໓. ອິຓສຸຕ຺ຕໍ

໔໕. ‘‘ທາລິທ຺ທິຍໍ [ທາຬິທ຺ທິຍໍ (ສີ.)], ຠິກ຺ຂເວ, ທຸກ຺ຂໍ ໂລກສ຺ມິໍ ກາມໂຠຄິໂນ’’ຕິ? ‘‘ເອວໍ, ຠນ຺ເຕ’’. ‘‘ຍມ຺ປິ, ຠິກ຺ຂເວ, ທລິທ຺ໂທ [ທຬິທ຺ໂທ (ສີ.)] ອສ຺ສໂກ ອນາຬ຺ຫິໂກ [ອນທ຺ຘິໂກ (ສ຺ຍາ. ກໍ.)] ອິຓໍ ອາທິຍຕິ, ອິຓາທານມ຺ປິ, ຠິກ຺ຂເວ, ທຸກ຺ຂໍ ໂລກສ຺ມິໍ ກາມໂຠຄິໂນ’’ຕິ? ‘‘ເອວໍ, ຠນ຺ເຕ’’. ‘‘ຍມ຺ປິ, ຠິກ຺ຂເວ, ທລິທ຺ໂທ ອສ຺ສໂກ ອນາຬ຺ຫິໂກ ອິຓໍ ອາທິຍິຕ຺ວາ ວຑ຺ຒິໍ ປຏິສ຺ສຸຓາຕິ, ວຑ຺ຒິປິ, ຠິກ຺ຂເວ, ທຸກ຺ຂາ ໂລກສ຺ມິໍ ກາມໂຠຄິໂນ’’ຕິ? ‘‘ເອວໍ, ຠນ຺ເຕ’’. ‘‘ຍມ຺ປິ, ຠິກ຺ຂເວ, ທລິທ຺ໂທ ອສ຺ສໂກ ອນາຬ຺ຫິໂກ ວຑ຺ຒິໍ ປຏິສ຺ສຸຓິຕ຺ວາ ກາລາຠຕໍ [ກາລຄຕໍ (ກ.)] ວຑ຺ຒິໍ ນ ເທຕິ, ໂຈເທນ຺ຕິປິ ນໍ; ໂຈທນາປິ, ຠິກ຺ຂເວ, ທຸກ຺ຂາ ໂລກສ຺ມິໍ ກາມໂຠຄິໂນ’’ຕິ? ‘‘ເອວໍ, ຠນ຺ເຕ’’. ‘‘ຍມ຺ປິ, ຠິກ຺ຂເວ, ທລິທ຺ໂທ ອສ຺ສໂກ ອນາຬ຺ຫິໂກ ໂຈທິຍມາໂນ ນ ເທຕິ, ອນຸຈຣນ຺ຕິປິ ນໍ; ອນຸຈຣິຍາປິ, ຠິກ຺ຂເວ, ທຸກ຺ຂາ ໂລກສ຺ມິໍ ກາມໂຠຄິໂນ’’ຕິ? ‘‘ເອວໍ, ຠນ຺ເຕ’’. ‘‘ຍມ຺ປິ, ຠິກ຺ຂເວ, ທລິທ຺ໂທ ອສ຺ສໂກ ອນາຬ຺ຫິໂກ ອນຸຈຣິຍມາໂນ ນ ເທຕິ, ພນ຺ຘນ຺ຕິປິ ນໍ; ພນ຺ຘນມ຺ປິ, ຠິກ຺ຂເວ, ທຸກ຺ຂໍ ໂລກສ຺ມິໍ ກາມໂຠຄິໂນ’’ຕິ? ‘‘ເອວໍ, ຠນ຺ເຕ’’.

