໖. ປຸຎ຺ຎກິຣິຍວຕ຺ຖຸສຸຕ຺ຕໍ

໓໖. ‘‘ຕີຓິມານິ, ຠິກ຺ຂເວ, ປຸຎ຺ຎກິຣິຍວຕ຺ຖູນິ. ກຕມານິ ຕີຓິ? ທານມຍໍ ປຸຎ຺ຎກິຣິຍວຕ຺ຖຸ [ປຸຎ຺ຎກິຣິຍວຕ຺ຖຸໍ (ສີ. ປີ.) ເອວມຸປຣິປິ], ສີລມຍໍ ປຸຎ຺ຎກິຣິຍວຕ຺ຖຸ, ຠາວນາມຍໍ ປຸຎ຺ຎກິຣິຍວຕ຺ຖຸ. ອິຘ, ຠິກ຺ຂເວ, ເອກຈ຺ຈສ຺ສ ທານມຍໍ ປຸຎ຺ຎກິຣິຍວຕ຺ຖຸ ປຣິຕ຺ຕໍ ກຕໍ ໂຫຕິ, ສີລມຍໍ ປຸຎ຺ຎກິຣິຍວຕ຺ຖຸ ປຣິຕ຺ຕໍ ກຕໍ ໂຫຕິ, ຠາວນາມຍໍ ປຸຎ຺ຎກິຣິຍວຕ຺ຖຸໍ [ປຸຎ຺ຎກິຣິຍວຕ຺ຖຸ (ສ຺ຍາ.)] ນາຠິສມ຺ໂຠຕິ. ໂສ ກາຍສ຺ສ ເຠທາ ປຣໍ ມຣຓາ ມນຸສ຺ສໂທຠຄ຺ຍໍ ອຸປປຊ຺ຊຕິ.

‘‘ອິຘ ປນ, ຠິກ຺ຂເວ, ເອກຈ຺ຈສ຺ສ ທານມຍໍ ປຸຎ຺ຎກິຣິຍວຕ຺ຖຸ ມຕ຺ຕໂສ ກຕໍ ໂຫຕິ, ສີລມຍໍ ປຸຎ຺ຎກິຣິຍວຕ຺ຖຸ ມຕ຺ຕໂສ ກຕໍ ໂຫຕິ, ຠາວນາມຍໍ ປຸຎ຺ຎກິຣິຍວຕ຺ຖຸໍ ນາຠິສມ຺ໂຠຕິ. ໂສ ກາຍສ຺ສ ເຠທາ ປຣໍ ມຣຓາ ມນຸສ຺ສໂສຠຄ຺ຍໍ ອຸປປຊ຺ຊຕິ.

‘‘ອິຘ ປນ, ຠິກ຺ຂເວ, ເອກຈ຺ຈສ຺ສ ທານມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ສີລມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ຠາວນາມຍໍ ປຸຎ຺ຎກິຣິຍວຕ຺ຖຸໍ ນາຠິສມ຺ໂຠຕິ. ໂສ ກາຍສ຺ສ ເຠທາ ປຣໍ ມຣຓາ ຈາຕຸມຫາຣາຊິການໍ ເທວານໍ ສຫພ຺ຍຕໍ ອຸປປຊ຺ຊຕິ. ຕຕ຺ຣ, ຠິກ຺ຂເວ, ຈຕ຺ຕາໂຣ ມຫາຣາຊາໂນ ທານມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ສີລມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ຈາຕຸມຫາຣາຊິເກ ເທເວ ທສຫິ ຐາເນຫິ ອຘິຄຓ຺ຫນ຺ຕິ – ທິພ຺ເພນ ອາຍຸນາ, ທິພ຺ເພນ ວຓ຺ເຓນ, ທິພ຺ເພນ ສຸເຂນ, ທິພ຺ເພນ ຍເສນ, ທິພ຺ເພນ ອາຘິປເຕຍ຺ເຍນ, ທິພ຺ເພຫິ ຣູເປຫິ, ທິພ຺ເພຫິ ສທ຺ເທຫິ, ທິພ຺ເພຫິ ຄນ຺ເຘຫິ, ທິພ຺ເພຫິ ຣເສຫິ, ທິພ຺ເພຫິ ໂຜຏ຺ຐພ຺ເພຫິ.

‘‘ອິຘ ປນ, ຠິກ຺ຂເວ, ເອກຈ຺ຈສ຺ສ ທານມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ສີລມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ຠາວນາມຍໍ ປຸຎ຺ຎກິຣິຍວຕ຺ຖຸໍ ນາຠິສມ຺ໂຠຕິ. ໂສ ກາຍສ຺ສ ເຠທາ ປຣໍ ມຣຓາ ຕາວຕິໍສານໍ ເທວານໍ ສຫພ຺ຍຕໍ ອຸປປຊ຺ຊຕິ. ຕຕ຺ຣ, ຠິກ຺ຂເວ, ສກ຺ໂກ ເທວານມິນ຺ໂທ ທານມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ ສີລມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ ຕາວຕິໍເສ ເທເວ ທສຫິ ຐາເນຫິ ອຘິຄຓ຺ຫາຕິ – ທິພ຺ເພນ ອາຍຸນາ…ເປ… ທິພ຺ເພຫິ ໂຜຏ຺ຐພ຺ເພຫິ.

