໓. ສງ຺ຄາຣວສຸຕ຺ຕໍ

໑໙໓. ອຖ ໂຂ ສງ຺ຄາຣໂວ ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ສງ຺ຄາຣໂວ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘ໂກ ນຸ ໂຂ, ໂຠ ໂຄຕມ, ເຫຕຸ ໂກ ປຈ຺ຈໂຍ, ເຍນ ກທາຈິ ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ? ໂກ ປນ, ໂຠ ໂຄຕມ, ເຫຕຸ ໂກ ປຈ຺ຈໂຍ, ເຍນ ກທາຈິ ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ’’ຕິ?

‘‘ຍສ຺ມິໍ, ພ຺ຣາຫ຺ມຓ, ສມເຍ ກາມຣາຄປຣິຍຸຏ຺ຐິເຕນ ເຈຕສາ ວິຫຣຕິ ກາມຣາຄປເຣເຕນ, ອຸປ຺ປນ຺ນສ຺ສ ຈ ກາມຣາຄສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ. ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ສໍສຏ຺ໂຐ ລາຂາຍ ວາ ຫລິທ຺ທິຍາ ວາ ນີລິຍາ ວາ ມຎ຺ຊິຏ຺ຐາຍ ວາ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນປ຺ປຊາເນຍ຺ຍ ນ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ກາມຣາຄປຣິຍຸຏ຺ຐິເຕນ ເຈຕສາ ວິຫຣຕິ ກາມຣາຄປເຣເຕນ, ອຸປ຺ປນ຺ນສ຺ສ ຈ ກາມຣາຄສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ພ຺ຍາປາທປຣິຍຸຏ຺ຐິເຕນ ເຈຕສາ ວິຫຣຕິ ພ຺ຍາປາທປເຣເຕນ, ອຸປ຺ປນ຺ນສ຺ສ ຈ ພ຺ຍາປາທສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ. ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ອຄ຺ຄິນາ ສນ຺ຕຕ຺ໂຕ ອຸກ຺ກຸຘິໂຕ [ອຸກ຺ກຏ຺ຐິໂຕ (ສີ. ປີ.), ອຸກ຺ກຸຏ຺ຐິໂຕ (ສ຺ຍາ. ກໍ.)] ອຸສ຺ສທກຊາໂຕ [ອຸສຸມກຊາໂຕ (ກຕ຺ຖຈິ), ອຸສ຺ສຸຣກຊາໂຕ (ກ.), ອຸສ຺ມຸທກຊາໂຕ (ມ. ນິ. ໓ ມຊ຺ຌິມນິກາເຍ)]. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນປ຺ປຊາເນຍ຺ຍ ນ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ພ຺ຍາປາທປຣິຍຸຏ຺ຐິເຕນ ເຈຕສາ ວິຫຣຕິ ພ຺ຍາປາທປເຣເຕນ, ອຸປ຺ປນ຺ນສ຺ສ ຈ ພ຺ຍາປາທສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ຖິນມິທ຺ຘປຣິຍຸຏ຺ຐິເຕນ ເຈຕສາ ວິຫຣຕິ ຖິນມິທ຺ຘປເຣເຕນ, ອຸປ຺ປນ຺ນສ຺ສ ຈ ຖິນມິທ຺ຘສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ. ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ເສວາລປຓກປຣິໂຍນທ຺ໂຘ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນປ຺ປຊາເນຍ຺ຍ ນ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ຖິນມິທ຺ຘປຣິຍຸຏ຺ຐິເຕນ ເຈຕສາ ວິຫຣຕິ ຖິນມິທ຺ຘປເຣເຕນ, ອຸປ຺ປນ຺ນສ຺ສ ຈ ຖິນມິທ຺ຘສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ອຸທ຺ຘຈ຺ຈກຸກ຺ກຸຈ຺ຈປຣິຍຸຏ຺ຐິເຕນ ເຈຕສາ ວິຫຣຕິ ອຸທ຺ຘຈ຺ຈກຸກ຺ກຸຈ຺ຈປເຣເຕນ, ອຸປ຺ປນ຺ນສ຺ສ ຈ ອຸທ຺ຘຈ຺ຈກຸກ຺ກຸຈ຺ຈສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ. ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ວາເຕຣິໂຕ ຈລິໂຕ ຠນ຺ໂຕ ອູມິຊາໂຕ [ອຸມ຺ມິຊາໂຕ (ປີ.)]. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນປ຺ປຊາເນຍ຺ຍ ນ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ອຸທ຺ຘຈ຺ຈກຸກ຺ກຸຈ຺ຈປຣິຍຸຏ຺ຐິເຕນ ເຈຕສາ ວິຫຣຕິ ອຸທ຺ຘຈ຺ຈກຸກ຺ກຸຈ຺ຈປເຣເຕນ, ອຸປ຺ປນ຺ນສ຺ສ ຈ ອຸທ຺ຘຈ຺ຈກຸກ຺ກຸຈ຺ຈສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ວິຈິກິຈ຺ຉາປຣິຍຸຏ຺ຐິເຕນ ເຈຕສາ ວິຫຣຕິ ວິຈິກິຈ຺ຉາປເຣເຕນ, ອຸປ຺ປນ຺ນາຍ ຈ ວິຈິກິຈ຺ຉາຍ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ. ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ອາວິໂລ ລຸຬິໂຕ ກລລີຠູໂຕ ອນ຺ຘກາເຣ ນິກ຺ຂິຕ຺ໂຕ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນປ຺ປຊາເນຍ຺ຍ ນ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ວິຈິກິຈ຺ຉາປຣິຍຸຏ຺ຐິເຕນ ເຈຕສາ ວິຫຣຕິ ວິຈິກິຈ຺ຉາປເຣເຕນ, ອຸປ຺ປນ຺ນາຍ ຈ ວິຈິກິຈ຺ຉາຍ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນປ຺ປຊານາຕິ ນ ປສ຺ສຕິ, ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ຍສ຺ມິຎ຺ຈ ໂຂ, ພ຺ຣາຫ຺ມຓ, ສມເຍ ນ ກາມຣາຄປຣິຍຸຏ຺ຐິເຕນ ເຈຕສາ ວິຫຣຕິ ນ ກາມຣາຄປເຣເຕນ, ອຸປ຺ປນ຺ນສ຺ສ ຈ ກາມຣາຄສ຺ສ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ປຊານາຕິ ປສ຺ສຕິ, ປຣຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ປຊານາຕິ ປສ຺ສຕິ, ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ປຊານາຕິ ປສ຺ສຕິ, ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ. ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ອສໍສຏ຺ໂຐ ລາຂາຍ ວາ ຫລິທ຺ທິຍາ ວາ ນີລິຍາ ວາ ມຎ຺ຊິຏ຺ຐາຍ ວາ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ປຊາເນຍ຺ຍ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ກາມຣາຄປຣິຍຸຏ຺ຐິເຕນ ເຈຕສາ ວິຫຣຕິ…ເປ….

