໑໐. ນິສ຺ສາຣຓີຍສຸຕ຺ຕໍ

໒໐໐. ‘‘ປຎ຺ຈິມາ, ຠິກ຺ຂເວ, ນິສ຺ສາຣຓີຍາ [ນິສ຺ສຣຓີຍາ (ປີ.), ນິສ຺ສຣຓິຍາ (ທີ. ນິ. ໓.໓໒໑)] ຘາຕຸໂຍ. ກຕມາ ປຎ຺ຈ? ອິຘ, ຠິກ຺ຂເວ, ຠິກ຺ຂຸໂນ ກາມໍ [ກາເມ (ສ຺ຍາ. ກໍ.) ທີ. ນິ. ໓.໓໒໑] ມນສິກໂຣໂຕ ກາເມສຸ ຈິຕ຺ຕໍ ນ ປກ຺ຂນ຺ທຕິ ນປ຺ປສີທຕິ ນ ສນ຺ຕິຏ຺ຐຕິ ນ ວິມຸຈ຺ຈຕິ. ເນກ຺ຂມ຺ມໍ ໂຂ ປນສ຺ສ ມນສິກໂຣໂຕ ເນກ຺ຂມ຺ເມ ຈິຕ຺ຕໍ ປກ຺ຂນ຺ທຕິ ປສີທຕິ ສນ຺ຕິຏ຺ຐຕິ ວິມຸຈ຺ຈຕິ. ຕສ຺ສ ຕໍ ຈິຕ຺ຕໍ ສຸຄຕໍ [ສຸກຕໍ (ປີ. ກ.)] ສຸຠາວິຕໍ ສຸວຸຏ຺ຐິຕໍ ສຸວິມຸຕ຺ຕໍ ສຸວິສໍຍຸຕ຺ຕໍ [ວິສໍຍຸຕ຺ຕໍ (ກຕ຺ຖຈິ, ທີ. ນິ. ໓.໓໒໑)] ກາເມຫິ; ເຍ ຈ ກາມປຈ຺ຈຍາ ອຸປ຺ປຊ຺ຊນ຺ຕິ ອາສວາ ວິຆາຕປຣິຬາຫາ, ມຸຕ຺ໂຕ ໂສ ເຕຫິ, ນ ໂສ ຕໍ ເວທນໍ ເວທິຍຕິ. ອິທມກ຺ຂາຕໍ ກາມານໍ ນິສ຺ສຣຓໍ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸໂນ ພ຺ຍາປາທໍ ມນສິກໂຣໂຕ ພ຺ຍາປາເທ ຈິຕ຺ຕໍ ນ ປກ຺ຂນ຺ທຕິ ນປ຺ປສີທຕິ ນ ສນ຺ຕິຏ຺ຐຕິ ນ ວິມຸຈ຺ຈຕິ. ອພ຺ຍາປາທໍ ໂຂ ປນສ຺ສ ມນສິກໂຣໂຕ ອພ຺ຍາປາເທ ຈິຕ຺ຕໍ ປກ຺ຂນ຺ທຕິ ປສີທຕິ ສນ຺ຕິຏ຺ຐຕິ ວິມຸຈ຺ຈຕິ. ຕສ຺ສ ຕໍ ຈິຕ຺ຕໍ ສຸຄຕໍ ສຸຠາວິຕໍ ສຸວຸຏ຺ຐິຕໍ ສຸວິມຸຕ຺ຕໍ ສຸວິສໍຍຸຕ຺ຕໍ ພ຺ຍາປາເທນ; ເຍ ຈ ພ຺ຍາປາທປຈ຺ຈຍາ ອຸປ຺ປຊ຺ຊນ຺ຕິ ອາສວາ ວິຆາຕປຣິຬາຫາ, ມຸຕ຺ໂຕ ໂສ ເຕຫິ, ນ ໂສ ຕໍ ເວທນໍ ເວທິຍຕິ. ອິທມກ຺ຂາຕໍ ພ຺ຍາປາທສ຺ສ ນິສ຺ສຣຓໍ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸໂນ ວິເຫສໍ ມນສິກໂຣໂຕ ວິເຫສາຍ ຈິຕ຺ຕໍ ນ ປກ຺ຂນ຺ທຕິ ນປ຺ປສີທຕິ ນ ສນ຺ຕິຏ຺ຐຕິ ນ ວິມຸຈ຺ຈຕິ. ອວິເຫສໍ ໂຂ ປນສ຺ສ ມນສິກໂຣໂຕ ອວິເຫສາຍ ຈິຕ຺ຕໍ ປກ຺ຂນ຺ທຕິ ປສີທຕິ ສນ຺ຕິຏ຺ຐຕິ ວິມຸຈ຺ຈຕິ. ຕສ຺ສ ຕໍ ຈິຕ຺ຕໍ ສຸຄຕໍ ສຸຠາວິຕໍ ສຸວຸຏ຺ຐິຕໍ ສຸວິມຸຕ຺ຕໍ ສຸວິສໍຍຸຕ຺ຕໍ ວິເຫສາຍ; ເຍ ຈ ວິເຫສາປຈ຺ຈຍາ ອຸປ຺ປຊ຺ຊນ຺ຕິ ອາສວາ ວິຆາຕປຣິຬາຫາ, ມຸຕ຺ໂຕ ໂສ ເຕຫິ, ນ ໂສ ຕໍ ເວທນໍ ເວທິຍຕິ. ອິທມກ຺ຂາຕໍ ວິເຫສາຍ ນິສ຺ສຣຓໍ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸໂນ ຣູປໍ ມນສິກໂຣໂຕ ຣູເປ ຈິຕ຺ຕໍ ນ ປກ຺ຂນ຺ທຕິ ນປ຺ປສີທຕິ ນ ສນ຺ຕິຏ຺ຐຕິ ນ ວິມຸຈ຺ຈຕິ. ອຣູປໍ ໂຂ ປນສ຺ສ ມນສິກໂຣໂຕ ອຣູເປ ຈິຕ຺ຕໍ ປກ຺ຂນ຺ທຕິ ປສີທຕິ ສນ຺ຕິຏ຺ຐຕິ ວິມຸຈ຺ຈຕິ. ຕສ຺ສ ຕໍ ຈິຕ຺ຕໍ ສຸຄຕໍ ສຸຠາວິຕໍ ສຸວຸຏ຺ຐິຕໍ ສຸວິມຸຕ຺ຕໍ ສຸວິສໍຍຸຕ຺ຕໍ ຣູເປຫິ; ເຍ ຈ ຣູປປຈ຺ຈຍາ ອຸປ຺ປຊ຺ຊນ຺ຕິ ອາສວາ ວິຆາຕປຣິຬາຫາ, ມຸຕ຺ໂຕ ໂສ ເຕຫິ, ນ ໂສ ຕໍ ເວທນໍ ເວທິຍຕິ. ອິທມກ຺ຂາຕໍ ຣູປານໍ ນິສ຺ສຣຓໍ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸໂນ ສກ຺ກາຍໍ ມນສິກໂຣໂຕ ສກ຺ກາເຍ ຈິຕ຺ຕໍ ນ ປກ຺ຂນ຺ທຕິ ນປ຺ປສີທຕິ ນ ສນ຺ຕິຏ຺ຐຕິ ນ ວິມຸຈ຺ຈຕິ. ສກ຺ກາຍນິໂຣຘໍ ໂຂ ປນສ຺ສ ມນສິກໂຣໂຕ ສກ຺ກາຍນິໂຣເຘ ຈິຕ຺ຕໍ ປກ຺ຂນ຺ທຕິ ປສີທຕິ ສນ຺ຕິຏ຺ຐຕິ ວິມຸຈ຺ຈຕິ. ຕສ຺ສ ຕໍ ຈິຕ຺ຕໍ ສຸຄຕໍ ສຸຠາວິຕໍ ສຸວຸຏ຺ຐິຕໍ ສຸວິມຸຕ຺ຕໍ ສຸວິສໍຍຸຕ຺ຕໍ ສກ຺ກາເຍນ; ເຍ ຈ ສກ຺ກາຍປຈ຺ຈຍາ ອຸປ຺ປຊ຺ຊນ຺ຕິ ອາສວາ ວິຆາຕປຣິຬາຫາ, ມຸຕ຺ໂຕ ໂສ ເຕຫິ, ນ ໂສ ຕໍ ເວທນໍ ເວທິຍຕິ. ອິທມກ຺ຂາຕໍ ສກ຺ກາຍສ຺ສ ນິສ຺ສຣຓໍ.

