໓. ສາຣນ຺ທທສຸຕ຺ຕໍ

໑໔໓. ເອກໍ ສມຍໍ ຠຄວາ ເວສາລິຍໍ ວິຫຣຕິ ມຫາວເນ ກູຏາຄາຣສາລາຍໍ. ອຖ ໂຂ ຠຄວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເວສາລິໍ ປິຓ຺ຑາຍ ປາວິສິ. ເຕນ ໂຂ ປນ ສມເຍນ ປຎ຺ຈມຕ຺ຕານໍ ລິຈ຺ຉວິສຕານໍ ສາຣນ຺ທເທ ເຈຕິເຍ ສນ຺ນິສິນ຺ນານໍ ສນ຺ນິປຕິຕານໍ ອຍມນ຺ຕຣາກຖາ ອຸທປາທິ – ‘‘ປຎ຺ຈນ຺ນໍ ຣຕນານໍ ປາຕຸຠາໂວ ທຸລ຺ລໂຠ ໂລກສ຺ມິໍ. ກຕເມສໍ ປຎ຺ຈນ຺ນໍ? ຫຕ຺ຖິຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ອສ຺ສຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ມຓິຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ອິຕ຺ຖິຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ຄຫປຕິຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ. ອິເມສໍ ປຎ຺ຈນ຺ນໍ ຣຕນານໍ ປາຕຸຠາໂວ ທຸລ຺ລໂຠ ໂລກສ຺ມິ’’ນ຺ຕິ.

ອຖ ໂຂ ເຕ ລິຈ຺ຉວີ ມຄ຺ເຄ ປຸຣິສໍ ຐເປສຸໍ [ເປເສສຸໍ (ສ຺ຍາ. ກ.)] – ‘‘ຍທາ ຕ຺ວໍ [ຍຖາ ຕ຺ວໍ (ສີ. ປີ.)], ອມ຺ໂຠ ປຸຣິສ, ປສ຺ເສຍ຺ຍາສິ ຠຄວນ຺ຕໍ, ອຖ ອມ຺ຫາກໍ ອາໂຣເຈຍ຺ຍາສີ’’ຕິ. ອທ຺ທສາ ໂຂ ໂສ ປຸຣິໂສ ຠຄວນ຺ຕໍ ທູຣໂຕວ ອາຄຈ຺ຉນ຺ຕໍ; ທິສ຺ວານ ເຍນ ເຕ ລິຈ຺ຉວີ ເຕນຸປສງ຺ກມິ; ອຸປສງ຺ກມິຕ຺ວາ ເຕ ລິຈ຺ຉວີ ເອຕທໂວຈ – ‘‘ອຍໍ ໂສ, ຠນ຺ເຕ, ຠຄວາ ຄຈ຺ຉຕິ ອຣຫໍ ສມ຺ມາສມ຺ພຸທ຺ໂຘ; ຍສ຺ສທານິ ກາລໍ ມຎ຺ຎຖາ’’ຕິ.

ອຖ ໂຂ ເຕ ລິຈ຺ຉວີ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐໍສຸ. ເອກມນ຺ຕໍ ຐິຕາ ໂຂ ເຕ ລິຈ຺ຉວີ ຠຄວນ຺ຕໍ ເອຕທໂວຈຸໍ –

