໕. ປຐມໂຍຘາຊີວສຸຕ຺ຕໍ

໗໕. ‘‘ປຎ຺ຈິເມ, ຠິກ຺ຂເວ, ໂຍຘາຊີວາ ສນ຺ໂຕ ສໍວິຊ຺ຊມານາ ໂລກສ຺ມິໍ. ກຕເມ ປຎ຺ຈ? ອິຘ, ຠິກ຺ຂເວ, ເອກຈ຺ໂຈ ໂຍຘາຊີໂວ ຣຊຄ຺ຄຎ຺ເຎວ ທິສ຺ວາ ສໍສີທຕິ ວິສີທຕິ ນ ສນ຺ຖມ຺ຠຕິ ນ ສກ຺ໂກຕິ ສງ຺ຄາມໍ ໂອຕຣິຕຸໍ. ເອວຣູໂປປິ [ເອວຣູໂປ (ສີ.) ປຸ. ປ. ໑໙໓], ຠິກ຺ຂເວ, ອິເຘກຈ຺ໂຈ [ເອກຈ຺ໂຈ (ສີ.)] ໂຍຘາຊີໂວ ໂຫຕິ. ອຍໍ, ຠິກ຺ຂເວ, ປຐໂມ ໂຍຘາຊີໂວ ສນ຺ໂຕ ສໍວິຊ຺ຊມາໂນ ໂລກສ຺ມິໍ.

‘‘ປຸນ ຈປຣໍ, ຠິກ຺ຂເວ, ອິເຘກຈ຺ໂຈ ໂຍຘາຊີໂວ ສຫຕິ ຣຊຄ຺ຄໍ; ອປິ ຈ ໂຂ ຘຊຄ຺ຄຎ຺ເຎວ ທິສ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ສງ຺ຄາມໍ ໂອຕຣິຕຸໍ. ເອວຣູໂປປິ, ຠິກ຺ຂເວ, ອິເຘກຈ຺ໂຈ ໂຍຘາຊີໂວ ໂຫຕິ. ອຍໍ, ຠິກ຺ຂເວ, ທຸຕິໂຍ ໂຍຘາຊີໂວ ສນ຺ໂຕ ສໍວິຊ຺ຊມາໂນ ໂລກສ຺ມິໍ.

‘‘ປຸນ ຈປຣໍ, ຠິກ຺ຂເວ, ອິເຘກຈ຺ໂຈ ໂຍຘາຊີໂວ ສຫຕິ ຣຊຄ຺ຄໍ ສຫຕິ ຘຊຄ຺ຄໍ; ອປິ ຈ ໂຂ ອຸສ຺ສາຣຓຎ຺ເຎວ [ອຸສ຺ສາທນໍເຍວ (ສີ. ປີ.)] ສຸຕ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ສງ຺ຄາມໍ ໂອຕຣິຕຸໍ. ເອວຣູໂປປິ, ຠິກ຺ຂເວ, ອິເຘກຈ຺ໂຈ ໂຍຘາຊີໂວ ໂຫຕິ. ອຍໍ, ຠິກ຺ຂເວ, ຕຕິໂຍ ໂຍຘາຊີໂວ ສນ຺ໂຕ ສໍວິຊ຺ຊມາໂນ ໂລກສ຺ມິໍ.

‘‘ປຸນ ຈປຣໍ, ຠິກ຺ຂເວ, ອິເຘກຈ຺ໂຈ ໂຍຘາຊີໂວ ສຫຕິ ຣຊຄ຺ຄໍ, ສຫຕິ ຘຊຄ຺ຄໍ, ສຫຕິ ອຸສ຺ສາຣຓໍ; ອປິ ຈ ໂຂ ສມ຺ປຫາເຣ ຫຎ຺ຎຕິ [ອາຫຎ຺ຎຕິ (ສີ.)] ພ຺ຍາປຊ຺ຊຕິ. ເອວຣູໂປປິ, ຠິກ຺ຂເວ, ອິເຘກຈ຺ໂຈ ໂຍຘາຊີໂວ ໂຫຕິ. ອຍໍ, ຠິກ຺ຂເວ, ຈຕຸຕ຺ໂຖ ໂຍຘາຊີໂວ ສນ຺ໂຕ ສໍວິຊ຺ຊມາໂນ ໂລກສ຺ມິໍ.

