໘. ສປ຺ປຸຣິສທານສຸຕ຺ຕໍ

໑໔໘. ‘‘ປຎ຺ຈິມານິ, ຠິກ຺ຂເວ, ສປ຺ປຸຣິສທານານິ. ກຕມານິ ປຎ຺ຈ? ສທ຺ຘາຍ ທານໍ ເທຕິ, ສກ຺ກຈ຺ຈໍ ທານໍ ເທຕິ, ກາເລນ ທານໍ ເທຕິ, ອນຸຄ຺ຄຫິຕຈິຕ຺ໂຕ [ອນຄ຺ຄຫິຕຈິຕ຺ໂຕ (ສີ.)] ທານໍ ເທຕິ, ອຕ຺ຕານຎ຺ຈ ປຣຎ຺ຈ ອນຸປຫຈ຺ຈ ທານໍ ເທຕິ.

‘‘ສທ຺ຘາຍ ໂຂ ປນ, ຠິກ຺ຂເວ, ທານໍ ທຕ຺ວາ ຍຕ຺ຖ ຍຕ຺ຖ ຕສ຺ສ ທານສ຺ສ ວິປາໂກ ນິພ຺ພຕ຺ຕຕິ, ອຑ຺ໂຒ ຈ ໂຫຕິ ມຫທ຺ຘໂນ ມຫາໂຠໂຄ, ອຠິຣູໂປ ຈ ໂຫຕິ ທສ຺ສນີໂຍ ປາສາທິໂກ ປຣມາຍ ວຓ຺ຓໂປກ຺ຂຣຕາຍ ສມນ຺ນາຄໂຕ.

‘‘ສກ຺ກຈ຺ຈໍ ໂຂ ປນ, ຠິກ຺ຂເວ, ທານໍ ທຕ຺ວາ ຍຕ຺ຖ ຍຕ຺ຖ ຕສ຺ສ ທານສ຺ສ ວິປາໂກ ນິພ຺ພຕ຺ຕຕິ, ອຑ຺ໂຒ ຈ ໂຫຕິ ມຫທ຺ຘໂນ ມຫາໂຠໂຄ. ເຍປິສ຺ສ ເຕ ໂຫນ຺ຕິ ປຸຕ຺ຕາຕິ ວາ ທາຣາຕິ ວາ ທາສາຕິ ວາ ເປສ຺ສາຕິ ວາ ກມ຺ມກຣາຕິ [ກມ຺ມກາຣາຕິ (ກ.)] ວາ, ເຕປິ ສຸສ຺ສູສນ຺ຕິ ໂສຕໍ ໂອທຫນ຺ຕິ ອຎ຺ຎາ ຈິຕ຺ຕໍ ອຸປຏ຺ຐເປນ຺ຕິ.

‘‘ກາເລນ ໂຂ ປນ, ຠິກ຺ຂເວ, ທານໍ ທຕ຺ວາ ຍຕ຺ຖ ຍຕ຺ຖ ຕສ຺ສ ທານສ຺ສ ວິປາໂກ ນິພ຺ພຕ຺ຕຕິ, ອຑ຺ໂຒ ຈ ໂຫຕິ ມຫທ຺ຘໂນ ມຫາໂຠໂຄ; ກາລາຄຕາ ຈສ຺ສ ອຕ຺ຖາ ປຈຸຣາ ໂຫນ຺ຕິ.

‘‘ອນຸຄ຺ຄຫິຕຈິຕ຺ໂຕ ໂຂ ປນ, ຠິກ຺ຂເວ, ທານໍ ທຕ຺ວາ ຍຕ຺ຖ ຍຕ຺ຖ ຕສ຺ສ ທານສ຺ສ ວິປາໂກ ນິພ຺ພຕ຺ຕຕິ, ອຑ຺ໂຒ ຈ ໂຫຕິ ມຫທ຺ຘໂນ ມຫາໂຠໂຄ; ອຸຬາເຣສຸ ຈ ປຎ຺ຈສຸ ກາມຄຸເຓສຸ ໂຠຄາຍ ຈິຕ຺ຕໍ ນມຕິ.

‘‘ອຕ຺ຕານຎ຺ຈ ປຣຎ຺ຈ ອນຸປຫຈ຺ຈ ໂຂ ປນ, ຠິກ຺ຂເວ, ທານໍ ທຕ຺ວາ ຍຕ຺ຖ ຍຕ຺ຖ ຕສ຺ສ ທານສ຺ສ ວິປາໂກ ນິພ຺ພຕ຺ຕຕິ, ອຑ຺ໂຒ ຈ ໂຫຕິ ມຫທ຺ຘໂນ ມຫາໂຠໂຄ; ນ ຈສ຺ສ ກຸໂຕຈິ ໂຠຄານໍ ອຸປຆາໂຕ ອາຄຈ຺ຉຕິ ອຄ຺ຄິໂຕ ວາ ອຸທກໂຕ ວາ ຣາຊໂຕ ວາ ໂຈຣໂຕ ວາ ອປ຺ປິຍໂຕ ວາ ທາຍາທໂຕ ວາ [ອປ຺ປິຍໂຕ ວາ ທາຍາທໂຕ ວາ (ສີ. ສ຺ຍາ. ກໍ. ປີ.), ອປ຺ປິຍທາຍາທໂຕ ວາ (ກ.)]. ອິມານິ ໂຂ, ຠິກ຺ຂເວ, ປຎ຺ຈ ສປ຺ປຸຣິສທານານີ’’ຕິ. ອຏ຺ຐມໍ.