‘‘ສາຘຸ, ຠນ຺ເຕ, ເຍນ ສາຣນ຺ທທໍ ເຈຕິຍໍ ເຕນຸປສງ຺ກມຕຸ ອນຸກມ຺ປໍ ອຸປາທາຍາ’’ຕິ. ອຘິວາເສສິ ຠຄວາ ຕຸຓ຺ຫີຠາເວນ. ອຖ ໂຂ ຠຄວາ ເຍນ ສາຣນ຺ທທໍ ເຈຕິຍໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ນິສຊ຺ຊ ໂຂ ຠຄວາ ເຕ ລິຈ຺ຉວີ ເອຕທໂວຈ – ‘‘ກາຍ ນຸຕ຺ຖ, ລິຈ຺ຉວີ, ເອຕຣຫິ ກຖາຍ ສນ຺ນິສິນ຺ນາ, ກາ ຈ ປນ ໂວ ອນ຺ຕຣາກຖາ ວິປ຺ປກຕາ’’ຕິ? ‘‘ອິຘ, ຠນ຺ເຕ, ອມ຺ຫາກໍ ສນ຺ນິສິນ຺ນານໍ ສນ຺ນິປຕິຕານໍ ອຍມນ຺ຕຣາກຖາ ອຸທປາທິ – ‘ປຎ຺ຈນ຺ນໍ ຣຕນານໍ ປາຕຸຠາໂວ ທຸລ຺ລໂຠ ໂລກສ຺ມິໍ. ກຕເມສໍ ປຎ຺ຈນ຺ນໍ? ຫຕ຺ຖິຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ອສ຺ສຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ມຓິຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ອິຕ຺ຖິຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ຄຫປຕິຣຕນສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ. ອິເມສໍ ປຎ຺ຈນ຺ນໍ ຣຕນານໍ ປາຕຸຠາໂວ ທຸລ຺ລໂຠ ໂລກສ຺ມິ’’’ນ຺ຕິ.

‘‘ກາມາຘິມຸຕ຺ຕານໍ ວຕ, ໂຠ, ລິຈ຺ຉວີນໍ [ກາມາຘິມຸຕ຺ຕານໍ ວຕ ໂວ ລິຈ຺ຉວີນໍ (ສີ.), ກາມາຘິມຸຕ຺ຕານໍ ວຕ ໂວ ລິຈ຺ຉວີ (ສ຺ຍາ.), ກາມາຘິມຸຕ຺ຕານໍວ ໂວ ລິຈ຺ຉວີ (?)] ກາມໍເຍວ ອາຣພ຺ຠ ອນ຺ຕຣາກຖາ ອຸທປາທິ. ປຎ຺ຈນ຺ນໍ, ລິຈ຺ຉວີ, ຣຕນານໍ ປາຕຸຠາໂວ ທຸລ຺ລໂຠ ໂລກສ຺ມິໍ. ກຕເມສໍ ປຎ຺ຈນ຺ນໍ? ຕຖາຄຕສ຺ສ ອຣຫໂຕ ສມ຺ມາສມ຺ພຸທ຺ຘສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ຕຖາຄຕປ຺ປເວທິຕສ຺ສ ຘມ຺ມວິນຍສ຺ສ ເທເສຕາ ປຸຄ຺ຄໂລ ທຸລ຺ລໂຠ ໂລກສ຺ມິໍ, ຕຖາຄຕປ຺ປເວທິຕສ຺ສ ຘມ຺ມວິນຍສ຺ສ ເທສິຕສ຺ສ ວິຎ຺ຎາຕາ ປຸຄ຺ຄໂລ ທຸລ຺ລໂຠ ໂລກສ຺ມິໍ, ຕຖາຄຕປ຺ປເວທິຕສ຺ສ ຘມ຺ມວິນຍສ຺ສ ເທສິຕສ຺ສ ວິຎ຺ຎາຕາ [ວິຎ຺ຎາຕສ຺ສ (ສີ. ປີ.) ອ. ນິ. ໕.໑໙໕] ຘມ຺ມານຸຘມ຺ມປ຺ປຏິປນ຺ໂນ ປຸຄ຺ຄໂລ ທຸລ຺ລໂຠ ໂລກສ຺ມິໍ, ກຕຎ຺ຎູ ກຕເວທີ ປຸຄ຺ຄໂລ ທຸລ຺ລໂຠ ໂລກສ຺ມິໍ. ອິເມສໍ ໂຂ, ລິຈ຺ຉວີ, ປຎ຺ຈນ຺ນໍ ຣຕນານໍ ປາຕຸຠາໂວ ທຸລ຺ລໂຠ ໂລກສ຺ມິ’’ນ຺ຕິ. ຕຕິຍໍ.