‘‘ປຸນ ຈປຣໍ, ຠິກ຺ຂເວ, ອິເຘກຈ຺ໂຈ ໂຍຘາຊີໂວ ສຫຕິ ຣຊຄ຺ຄໍ, ສຫຕິ ຘຊຄ຺ຄໍ, ສຫຕິ ອຸສ຺ສາຣຓໍ, ສຫຕິ ສມ຺ປຫາຣໍ. ໂສ ຕໍ ສງ຺ຄາມໍ ອຠິວິຊິນິຕ຺ວາ ວິຊິຕສງ຺ຄາໂມ ຕເມວ ສງ຺ຄາມສີສໍ ອຊ຺ຌາວສຕິ. ເອວຣູໂປປິ, ຠິກ຺ຂເວ, ອິເຘກຈ຺ໂຈ ໂຍຘາຊີໂວ ໂຫຕິ. ອຍໍ, ຠິກ຺ຂເວ, ປຎ຺ຈໂມ ໂຍຘາຊີໂວ ສນ຺ໂຕ ສໍວິຊ຺ຊມາໂນ ໂລກສ຺ມິໍ. ອິເມ ໂຂ, ຠິກ຺ຂເວ, ປຎ຺ຈ ໂຍຘາຊີວາ ສນ຺ໂຕ ສໍວິຊ຺ຊມານາ ໂລກສ຺ມິໍ.

‘‘ເອວເມວໍ ໂຂ, ຠິກ຺ຂເວ, ປຎ຺ຈິເມ ໂຍຘາຊີວູປມາ ປຸຄ຺ຄລາ ສນ຺ໂຕ ສໍວິຊ຺ຊມານາ ຠິກ຺ຂູສຸ. ກຕເມ ປຎ຺ຈ? ອິຘ, ຠິກ຺ຂເວ, ຠິກ຺ຂຸ ຣຊຄ຺ຄຎ຺ເຎວ ທິສ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ພ຺ຣຫ຺ມຈຣິຍໍ ສນ຺ຘາເຣຕຸໍ [ສນ຺ຕາເນຕຸໍ (ສີ. ສ຺ຍາ. ກໍ. ປີ.)]. ສິກ຺ຂາທຸພ຺ພລ຺ຍໍ ອາວິກຕ຺ວາ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕຕິ. ກິມສ຺ສ ຣຊຄ຺ຄສ຺ມິໍ? ອິຘ, ຠິກ຺ຂເວ, ຠິກ຺ຂຸ ສຸຓາຕິ – ‘ອມຸກສ຺ມິໍ ນາມ ຄາເມ ວາ ນິຄເມ ວາ ອິຕ຺ຖີ ວາ ກຸມາຣີ ວາ ອຠິຣູປາ ທສ຺ສນີຍາ ປາສາທິກາ ປຣມາຍ ວຓ຺ຓໂປກ຺ຂຣຕາຍ ສມນ຺ນາຄຕາ’ຕິ. ໂສ ຕໍ ສຸຕ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ພ຺ຣຫ຺ມຈຣິຍໍ ສນ຺ຘາເຣຕຸໍ. ສິກ຺ຂາທຸພ຺ພລ຺ຍໍ ອາວິກຕ຺ວາ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕຕິ. ອິທມສ຺ສ ຣຊຄ຺ຄສ຺ມິໍ.

