໖. ມິຕ຺ຕສຸຕ຺ຕໍ

໑໔໖. ‘‘ປຎ຺ຈຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ມິຕ຺ໂຕ ນ ເສວິຕພ຺ໂພ. ກຕເມຫິ ປຎ຺ຈຫິ? ກມ຺ມນ຺ຕໍ ກາເຣຕິ, ອຘິກຣຓໍ ອາທິຍຕິ, ປາໂມກ຺ເຂສຸ ຠິກ຺ຂູສຸ ປຏິວິຣຸທ຺ໂຘ ໂຫຕິ, ທີຆຈາຣິກໍ ອນວຕ຺ຖຈາຣິກໍ [ອວຕ຺ຖານຈາຣິກໍ (ສ຺ຍາ.)] ອນຸຍຸຕ຺ໂຕ ວິຫຣຕິ, ນປ຺ປຏິພໂລ ໂຫຕິ ກາເລນ ກາລໍ ຘມ຺ມິຍາ ກຖາຍ ສນ຺ທສ຺ເສຕຸໍ ສມາທເປຕຸໍ ສມຸຕ຺ເຕເຊຕຸໍ ສມ຺ປຫໍເສຕຸໍ. ອິເມຫິ ໂຂ, ຠິກ຺ຂເວ, ປຎ຺ຈຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ມິຕ຺ໂຕ ນ ເສວິຕພ຺ໂພ.

‘‘ປຎ຺ຈຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ມິຕ຺ໂຕ ເສວິຕພ຺ໂພ. ກຕເມຫິ ປຎ຺ຈຫິ? ນ ກມ຺ມນ຺ຕໍ ກາເຣຕິ, ນ ອຘິກຣຓໍ ອາທິຍຕິ, ນ ປາໂມກ຺ເຂສຸ ຠິກ຺ຂູສຸ ປຏິວິຣຸທ຺ໂຘ ໂຫຕິ, ນ ທີຆຈາຣິກໍ ອນວຕ຺ຖຈາຣິກໍ ອນຸຍຸຕ຺ໂຕ ວິຫຣຕິ, ປຏິພໂລ ໂຫຕິ ກາເລນ ກາລໍ ຘມ຺ມິຍາ ກຖາຍ ສນ຺ທສ຺ເສຕຸໍ ສມາທເປຕຸໍ ສມຸຕ຺ເຕເຊຕຸໍ ສມ຺ປຫໍເສຕຸໍ. ອິເມຫິ ໂຂ, ຠິກ຺ຂເວ, ປຎ຺ຈຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ມິຕ຺ໂຕ ເສວິຕພ຺ໂພ’’ຕິ. ຉຏ຺ຐໍ.