‘‘ອິຕິ ໂຂ, ຠິກ຺ຂເວ, ທາລິທ຺ທິຍມ຺ປິ ທຸກ຺ຂໍ ໂລກສ຺ມິໍ ກາມໂຠຄິໂນ, ອິຓາທານມ຺ປິ ທຸກ຺ຂໍ ໂລກສ຺ມິໍ ກາມໂຠຄິໂນ, ວຑ຺ຒິປິ ທຸກ຺ຂາ ໂລກສ຺ມິໍ ກາມໂຠຄິໂນ, ໂຈທນາປິ ທຸກ຺ຂາ ໂລກສ຺ມິໍ ກາມໂຠຄິໂນ, ອນຸຈຣິຍາປິ ທຸກ຺ຂາ ໂລກສ຺ມິໍ ກາມໂຠຄິໂນ, ພນ຺ຘນມ຺ປິ ທຸກ຺ຂໍ ໂລກສ຺ມິໍ ກາມໂຠຄິໂນ; ເອວເມວໍ ໂຂ, ຠິກ຺ຂເວ, ຍສ຺ສ ກສ຺ສຈິ ສທ຺ຘາ ນຕ຺ຖິ ກຸສເລສຸ ຘມ຺ເມສຸ, ຫິຣີ ນຕ຺ຖິ ກຸສເລສຸ ຘມ຺ເມສຸ, ໂອຕ຺ຕປ຺ປໍ ນຕ຺ຖິ ກຸສເລສຸ ຘມ຺ເມສຸ, ວີຣິຍໍ ນຕ຺ຖິ ກຸສເລສຸ ຘມ຺ເມສຸ, ປຎ຺ຎາ ນຕ຺ຖິ ກຸສເລສຸ ຘມ຺ເມສຸ – ອຍໍ ວຸຈ຺ຈຕິ, ຠິກ຺ຂເວ, ອຣິຍສ຺ສ ວິນເຍ ທລິທ຺ໂທ ອສ຺ສໂກ ອນາຬ຺ຫິໂກ.

‘‘ສ ໂຂ ໂສ, ຠິກ຺ຂເວ, ທລິທ຺ໂທ ອສ຺ສໂກ ອນາຬ຺ຫິໂກ ສທ຺ຘາຍ ອສຕິ ກຸສເລສຸ ຘມ຺ເມສຸ, ຫິຣິຍາ ອສຕິ ກຸສເລສຸ ຘມ຺ເມສຸ, ໂອຕ຺ຕປ຺ເປ ອສຕິ ກຸສເລສຸ ຘມ຺ເມສຸ, ວີຣິເຍ ອສຕິ ກຸສເລສຸ ຘມ຺ເມສຸ, ປຎ຺ຎາຍ ອສຕິ ກຸສເລສຸ ຘມ຺ເມສຸ, ກາເຍນ ທຸຈ຺ຈຣິຕໍ ຈຣຕິ, ວາຈາຍ ທຸຈ຺ຈຣິຕໍ ຈຣຕິ, ມນສາ ທຸຈ຺ຈຣິຕໍ ຈຣຕິ. ອິທມສ຺ສ ອິຓາທານສ຺ມິໍ ວທາມິ.

‘‘ໂສ ຕສ຺ສ ກາຍທຸຈ຺ຈຣິຕສ຺ສ ປຏິຈ຺ຉາທນເຫຕຸ ປາປິກໍ ອິຈ຺ຉໍ ປຓິທຫຕິ [ປທຫຕິ (ກ.)]. ‘ມາ ມໍ ຊຎ຺ຎູ’ຕິ ອິຈ຺ຉຕິ, ‘ມາ ມໍ ຊຎ຺ຎູ’ຕິ ສງ຺ກປ຺ປຕິ, ‘ມາ ມໍ ຊຎ຺ຎູ’ຕິ ວາຈໍ ຠາສຕິ, ‘ມາ ມໍ ຊຎ຺ຎູ’ຕິ ກາເຍນ ປຣກ຺ກມຕິ. ໂສ ຕສ຺ສ ວຈີທຸຈ຺ຈຣິຕສ຺ສ ປຏິຈ຺ຉາທນເຫຕຸ…ເປ… ໂສ ຕສ຺ສ ມໂນທຸຈ຺ຈຣິຕສ຺ສ ປຏິຈ຺ຉາທນເຫຕຸ…ເປ… ‘ມາ ມໍ ຊຎ຺ຎູ’ຕິ ກາເຍນ ປຣກ຺ກມຕິ. ອິທມສ຺ສ ວຑ຺ຒິຍາ ວທາມິ.

