໖. ທຸຕິຍສຎ຺ຎາສຸຕ຺ຕໍ

໔໙. ‘‘ສຕ຺ຕິມາ, ຠິກ຺ຂເວ, ສຎ຺ຎາ ຠາວິຕາ ພຫຸລີກຕາ ມຫປ຺ຜລາ ໂຫນ຺ຕິ ມຫານິສໍສາ ອມໂຕຄຘາ ອມຕປຣິໂຍສານາ. ກຕມາ ສຕ຺ຕ? ອສຸຠສຎ຺ຎາ, ມຣຓສຎ຺ຎາ, ອາຫາເຣ ປຏິກູລສຎ຺ຎາ, ສພ຺ພໂລເກ ອນຠິຣຕສຎ຺ຎາ, ອນິຈ຺ຈສຎ຺ຎາ, ອນິຈ຺ເຈ ທຸກ຺ຂສຎ຺ຎາ, ທຸກ຺ເຂ ອນຕ຺ຕສຎ຺ຎາ. ອິມາ ໂຂ, ຠິກ຺ຂເວ, ສຕ຺ຕ ສຎ຺ຎາ ຠາວິຕາ ພຫຸລີກຕາ ມຫປ຺ຜລາ ໂຫນ຺ຕິ ມຫານິສໍສາ ອມໂຕຄຘາ ອມຕປຣິໂຍສານາຕິ.

‘‘‘ອສຸຠສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ. ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ອສຸຠສຎ຺ຎາປຣິຈິເຕນ, ຠິກ຺ຂເວ, ຠິກ຺ຂຸໂນ ເຈຕສາ ພຫຸລໍ ວິຫຣໂຕ ເມຖຸນຘມ຺ມສມາປຕ຺ຕິຍາ ຈິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ. ເສຍ຺ຍຖາປິ, ຠິກ຺ຂເວ, ກຸກ຺ກຸຏປຕ຺ຕໍ ວາ ນ຺ຫາຣຸທທ຺ທຸລໍ ວາ ອຄ຺ຄິມ຺ຫິ ປກ຺ຂິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ. ເອວເມວໍ ໂຂ, ຠິກ຺ຂເວ, ຠິກ຺ຂຸໂນ ອສຸຠສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ເມຖຸນຘມ຺ມສມາປຕ຺ຕິຍາ ຈິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ.

‘‘ສເຈ, ຠິກ຺ຂເວ, ຠິກ຺ຂຸໂນ ອສຸຠສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ເມຖຸນຘມ຺ມສມາປຕ຺ຕິຍາ ຈິຕ຺ຕໍ ອນຸສນ຺ທຫຕິ [ອນຸສຓ຺ຐາຕິ (ສີ.)] ອປ຺ປຏິກຸລ຺ຍຕາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ອຠາວິຕາ ເມ ອສຸຠສຎ຺ຎາ, ນຕ຺ຖິ ເມ ປຸພ຺ເພນາປຣໍ ວິເສໂສ, ອປ຺ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ສເຈ ປນ, ຠິກ຺ຂເວ, ຠິກ຺ຂຸໂນ ອສຸຠສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ເມຖຸນຘມ຺ມສມາປຕ຺ຕິຍາ ຈິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ສຸຠາວິຕາ ເມ ອສຸຠສຎ຺ຎາ, ອຕ຺ຖິ ເມ ປຸພ຺ເພນາປຣໍ ວິເສໂສ, ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ‘ອສຸຠສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ຍໍ ຕໍ ວຸຕ຺ຕໍ ອິທເມຕໍ ປຏິຈ຺ຈ ວຸຕ຺ຕໍ.

‘‘‘ມຣຓສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ໂຂ ປເນຕໍ ວຸຕ຺ຕໍ ກິຎ຺ເຈຕໍ ປຏິຈ຺ຈ ວຸຕ຺ຕໍ? ມຣຓສຎ຺ຎາປຣິຈິເຕນ, ຠິກ຺ຂເວ, ຠິກ຺ຂຸໂນ ເຈຕສາ ພຫຸລໍ ວິຫຣໂຕ ຊີວິຕນິກນ຺ຕິຍາ ຈິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ. ເສຍ຺ຍຖາປິ, ຠິກ຺ຂເວ, ກຸກ຺ກຸຏປຕ຺ຕໍ ວາ ນ຺ຫາຣຸທທ຺ທຸລໍ ວາ ອຄ຺ຄິມ຺ຫິ ປກ຺ຂິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ. ເອວເມວໍ ໂຂ, ຠິກ຺ຂເວ, ຠິກ຺ຂຸໂນ ມຣຓສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ຊີວິຕນິກນ຺ຕິຍາ ຈິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ.

