໙. ທຸຕິຍປຣິຫານິສຸຕ຺ຕໍ

໒໙. ‘‘ສຕ຺ຕິເມ, ຠິກ຺ຂເວ, ຘມ຺ມາ ອຸປາສກສ຺ສ ປຣິຫານາຍ ສໍວຕ຺ຕນ຺ຕິ. ກຕເມ ສຕ຺ຕ? ຠິກ຺ຂຸທສ຺ສນໍ ຫາເປຕິ, ສທ຺ຘມ຺ມສ຺ສວນໍ ປມຊ຺ຊຕິ, ອຘິສີເລ ນ ສິກ຺ຂຕິ, ອປ຺ປສາທພຫຸໂລ ໂຫຕິ, ຠິກ຺ຂູສຸ ເຖເຣສຸ ເຈວ ນເວສຸ ຈ ມຊ຺ຌິເມສຸ ຈ ອຸປາຣມ຺ຠຈິຕ຺ໂຕ ຘມ຺ມໍ ສຸຓາຕິ ຣນ຺ຘຄເວສີ, ອິໂຕ ພຫິທ຺ຘາ ທກ຺ຂິເຓຍ຺ຍໍ ຄເວສຕິ, ຕຕ຺ຖ ຈ ປຸພ຺ພກາຣໍ ກໂຣຕິ. ອິເມ ໂຂ, ຠິກ຺ຂເວ, ສຕ຺ຕ ຘມ຺ມາ ອຸປາສກສ຺ສ ປຣິຫານາຍ ສໍວຕ຺ຕນ຺ຕິ.

‘‘ສຕ຺ຕິເມ, ຠິກ຺ຂເວ, ຘມ຺ມາ ອຸປາສກສ຺ສ ອປຣິຫານາຍ ສໍວຕ຺ຕນ຺ຕິ. ກຕເມ ສຕ຺ຕ? ຠິກ຺ຂຸທສ຺ສນໍ ນ ຫາເປຕິ, ສທ຺ຘມ຺ມສ຺ສວນໍ ນປ຺ປມຊ຺ຊຕິ, ອຘິສີເລ ສິກ຺ຂຕິ, ປສາທພຫຸໂລ ໂຫຕິ, ຠິກ຺ຂູສຸ ເຖເຣສຸ ເຈວ ນເວສຸ ຈ ມຊ຺ຌິເມສຸ ຈ ອນຸປາຣມ຺ຠຈິຕ຺ໂຕ ຘມ຺ມໍ ສຸຓາຕິ ນ ຣນ຺ຘຄເວສີ, ນ ອິໂຕ ພຫິທ຺ຘາ ທກ຺ຂິເຓຍ຺ຍໍ ຄເວສຕິ, ອິຘ ຈ ປຸພ຺ພກາຣໍ ກໂຣຕິ. ອິເມ ໂຂ, ຠິກ຺ຂເວ, ສຕ຺ຕ ຘມ຺ມາ ອຸປາສກສ຺ສ ອປຣິຫານາຍ ສໍວຕ຺ຕນ຺ຕີ’’ຕິ. ອິທມໂວຈ ຠຄວາ. ອິທໍ ວຕ຺ວານ ສຸຄໂຕ ອຖາປຣໍ ເອຕທໂວຈ ສຕ຺ຖາ –

‘‘ທສ຺ສນໍ ຠາວິຕຕ຺ຕານໍ, ໂຍ ຫາເປຕິ ອຸປາສໂກ;

ສວນຎ຺ຈ ອຣິຍຘມ຺ມານໍ, ອຘິສີເລ ນ ສິກ຺ຂຕິ.

‘‘ອປ຺ປສາໂທ ຈ ຠິກ຺ຂູສຸ, ຠິຍ຺ໂຍ ຠິຍ຺ໂຍ ປວຑ຺ຒຕິ;

ອຸປາຣມ຺ຠກຈິຕ຺ໂຕ ຈ, ສທ຺ຘມ຺ມໍ ໂສຕຸມິຈ຺ຉຕິ.

‘‘ອິໂຕ ຈ ພຫິທ຺ຘາ ອຎ຺ຎໍ, ທກ຺ຂິເຓຍ຺ຍໍ ຄເວສຕິ;

ຕຕ຺ເຖວ ຈ ປຸພ຺ພກາຣໍ, ໂຍ ກໂຣຕິ ອຸປາສໂກ.

‘‘ເອເຕ ໂຂ ປຣິຫານິເຍ, ສຕ຺ຕ ຘມ຺ເມ ສຸເທສິເຕ;

ອຸປາສໂກ ເສວມາໂນ, ສທ຺ຘມ຺ມາ ປຣິຫາຍຕິ.

‘‘ທສ຺ສນໍ ຠາວິຕຕ຺ຕານໍ, ໂຍ ນ ຫາເປຕິ ອຸປາສໂກ;

ສວນຎ຺ຈ ອຣິຍຘມ຺ມານໍ, ອຘິສີເລ ຈ ສິກ຺ຂຕິ.

‘‘ປສາໂທ ຈສ຺ສ ຠິກ຺ຂູສຸ, ຠິຍ຺ໂຍ ຠິຍ຺ໂຍ ປວຑ຺ຒຕິ;

ອນຸປາຣມ຺ຠຈິຕ຺ໂຕ ຈ, ສທ຺ຘມ຺ມໍ ໂສຕຸມິຈ຺ຉຕິ.

‘‘ນ ອິໂຕ ພຫິທ຺ຘາ ອຎ຺ຎໍ, ທກ຺ຂິເຓຍ຺ຍໍ ຄເວສຕິ;

ອິເຘວ ຈ ປຸພ຺ພກາຣໍ, ໂຍ ກໂຣຕິ ອຸປາສໂກ.

‘‘ເອເຕ ໂຂ ອປຣິຫານິເຍ, ສຕ຺ຕ ຘມ຺ເມ ສຸເທສິເຕ;

ອຸປາສໂກ ເສວມາໂນ, ສທ຺ຘມ຺ມາ ນ ປຣິຫາຍຕີ’’ຕິ. ນວມໍ;