໔. ທຸຕິຍອຄ຺ຄິສຸຕ຺ຕໍ

໔໗. ເຕນ ໂຂ ປນ ສມເຍນ ອຸຄ຺ຄຕສຣີຣສ຺ສ ພ຺ຣາຫ຺ມຓສ຺ສ ມຫາຍຎ຺ໂຎ ອຸປກ຺ຂໂຏ ໂຫຕິ. ປຎ຺ຈ ອຸສຠສຕານິ ຖູຓູປນີຕານິ ໂຫນ຺ຕິ ຍຎ຺ຎຕ຺ຖາຍ, ປຎ຺ຈ ວຈ຺ຉຕຣສຕານິ ຖູຓູປນີຕານິ ໂຫນ຺ຕິ ຍຎ຺ຎຕ຺ຖາຍ, ປຎ຺ຈ ວຈ຺ຉຕຣິສຕານິ ຖູຓູປນີຕານິ ໂຫນ຺ຕິ ຍຎ຺ຎຕ຺ຖາຍ, ປຎ຺ຈ ອຊສຕານິ ຖູຓູປນີຕານິ ໂຫນ຺ຕິ ຍຎ຺ຎຕ຺ຖາຍ, ປຎ຺ຈ ອຸຣພ຺ຠສຕານິ ຖູຓູປນີຕານິ ໂຫນ຺ຕິ ຍຎ຺ຎຕ຺ຖາຍ. ອຖ ໂຂ ອຸຄ຺ຄຕສຣີໂຣ ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອຸຄ຺ຄຕສຣີໂຣ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ –

‘‘ສຸຕໍ ເມຕໍ, ໂຠ ໂຄຕມ, ອຄ຺ຄິສ຺ສ ອາທານໍ [ອາຘານໍ (ສີ. ສ຺ຍາ.)] ຍູປສ຺ສ ອຸສ຺ສາປນໍ ມຫປ຺ຜລໍ ໂຫຕິ ມຫານິສໍສ’’ນ຺ຕິ. ‘‘ມຍາປິ ໂຂ ເອຕໍ, ພ຺ຣາຫ຺ມຓ, ສຸຕໍ ອຄ຺ຄິສ຺ສ ອາທານໍ ຍູປສ຺ສ ອຸສ຺ສາປນໍ ມຫປ຺ຜລໍ ໂຫຕິ ມຫານິສໍສ’’ນ຺ຕິ. ທຸຕິຍມ຺ປິ ໂຂ ອຸຄ຺ຄຕສຣີໂຣ ພ຺ຣາຫ຺ມໂຓ…ເປ… ຕຕິຍມ຺ປິ ໂຂ ອຸຄ຺ຄຕສຣີໂຣ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘ສຸຕໍ ເມຕໍ, ໂຠ ໂຄຕມ, ອຄ຺ຄິສ຺ສ ອາທານໍ ຍູປສ຺ສ ອຸສ຺ສາປນໍ ມຫປ຺ຜລໍ ໂຫຕິ ມຫານິສໍສ’’ນ຺ຕິ. ‘‘ມຍາປິ ໂຂ ເອຕໍ, ພ຺ຣາຫ຺ມຓ, ສຸຕໍ ອຄ຺ຄິສ຺ສ ອາທານໍ ຍູປສ຺ສ ອຸສ຺ສາປນໍ ມຫປ຺ຜລໍ ໂຫຕິ ມຫານິສໍສ’’ນ຺ຕິ. ‘‘ຕຍິທໍ, ໂຠ ໂຄຕມ, ສເມຕິ ໂຠໂຕ ເຈວ ໂຄຕມສ຺ສ ອມ຺ຫາກຎ຺ຈ, ຍທິທໍ ສພ຺ເພນ ສພ຺ພໍ’’.