‘‘ສເຈ, ຠິກ຺ຂເວ, ຠິກ຺ຂຸໂນ ມຣຓສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ຊີວິຕນິກນ຺ຕິຍາ ຈິຕ຺ຕໍ ອນຸສນ຺ທຫຕິ ອປ຺ປຏິກຸລ຺ຍຕາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ອຠາວິຕາ ເມ ມຣຓສຎ຺ຎາ, ນຕ຺ຖິ ເມ ປຸພ຺ເພນາປຣໍ ວິເສໂສ, ອປ຺ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ສເຈ ປນ, ຠິກ຺ຂເວ, ຠິກ຺ຂຸໂນ ມຣຓສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ຊີວິຕນິກນ຺ຕິຍາ ຈິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ສຸຠາວິຕາ ເມ ມຣຓສຎ຺ຎາ, ອຕ຺ຖິ ເມ ປຸພ຺ເພນາປຣໍ ວິເສໂສ, ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ‘ມຣຓສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ຍໍ ຕໍ ວຸຕ຺ຕໍ ອິທເມຕໍ ປຏິຈ຺ຈ ວຸຕ຺ຕໍ.

‘‘‘ອາຫາເຣ ປຏິກູລສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ໂຂ ປເນຕໍ ວຸຕ຺ຕໍ, ກິຎ຺ເຈຕໍ ປຏິຈ຺ຈ ວຸຕ຺ຕໍ? ອາຫາເຣ ປຏິກູລສຎ຺ຎາປຣິຈິເຕນ, ຠິກ຺ຂເວ, ຠິກ຺ຂຸໂນ ເຈຕສາ ພຫຸລໍ ວິຫຣໂຕ ຣສຕຓ຺ຫາຍ ຈິຕ຺ຕໍ ປຕິລີຍຕິ …ເປ… ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ. ເສຍ຺ຍຖາປິ, ຠິກ຺ຂເວ, ກຸກ຺ກຸຏປຕ຺ຕໍ ວາ ນ຺ຫາຣຸທທ຺ທຸລໍ ວາ ອຄ຺ຄິມ຺ຫິ ປກ຺ຂິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ. ເອວເມວໍ ໂຂ, ຠິກ຺ຂເວ, ຠິກ຺ຂຸໂນ ອາຫາເຣ ປຏິກູລສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ຣສຕຓ຺ຫາຍ ຈິຕ຺ຕໍ ປຕິລີຍຕິ…ເປ… ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ.

‘‘ສເຈ, ຠິກ຺ຂເວ, ຠິກ຺ຂຸໂນ ອາຫາເຣ ປຏິກູລສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ຣສຕຓ຺ຫາຍ ຈິຕ຺ຕໍ ອນຸສນ຺ທຫຕິ ອປ຺ປຏິກຸລ຺ຍຕາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ອຠາວິຕາ ເມ ອາຫາເຣ ປຏິກູລສຎ຺ຎາ, ນຕ຺ຖິ ເມ ປຸພ຺ເພນາປຣໍ ວິເສໂສ, ອປ຺ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ສເຈ ປນ, ຠິກ຺ຂເວ, ຠິກ຺ຂຸໂນ ອາຫາເຣ ປຏິກູລສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ຣສຕຓ຺ຫາຍ ຈິຕ຺ຕໍ ປຕິລີຍຕິ…ເປ… ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ສຸຠາວິຕາ ເມ ອາຫາເຣ ປຏິກູລສຎ຺ຎາ, ອຕ຺ຖິ ເມ ປຸພ຺ເພນາປຣໍ ວິເສໂສ, ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ‘ອາຫາເຣ ປຏິກູລສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ຍໍ ຕໍ ວຸຕ຺ຕໍ ອິທເມຕໍ ປຏິຈ຺ຈ ວຸຕ຺ຕໍ.

