາຕິ, ຕໍ ຈິຕ຺ຕໍ ຠາເວຕິ. ຕສ຺ສ ຕໍ ຈິຕ຺ຕໍ ຫີເນ ວິມຸຕ຺ຕໍ [ຫີເນຘິມຸຕ຺ຕໍ (ສ຺ຍາ. ປີ.) ວິມຸຕ຺ຕນ຺ຕິ ອຘິມຸຕ຺ຕໍ, ວິມຸຕ຺ຕນ຺ຕິ ວາ ວິສ຺ສຏ຺ຐໍ (ຏີກາສໍວຓ຺ຓນາ)], ອຸຕ຺ຕຣິ ອຠາວິຕໍ, ຕຕ຺ຣູປປຕ຺ຕິຍາ ສໍວຕ຺ຕຕິ. ກາຍສ຺ສ ເຠທາ ປຣໍ ມຣຓາ ຂຕ຺ຕິຍມຫາສາລານໍ ວາ ພ຺ຣາຫ຺ມຓມຫາສາລານໍ ວາ ຄຫປຕິມຫາສາລານໍ ວາ ສຫພ຺ຍຕໍ ອຸປປຊ຺ຊຕິ. ຕຎ຺ຈ ໂຂ ສີລວໂຕ ວທາມິ, ໂນ ທຸສ຺ສີລສ຺ສ. ອິຊ຺ຌຕິ, ຠິກ຺ຂເວ, ສີລວໂຕ ເຈໂຕປຓິຘິ ວິສຸທ຺ຘຕ຺ຕາ.

‘‘ອິຘ ປນ, ຠິກ຺ຂເວ, ເອກຈ຺ໂຈ ທານໍ ເທຕິ ສມຓສ຺ສ ວາ ພ຺ຣາຫ຺ມຓສ຺ສ ວາ ອນ຺ນໍ ປານໍ ວຕ຺ຖໍ ຍານໍ ມາລາຄນ຺ຘວິເລປນໍ ເສຍ຺ຍາວສຖປທີເປຍ຺ຍໍ. ໂສ ຍໍ ເທຕິ ຕໍ ປຈ຺ຈາສີສຕິ. ຕສ຺ສ ສຸຕໍ ໂຫຕິ – ‘ຈາຕຸມຫາຣາຊິກາ [ຈາຕຸມ຺ມຫາຣາຊິກາ (ສີ. ສ຺ຍາ. ກໍ. ປີ.)] ເທວາ ທີຆາຍຸກາ ວຓ຺ຓວນ຺ໂຕ ສຸຂພຫຸລາ’ຕິ. ຕສ຺ສ ເອວໍ ໂຫຕິ – ‘ອໂຫ ວຕາຫໍ ກາຍສ຺ສ ເຠທາ ປຣໍ ມຣຓາ ຈາຕຸມຫາຣາຊິການໍ ເທວານໍ ສຫພ຺ຍຕໍ ອຸປປຊ຺ເຊຍ຺ຍ’ນ຺ຕິ. ໂສ ຕໍ ຈິຕ຺ຕໍ ທຫຕິ, ຕໍ ຈິຕ຺ຕໍ ອຘິຏ຺ຐາຕິ, ຕໍ ຈິຕ຺ຕໍ ຠາເວຕິ. ຕສ຺ສ ຕໍ ຈິຕ຺ຕໍ ຫີເນ ວິມຸຕ຺ຕໍ, ອຸຕ຺ຕຣິ ອຠາວິຕໍ, ຕຕ຺ຣູປປຕ຺ຕິຍາ ສໍວຕ຺ຕຕິ. ກາຍສ຺ສ ເຠທາ ປຣໍ ມຣຓາ ຈາຕຸມຫາຣາຊິການໍ ເທວານໍ ສຫພ຺ຍຕໍ ອຸປປຊ຺ຊຕິ. ຕຎ຺ຈ ໂຂ ສີລວໂຕ ວທາມິ, ໂນ ທຸສ຺ສີລສ຺ສ. ອິຊ຺ຌຕິ, ຠິກ຺ຂເວ, ສີລວໂຕ ເຈໂຕປຓິຘິ ວິສຸທ຺ຘຕ຺ຕາ.