ເອວໍ ວຸຕ຺ເຕ ອາຍສ຺ມາ ອານນ຺ໂທ ອຸຄ຺ຄຕສຣີຣໍ ພ຺ຣາຫ຺ມຓໍ ເອຕທໂວຈ – ‘‘ນ ໂຂ, ພ຺ຣາຫ຺ມຓ, ຕຖາຄຕາ ເອວໍ ປຸຈ຺ຉິຕພ຺ພາ – ‘ສຸຕໍ ເມຕໍ, ໂຠ ໂຄຕມ, ອຄ຺ຄິສ຺ສ ອາທານໍ ຍູປສ຺ສ ອຸສ຺ສາປນໍ ມຫປ຺ຜລໍ ໂຫຕິ ມຫານິສໍສ’ນ຺ຕິ. ເອວໍ ໂຂ, ພ຺ຣາຫ຺ມຓ, ຕຖາຄຕາ ປຸຈ຺ຉິຕພ຺ພາ – ‘ອຫຎ຺ຫິ, ຠນ຺ເຕ, ອຄ຺ຄິໍ [ອຄ຺ຄິສ຺ສ (ກ.)] ອາທາຕຸກາໂມ, [ອາຘາຕຸກາໂມ (ສີ. ສ຺ຍາ.)] ຍູປໍ ອຸສ຺ສາເປຕຸກາໂມ. ໂອວທຕຸ ມໍ, ຠນ຺ເຕ, ຠຄວາ. ອນຸສາສຕຸ ມໍ, ຠນ຺ເຕ, ຠຄວາ ຍໍ ມມ ອສ຺ສ ທີຆຣຕ຺ຕໍ ຫິຕາຍ ສຸຂາຍາ’’’ຕິ.

ອຖ ໂຂ ອຸຄ຺ຄຕສຣີໂຣ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘ອຫຎ຺ຫິ, ໂຠ ໂຄຕມ, ອຄ຺ຄິໍ ອາທາຕຸກາໂມ ຍູປໍ ອຸສ຺ສາເປຕຸກາໂມ. ໂອວທຕຸ ມໍ ຠວໍ ໂຄຕໂມ. ອນຸສາສຕຸ ມໍ ຠວໍ ໂຄຕໂມ ຍໍ ມມ ອສ຺ສ ທີຆຣຕ຺ຕໍ ຫິຕາຍ ສຸຂາຍາ’’ຕິ.

‘‘ອຄ຺ຄິໍ, ພ຺ຣາຫ຺ມຓ, ອາເທນ຺ໂຕ [ອາເຘນ຺ໂຕ (ສີ. ສ຺ຍາ.)] ຍູປໍ ອຸສ຺ສາເປນ຺ໂຕ ປຸພ຺ເພວ ຍຎ຺ຎາ ຕີຓິ ສຕ຺ຖານິ ອຸສ຺ສາເປຕິ ອກຸສລານິ ທຸກ຺ຂຸທ຺ຣຍານິ [ທຸກ຺ຂຸທ຺ທຍານິ (ສີ.)] ທຸກ຺ຂວິປາການິ. ກຕມານິ ຕີຓິ? ກາຍສຕ຺ຖໍ, ວຈີສຕ຺ຖໍ, ມໂນສຕ຺ຖໍ. ອຄ຺ຄິໍ, ພ຺ຣາຫ຺ມຓ, ອາເທນ຺ໂຕ ຍູປໍ ອຸສ຺ສາເປນ຺ໂຕ ປຸພ຺ເພວ ຍຎ຺ຎາ ເອວໍ ຈິຕ຺ຕໍ ອຸປ຺ປາເທສິ – ‘ເອຕ຺ຕກາ ອຸສຠາ ຫຎ຺ຎນ຺ຕຸ ຍຎ຺ຎຕ຺ຖາຍ, ເອຕ຺ຕກາ ວຈ຺ຉຕຣາ ຫຎ຺ຎນ຺ຕຸ ຍຎ຺ຎຕ຺ຖາຍ, ເອຕ຺ຕກາ ວຈ຺ຉຕຣິໂຍ ຫຎ຺ຎນ຺ຕຸ ຍຎ຺ຎຕ຺ຖາຍ, ເອຕ຺ຕກາ ອຊາ ຫຎ຺ຎນ຺ຕຸ ຍຎ຺ຎຕ຺ຖາຍ, ເອຕ຺ຕກາ ອຸຣພ຺ຠາ ຫຎ຺ຎນ຺ຕຸ ຍຎ຺ຎຕ຺ຖາຍາ’ຕິ. ໂສ ‘ປຸຎ຺ຎໍ ກໂຣມີ’ຕິ ອປຸຎ຺ຎໍ ກໂຣຕິ, ‘ກຸສລໍ ກໂຣມີ’ຕິ ອກຸສລໍ ກໂຣຕິ, ‘ສຸຄຕິຍາ ມຄ຺ຄໍ ປຣິເຍສາມີ’ຕິ ທຸຄ຺ຄຕິຍາ ມຄ຺ຄໍ ປຣິເຍສຕິ. ອຄ຺ຄິໍ, ພ຺ຣາຫ຺ມຓ, ອາເທນ຺ໂຕ ຍູປໍ ອຸສ຺ສາເປນ຺ໂຕ ປຸພ຺ເພວ ຍຎ຺ຎາ ອິທໍ ປຐມໍ ມໂນສຕ຺ຖໍ ອຸສ຺ສາເປຕິ ອກຸສລໍ ທຸກ຺ຂຸທ຺ຣຍໍ ທຸກ຺ຂວິປາກໍ.