‘‘ຕເມນໍ ເປສລາ ສພ຺ຣຫ຺ມຈາຣີ ເອວມາຫໍສຸ – ‘ອຍຎ຺ຈ ໂສ ອາຍສ຺ມາ ເອວໍກາຣີ ເອວໍສມາຈາໂຣ’ຕິ. ອິທມສ຺ສ ໂຈທນາຍ ວທາມິ.

‘‘ຕເມນໍ ອຣຎ຺ຎຄຕໍ ວາ ຣຸກ຺ຂມູລຄຕໍ ວາ ສຸຎ຺ຎາຄາຣຄຕໍ ວາ ວິປ຺ປຏິສາຣສຫຄຕາ ປາປກາ ອກຸສລວິຕກ຺ກາ ສມຸທາຈຣນ຺ຕິ. ອິທມສ຺ສ ອນຸຈຣິຍາຍ ວທາມິ.

‘‘ສ ໂຂ ໂສ, ຠິກ຺ຂເວ, ທລິທ຺ໂທ ອສ຺ສໂກ ອນາຬ຺ຫິໂກ ກາເຍນ ທຸຈ຺ຈຣິຕໍ ຈຣິຕ຺ວາ ວາຈາຍ ທຸຈ຺ຈຣິຕໍ ຈຣິຕ຺ວາ ມນສາ ທຸຈ຺ຈຣິຕໍ ຈຣິຕ຺ວາ ກາຍສ຺ສ ເຠທາ ປຣໍ ມຣຓາ ນິຣຍພນ຺ຘເນ ວາ ພຊ຺ຌຕິ ຕິຣຈ຺ຉານໂຍນິພນ຺ຘເນ ວາ. ນາຫໍ, ຠິກ຺ຂເວ, ອຎ຺ຎໍ ເອກພນ຺ຘນມ຺ປິ ສມນຸປສ຺ສາມິ ເອວໍທາຣຸຓໍ ເອວໍກຏຸກໍ [ເອວໍທຸກ຺ຂໍ (ສ຺ຍາ. ກໍ. ກ.)] ເອວໍອນ຺ຕຣາຍກຣໍ ອນຸຕ຺ຕຣສ຺ສ ໂຍຄກ຺ເຂມສ຺ສ ອຘິຄມາຍ, ຍຖຍິທໍ, ຠິກ຺ຂເວ, ນິຣຍພນ຺ຘນໍ ວາ ຕິຣຈ຺ຉານໂຍນິພນ຺ຘນໍ ວາ’’ຕິ.

‘‘ທາລິທ຺ທິຍໍ ທຸກ຺ຂໍ ໂລເກ, ອິຓາທານຎ຺ຈ ວຸຈ຺ຈຕິ;

ທລິທ຺ໂທ ອິຓມາທາຍ, ຠຸຎ຺ຊມາໂນ ວິຫຎ຺ຎຕິ.

‘‘ຕໂຕ ອນຸຈຣນ຺ຕິ ນໍ, ພນ຺ຘນມ຺ປິ ນິຄຈ຺ຉຕິ;

ເອຕຎ຺ຫິ ພນ຺ຘນໍ ທຸກ຺ຂໍ, ກາມລາຠາຠິຊປ຺ປິນໍ.

‘‘ຕເຖວ ອຣິຍວິນເຍ, ສທ຺ຘາ ຍສ຺ສ ນ ວິຊ຺ຊຕິ;

ອຫິຣີໂກ ອໂນຕ຺ຕປ຺ປີ, ປາປກມ຺ມວິນິພ຺ພໂຍ.

‘‘ກາຍທຸຈ຺ຈຣິຕໍ ກຕ຺ວາ, ວຈີທຸຈ຺ຈຣິຕານິ ຈ;

ມໂນທຸຈ຺ຈຣິຕໍ ກຕ຺ວາ, ‘ມາ ມໍ ຊຎ຺ຎູ’ຕິ ອິຈ຺ຉຕິ.

‘‘ໂສ ສໍສປ຺ປຕິ [ສງ຺ກປ຺ປຕິ (ກ.)] ກາເຍນ, ວາຈາຍ ອຸທ ເຈຕສາ;

ປາປກມ຺ມໍ ປວຑ຺ເຒນ຺ໂຕ, ຕຕ຺ຖ ຕຕ຺ຖ ປຸນປ຺ປຸນໍ.

