໙. ຕຕິຍອນາຄຕຠຍສຸຕ຺ຕໍ

໗໙. ‘‘ປຎ຺ຈິມານິ, ຠິກ຺ຂເວ, ອນາຄຕຠຍານິ ເອຕຣຫິ ອສມຸປ຺ປນ຺ນານິ ອາຍຕິໍ ສມຸປ຺ປຊ຺ຊິສ຺ສນ຺ຕິ. ຕານິ ໂວ [ໂຂ (ກຕ຺ຖຈິ)] ປຏິພຸຊ຺ຌິຕພ຺ພານິ; ປຏິພຸຊ຺ຌິຕ຺ວາ ຈ ເຕສໍ ປຫານາຍ ວາຍມິຕພ຺ພໍ.

‘‘ກຕມານິ ປຎ຺ຈ? ຠວິສ຺ສນ຺ຕິ, ຠິກ຺ຂເວ, ຠິກ຺ຂູ ອນາຄຕມທ຺ຘານໍ ອຠາວິຕກາຍາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ. ເຕ ອຠາວິຕກາຍາ ສມານາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ ອຎ຺ເຎ ອຸປສມ຺ປາເທສ຺ສນ຺ຕິ. ເຕປິ [ເຕ (ສີ.)] ນ ສກ຺ຂິສ຺ສນ຺ຕິ ວິເນຕຸໍ ອຘິສີເລ ອຘິຈິຕ຺ເຕ ອຘິປຎ຺ຎາຍ. ເຕປິ ຠວິສ຺ສນ຺ຕິ ອຠາວິຕກາຍາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ. ເຕ ອຠາວິຕກາຍາ ສມານາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ ອຎ຺ເຎ ອຸປສມ຺ປາເທສ຺ສນ຺ຕິ. ເຕປິ [ເຕ (?)] ນ ສກ຺ຂິສ຺ສນ຺ຕິ ວິເນຕຸໍ ອຘິສີເລ ອຘິຈິຕ຺ເຕ ອຘິປຎ຺ຎາຍ. ເຕປິ ຠວິສ຺ສນ຺ຕິ ອຠາວິຕກາຍາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ. ອິຕິ ໂຂ, ຠິກ຺ຂເວ, ຘມ຺ມສນ຺ໂທສາ ວິນຍສນ຺ໂທໂສ; ວິນຍສນ຺ໂທສາ ຘມ຺ມສນ຺ໂທໂສ. ອິທໍ, ຠິກ຺ຂເວ, ປຐມໍ ອນາຄຕຠຍໍ ເອຕຣຫິ ອສມຸປ຺ປນ຺ນໍ ອາຍຕິໍ ສມຸປ຺ປຊ຺ຊິສ຺ສຕິ. ຕໍ ໂວ ປຏິພຸຊ຺ຌິຕພ຺ພໍ; ປຏິພຸຊ຺ຌິຕ຺ວາ ຈ ຕສ຺ສ ປຫານາຍ ວາຍມິຕພ຺ພໍ.

‘‘ປຸນ ຈປຣໍ, ຠິກ຺ຂເວ, ຠວິສ຺ສນ຺ຕິ ຠິກ຺ຂູ ອນາຄຕມທ຺ຘານໍ ອຠາວິຕກາຍາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ. ເຕ ອຠາວິຕກາຍາ ສມານາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ ອຎ຺ເຎສໍ ນິສ຺ສຍໍ ທສ຺ສນ຺ຕິ. ເຕປິ ນ ສກ຺ຂິສ຺ສນ຺ຕິ ວິເນຕຸໍ ອຘິສີເລ ອຘິຈິຕ຺ເຕ ອຘິປຎ຺ຎາຍ. ເຕປິ ຠວິສ຺ສນ຺ຕິ ອຠາວິຕກາຍາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ. ເຕ ອຠາວິຕກາຍາ ສມານາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ ອຎ຺ເຎສໍ ນິສ຺ສຍໍ ທສ຺ສນ຺ຕິ. ເຕປິ ນ ສກ຺ຂິສ຺ສນ຺ຕິ ວິເນຕຸໍ ອຘິສີເລ ອຘິຈິຕ຺ເຕ ອຘິປຎ຺ຎາຍ. ເຕປິ ຠວິສ຺ສນ຺ຕິ ອຠາວິຕກາຍາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ. ອິຕິ ໂຂ, ຠິກ຺ຂເວ, ຘມ຺ມສນ຺ໂທສາ ວິນຍສນ຺ໂທໂສ; ວິນຍສນ຺ໂທສາ ຘມ຺ມສນ຺ໂທໂສ. ອິທໍ, ຠິກ຺ຂເວ, ທຸຕິຍໍ ອນາຄຕຠຍໍ ເອຕຣຫິ ອສມຸປ຺ປນ຺ນໍ ອາຍຕິໍ ສມຸປ຺ປຊ຺ຊິສ຺ສຕິ. ຕໍ ໂວ ປຏິພຸຊ຺ຌິຕພ຺ພໍ; ປຏິພຸຊ຺ຌິຕ຺ວາ ຈ ຕສ຺ສ ປຫານາຍ ວາຍມິຕພ຺ພໍ.