‘‘ປຸນ ຈປຣໍ, ພ຺ຣາຫ຺ມຓ, ອຄ຺ຄິໍ ອາເທນ຺ໂຕ ຍູປໍ ອຸສ຺ສາເປນ຺ໂຕ ປຸພ຺ເພວ ຍຎ຺ຎາ ເອວໍ ວາຈໍ ຠາສຕິ – ‘ເອຕ຺ຕກາ ອຸສຠາ ຫຎ຺ຎນ຺ຕຸ ຍຎ຺ຎຕ຺ຖາຍ, ເອຕ຺ຕກາ ວຈ຺ຉຕຣາ ຫຎ຺ຎນ຺ຕຸ ຍຎ຺ຎຕ຺ຖາຍ, ເອຕ຺ຕກາ ວຈ຺ຉຕຣິໂຍ ຫຎ຺ຎນ຺ຕຸ ຍຎ຺ຎຕ຺ຖາຍ, ເອຕ຺ຕກາ ອຊາ ຫຎ຺ຎນ຺ຕຸ ຍຎ຺ຎຕ຺ຖາຍ, ເອຕ຺ຕກາ ອຸຣພ຺ຠາ ຫຎ຺ຎນ຺ຕຸ ຍຎ຺ຎຕ຺ຖາຍາ’ຕິ. ໂສ ‘ປຸຎ຺ຎໍ ກໂຣມີ’ຕິ ອປຸຎ຺ຎໍ ກໂຣຕິ, ‘ກຸສລໍ ກໂຣມີ’ຕິ ອກຸສລໍ ກໂຣຕິ, ‘ສຸຄຕິຍາ ມຄ຺ຄໍ ປຣິເຍສາມີ’ຕິ ທຸຄ຺ຄຕິຍາ ມຄ຺ຄໍ ປຣິເຍສຕິ. ອຄ຺ຄິໍ, ພ຺ຣາຫ຺ມຓ, ອາເທນ຺ໂຕ ຍູປໍ ອຸສ຺ສາເປນ຺ໂຕ ປຸພ຺ເພວ ຍຎ຺ຎາ ອິທໍ ທຸຕິຍໍ ວຈີສຕ຺ຖໍ ອຸສ຺ສາເປຕິ ອກຸສລໍ ທຸກ຺ຂຸທ຺ຣຍໍ ທຸກ຺ຂວິປາກໍ.

‘‘ປຸນ ຈປຣໍ, ພ຺ຣາຫ຺ມຓ, ອຄ຺ຄິໍ ອາເທນ຺ໂຕ ຍູປໍ ອຸສ຺ສາເປນ຺ໂຕ ປຸພ຺ເພວ ຍຎ຺ຎາ ສຍໍ ປຐມໍ ສມາຣມ຺ຠຕິ [ສມາຣພ຺ຠຕິ (ສີ. ກ.), ສມາຣຠຕິ (ສ຺ຍາ.)] ອຸສຠາ ຫນ຺ຕຸໍ [ຫຎ຺ຎນ຺ຕຸ (ສີ. ສ຺ຍາ.)] ຍຎ຺ຎຕ຺ຖາຍ, ສຍໍ ປຐມໍ ສມາຣມ຺ຠຕິ ວຈ຺ຉຕຣາ ຫນ຺ຕຸໍ ຍຎ຺ຎຕ຺ຖາຍ, ສຍໍ ປຐມໍ ສມາຣມ຺ຠຕິ ວຈ຺ຉຕຣິໂຍ ຫນ຺ຕຸໍ ຍຎ຺ຎຕ຺ຖາຍ, ສຍໍ ປຐມໍ ສມາຣມ຺ຠຕິ ອຊາ ຫນ຺ຕຸໍ ຍຎ຺ຎຕ຺ຖາຍ, ສຍໍ ປຐມໍ ສມາຣມ຺ຠຕິ ອຸຣພ຺ຠາ ຫນ຺ຕຸໍ ຍຎ຺ຎຕ຺ຖາຍ [ຫຎ຺ຎນ຺ຕຸ ຍຎ຺ຎຕ຺ຖາຍາຕິ (ສີ. ສ຺ຍາ.)]. ໂສ ‘ປຸຎ຺ຎໍ ກໂຣມີ’ຕິ ອປຸຎ຺ຎໍ ກໂຣຕິ, ‘ກຸສລໍ ກໂຣມີ’ຕິ ອກຸສລໍ ກໂຣຕິ, ‘ສຸຄຕິຍາ ມຄ຺ຄໍ ປຣິເຍສາມີ’ຕິ ທຸຄ຺ຄຕິຍາ ມຄ຺ຄໍ ປຣິເຍສຕິ. ອຄ຺ຄິໍ, ພ຺ຣາຫ຺ມຓ, ອາເທນ຺ໂຕ ຍູປໍ ອຸສ຺ສາເປນ຺ໂຕ ປຸພ຺ເພວ ຍຎ຺ຎາ ອິທໍ ຕຕິຍໍ ກາຍສຕ຺ຖໍ ອຸສ຺ສາເປຕິ ອກຸສລໍ ທຸກ຺ຂຸທ຺ຣຍໍ ທຸກ຺ຂວິປາກໍ. ອຄ຺ຄິໍ, ພ຺ຣາຫ຺ມຓ, ອາເທນ຺ໂຕ ຍູປໍ ອຸສ຺ສາເປນ຺ໂຕ ປຸພ຺ເພວ ຍຎ຺ຎາ ອິມານິ ຕີຓິ ສຕ຺ຖານິ ອຸສ຺ສາເປຕິ ອກຸສລານິ ທຸກ຺ຂຸທ຺ຣຍານິ ທຸກ຺ຂວິປາການິ.