‘‘‘ສພ຺ພໂລເກ ອນຠິຣຕສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ສພ຺ພໂລເກ ອນຠິຣຕສຎ຺ຎາປຣິຈິເຕນ, ຠິກ຺ຂເວ, ຠິກ຺ຂຸໂນ ເຈຕສາ ພຫຸລໍ ວິຫຣໂຕ ໂລກຈິຕ຺ເຣສຸ ຈິຕ຺ຕໍ ປຕິລີຍຕິ…ເປ… ເສຍ຺ຍຖາປິ ຠິກ຺ຂເວ…ເປ… ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ. ເອວເມວໍ ໂຂ, ຠິກ຺ຂເວ, ຠິກ຺ຂຸໂນ ສພ຺ພໂລເກ ອນຠິຣຕສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ໂລກຈິຕ຺ເຣສຸ ຈິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ.

‘‘ສເຈ, ຠິກ຺ຂເວ, ຠິກ຺ຂຸໂນ ສພ຺ພໂລເກ ອນຠິຣຕສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ໂລກຈິຕ຺ເຣສຸ ຈິຕ຺ຕໍ ອນຸສນ຺ທຫຕິ ອປ຺ປຏິກຸລ຺ຍຕາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ອຠາວິຕາ ເມ ສພ຺ພໂລເກ ອນຠິຣຕສຎ຺ຎາ, ນຕ຺ຖິ ເມ ປຸພ຺ເພນາປຣໍ ວິເສໂສ, ອປ຺ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ສເຈ ປນ, ຠິກ຺ຂເວ, ຠິກ຺ຂຸໂນ ສພ຺ພໂລເກ ອນຠິຣຕສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ໂລກຈິຕ຺ເຣສຸ ຈິຕ຺ຕໍ ປຕິລີຍຕິ…ເປ… ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ສຸຠາວິຕາ ເມ ສພ຺ພໂລເກ ອນຠິຣຕສຎ຺ຎາ, ອຕ຺ຖິ ເມ ປຸພ຺ເພນາປຣໍ ວິເສໂສ, ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ‘ສພ຺ພໂລເກ ອນຠິຣຕສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ຍໍ ຕໍ ວຸຕ຺ຕໍ ອິທເມຕໍ ປຏິຈ຺ຈ ວຸຕ຺ຕໍ.

‘‘‘ອນິຈ຺ຈສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ອນິຈ຺ຈສຎ຺ຎາປຣິຈິເຕນ, ຠິກ຺ຂເວ, ຠິກ຺ຂຸໂນ ເຈຕສາ ພຫຸລໍ ວິຫຣໂຕ ລາຠສກ຺ກາຣສິໂລເກ ຈິຕ຺ຕໍ ປຕິລີຍຕິ…ເປ… ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ. ເສຍ຺ຍຖາປິ, ຠິກ຺ຂເວ, ກຸກ຺ກຸຏປຕ຺ຕໍ ວາ ນ຺ຫາຣຸທທ຺ທຸລໍ ວາ ອຄ຺ຄິມ຺ຫິ ປກ຺ຂິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ ນ ສມ຺ປສາຣິຍຕິ. ເອວເມວໍ ໂຂ, ຠິກ຺ຂເວ, ຠິກ຺ຂຸໂນ ອນິຈ຺ຈສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ລາຠສກ຺ກາຣສິໂລເກ ຈິຕ຺ຕໍ ປຕິລີຍຕິ…ເປ… ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ.

