໕. ປຎ຺ຫປຸຈ຺ຉາສຸຕ຺ຕໍ

໑໖໕. ຕຕ຺ຣ ໂຂ ອາຍສ຺ມາ ສາຣິປຸຕ຺ໂຕ ຠິກ຺ຂູ ອາມນ຺ເຕສິ…ເປ… ‘‘ໂຍ ຫິ ໂກຈິ, ອາວຸໂສ, ປຣໍ ປຎ຺ຫໍ ປຸຈ຺ຉຕິ, ສພ຺ໂພ ໂສ ປຎ຺ຈຫິ ຐາເນຫິ, ເອເຕສໍ ວາ ອຎ຺ຎຕເຣນ. ກຕເມຫິ ປຎ຺ຈຫິ? ມນ຺ທຕ຺ຕາ ໂມມູຫຕ຺ຕາ [ໂມມຸຫຕ຺ຕາ (ສີ.)] ປຣໍ ປຎ຺ຫໍ ປຸຈ຺ຉຕິ, ປາປິຈ຺ໂຉ ອິຈ຺ຉາປກໂຕ ປຣໍ ປຎ຺ຫໍ ປຸຈ຺ຉຕິ, ປຣິຠວໍ ປຣໍ ປຎ຺ຫໍ ປຸຈ຺ຉຕິ, ອຎ຺ຎາຕຸກາໂມ ປຣໍ ປຎ຺ຫໍ ປຸຈ຺ຉຕິ, ອຖ ວາ ປເນວໍຈິຕ຺ໂຕ [ອຖ ວາ ປກຸປ຺ປນ຺ໂຕ (ສີ. ປີ.)] ປຣໍ ປຎ຺ຫໍ ປຸຈ຺ຉຕິ – ‘ສເຈ ເມ ປຎ຺ຫໍ ປຸຏ຺ໂຐ ສມ຺ມເທວ ພ຺ຍາກຣິສ຺ສຕິ ອິຈ຺ເຈຕໍ ກຸສລໍ, ໂນ ເຈ [ໂນ ຈ (ສ຺ຍາ.)] ເມ ປຎ຺ຫໍ ປຸຏ຺ໂຐ ສມ຺ມເທວ ພ຺ຍາກຣິສ຺ສຕິ ອຫມສ຺ສ ສມ຺ມເທວ ພ຺ຍາກຣິສ຺ສາມີ’ຕິ. ໂຍ ຫິ ໂກຈິ, ອາວຸໂສ, ປຣໍ ປຎ຺ຫໍ ປຸຈ຺ຉຕິ, ສພ຺ໂພ ໂສ ອິເມຫິ ປຎ຺ຈຫິ ຐາເນຫິ, ເອເຕສໍ ວາ ອຎ຺ຎຕເຣນ. ອຫໍ ໂຂ ປນາວຸໂສ, ເອວໍຈິຕ຺ໂຕ ປຣໍ ປຎ຺ຫໍ ປຸຈ຺ຉາມິ – ‘ສເຈ ເມ ປຎ຺ຫໍ ປຸຏ຺ໂຐ ສມ຺ມເທວ ພ຺ຍາກຣິສ຺ສຕິ ອິຈ຺ເຈຕໍ ກຸສລໍ, ໂນ ເຈ ເມ ປຎ຺ຫໍ ປຸຏ຺ໂຐ ສມ຺ມເທວ ພ຺ຍາກຣິສ຺ສຕິ, ອຫມສ຺ສ ສມ຺ມເທວ ພ຺ຍາກຣິສ຺ສາມີ’’ຕິ. ປຎ຺ຈມໍ.