‘‘ເສຍ຺ຍຖາປິ ໂສ, ຠິກ຺ຂເວ, ໂຍຘາຊີໂວ ຣຊຄ຺ຄຎ຺ເຎວ ທິສ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ສງ຺ຄາມໍ ໂອຕຣິຕຸໍ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ. ເອວຣູໂປປິ, ຠິກ຺ຂເວ, ອິເຘກຈ຺ໂຈ ປຸຄ຺ຄໂລ ໂຫຕິ. ອຍໍ, ຠິກ຺ຂເວ, ປຐໂມ ໂຍຘາຊີວູປໂມ ປຸຄ຺ຄໂລ ສນ຺ໂຕ ສໍວິຊ຺ຊມາໂນ ຠິກ຺ຂູສຸ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸ ສຫຕິ ຣຊຄ຺ຄໍ; ອປິ ຈ ໂຂ ຘຊຄ຺ຄຎ຺ເຎວ ທິສ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ພ຺ຣຫ຺ມຈຣິຍໍ ສນ຺ຘາເຣຕຸໍ. ສິກ຺ຂາທຸພ຺ພລ຺ຍໍ ອາວິກຕ຺ວາ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕຕິ. ກິມສ຺ສ ຘຊຄ຺ຄສ຺ມິໍ? ອິຘ, ຠິກ຺ຂເວ, ຠິກ຺ຂຸ ນ ເຫວ ໂຂ ສຸຓາຕິ – ‘ອມຸກສ຺ມິໍ ນາມ ຄາເມ ວາ ນິຄເມ ວາ ອິຕ຺ຖີ ວາ ກຸມາຣີ ວາ ອຠິຣູປາ ທສ຺ສນີຍາ ປາສາທິກາ ປຣມາຍ ວຓ຺ຓໂປກ຺ຂຣຕາຍ ສມນ຺ນາຄຕາ’ຕິ; ອປິ ຈ ໂຂ ສາມໍ ປສ຺ສຕິ ອິຕ຺ຖິໍ ວາ ກຸມາຣິໍ ວາ ອຠິຣູປໍ ທສ຺ສນີຍໍ ປາສາທິກໍ ປຣມາຍ ວຓ຺ຓໂປກ຺ຂຣຕາຍ ສມນ຺ນາຄຕໍ. ໂສ ຕໍ ທິສ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ພ຺ຣຫ຺ມຈຣິຍໍ ສນ຺ຘາເຣຕຸໍ. ສິກ຺ຂາທຸພ຺ພລ຺ຍໍ ອາວິກຕ຺ວາ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕຕິ. ອິທມສ຺ສ ຘຊຄ຺ຄສ຺ມິໍ.

