໑໐. ພ຺ຍສນສຸຕ຺ຕໍ

໑໓໐. ‘‘ປຎ຺ຈິມານິ, ຠິກ຺ຂເວ, ພ຺ຍສນານິ. ກຕມານິ ປຎ຺ຈ? ຎາຕິພ຺ຍສນໍ, ໂຠຄພ຺ຍສນໍ, ໂຣຄພ຺ຍສນໍ, ສີລພ຺ຍສນໍ, ທິຏ຺ຐິພ຺ຍສນໍ. ນ, ຠິກ຺ຂເວ, ສຕ຺ຕາ ຎາຕິພ຺ຍສນເຫຕຸ ວາ ໂຠຄພ຺ຍສນເຫຕຸ ວາ ໂຣຄພ຺ຍສນເຫຕຸ ວາ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊນ຺ຕິ. ສີລພ຺ຍສນເຫຕຸ ວາ, ຠິກ຺ຂເວ, ສຕ຺ຕາ ທິຏ຺ຐິພ຺ຍສນເຫຕຸ ວາ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊນ຺ຕິ. ອິມານິ ໂຂ, ຠິກ຺ຂເວ, ປຎ຺ຈ ພ຺ຍສນານິ.

‘‘ປຎ຺ຈິມາ, ຠິກ຺ຂເວ, ສມ຺ປທາ. ກຕມາ ປຎ຺ຈ? ຎາຕິສມ຺ປທາ, ໂຠຄສມ຺ປທາ, ອາໂຣຄ຺ຍສມ຺ປທາ, ສີລສມ຺ປທາ, ທິຏ຺ຐິສມ຺ປທາ. ນ, ຠິກ຺ຂເວ, ສຕ຺ຕາ ຎາຕິສມ຺ປທາເຫຕຸ ວາ ໂຠຄສມ຺ປທາເຫຕຸ ວາ ອາໂຣຄ຺ຍສມ຺ປທາເຫຕຸ ວາ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊນ຺ຕິ. ສີລສມ຺ປທາເຫຕຸ ວາ, ຠິກ຺ຂເວ, ສຕ຺ຕາ ທິຏ຺ຐິສມ຺ປທາເຫຕຸ ວາ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊນ຺ຕິ. ອິມາ ໂຂ, ຠິກ຺ຂເວ, ປຎ຺ຈ ສມ຺ປທາ’’ຕິ. ທສມໍ.

ຄິລານວຄ຺ໂຄ ຕຕິໂຍ.