‘‘ອິຘ ປນ, ຠິກ຺ຂເວ, ເອກຈ຺ໂຈ ທານໍ ເທຕິ ສມຓສ຺ສ ວາ ພ຺ຣາຫ຺ມຓສ຺ສ ວາ ອນ຺ນໍ ປານໍ ວຕ຺ຖໍ ຍານໍ ມາລາຄນ຺ຘວິເລປນໍ ເສຍ຺ຍາວສຖປທີເປຍ຺ຍໍ. ໂສ ຍໍ ເທຕິ ຕໍ ປຈ຺ຈາສີສຕິ. ຕສ຺ສ ສຸຕໍ ໂຫຕິ – ຕາວຕິໍສາ ເທວາ…ເປ… ຍາມາ ເທວາ… ຕຸສິຕາ ເທວາ… ນິມ຺ມານຣຕີ ເທວາ… ປຣນິມ຺ມິຕວສວຕ຺ຕີ ເທວາ ທີຆາຍຸກາ ວຓ຺ຓວນ຺ໂຕ ສຸຂພຫຸລາຕິ. ຕສ຺ສ ເອວໍ ໂຫຕິ – ‘ອໂຫ ວຕາຫໍ ກາຍສ຺ສ ເຠທາ ປຣໍ ມຣຓາ ປຣນິມ຺ມິຕວສວຕ຺ຕີນໍ ເທວານໍ ສຫພ຺ຍຕໍ ອຸປປຊ຺ເຊຍ຺ຍ’ນ຺ຕິ. ໂສ ຕໍ ຈິຕ຺ຕໍ ທຫຕິ, ຕໍ ຈິຕ຺ຕໍ ອຘິຏ຺ຐາຕິ, ຕໍ ຈິຕ຺ຕໍ ຠາເວຕິ. ຕສ຺ສ ຕໍ ຈິຕ຺ຕໍ ຫີເນ ວິມຸຕ຺ຕໍ, ອຸຕ຺ຕຣິ ອຠາວິຕໍ, ຕຕ຺ຣູປປຕ຺ຕິຍາ ສໍວຕ຺ຕຕິ. ກາຍສ຺ສ ເຠທາ ປຣໍ ມຣຓາ ປຣນິມ຺ມິຕວສວຕ຺ຕີນໍ ເທວານໍ ສຫພ຺ຍຕໍ ອຸປປຊ຺ຊຕິ. ຕຎ຺ຈ ໂຂ ສີລວໂຕ ວທາມິ, ໂນ ທຸສ຺ສີລສ຺ສ. ອິຊ຺ຌຕິ, ຠິກ຺ຂເວ, ສີລວໂຕ ເຈໂຕປຓິຘິ ວິສຸທ຺ຘຕ຺ຕາ.

‘‘ອິຘ ປນ, ຠິກ຺ຂເວ, ເອກຈ຺ໂຈ ທານໍ ເທຕິ ສມຓສ຺ສ ວາ ພ຺ຣາຫ຺ມຓສ຺ສ ວາ ອນ຺ນໍ ປານໍ ວຕ຺ຖໍ ຍານໍ ມາລາຄນ຺ຘວິເລປນໍ ເສຍ຺ຍາວສຖປທີເປຍ຺ຍໍ. ໂສ ຍໍ ເທຕິ ຕໍ ປຈ຺ຈາສີສຕິ. ຕສ຺ສ ສຸຕໍ ໂຫຕິ – ‘ພ຺ຣຫ຺ມກາຍິກາ ເທວາ ທີຆາຍຸກາ ວຓ຺ຓວນ຺ໂຕ ສຸຂພຫຸລາ’ຕິ. ຕສ຺ສ ເອວໍ ໂຫຕິ – ‘ອໂຫ ວຕາຫໍ ກາຍສ຺ສ ເຠທາ ປຣໍ ມຣຓາ ພ຺ຣຫ຺ມກາຍິການໍ ເທວານໍ ສຫພ຺ຍຕໍ ອຸປປຊ຺ເຊຍ຺ຍ’ນ຺ຕິ. ໂສ ຕໍ ຈິຕ຺ຕໍ ທຫຕິ, ຕໍ ຈິຕ຺ຕໍ ອຘິຏ຺ຐາຕິ, ຕໍ ຈິຕ຺ຕໍ ຠາເວຕິ. ຕສ຺ສ ຕໍ ຈິຕ຺ຕໍ ຫີເນ ວິມຸຕ຺ຕໍ, ອຸຕ຺ຕຣິ ອຠາວິຕໍ, ຕຕ຺ຣູປປຕ຺ຕິຍາ ສໍວຕ຺ຕຕິ. ກາຍສ຺ສ ເຠທາ ປຣໍ ມຣຓາ ພ຺ຣຫ຺ມກາຍິການໍ ເທວານໍ ສຫພ຺ຍຕໍ ອຸປປຊ຺ຊຕິ. ຕຎ຺ຈ ໂຂ ສີລວໂຕ ວທາມິ, ໂນ ທຸສ຺ສີລສ຺ສ; ວີຕຣາຄສ຺ສ, ໂນ ສຣາຄສ຺ສ. ອິຊ຺ຌຕິ, ຠິກ຺ຂເວ, ສີລວໂຕ ເຈໂຕປຓິຘິ ວີຕຣາຄຕ຺ຕາ. ອິມາ ໂຂ, ຠິກ຺ຂເວ, ອຏ຺ຐ ທານູປປຕ຺ຕິໂຍ’’ຕິ. ປຎ຺ຈມໍ.