‘‘ເສຍ຺ຍຖາປິ ໂສ, ຠິກ຺ຂເວ, ໂຍຘາຊີໂວ ສຫຕິ ຣຊຄ຺ຄໍ; ອປິ ຈ ໂຂ ຘຊຄ຺ຄຎ຺ເຎວ ທິສ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ສງ຺ຄາມໍ ໂອຕຣິຕຸໍ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ. ເອວຣູໂປປິ, ຠິກ຺ຂເວ, ອິເຘກຈ຺ໂຈ ປຸຄ຺ຄໂລ ໂຫຕິ. ອຍໍ, ຠິກ຺ຂເວ, ທຸຕິໂຍ ໂຍຘາຊີວູປໂມ ປຸຄ຺ຄໂລ ສນ຺ໂຕ ສໍວິຊ຺ຊມາໂນ ຠິກ຺ຂູສຸ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸ ສຫຕິ ຣຊຄ຺ຄໍ, ສຫຕິ ຘຊຄ຺ຄໍ; ອປິ ຈ ໂຂ ອຸສ຺ສາຣຓຎ຺ເຎວ ສຸຕ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ພ຺ຣຫ຺ມຈຣິຍໍ ສນ຺ຘາເຣຕຸໍ. ສິກ຺ຂາທຸພ຺ພລ຺ຍໍ ອາວິກຕ຺ວາ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕຕິ. ກິມສ຺ສ ອຸສ຺ສາຣຓາຍ? ອິຘ, ຠິກ຺ຂເວ, ຠິກ຺ຂຸໍ ອຣຎ຺ຎຄຕໍ ວາ ຣຸກ຺ຂມູລຄຕໍ ວາ ສຸຎ຺ຎາຄາຣຄຕໍ ວາ ມາຕຸຄາໂມ ອຸປສງ຺ກມິຕ຺ວາ ອູຫສຕິ [ອຸຫສຕິ (ກ.), ໂອຫສຕິ (ສ຺ຍາ. ກໍ.) ປຸ. ປ. ໑໙໖] ອຸລ຺ລປຕິ ອຸຊ຺ຊຄ຺ຆຕິ ອຸປ຺ປຓ຺ເຑຕິ. ໂສ ມາຕຸຄາເມນ ອູຫສິຍມາໂນ ອຸລ຺ລປິຍມາໂນ ອຸຊ຺ຊຄ຺ຆິຍມາໂນ ອຸປ຺ປຓ຺ຑິຍມາໂນ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ພ຺ຣຫ຺ມຈຣິຍໍ ສນ຺ຘາເຣຕຸໍ. ສິກ຺ຂາທຸພ຺ພລ຺ຍໍ ອາວິກຕ຺ວາ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕຕິ. ອິທມສ຺ສ ອຸສ຺ສາຣຓາຍ.

‘‘ເສຍ຺ຍຖາປິ ໂສ, ຠິກ຺ຂເວ, ໂຍຘາຊີໂວ ສຫຕິ ຣຊຄ຺ຄໍ, ສຫຕິ ຘຊຄ຺ຄໍ; ອປິ ຈ ໂຂ ອຸສ຺ສາຣຓຎ຺ເຎວ ສຸຕ຺ວາ ສໍສີທຕິ ວິສີທຕິ, ນ ສນ຺ຖມ຺ຠຕິ, ນ ສກ຺ໂກຕິ ສງ຺ຄາມໍ ໂອຕຣິຕຸໍ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ. ເອວຣູໂປປິ, ຠິກ຺ຂເວ, ອິເຘກຈ຺ໂຈ ປຸຄ຺ຄໂລ ໂຫຕິ. ອຍໍ, ຠິກ຺ຂເວ, ຕຕິໂຍ ໂຍຘາຊີວູປໂມ ປຸຄ຺ຄໂລ ສນ຺ໂຕ ສໍວິຊ຺ຊມາໂນ ຠິກ຺ຂູສຸ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸ ສຫຕິ ຣຊຄ຺ຄໍ, ສຫຕິ ຘຊຄ຺ຄໍ, ສຫຕິ ອຸສ຺ສາຣຓໍ; ອປິ ຈ ໂຂ ສມ຺ປຫາເຣ ຫຎ຺ຎຕິ ພ຺ຍາປຊ຺ຊຕິ. ກິມສ຺ສ ສມ຺ປຫາຣສ຺ມິໍ? ອິຘ, ຠິກ຺ຂເວ, ຠິກ຺ຂຸໍ ອຣຎ຺ຎຄຕໍ ວາ ຣຸກ຺ຂມູລຄຕໍ ວາ ສຸຎ຺ຎາຄາຣຄຕໍ ວາ ມາຕຸຄາໂມ ອຸປສງ຺ກມິຕ຺ວາ ອຠິນິສີທຕິ ອຠິນິປຊ຺ຊຕິ ອຊ຺ໂຌຕ຺ຖຣຕິ. ໂສ ມາຕຸຄາເມນ ອຠິນິສີທິຍມາໂນ ອຠິນິປຊ຺ຊິຍມາໂນ ອຊ຺ໂຌຕ຺ຖຣິຍມາໂນ ສິກ຺ຂໍ ອປຈ຺ຈກ຺ຂາຍ ທຸພ຺ພລ຺ຍໍ ອນາວິກຕ຺ວາ ເມຖຸນໍ ຘມ຺ມໍ ປຏິເສວຕິ. ອິທມສ຺ສ ສມ຺ປຫາຣສ຺ມິໍ.