‘‘ອິຘ ປນ, ຠິກ຺ຂເວ, ເອກຈ຺ຈສ຺ສ ທານມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ສີລມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ຠາວນາມຍໍ ປຸຎ຺ຎກິຣິຍວຕ຺ຖຸໍ ນາຠິສມ຺ໂຠຕິ. ໂສ ກາຍສ຺ສ ເຠທາ ປຣໍ ມຣຓາ ຍາມານໍ ເທວານໍ ສຫພ຺ຍຕໍ ອຸປປຊ຺ຊຕິ. ຕຕ຺ຣ, ຠິກ຺ຂເວ, ສຸຍາໂມ ເທວປຸຕ຺ໂຕ ທານມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ສີລມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ຍາເມ ເທເວ ທສຫິ ຐາເນຫິ ອຘິຄຓ຺ຫາຕິ – ທິພ຺ເພນ ອາຍຸນາ…ເປ… ທິພ຺ເພຫິ ໂຜຏ຺ຐພ຺ເພຫິ.

‘‘ອິຘ ປນ, ຠິກ຺ຂເວ, ເອກຈ຺ຈສ຺ສ ທານມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ສີລມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ຠາວນາມຍໍ ປຸຎ຺ຎກິຣິຍວຕ຺ຖຸໍ ນາຠິສມ຺ໂຠຕິ. ໂສ ກາຍສ຺ສ ເຠທາ ປຣໍ ມຣຓາ ຕຸສິຕານໍ ເທວານໍ ສຫພ຺ຍຕໍ ອຸປປຊ຺ຊຕິ. ຕຕ຺ຣ, ຠິກ຺ຂເວ, ສນ຺ຕຸສິໂຕ ເທວປຸຕ຺ໂຕ ທານມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ສີລມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ຕຸສິເຕ ເທເວ ທສຫິ ຐາເນຫິ ອຘິຄຓ຺ຫາຕິ – ທິພ຺ເພນ ອາຍຸນາ…ເປ… ທິພ຺ເພຫິ ໂຜຏ຺ຐພ຺ເພຫິ.

‘‘ອິຘ ປນ, ຠິກ຺ຂເວ, ເອກຈ຺ຈສ຺ສ ທານມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ສີລມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ຠາວນາມຍໍ ປຸຎ຺ຎກິຣິຍວຕ຺ຖຸໍ ນາຠິສມ຺ໂຠຕິ. ໂສ ກາຍສ຺ສ ເຠທາ ປຣໍ ມຣຓາ ນິມ຺ມານຣຕີນໍ ເທວານໍ ສຫພ຺ຍຕໍ ອຸປປຊ຺ຊຕິ. ຕຕ຺ຣ, ຠິກ຺ຂເວ, ສຸນິມ຺ມິໂຕ ເທວປຸຕ຺ໂຕ ທານມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ສີລມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ນິມ຺ມານຣຕີເທເວ ທສຫິ ຐາເນຫິ ອຘິຄຓ຺ຫາຕິ – ທິພ຺ເພນ ອາຍຸນາ…ເປ… ທິພ຺ເພຫິ ໂຜຏ຺ຐພ຺ເພຫິ.

‘‘ອິຘ ປນ, ຠິກ຺ຂເວ, ເອກຈ຺ຈສ຺ສ ທານມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ສີລມຍໍ ປຸຎ຺ຎກິຣິຍວຕ຺ຖຸ ອຘິມຕ຺ຕໍ ກຕໍ ໂຫຕິ, ຠາວນາມຍໍ ປຸຎ຺ຎກິຣິຍວຕ຺ຖຸໍ ນາຠິສມ຺ໂຠຕິ. ໂສ ກາຍສ຺ສ ເຠທາ ປຣໍ ມຣຓາ ປຣນິມ຺ມິຕວສວຕ຺ຕີນໍ ເທວານໍ ສຫພ຺ຍຕໍ ອຸປປຊ຺ຊຕິ. ຕຕ຺ຣ, ຠິກ຺ຂເວ, ວສວຕ຺ຕີ ເທວປຸຕ຺ໂຕ ທານມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ສີລມຍໍ ປຸຎ຺ຎກິຣິຍວຕ຺ຖຸໍ ອຕິເຣກໍ ກຣິຕ຺ວາ, ປຣນິມ຺ມິຕວສວຕ຺ຕີເທເວ ທສຫິ ຐາເນຫິ ອຘິຄຓ຺ຫາຕິ – ທິພ຺ເພນ ອາຍຸນາ, ທິພ຺ເພນ ວຓ຺ເຓນ, ທິພ຺ເພນ ສຸເຂນ, ທິພ຺ເພນ ຍເສນ, ທິພ຺ເພນ ອາຘິປເຕຍ຺ເຍນ, ທິພ຺ເພຫິ ຣູເປຫິ, ທິພ຺ເພຫິ ສທ຺ເທຫິ, ທິພ຺ເພຫິ ຄນ຺ເຘຫິ, ທິພ຺ເພຫິ ຣເສຫິ, ທິພ຺ເພຫິ ໂຜຏ຺ຐພ຺ເພຫິ. ອິມານິ ໂຂ, ຠິກ຺ຂເວ, ຕີຓິ ປຸຎ຺ຎກິຣິຍວຕ຺ຖູນີ’’ຕິ. ຉຏ຺ຐໍ.