‘‘ຕສ຺ສ ກາມນນ຺ທີປິ ນານຸເສຕິ, ພ຺ຍາປາທນນ຺ທີປິ ນານຸເສຕິ, ວິເຫສານນ຺ທີປິ ນານຸເສຕິ, ຣູປນນ຺ທີປິ ນານຸເສຕິ, ສກ຺ກາຍນນ຺ທີປິ ນານຸເສຕິ (ໂສ) [( ) ກຕ຺ຖຈິ ນຕ຺ຖິ] ກາມນນ຺ທິຍາປິ ອນນຸສຍາ, ພ຺ຍາປາທນນ຺ທິຍາປິ ອນນຸສຍາ, ວິເຫສານນ຺ທິຍາປິ ອນນຸສຍາ, ຣູປນນ຺ທິຍາປິ ອນນຸສຍາ, ສກ຺ກາຍນນ຺ທິຍາປິ ອນນຸສຍາ. ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ນິຣນຸສໂຍ, ອຈ຺ເຉຈ຺ຉິ [ອຈ຺ເຉຊ຺ຊິ (ສ຺ຍາ. ກໍ. ກ.)] ຕຓ຺ຫໍ, ວິວຕ຺ຕຍິ [ວາວຕ຺ຕຍິ (ສີ.)] ສໍໂຍຊນໍ, ສມ຺ມາ ມານາຠິສມຍາ ອນ຺ຕມກາສິ ທຸກ຺ຂສ຺ສ. ອິມາ ໂຂ, ຠິກ຺ຂເວ, ປຎ຺ຈ ນິສ຺ສາຣຓີຍາ ຘາຕຸໂຍ’’ຕິ. ທສມໍ.

ພ຺ຣາຫ຺ມຓວຄ຺ໂຄ ປຎ຺ຈໂມ.