‘‘ເສຍ຺ຍຖາປິ ໂສ, ຠິກ຺ຂເວ, ໂຍຘາຊີໂວ ສຫຕິ ຣຊຄ຺ຄໍ, ສຫຕິ ຘຊຄ຺ຄໍ, ສຫຕິ ອຸສ຺ສາຣຓໍ, ອປິ ຈ ໂຂ ສມ຺ປຫາເຣ ຫຎ຺ຎຕິ ພ຺ຍາປຊ຺ຊຕິ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ. ເອວຣູໂປປິ, ຠິກ຺ຂເວ, ອິເຘກຈ຺ໂຈ ປຸຄ຺ຄໂລ ໂຫຕິ. ອຍໍ, ຠິກ຺ຂເວ, ຈຕຸຕ຺ໂຖ ໂຍຘາຊີວູປໂມ ປຸຄ຺ຄໂລ ສນ຺ໂຕ ສໍວິຊ຺ຊມາໂນ ຠິກ຺ຂູສຸ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸ ສຫຕິ ຣຊຄ຺ຄໍ, ສຫຕິ ຘຊຄ຺ຄໍ, ສຫຕິ ອຸສ຺ສາຣຓໍ, ສຫຕິ ສມ຺ປຫາຣໍ, ໂສ ຕໍ ສງ຺ຄາມໍ ອຠິວິຊິນິຕ຺ວາ ວິຊິຕສງ຺ຄາໂມ ຕເມວ ສງ຺ຄາມສີສໍ ອຊ຺ຌາວສຕິ. ກິມສ຺ສ ສງ຺ຄາມວິຊຍສ຺ມິໍ? ອິຘ, ຠິກ຺ຂເວ, ຠິກ຺ຂຸ ອຣຎ຺ຎຄຕໍ ວາ ຣຸກ຺ຂມູລຄຕໍ ວາ ສຸຎ຺ຎາຄາຣຄຕໍ ວາ ມາຕຸຄາໂມ ອຸປສງ຺ກມິຕ຺ວາ ອຠິນິສີທຕິ ອຠິນິປຊ຺ຊຕິ ອຊ຺ໂຌຕ຺ຖຣຕິ. ໂສ ມາຕຸຄາເມນ ອຠິນິສີທິຍມາໂນ ອຠິນິປຊ຺ຊິຍມາໂນ ອຊ຺ໂຌຕ຺ຖຣິຍມາໂນ ວິນິເວເຐຕ຺ວາ ວິນິໂມເຈຕ຺ວາ ເຍນ ກາມໍ ປກ຺ກມຕິ. ໂສ ວິວິຕ຺ຕໍ ເສນາສນໍ ຠຊຕິ ອຣຎ຺ຎໍ ຣຸກ຺ຂມູລໍ ປພ຺ພຕໍ ກນ຺ທຣໍ ຄິຣິຄຸຫໍ ສຸສານໍ ວນປຕ຺ຖໍ ອພ຺ໂຠກາສໍ ປລາລປຸຎ຺ຊໍ.

