໘. ທຸຕິຍປຏິສມ຺ຠິທາສຸຕ຺ຕໍ

໓໙. ‘‘ສຕ຺ຕຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ສາຣິປຸຕ຺ໂຕ ຈຕສ຺ໂສ ປຏິສມ຺ຠິທາ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕິ. ກຕເມຫິ ສຕ຺ຕຫິ? ອິຘ, ຠິກ຺ຂເວ, ສາຣິປຸຕ຺ໂຕ ‘ອິທໍ ເມ ເຈຕໂສ ລີນຕ຺ຕ’ນ຺ຕິ ຍຖາຠູຕໍ ປຊານາຕິ; ອຊ຺ຌຕ຺ຕໍ ສໍຂິຕ຺ຕໍ ວາ ຈິຕ຺ຕໍ ‘ອຊ຺ຌຕ຺ຕໍ ເມ ສໍຂິຕ຺ຕໍ ຈິຕ຺ຕ’ນ຺ຕິ ຍຖາຠູຕໍ ປຊານາຕິ; ພຫິທ຺ຘາ ວິກ຺ຂິຕ຺ຕໍ ວາ ຈິຕ຺ຕໍ ‘ພຫິທ຺ຘາ ເມ ວິກ຺ຂິຕ຺ຕໍ ຈິຕ຺ຕ’ນ຺ຕິ ຍຖາຠູຕໍ ປຊານາຕິ; ຕສ຺ສ ວິທິຕາ ເວທນາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ; ວິທິຕາ ສຎ຺ຎາ…ເປ… ວິຕກ຺ກາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ; ສປ຺ປາຍາສປ຺ປາເຍສຸ ໂຂ ປນສ຺ສ ຘມ຺ເມສຸ ຫີນປ຺ປຓີເຕສຸ ກຓ຺ຫສຸກ຺ກສປ຺ປຕິຠາເຄສຸ ນິມິຕ຺ຕໍ ສຸຄ຺ຄຫິຕໍ ສຸມນສິກຕໍ ສູປຘາຣິຕໍ ສຸປ຺ປຏິວິທ຺ຘໍ ປຎ຺ຎາຍ. ອິເມຫິ ໂຂ, ຠິກ຺ຂເວ, ສຕ຺ຕຫິ ຘມ຺ເມຫິ ສມນ຺ນາຄໂຕ ສາຣິປຸຕ຺ໂຕ ຈຕສ຺ໂສ ປຏິສມ຺ຠິທາ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕີ’’ຕິ. ອຏ຺ຐມໍ.