‘‘ປຸນ ຈປຣໍ, ຠິກ຺ຂເວ, ຠວິສ຺ສນ຺ຕິ ຠິກ຺ຂູ ອນາຄຕມທ຺ຘານໍ ອຠາວິຕກາຍາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ. ເຕ ອຠາວິຕກາຍາ ສມານາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ ອຠິຘມ຺ມກຖໍ ເວທລ຺ລກຖໍ ກເຖນ຺ຕາ ກຓ຺ຫຘມ຺ມໍ ໂອກ຺ກມມານາ ນ ພຸຊ຺ຌິສ຺ສນ຺ຕິ. ອິຕິ ໂຂ, ຠິກ຺ຂເວ, ຘມ຺ມສນ຺ໂທສາ ວິນຍສນ຺ໂທໂສ; ວິນຍສນ຺ໂທສາ ຘມ຺ມສນ຺ໂທໂສ. ອິທໍ, ຠິກ຺ຂເວ, ຕຕິຍໍ ອນາຄຕຠຍໍ ເອຕຣຫິ ອສມຸປ຺ປນ຺ນໍ ອາຍຕິໍ ສມຸປ຺ປຊ຺ຊິສ຺ສຕິ. ຕໍ ໂວ ປຏິພຸຊ຺ຌິຕພ຺ພໍ; ປຏິພຸຊ຺ຌິຕ຺ວາ ຈ ຕສ຺ສ ປຫານາຍ ວາຍມິຕພ຺ພໍ.

‘‘ປຸນ ຈປຣໍ, ຠິກ຺ຂເວ, ຠວິສ຺ສນ຺ຕິ ຠິກ຺ຂູ ອນາຄຕມທ຺ຘານໍ ອຠາວິຕກາຍາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ. ເຕ ອຠາວິຕກາຍາ ສມານາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ ເຍ ເຕ ສຸຕ຺ຕນ຺ຕາ ຕຖາຄຕຠາສິຕາ ຄມ຺ຠີຣາ ຄມ຺ຠີຣຕ຺ຖາ ໂລກຸຕ຺ຕຣາ ສຸຎ຺ຎຕາປ຺ປຏິສໍຍຸຕ຺ຕາ, ເຕສຸ ຠຎ຺ຎມາເນສຸ ນ ສຸສ຺ສູສິສ຺ສນ຺ຕິ, ນ ໂສຕໍ ໂອທຫິສ຺ສນ຺ຕິ, ນ ອຎ຺ຎາ ຈິຕ຺ຕໍ ອຸປຏ຺ຐເປສ຺ສນ຺ຕິ, ນ ຈ ເຕ ຘມ຺ເມ ອຸຄ຺ຄເຫຕພ຺ພໍ ປຣິຍາປຸຓິຕພ຺ພໍ ມຎ຺ຎິສ຺ສນ຺ຕິ. ເຍ ປນ ເຕ ສຸຕ຺ຕນ຺ຕາ ກວິຕາ [ກວິກຕາ (ສີ. ສ຺ຍາ. ກໍ. ປີ., ສໍ. ນິ. ໒.໒໒໙) ຏີກາ ໂອໂລເກຕພ຺ພາ] ກາເວຍ຺ຍາ ຈິຕ຺ຕກ຺ຂຣາ ຈິຕ຺ຕພ຺ຍຎ຺ຊນາ ພາຫິຣກາ ສາວກຠາສິຕາ, ເຕສຸ ຠຎ຺ຎມາເນສຸ ສຸສ຺ສູສິສ຺ສນ຺ຕິ, ໂສຕໍ ໂອທຫິສ຺ສນ຺ຕິ, ອຎ຺ຎາ ຈິຕ຺ຕໍ ອຸປຏ຺ຐເປສ຺ສນ຺ຕິ, ເຕ ຈ ຘມ຺ເມ ອຸຄ຺ຄເຫຕພ຺ພໍ ປຣິຍາປຸຓິຕພ຺ພໍ ມຎ຺ຎິສ຺ສນ຺ຕິ. ອິຕິ ໂຂ, ຠິກ຺ຂເວ, ຘມ຺ມສນ຺ໂທສາ ວິນຍສນ຺ໂທໂສ; ວິນຍສນ຺ໂທສາ ຘມ຺ມສນ຺ໂທໂສ. ອິທໍ, ຠິກ຺ຂເວ, ຈຕຸຕ຺ຖໍ ອນາຄຕຠຍໍ ເອຕຣຫິ ອສມຸປ຺ປນ຺ນໍ ອາຍຕິໍ ສມຸປ຺ປຊ຺ຊິສ຺ສຕິ. ຕໍ ໂວ ປຏິພຸຊ຺ຌິຕພ຺ພໍ; ປຏິພຸຊ຺ຌິຕ຺ວາ ຈ ຕສ຺ສ ປຫານາຍ ວາຍມິຕພ຺ພໍ.

