໑໐. ຂຕ຺ຕິຍສຸຕ຺ຕໍ

໕໒. ອຖ ໂຂ ຊາຓຸສ຺ໂສຓິ [ຊາຓຸໂສຓິ (ກ.)] ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ຊາຓຸສ຺ໂສຓິ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ –

‘‘ຂຕ຺ຕິຍາ, ໂຠ ໂຄຕມ, ກິໍອຘິປ຺ປາຍາ, ກິໍອຸປວິຈາຣາ, ກິໍອຘິຏ຺ຐານາ, ກິໍອຠິນິເວສາ, ກິໍປຣິໂຍສານາ’’ຕິ? ‘‘ຂຕ຺ຕິຍາ ໂຂ, ພ຺ຣາຫ຺ມຓ, ໂຠຄາຘິປ຺ປາຍາ ປຎ຺ຎູປວິຈາຣາ ພລາຘິຏ຺ຐານາ ປຖວີຠິນິເວສາ ອິສ຺ສຣິຍປຣິໂຍສານາ’’ຕິ.

‘‘ພ຺ຣາຫ຺ມຓາ ປນ, ໂຠ ໂຄຕມ, ກິໍອຘິປ຺ປາຍາ, ກິໍອຸປວິຈາຣາ, ກິໍອຘິຏ຺ຐານາ, ກິໍອຠິນິເວສາ, ກິໍປຣິໂຍສານາ’’ຕິ? ‘‘ພ຺ຣາຫ຺ມຓາ ໂຂ, ພ຺ຣາຫ຺ມຓ, ໂຠຄາຘິປ຺ປາຍາ ປຎ຺ຎູປວິຈາຣາ ມນ຺ຕາຘິຏ຺ຐານາ ຍຎ຺ຎາຠິນິເວສາ ພ຺ຣຫ຺ມໂລກປຣິໂຍສານາ’’ຕິ.

‘‘ຄຫປຕິກາ ປນ, ໂຠ ໂຄຕມ, ກິໍອຘິປ຺ປາຍາ, ກິໍອຸປວິຈາຣາ, ກິໍອຘິຏ຺ຐານາ, ກິໍອຠິນິເວສາ, ກິໍປຣິໂຍສານາ’’ຕິ? ‘‘ຄຫປຕິກາ ໂຂ, ພ຺ຣາຫ຺ມຓ, ໂຠຄາຘິປ຺ປາຍາ ປຎ຺ຎູປວິຈາຣາ ສິປ຺ປາຘິຏ຺ຐານາ ກມ຺ມນ຺ຕາຠິນິເວສາ ນິຏ຺ຐິຕກມ຺ມນ຺ຕປຣິໂຍສານາ’’ຕິ.

‘‘ອິຕ຺ຖີ ປນ, ໂຠ ໂຄຕມ, ກິໍອຘິປ຺ປາຍາ, ກິໍອຸປວິຈາຣາ, ກິໍອຘິຏ຺ຐານາ, ກິໍອຠິນິເວສາ, ກິໍປຣິໂຍສານາ’’ຕິ? ‘‘ອິຕ຺ຖີ ໂຂ, ພ຺ຣາຫ຺ມຓ, ປຸຣິສາຘິປ຺ປາຍາ ອລງ຺ກາຣູປວິຈາຣາ ປຸຕ຺ຕາຘິຏ຺ຐານາ ອສປຕີຠິນິເວສາ ອິສ຺ສຣິຍປຣິໂຍສານາ’’ຕິ.

‘‘ໂຈຣາ ປນ, ໂຠ ໂຄຕມ, ກິໍອຘິປ຺ປາຍາ, ກິໍອຸປວິຈາຣາ, ກິໍອຘິຏ຺ຐານາ, ກິໍອຠິນິເວສາ, ກິໍປຣິໂຍສານາ’’ຕິ? ‘‘ໂຈຣາ ໂຂ, ພ຺ຣາຫ຺ມຓ, ອາທານາຘິປ຺ປາຍາ ຄຫນູປວິຈາຣາ ສຕ຺ຖາຘິຏ຺ຐານາ ອນ຺ຘກາຣາຠິນິເວສາ ອທສ຺ສນປຣິໂຍສານາ’’ຕິ.

‘‘ສມຓາ ປນ, ໂຠ ໂຄຕມ, ກິໍອຘິປ຺ປາຍາ, ກິໍອຸປວິຈາຣາ, ກິໍອຘິຏ຺ຐານາ, ກິໍອຠິນິເວສາ, ກິໍປຣິໂຍສານາ’’ຕິ? ‘‘ສມຓາ ໂຂ, ພ຺ຣາຫ຺ມຓ, ຂນ຺ຕິໂສຣຈ຺ຈາຘິປ຺ປາຍາ ປຎ຺ຎູປວິຈາຣາ ສີລາຘິຏ຺ຐານາ ອາກິຎ຺ຈຎ຺ຎາຠິນິເວສາ [ອກິຎ຺ຈນາຠິນິເວສາ (ສ຺ຍາ. ກ.)] ນິພ຺ພານປຣິໂຍສານາ’’ຕິ.

‘‘ອຈ຺ຉຣິຍໍ, ໂຠ ໂຄຕມ, ອພ຺ຠຸຕໍ, ໂຠ ໂຄຕມ! ຂຕ຺ຕິຍານມ຺ປິ ຠວໍ ໂຄຕໂມ ຊານາຕິ ອຘິປ຺ປາຍຎ຺ຈ ອຸປວິຈາຣຎ຺ຈ ອຘິຏ຺ຐານຎ຺ຈ ອຠິນິເວສຎ຺ຈ ປຣິໂຍສານຎ຺ຈ. ພ຺ຣາຫ຺ມຓານມ຺ປິ ຠວໍ ໂຄຕໂມ ຊານາຕິ…ເປ… ຄຫປຕີນມ຺ປິ ຠວໍ ໂຄຕໂມ ຊານາຕິ… ອິຕ຺ຖີນມ຺ປິ ຠວໍ ໂຄຕໂມ ຊານາຕິ… ໂຈຣານມ຺ປິ ຠວໍ ໂຄຕໂມ ຊານາຕິ … ສມຓານມ຺ປິ ຠວໍ ໂຄຕໂມ ຊານາຕິ ອຘິປ຺ປາຍຎ຺ຈ ອຸປວິຈາຣຎ຺ຈ ອຘິຏ຺ຐານຎ຺ຈ ອຠິນິເວສຎ຺ຈ ປຣິໂຍສານຎ຺ຈ. ອຠິກ຺ກນ຺ຕໍ, ໂຠ ໂຄຕມ…ເປ… ອຸປາສກໍ ມໍ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ທສມໍ.