໙. ກຸລສຸຕ຺ຕໍ

໑໙໙. ‘‘ຍໍ, ຠິກ຺ຂເວ, ສີລວນ຺ໂຕ ປພ຺ພຊິຕາ ກຸລໍ ອຸປສງ຺ກມນ຺ຕິ, ຕຕ຺ຖ ມນຸສ຺ສາ ປຎ຺ຈຫິ ຐາເນຫິ ພຫຸໍ ປຸຎ຺ຎໍ ປສວນ຺ຕິ. ກຕເມຫິ ປຎ຺ຈຫິ? ຍສ຺ມິໍ, ຠິກ຺ຂເວ, ສມເຍ ສີລວນ຺ເຕ ປພ຺ພຊິເຕ ກຸລໍ ອຸປສງ຺ກມນ຺ເຕ ມນຸສ຺ສາ ທິສ຺ວາ ຈິຕ຺ຕານິ ປສາເທນ຺ຕິ [ປສີທນ຺ຕິ (ສ຺ຍາ. ກໍ. ກ.)], ສຄ຺ຄສໍວຕ຺ຕນິກໍ, ຠິກ຺ຂເວ, ຕໍ ກຸລໍ ຕສ຺ມິໍ ສມເຍ ປຏິປທໍ ປຏິປນ຺ນໍ ໂຫຕິ.

‘‘ຍສ຺ມິໍ, ຠິກ຺ຂເວ, ສມເຍ ສີລວນ຺ເຕ ປພ຺ພຊິເຕ ກຸລໍ ອຸປສງ຺ກມນ຺ເຕ ມນຸສ຺ສາ ປຈ຺ຈຸຏ຺ເຐນ຺ຕິ ອຠິວາເທນ຺ຕິ ອາສນໍ ເທນ຺ຕິ, ອຸຈ຺ຈາກຸລີນສໍວຕ຺ຕນິກໍ, ຠິກ຺ຂເວ, ຕໍ ກຸລໍ ຕສ຺ມິໍ ສມເຍ ປຏິປທໍ ປຏິປນ຺ນໍ ໂຫຕິ.

‘‘ຍສ຺ມິໍ, ຠິກ຺ຂເວ, ສມເຍ ສີລວນ຺ເຕ ປພ຺ພຊິເຕ ກຸລໍ ອຸປສງ຺ກມນ຺ເຕ ມນຸສ຺ສາ ມຈ຺ເຉຣມລໍ ປຏິວິເນນ຺ຕິ [ປຏິວິໂນເທນ຺ຕິ (ສີ. ປີ.)], ມເຫສກ຺ຂສໍວຕ຺ຕນິກໍ, ຠິກ຺ຂເວ, ຕໍ ກຸລໍ ຕສ຺ມິໍ ສມເຍ ປຏິປທໍ ປຏິປນ຺ນໍ ໂຫຕິ.

‘‘ຍສ຺ມິໍ, ຠິກ຺ຂເວ, ສມເຍ ສີລວນ຺ເຕ ປພ຺ພຊິເຕ ກຸລໍ ອຸປສງ຺ກມນ຺ເຕ ມນຸສ຺ສາ ຍຖາສຕ຺ຕິ ຍຖາພລໍ ສໍວິຠຊນ຺ຕິ, ມຫາໂຠຄສໍວຕ຺ຕນິກໍ, ຠິກ຺ຂເວ, ຕໍ ກຸລໍ ຕສ຺ມິໍ ສມເຍ ປຏິປທໍ ປຏິປນ຺ນໍ ໂຫຕິ.

‘‘ຍສ຺ມິໍ, ຠິກ຺ຂເວ, ສມເຍ ສີລວນ຺ເຕ ປພ຺ພຊິເຕ ກຸລໍ ອຸປສງ຺ກມນ຺ເຕ ມນຸສ຺ສາ ປຣິປຸຈ຺ຉນ຺ຕິ ປຣິປຎ຺ຫນ຺ຕິ ຘມ຺ມໍ ສຸຓນ຺ຕິ, ມຫາປຎ຺ຎາສໍວຕ຺ຕນິກໍ, ຠິກ຺ຂເວ, ຕໍ ກຸລໍ ຕສ຺ມິໍ ສມເຍ ປຏິປທໍ ປຏິປນ຺ນໍ ໂຫຕິ. ຍໍ, ຠິກ຺ຂເວ, ສີລວນ຺ໂຕ ປພ຺ພຊິຕາ ກຸລໍ ອຸປສງ຺ກມນ຺ຕິ, ຕຕ຺ຖ ມນຸສ຺ສາ ອິເມຫິ ປຎ຺ຈຫິ ຐາເນຫິ ພຫຸໍ ປຸຎ຺ຎໍ ປສວນ຺ຕີ’’ຕິ. ນວມໍ.