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ນ ພ຺ຍາປາທປຣິຍຸຏ຺ຐິເຕນ ເຈຕສາ ວິຫຣຕິ…ເປ… ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ອຄ຺ຄິນາ ອສນ຺ຕຕ຺ໂຕ ອນຸກ຺ກຸຘິໂຕ ອນຸສ຺ສທກຊາໂຕ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ປຊາເນຍ຺ຍ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ພ຺ຍາປາທປຣິຍຸຏ຺ຐິເຕນ ເຈຕສາ ວິຫຣຕິ…ເປ….

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ນ ຖິນມິທ຺ຘປຣິຍຸຏ຺ຐິເຕນ ເຈຕສາ ວິຫຣຕິ…ເປ… ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ນ ເສວາລປຓກປຣິໂຍນທ຺ໂຘ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ປຊາເນຍ຺ຍ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ຖິນມິທ຺ຘປຣິຍຸຏ຺ຐິເຕນ ເຈຕສາ ວິຫຣຕິ…ເປ….

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ນ ອຸທ຺ຘຈ຺ຈກຸກ຺ກຸຈ຺ຈປຣິຍຸຏ຺ຐິເຕນ ເຈຕສາ ວິຫຣຕິ…ເປ… ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ນ ວາເຕຣິໂຕ ນ ຈລິໂຕ ນ ຠນ຺ໂຕ ນ ອູມິຊາໂຕ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ປຊາເນຍ຺ຍ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ອຸທ຺ຘຈ຺ຈກຸກ຺ກຸຈ຺ຈປຣິຍຸຏ຺ຐິເຕນ ເຈຕສາ ວິຫຣຕິ …ເປ….

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ນ ວິຈິກິຈ຺ຉາປຣິຍຸຏ຺ຐິເຕນ ເຈຕສາ ວິຫຣຕິ ນ ວິຈິກິຈ຺ຉາປເຣເຕນ, ອຸປ຺ປນ຺ນາຍ ຈ ວິຈິກິຈ຺ຉາຍ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ປຊານາຕິ ປສ຺ສຕິ, ປຣຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ປຊານາຕິ ປສ຺ສຕິ, ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ປຊານາຕິ ປສ຺ສຕິ, ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ. ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ອຈ຺ໂຉ ວິປ຺ປສນ຺ໂນ ອນາວິໂລ ອາໂລເກ ນິກ຺ຂິຕ຺ໂຕ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ປຊາເນຍ຺ຍ ປສ຺ເສຍ຺ຍ. ເອວເມວໍ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ວິຈິກິຈ຺ຉາປຣິຍຸຏ຺ຐິເຕນ ເຈຕສາ ວິຫຣຕິ ນ ວິຈິກິຈ຺ຉາປເຣເຕນ, ອຸປ຺ປນ຺ນາຍ ຈ ວິຈິກິຈ຺ຉາຍ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ປຊານາຕິ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ປຊານາຕິ ປສ຺ສຕິ, ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ອຍໍ ໂຂ, ພ຺ຣາຫ຺ມຓ, ເຫຕຸ ອຍໍ ປຈ຺ຈໂຍ, ເຍນ ກທາຈິ ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ. ອຍໍ ປນ, ພ຺ຣາຫ຺ມຓ, ເຫຕຸ ອຍໍ ປຈ຺ຈໂຍ, ເຍນ ກທາຈິ ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ’’ຕິ.

‘‘ອຠິກ຺ກນ຺ຕໍ, ໂຠ ໂຄຕມ…ເປ… ອຸປາສກໍ ມໍ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ຕຕິຍໍ.