໑໐. ທຸຈ຺ຈຣິຕວິປາກສຸຕ຺ຕໍ

໔໐. ‘‘ປາຓາຕິປາໂຕ, ຠິກ຺ຂເວ, ອາເສວິໂຕ ຠາວິໂຕ ພຫຸລີກໂຕ ນິຣຍສໍວຕ຺ຕນິໂກ ຕິຣຈ຺ຉານໂຍນິສໍວຕ຺ຕນິໂກ ເປຕ຺ຕິວິສຍສໍວຕ຺ຕນິໂກ. ໂຍ ສພ຺ພລຫຸໂສ [ສພ຺ພລຫຸໂສຕິ ສພ຺ພລຫຸໂກ (ສ຺ຍາ. ອຏ຺ຐ.)] ປາຓາຕິປາຕສ຺ສ ວິປາໂກ, ມນຸສ຺ສຠູຕສ຺ສ ອປ຺ປາຍຸກສໍວຕ຺ຕນິໂກ ໂຫຕິ.

‘‘ອທິນ຺ນາທານໍ, ຠິກ຺ຂເວ, ອາເສວິຕໍ ຠາວິຕໍ ພຫຸລີກຕໍ ນິຣຍສໍວຕ຺ຕນິກໍ ຕິຣຈ຺ຉານໂຍນິສໍວຕ຺ຕນິກໍ ເປຕ຺ຕິວິສຍສໍວຕ຺ຕນິກໍ. ໂຍ ສພ຺ພລຫຸໂສ ອທິນ຺ນາທານສ຺ສ ວິປາໂກ, ມນຸສ຺ສຠູຕສ຺ສ ໂຠຄພ຺ຍສນສໍວຕ຺ຕນິໂກ ໂຫຕິ.

‘‘ກາເມສຸມິຈ຺ຉາຈາໂຣ, ຠິກ຺ຂເວ, ອາເສວິໂຕ ຠາວິໂຕ ພຫຸລີກໂຕ ນິຣຍສໍວຕ຺ຕນິໂກ ຕິຣຈ຺ຉານໂຍນິສໍວຕ຺ຕນິໂກ ເປຕ຺ຕິວິສຍສໍວຕ຺ຕນິໂກ. ໂຍ ສພ຺ພລຫຸໂສ ກາເມສຸມິຈ຺ຉາຈາຣສ຺ສ ວິປາໂກ, ມນຸສ຺ສຠູຕສ຺ສ ສປຕ຺ຕເວຣສໍວຕ຺ຕນິໂກ ໂຫຕິ.

‘‘ມຸສາວາໂທ, ຠິກ຺ຂເວ, ອາເສວິໂຕ ຠາວິໂຕ ພຫຸລີກໂຕ ນິຣຍສໍວຕ຺ຕນິໂກ ຕິຣຈ຺ຉານໂຍນິສໍວຕ຺ຕນິໂກ ເປຕ຺ຕິວິສຍສໍວຕ຺ຕນິໂກ. ໂຍ ສພ຺ພລຫຸໂສ ມຸສາວາທສ຺ສ ວິປາໂກ, ມນຸສ຺ສຠູຕສ຺ສ ອຠູຕພ຺ຠກ຺ຂານສໍວຕ຺ຕນິໂກ ໂຫຕິ.

‘‘ປິສຸຓາ, ຠິກ຺ຂເວ, ວາຈາ ອາເສວິຕາ ຠາວິຕາ ພຫຸລີກຕາ ນິຣຍສໍວຕ຺ຕນິກາ ຕິຣຈ຺ຉານໂຍນິສໍວຕ຺ຕນິກາ ເປຕ຺ຕິວິສຍສໍວຕ຺ຕນິກາ. ໂຍ ສພ຺ພລຫຸໂສ ປິສຸຓາຍ ວາຈາຍ ວິປາໂກ, ມນຸສ຺ສຠູຕສ຺ສ ມິຕ຺ເຕຫິ ເຠທນສໍວຕ຺ຕນິໂກ ໂຫຕິ.

‘‘ຜຣຸສາ, ຠິກ຺ຂເວ, ວາຈາ ອາເສວິຕາ ຠາວິຕາ ພຫຸລີກຕາ ນິຣຍສໍວຕ຺ຕນິກາ ຕິຣຈ຺ຉານໂຍນິສໍວຕ຺ຕນິກາ ເປຕ຺ຕິວິສຍສໍວຕ຺ຕນິກາ. ໂຍ ສພ຺ພລຫຸໂສ ຜຣຸສາຍ ວາຈາຍ ວິປາໂກ, ມນຸສ຺ສຠູຕສ຺ສ ອມນາປສທ຺ທສໍວຕ຺ຕນິໂກ ໂຫຕິ.

‘‘ສມ຺ຜປ຺ປລາໂປ, ຠິກ຺ຂເວ, ອາເສວິໂຕ ຠາວິໂຕ ພຫຸລີກໂຕ ນິຣຍສໍວຕ຺ຕນິໂກ ຕິຣຈ຺ຉານໂຍນິສໍວຕ຺ຕນິໂກ ເປຕ຺ຕິວິສຍສໍວຕ຺ຕນິໂກ. ໂຍ ສພ຺ພລຫຸໂສ ສມ຺ຜປ຺ປລາປສ຺ສ ວິປາໂກ, ມນຸສ຺ສຠູຕສ຺ສ ອນາເທຍ຺ຍວາຈາສໍວຕ຺ຕນິໂກ ໂຫຕິ.

‘‘ສຸຣາເມຣຍປານໍ, ຠິກ຺ຂເວ, ອາເສວິຕໍ ຠາວິຕໍ ພຫຸລີກຕໍ ນິຣຍສໍວຕ຺ຕນິກໍ ຕິຣຈ຺ຉານໂຍນິສໍວຕ຺ຕນິກໍ ເປຕ຺ຕິວິສຍສໍວຕ຺ຕນິກໍ. ໂຍ ສພ຺ພລຫຸໂສ ສຸຣາເມຣຍປານສ຺ສ ວິປາໂກ, ມນຸສ຺ສຠູຕສ຺ສ ອຸມ຺ມຕ຺ຕກສໍວຕ຺ຕນິໂກ ໂຫຕີ’’ຕິ. ທສມໍ.

ທານວຄ຺ໂຄ ຈຕຸຕ຺ໂຖ.