‘‘ຕໂຍເມ, ພ຺ຣາຫ຺ມຓ, ອຄ຺ຄີ ປຫາຕພ຺ພາ ປຣິວຊ຺ເຊຕພ຺ພາ, ນ ເສວິຕພ຺ພາ. ກຕເມ ຕໂຍ? ຣາຄຄ຺ຄິ, ໂທສຄ຺ຄິ, ໂມຫຄ຺ຄິ.

‘‘ກສ຺ມາ ຈາຍໍ, ພ຺ຣາຫ຺ມຓ, ຣາຄຄ຺ຄິ ປຫາຕພ຺ໂພ ປຣິວຊ຺ເຊຕພ຺ໂພ, ນ ເສວິຕພ຺ໂພ? ຣຕ຺ໂຕ ໂຂ, ພ຺ຣາຫ຺ມຓ, ຣາເຄນ ອຠິຠູໂຕ ປຣິຍາທິນ຺ນຈິຕ຺ໂຕ ກາເຍນ ທຸຈ຺ຈຣິຕໍ ຈຣຕິ, ວາຈາຍ ທຸຈ຺ຈຣິຕໍ ຈຣຕິ, ມນສາ ທຸຈ຺ຈຣິຕໍ ຈຣຕິ. ໂສ ກາເຍນ ທຸຈ຺ຈຣິຕໍ ຈຣິຕ຺ວາ, ວາຈາຍ ທຸຈ຺ຈຣິຕໍ ຈຣິຕ຺ວາ, ມນສາ ທຸຈ຺ຈຣິຕໍ ຈຣິຕ຺ວາ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ຕສ຺ມາຍໍ ຣາຄຄ຺ຄິ ປຫາຕພ຺ໂພ ປຣິວຊ຺ເຊຕພ຺ໂພ, ນ ເສວິຕພ຺ໂພ.

‘‘ກສ຺ມາ ຈາຍໍ, ພ຺ຣາຫ຺ມຓ, ໂທສຄ຺ຄິ ປຫາຕພ຺ໂພ ປຣິວຊ຺ເຊຕພ຺ໂພ, ນ ເສວິຕພ຺ໂພ? ທຸຏ຺ໂຐ ໂຂ, ພ຺ຣາຫ຺ມຓ, ໂທເສນ ອຠິຠູໂຕ ປຣິຍາທິນ຺ນຈິຕ຺ໂຕ ກາເຍນ ທຸຈ຺ຈຣິຕໍ ຈຣຕິ, ວາຈາຍ ທຸຈ຺ຈຣິຕໍ ຈຣຕິ, ມນສາ ທຸຈ຺ຈຣິຕໍ ຈຣຕິ. ໂສ ກາເຍນ ທຸຈ຺ຈຣິຕໍ ຈຣິຕ຺ວາ, ວາຈາຍ ທຸຈ຺ຈຣິຕໍ ຈຣິຕ຺ວາ, ມນສາ ທຸຈ຺ຈຣິຕໍ ຈຣິຕ຺ວາ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ຕສ຺ມາຍໍ ໂທສຄ຺ຄິ ປຫາຕພ຺ໂພ ປຣິວຊ຺ເຊຕພ຺ໂພ, ນ ເສວິຕພ຺ໂພ.

