໘. ອຕ຺ຕກາຣີສຸຕ຺ຕໍ

໓໘. ອຖ ໂຂ ອຎ຺ຎຕໂຣ ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ໂສ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘ອຫຎ຺ຫິ, ໂຠ ໂຄຕມ, ເອວໍວາທີ ເອວໍທິຏ຺ຐິ – ‘ນຕ຺ຖິ ອຕ຺ຕກາໂຣ, ນຕ຺ຖິ ປຣກາໂຣ’’’ຕິ. ‘‘ມາຫໍ, ພ຺ຣາຫ຺ມຓ, ເອວໍວາທິໍ ເອວໍທິຏ຺ຐິໍ ອທ຺ທສໍ ວາ ອສ຺ໂສສິໍ ວາ. ກຖຎ຺ຫິ ນາມ ສຍໍ ອຠິກ຺ກມນ຺ໂຕ, ສຍໍ ປຏິກ຺ກມນ຺ໂຕ ເອວໍ ວກ຺ຂຕິ – ‘ນຕ຺ຖິ ອຕ຺ຕກາໂຣ, ນຕ຺ຖິ ປຣກາໂຣ’’’ຕິ!

‘‘ຕໍ ກິໍ ມຎ຺ຎສິ, ພ຺ຣາຫ຺ມຓ, ອຕ຺ຖິ ອາຣພ຺ຠຘາຕູ’’ຕິ? ‘‘ເອວໍ, ໂຠ’’. ‘‘ອາຣພ຺ຠຘາຕຸຍາ ສຕິ ອາຣພ຺ຠວນ຺ໂຕ ສຕ຺ຕາ ປຎ຺ຎາຍນ຺ຕີ’’ຕິ? ‘‘ເອວໍ, ໂຠ’’. ‘‘ຍໍ ໂຂ, ພ຺ຣາຫ຺ມຓ, ອາຣພ຺ຠຘາຕຸຍາ ສຕິ ອາຣພ຺ຠວນ຺ໂຕ ສຕ຺ຕາ ປຎ຺ຎາຍນ຺ຕິ, ອຍໍ ສຕ຺ຕານໍ ອຕ຺ຕກາໂຣ ອຍໍ ປຣກາໂຣ’’.

‘‘ຕໍ ກິໍ ມຎ຺ຎສິ, ພ຺ຣາຫ຺ມຓ, ອຕ຺ຖິ ນິກ຺ກມຘາຕຸ…ເປ… ອຕ຺ຖິ ປຣກ຺ກມຘາຕຸ… ອຕ຺ຖິ ຖາມຘາຕຸ… ອຕ຺ຖິ ຐິຕິຘາຕຸ… ອຕ຺ຖິ ອຸປກ຺ກມຘາຕູ’’ຕິ? ‘‘ເອວໍ, ໂຠ’’. ‘‘ອຸປກ຺ກມຘາຕຸຍາ ສຕິ ອຸປກ຺ກມວນ຺ໂຕ ສຕ຺ຕາ ປຎ຺ຎາຍນ຺ຕີ’’ຕິ? ‘‘ເອວໍ, ໂຠ’’. ‘‘ຍໍ ໂຂ, ພ຺ຣາຫ຺ມຓ, ອຸປກ຺ກມຘາຕຸຍາ ສຕິ ອຸປກ຺ກມວນ຺ໂຕ ສຕ຺ຕາ ປຎ຺ຎາຍນ຺ຕິ, ອຍໍ ສຕ຺ຕານໍ ອຕ຺ຕກາໂຣ ອຍໍ ປຣກາໂຣ’’.

‘‘ມາຫໍ, ພ຺ຣາຫ຺ມຓ [ຕໍ ກິໍ ມຎ຺ຎສິ ພ຺ຣາຫ຺ມຓ ມາຫໍ (ກ.)], ເອວໍວາທິໍ ເອວໍທິຏ຺ຐິໍ ອທ຺ທສໍ ວາ ອສ຺ໂສສິໍ ວາ. ກຖຎ຺ຫິ ນາມ ສຍໍ ອຠິກ຺ກມນ຺ໂຕ ສຍໍ ປຏິກ຺ກມນ຺ໂຕ ເອວໍ ວກ຺ຂຕິ – ‘ນຕ຺ຖິ ອຕ຺ຕກາໂຣ ນຕ຺ຖິ ປຣກາໂຣ’’’ຕິ.

‘‘ອຠິກ຺ກນ຺ຕໍ, ໂຠ ໂຄຕມ…ເປ… ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ! ອຏ຺ຐມໍ.