‘‘ໂສ ປາປກມ຺ໂມ ທຸມ຺ເມໂຘ, ຊານໍ ທຸກ຺ກຏມຕ຺ຕໂນ;

ທລິທ຺ໂທ ອິຓມາທາຍ, ຠຸຎ຺ຊມາໂນ ວິຫຎ຺ຎຕິ.

‘‘ຕໂຕ ອນຸຈຣນ຺ຕິ ນໍ, ສງ຺ກປ຺ປາ ມານສາ ທຸຂາ;

ຄາເມ ວາ ຍທິ ວາຣຎ຺ເຎ, ຍສ຺ສ ວິປ຺ປຏິສາຣຊາ.

‘‘ໂສ ປາປກມ຺ໂມ ທຸມ຺ເມໂຘ, ຊານໍ ທຸກ຺ກຏມຕ຺ຕໂນ;

ໂຍນິມຎ຺ຎຕຣໍ ຄນ຺ຕ຺ວາ, ນິຣເຍ ວາປິ ພຊ຺ຌຕິ.

‘‘ເອຕຎ຺ຫິ ພນ຺ຘນໍ ທຸກ຺ຂໍ, ຍມ຺ຫາ ຘີໂຣ ປມຸຈ຺ຈຕິ;

ຘມ຺ມລທ຺ເຘຫິ ໂຠເຄຫິ, ທທໍ ຈິຕ຺ຕໍ ປສາທຍໍ.

‘‘ອຸຠຍຕ຺ຖ ກຏຄ຺ຄາໂຫ, ສທ຺ຘສ຺ສ ຆຣເມສິໂນ;

ທິຏ຺ຐຘມ຺ມຫິຕຕ຺ຖາຍ, ສມ຺ປຣາຍສຸຂາຍ ຈ;

ເອວເມຕໍ ຄຫຏ຺ຐານໍ, ຈາໂຄ ປຸຎ຺ຎໍ ປວຑ຺ຒຕິ.

‘‘ຕເຖວ ອຣິຍວິນເຍ, ສທ຺ຘາ ຍສ຺ສ ປຕິຏ຺ຐິຕາ;

ຫິຣີມໂນ ຈ ໂອຕ຺ຕປ຺ປີ, ປຎ຺ຎວາ ສີລສໍວຸໂຕ.

‘‘ເອໂສ ໂຂ ອຣິຍວິນເຍ, ‘ສຸຂຊີວີ’ຕິ ວຸຈ຺ຈຕິ;

ນິຣາມິສໍ ສຸຂໍ ລທ຺ຘາ, ອຸເປກ຺ຂໍ ອຘິຕິຏ຺ຐຕິ.

‘‘ປຎ຺ຈ ນີວຣເຓ ຫິຕ຺ວາ, ນິຈ຺ຈໍ ອາຣທ຺ຘວີຣິໂຍ;

ຌານານິ ອຸປສມ຺ປຊ຺ຊ, ເອໂກທິ ນິປໂກ ສໂຕ.

‘‘ເອວໍ ຎຕ຺ວາ ຍຖາຠູຕໍ, ສພ຺ພສໍໂຍຊນກ຺ຂເຍ;

ສພ຺ພໂສ ອນຸປາທາຍ, ສມ຺ມາ ຈິຕ຺ຕໍ ວິມຸຈ຺ຈຕິ.

‘‘ຕສ຺ສ ສມ຺ມາ ວິມຸຕ຺ຕສ຺ສ, ຎາຓໍ ເຈ ໂຫຕິ ຕາທິໂນ;

‘ອກຸປ຺ປາ ເມ ວິມຸຕ຺ຕີ’ຕິ, ຠວສໍໂຍຊນກ຺ຂເຍ.

‘‘ເອຕໍ ໂຂ ປຣມໍ ຎາຓໍ, ເອຕໍ ສຸຂມນຸຕ຺ຕຣໍ;

ອໂສກໍ ວິຣຊໍ ເຂມໍ, ເອຕໍ ອານຓ຺ຍມຸຕ຺ຕມ’’ນ຺ຕິ. ຕຕິຍໍ;