‘‘ກສ຺ມາ ຈາຍໍ, ພ຺ຣາຫ຺ມຓ, ໂມຫຄ຺ຄິ ປຫາຕພ຺ໂພ ປຣິວຊ຺ເຊຕພ຺ໂພ, ນ ເສວິຕພ຺ໂພ? ມູຬ຺ໂຫ ໂຂ, ພ຺ຣາຫ຺ມຓ, ໂມເຫນ ອຠິຠູໂຕ ປຣິຍາທິນ຺ນຈິຕ຺ໂຕ ກາເຍນ ທຸຈ຺ຈຣິຕໍ ຈຣຕິ, ວາຈາຍ ທຸຈ຺ຈຣິຕໍ ຈຣຕິ, ມນສາ ທຸຈ຺ຈຣິຕໍ ຈຣຕິ. ໂສ ກາເຍນ ທຸຈ຺ຈຣິຕໍ ຈຣິຕ຺ວາ, ວາຈາຍ ທຸຈ຺ຈຣິຕໍ ຈຣິຕ຺ວາ, ມນສາ ທຸຈ຺ຈຣິຕໍ ຈຣິຕ຺ວາ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ຕສ຺ມາຍໍ ໂມຫຄ຺ຄິ ປຫາຕພ຺ໂພ ປຣິວຊ຺ເຊຕພ຺ໂພ, ນ ເສວິຕພ຺ໂພ. ອິເມ ໂຂ ຕໂຍ, ພ຺ຣາຫ຺ມຓ, ອຄ຺ຄີ ປຫາຕພ຺ພາ ປຣິວຊ຺ເຊຕພ຺ພາ, ນ ເສວິຕພ຺ພາ.

‘‘ຕໂຍ ໂຂ, ພ຺ຣາຫ຺ມຓ, ອຄ຺ຄີ ສກ຺ກຕ຺ວາ ຄຣຸໍ ກຕ຺ວາ ມາເນຕ຺ວາ ປູເຊຕ຺ວາ ສມ຺ມາ ສຸຂໍ ປຣິຫາຕພ຺ພາ. ກຕເມ ຕໂຍ? ອາຫຸເນຍ຺ຍຄ຺ຄິ, ຄຫປຕຄ຺ຄິ, ທກ຺ຂິເຓຍ຺ຍຄ຺ຄິ.

‘‘ກຕໂມ ຈ, ພ຺ຣາຫ຺ມຓ, ອາຫຸເນຍ຺ຍຄ຺ຄິ? ອິຘ, ພ຺ຣາຫ຺ມຓ, ຍສ຺ສ ເຕ ໂຫນ຺ຕິ ມາຕາຕິ ວາ ປິຕາຕິ ວາ, ອຍໍ ວຸຈ຺ຈຕິ, ພ຺ຣາຫ຺ມຓ, ອາຫຸເນຍ຺ຍຄ຺ຄິ. ຕໍ ກິສ຺ສ ເຫຕຸ? ອໂຕຫຍໍ [ອິໂຕປາຍໍ (ກ.)], ພ຺ຣາຫ຺ມຓ, ອາຫຸໂຕ ສມ຺ຠູໂຕ, ຕສ຺ມາຍໍ ອາຫຸເນຍ຺ຍຄ຺ຄິ ສກ຺ກຕ຺ວາ ຄຣຸໍ ກຕ຺ວາ ມາເນຕ຺ວາ ປູເຊຕ຺ວາ ສມ຺ມາ ສຸຂໍ ປຣິຫາຕພ຺ໂພ.

‘‘ກຕໂມ ຈ, ພ຺ຣາຫ຺ມຓ, ຄຫປຕຄ຺ຄິ? ອິຘ, ພ຺ຣາຫ຺ມຓ, ຍສ຺ສ ເຕ ໂຫນ຺ຕິ ປຸຕ຺ຕາຕິ ວາ ທາຣາຕິ ວາ ທາສາຕິ ວາ ເປສ຺ສາຕິ ວາ ກມ຺ມກຣາຕິ ວາ, ອຍໍ ວຸຈ຺ຈຕິ, ພ຺ຣາຫ຺ມຓ, ຄຫປຕຄ຺ຄິ. ຕສ຺ມາຍໍ ຄຫປຕຄ຺ຄິ ສກ຺ກຕ຺ວາ ຄຣຸໍ ກຕ຺ວາ ມາເນຕ຺ວາ ປູເຊຕ຺ວາ ສມ຺ມາ ສຸຂໍ ປຣິຫາຕພ຺ໂພ.