‘‘ປຸນ ຈປຣໍ, ຠິກ຺ຂເວ, ຠວິສ຺ສນ຺ຕິ ຠິກ຺ຂູ ອນາຄຕມທ຺ຘານໍ ອຠາວິຕກາຍາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ. ເຕ ອຠາວິຕກາຍາ ສມານາ ອຠາວິຕສີລາ ອຠາວິຕຈິຕ຺ຕາ ອຠາວິຕປຎ຺ຎາ ເຖຣາ ຠິກ຺ຂູ ພາຫຸລິກາ [ພາຫຸລ຺ລິກາ (ສ຺ຍາ. ກໍ.) ອ. ນິ. ໒.໔໙; ໓.໙໖] ຠວິສ຺ສນ຺ຕິ ສາຖລິກາ ໂອກ຺ກມເນ ປຸພ຺ພງ຺ຄມາ ປວິເວເກ ນິກ຺ຂິຕ຺ຕຘຸຣາ, ນ ວີຣິຍໍ ອາຣຠິສ຺ສນ຺ຕິ ອປ຺ປຕ຺ຕສ຺ສ ປຕ຺ຕິຍາ ອນຘິຄຕສ຺ສ ອຘິຄມາຍ ອສຈ຺ຉິກຕສ຺ສ ສຈ຺ຉິກິຣິຍາຍ. ເຕສໍ ປຈ຺ຉິມາ ຊນຕາ ທິຏ຺ຐານຸຄຕິໍ ອາປຊ຺ຊິສ຺ສຕິ. ສາປິ ຠວິສ຺ສຕິ ພາຫຸລິກາ ສາຖລິກາ ໂອກ຺ກມເນ ປຸພ຺ພງ຺ຄມາ ປວິເວເກ ນິກ຺ຂິຕ຺ຕຘຸຣາ, ນ ວີຣິຍໍ ອາຣຠິສ຺ສຕິ ອປ຺ປຕ຺ຕສ຺ສ ປຕ຺ຕິຍາ ອນຘິຄຕສ຺ສ ອຘິຄມາຍ ອສຈ຺ຉິກຕສ຺ສ ສຈ຺ຉິກິຣິຍາຍ. ອິຕິ ໂຂ, ຠິກ຺ຂເວ, ຘມ຺ມສນ຺ໂທສາ ວິນຍສນ຺ໂທໂສ; ວິນຍສນ຺ໂທສາ ຘມ຺ມສນ຺ໂທໂສ. ອິທໍ, ຠິກ຺ຂເວ, ປຎ຺ຈມໍ ອນາຄຕຠຍໍ ເອຕຣຫິ ອສມຸປ຺ປນ຺ນໍ ອາຍຕິໍ ສມຸປ຺ປຊ຺ຊິສ຺ສຕິ. ຕໍ ໂວ ປຏິພຸຊ຺ຌິຕພ຺ພໍ; ປຏິພຸຊ຺ຌິຕ຺ວາ ຈ ຕສ຺ສ ປຫານາຍ ວາຍມິຕພ຺ພໍ. ‘‘ອິມານິ ໂຂ, ຠິກ຺ຂເວ, ປຎ຺ຈ ອນາຄຕຠຍານິ ເອຕຣຫິ ອສມຸປ຺ປນ຺ນານິ ອາຍຕິໍ ສມຸປ຺ປຊ຺ຊິສ຺ສນ຺ຕິ. ຕານິ ໂວ ປຏິພຸຊ຺ຌິຕພ຺ພານິ; ປຏິພຸຊ຺ຌິຕ຺ວາ ຈ ເຕສໍ ປຫານາຍ ວາຍມິຕພ຺ພ’’ນ຺ຕິ. ນວມໍ.