‘‘ສເຈ, ຠິກ຺ຂເວ, ຠິກ຺ຂຸໂນ ອນິຈ຺ຈສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ລາຠສກ຺ກາຣສິໂລເກ ຈິຕ຺ຕໍ ອນຸສນ຺ທຫຕິ ອປ຺ປຏິກຸລ຺ຍຕາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ອຠາວິຕາ ເມ ອນິຈ຺ຈສຎ຺ຎາ, ນຕ຺ຖິ ເມ ປຸພ຺ເພນາປຣໍ ວິເສໂສ, ອປ຺ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ສເຈ ປນ, ຠິກ຺ຂເວ, ຠິກ຺ຂຸໂນ ອນິຈ຺ຈສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ລາຠສກ຺ກາຣສິໂລເກ ຈິຕ຺ຕໍ ປຕິລີຍຕິ ປຕິກຸຏຕິ ປຕິວຕ຺ຕຕິ, ນ ສມ຺ປສາຣິຍຕິ ອຸເປກ຺ຂາ ວາ ປາຏິກຸລ຺ຍຕາ ວາ ສຓ຺ຐາຕິ; ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ສຸຠາວິຕາ ເມ ອນິຈ຺ຈສຎ຺ຎາ, ອຕ຺ຖິ ເມ ປຸພ຺ເພນາປຣໍ ວິເສໂສ, ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ‘ອນິຈ຺ຈສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ຍໍ ຕໍ ວຸຕ຺ຕໍ ອິທເມຕໍ ປຏິຈ຺ຈ ວຸຕ຺ຕໍ.

‘‘‘ອນິຈ຺ເຈ ທຸກ຺ຂສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ອນິຈ຺ເຈ ທຸກ຺ຂສຎ຺ຎາປຣິຈິເຕນ, ຠິກ຺ຂເວ, ຠິກ຺ຂຸໂນ ເຈຕສາ ພຫຸລໍ ວິຫຣໂຕ ອາລສ຺ເຍ ໂກສຊ຺ເຊ ວິສ຺ສຏ຺ຐິເຍ ປມາເທ ອນນຸໂຍເຄ ອປຈ຺ຈເວກ຺ຂຓາຍ ຕິພ຺ພາ ຠຍສຎ຺ຎາ ປຈ຺ຈຸປຏ຺ຐິຕາ ໂຫຕິ, ເສຍ຺ຍຖາປິ, ຠິກ຺ຂເວ, ອຸກ຺ຂິຕ຺ຕາສິເກ ວຘເກ.

‘‘ສເຈ, ຠິກ຺ຂເວ, ຠິກ຺ຂຸໂນ ອນິຈ຺ເຈ ທຸກ຺ຂສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ອາລສ຺ເຍ ໂກສຊ຺ເຊ ວິສ຺ສຏ຺ຐິເຍ ປມາເທ ອນນຸໂຍເຄ ອປຈ຺ຈເວກ຺ຂຓາຍ ຕິພ຺ພາ ຠຍສຎ຺ຎາ, ນ ປຈ຺ຈຸປຏ຺ຐິຕາ ໂຫຕິ, ເສຍ຺ຍຖາປິ, ຠິກ຺ຂເວ, ອຸກ຺ຂິຕ຺ຕາສິເກ ວຘເກ. ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ອຠາວິຕາ ເມ ອນິຈ຺ເຈ ທຸກ຺ຂສຎ຺ຎາ, ນຕ຺ຖິ ເມ ປຸພ຺ເພນາປຣໍ ວິເສໂສ, ອປ຺ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ສເຈ ປນ, ຠິກ຺ຂເວ, ຠິກ຺ຂຸໂນ ອນິຈ຺ເຈ ທຸກ຺ຂສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ອາລສ຺ເຍ ໂກສຊ຺ເຊ ວິສ຺ສຏ຺ຐິເຍ ປມາເທ ອນນຸໂຍເຄ ອປຈ຺ຈເວກ຺ຂຓາຍ ຕິພ຺ພາ ຠຍສຎ຺ຎາ ປຈ຺ຈຸປຏ຺ຐິຕາ ໂຫຕິ, ເສຍ຺ຍຖາປິ, ຠິກ຺ຂເວ, ອຸກ຺ຂິຕ຺ຕາສິເກ ວຘເກ. ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ສຸຠາວິຕາ ເມ ອນິຈ຺ເຈ ທຸກ຺ຂສຎ຺ຎາ, ອຕ຺ຖິ ເມ ປຸພ຺ເພນາປຣໍ ວິເສໂສ, ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ‘ອນິຈ຺ເຈ ທຸກ຺ຂສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ຍໍ ຕໍ ວຸຕ຺ຕໍ ອິທເມຕໍ ປຏິຈ຺ຈ ວຸຕ຺ຕໍ.