‘‘ກຕໂມ ຈ, ພ຺ຣາຫ຺ມຓ, ທກ຺ຂິເຓຍ຺ຍຄ຺ຄິ? ອິຘ, ພ຺ຣາຫ຺ມຓ, ເຍ ເຕ ສມຓພ຺ຣາຫ຺ມຓາ ປຣປ຺ປວາທາ ປຏິວິຣຕາ ຂນ຺ຕິໂສຣຈ຺ເຈ ນິວິຏ຺ຐາ ເອກມຕ຺ຕານໍ ທເມນ຺ຕິ, ເອກມຕ຺ຕານໍ ສເມນ຺ຕິ, ເອກມຕ຺ຕານໍ ປຣິນິພ຺ພາເປນ຺ຕິ, ອຍໍ ວຸຈ຺ຈຕິ, ພ຺ຣາຫ຺ມຓ, ທກ຺ຂິເຓຍ຺ຍຄ຺ຄິ. ຕສ຺ມາຍໍ ທກ຺ຂິເຓຍ຺ຍຄ຺ຄິ ສກ຺ກຕ຺ວາ ຄຣຸໍ ກຕ຺ວາ ມາເນຕ຺ວາ ປູເຊຕ຺ວາ ສມ຺ມາ ສຸຂໍ ປຣິຫາຕພ຺ໂພ. ອິເມ ໂຂ, ພ຺ຣາຫ຺ມຓ, ຕໂຍ ອຄ຺ຄີ ສກ຺ກຕ຺ວາ ຄຣຸໍ ກຕ຺ວາ ມາເນຕ຺ວາ ປູເຊຕ຺ວາ ສມ຺ມາ ສຸຂໍ ປຣິຫາຕພ຺ພາ.

‘‘ອຍໍ ໂຂ ປນ, ພ຺ຣາຫ຺ມຓ, ກຏ຺ຐຄ຺ຄິ ກາເລນ ກາລໍ ອຸຊ຺ຊເລຕພ຺ໂພ, ກາເລນ ກາລໍ ອຊ຺ຌຸເປກ຺ຂິຕພ຺ໂພ, ກາເລນ ກາລໍ ນິພ຺ພາເປຕພ຺ໂພ, ກາເລນ ກາລໍ ນິກ຺ຂິປິຕພ຺ໂພ’’ຕິ.

ເອວໍ ວຸຕ຺ເຕ ອຸຄ຺ຄຕສຣີໂຣ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘ອຠິກ຺ກນ຺ຕໍ, ໂຠ ໂຄຕມ; ອຠິກ຺ກນ຺ຕໍ, ໂຠ ໂຄຕມ…ເປ… ອຸປາສກໍ ມໍ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕນ຺ຕິ. ເອສາຫໍ, ໂຠ ໂຄຕມ, ປຎ຺ຈ ອຸສຠສຕານິ ມຸຎ຺ຈາມິ ຊີວິຕໍ ເທມິ, ປຎ຺ຈ ວຈ຺ຉຕຣສຕານິ ມຸຎ຺ຈາມິ ຊີວິຕໍ ເທມິ, ປຎ຺ຈ ວຈ຺ຉຕຣິສຕານິ ມຸຎ຺ຈາມິ ຊີວິຕໍ ເທມິ, ປຎ຺ຈ ອຊສຕານິ ມຸຎ຺ຈາມິ ຊີວິຕໍ ເທມິ, ປຎ຺ຈ ອຸຣພ຺ຠສຕານິ ມຸຎ຺ຈາມິ ຊີວິຕໍ ເທມິ. ຫຣິຕານິ ເຈວ ຕິຓານິ ຂາທນ຺ຕຸ, ສີຕານິ ຈ ປານີຍານິ ປິວນ຺ຕຸ, ສີໂຕ ຈ ເນສໍ ວາໂຕ ອຸປວາຍຕ’’ນ຺ຕິ [ອຸປວາຍຕູຕິ (ກ.)]. ຈຕຸຕ຺ຖໍ.