‘‘‘ທຸກ຺ເຂ ອນຕ຺ຕສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ໂຂ ປເນຕໍ ວຸຕ຺ຕໍ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ທຸກ຺ເຂ ອນຕ຺ຕສຎ຺ຎາປຣິຈິເຕນ, ຠິກ຺ຂເວ, ຠິກ຺ຂຸໂນ ເຈຕສາ ພຫຸລໍ ວິຫຣໂຕ ອິມສ຺ມິຎ຺ຈ ສວິຎ຺ຎາຓເກ ກາເຍ ພຫິທ຺ຘາ ຈ ສພ຺ພນິມິຕ຺ເຕສຸ ອຫງ຺ກາຣມມງ຺ກາຣມານາປຄຕໍ ມານສໍ ໂຫຕິ ວິຘາສມຕິກ຺ກນ຺ຕໍ ສນ຺ຕໍ ສຸວິມຸຕ຺ຕໍ.

‘‘ສເຈ, ຠິກ຺ຂເວ, ຠິກ຺ຂຸໂນ ທຸກ຺ເຂ ອນຕ຺ຕສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ອິມສ຺ມິຎ຺ຈ ສວິຎ຺ຎາຓເກ ກາເຍ ພຫິທ຺ຘາ ຈ ສພ຺ພນິມິຕ຺ເຕສຸ ນ ອຫງ຺ກາຣມມງ຺ກາຣມານາປຄຕໍ ມານສໍ ໂຫຕິ ວິຘາສມຕິກ຺ກນ຺ຕໍ ສນ຺ຕໍ ສຸວິມຸຕ຺ຕໍ. ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ອຠາວິຕາ ເມ ທຸກ຺ເຂ ອນຕ຺ຕສຎ຺ຎາ, ນຕ຺ຖິ ເມ ປຸພ຺ເພນາປຣໍ ວິເສໂສ, ອປ຺ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ.

‘‘ສເຈ ປນ, ຠິກ຺ຂເວ, ຠິກ຺ຂຸໂນ ທຸກ຺ເຂ ອນຕ຺ຕສຎ຺ຎາປຣິຈິເຕນ ເຈຕສາ ພຫຸລໍ ວິຫຣໂຕ ອິມສ຺ມິຎ຺ຈ ສວິຎ຺ຎາຓເກ ກາເຍ ພຫິທ຺ຘາ ຈ ສພ຺ພນິມິຕ຺ເຕສຸ ອຫງ຺ກາຣມມງ຺ກາຣມານາປຄຕໍ ມານສໍ ໂຫຕິ ວິຘາສມຕິກ຺ກນ຺ຕໍ ສນ຺ຕໍ ສຸວິມຸຕ຺ຕໍ. ເວທິຕພ຺ພເມຕໍ, ຠິກ຺ຂເວ, ຠິກ຺ຂຸນາ ‘ສຸຠາວິຕາ ເມ ທຸກ຺ເຂ ອນຕ຺ຕສຎ຺ຎາ, ອຕ຺ຖິ ເມ ປຸພ຺ເພນາປຣໍ ວິເສໂສ, ປຕ຺ຕໍ ເມ ຠາວນາພລ’ນ຺ຕິ. ອິຕິຫ ຕຕ຺ຖ ສມ຺ປຊາໂນ ໂຫຕິ. ‘ທຸກ຺ເຂ ອນຕ຺ຕສຎ຺ຎາ, ຠິກ຺ຂເວ, ຠາວິຕາ ພຫຸລີກຕາ ມຫປ຺ຜລາ ໂຫຕິ ມຫານິສໍສາ ອມໂຕຄຘາ ອມຕປຣິໂຍສານາ’ຕິ, ອິຕິ ຍໍ ຕໍ ວຸຕ຺ຕໍ ອິທເມຕໍ ປຏິຈ຺ຈ ວຸຕ຺ຕໍ.

‘‘ອິມາ ໂຂ, ຠິກ຺ຂເວ, ສຕ຺ຕ ສຎ຺ຎາ ຠາວິຕາ ພຫຸລີກຕາ ມຫປ຺ຜລາ ໂຫນ຺ຕິ ມຫານິສໍສາ ອມໂຕຄຘາ ອມຕປຣິໂຍສານາ’’ຕິ. ຉຏ຺ຐໍ.