‘‘ໂສ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ນິສີທຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ. ໂສ ອຠິຊ຺ຌໍ ໂລເກ ປຫາຍ ວິຄຕາຠິຊ຺ເຌນ ເຈຕສາ ວິຫຣຕິ, ອຠິຊ຺ຌາຍ ຈິຕ຺ຕໍ ປຣິໂສເຘຕິ; ພ຺ຍາປາທປໂທສໍ ປຫາຍ ອພ຺ຍາປນ຺ນຈິຕ຺ໂຕ ວິຫຣຕິ, ສພ຺ພປາຓຠູຕຫິຕານຸກມ຺ປີ ພ຺ຍາປາທປໂທສາ ຈິຕ຺ຕໍ ປຣິໂສເຘຕິ; ຖິນມິທ຺ຘໍ ປຫາຍ ວິຄຕຖິນມິທ຺ໂຘ ວິຫຣຕິ ອາໂລກສຎ຺ຎີ ສໂຕ ສມ຺ປຊາໂນ, ຖິນມິທ຺ຘາ ຈິຕ຺ຕໍ ປຣິໂສເຘຕິ; ອຸທ຺ຘຈ຺ຈກຸກ຺ກຸຈ຺ຈໍ ປຫາຍ ອນຸທ຺ຘໂຕ ວິຫຣຕິ ອຊ຺ຌຕ຺ຕໍ ວູປສນ຺ຕຈິຕ຺ໂຕ, ອຸທ຺ຘຈ຺ຈກຸກ຺ກຸຈ຺ຈາ ຈິຕ຺ຕໍ ປຣິໂສເຘຕິ; ວິຈິກິຈ຺ຉໍ ປຫາຍ ຕິຓ຺ຓວິຈິກິຈ຺ໂຉ ວິຫຣຕິ ອກຖໍກຖີ ກຸສເລສຸ ຘມ຺ເມສຸ, ວິຈິກິຈ຺ຉາຍ ຈິຕ຺ຕໍ ປຣິໂສເຘຕິ. ໂສ ອິເມ ປຎ຺ຈ ນີວຣເຓ ປຫາຍ ເຈຕໂສ ອຸປກ຺ກິເລເສ ປຎ຺ຎາຍ ທຸພ຺ພລີກຣເຓ ວິວິຈ຺ເຈວ ກາເມຫິ…ເປ… ປີຕິຍາ ຈ ວິຣາຄາ ອຸເປກ຺ຂໂກ ຈ ວິຫຣຕິ ສໂຕ ສມ຺ປຊາໂນ, ສຸຂຎ຺ຈ ກາເຍນ ປຏິສໍເວເທຕິ ຍໍ ຕໍ ອຣິຍາ ອາຈິກ຺ຂນ຺ຕິ – ‘ອຸເປກ຺ຂໂກ ສຕິມາ ສຸຂວິຫາຣີ’ຕິ ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ. ສຸຂສ຺ສ ຈ ປຫານາ ທຸກ຺ຂສ຺ສ ຈ ປຫານາ, ປຸພ຺ເພວ ໂສມນສ຺ສໂທມນສ຺ສານໍ ອຕ຺ຖງ຺ຄມາ ອທຸກ຺ຂມສຸຂໍ ອຸເປກ຺ຂາສຕິປາຣິສຸທ຺ຘິໍ ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ.

‘‘ໂສ ເອວໍ ສມາຫິເຕ ຈິຕ຺ເຕ ປຣິສຸທ຺ເຘ ປຣິໂຍທາເຕ ອນງ຺ຄເຓ ວິຄຕູປກ຺ກິເລເສ ມຸທຸຠູເຕ ກມ຺ມນິເຍ ຐິເຕ ອາເນຎ຺ຊປ຺ປຕ຺ເຕ ອາສວານໍ ຂຍຎາຓາຍ ຈິຕ຺ຕໍ ອຠິນິນ຺ນາເມຕິ. ໂສ ‘ອິທໍ ທຸກ຺ຂ’ນ຺ຕິ ຍຖາຠູຕໍ ປຊານາຕິ, ‘ອຍໍ ທຸກ຺ຂສມຸທໂຍ’ຕິ ຍຖາຠູຕໍ ປຊານາຕິ, ‘ອຍໍ ທຸກ຺ຂນິໂຣໂຘ’ຕິ ຍຖາຠູຕໍ ປຊານາຕິ, ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ, ‘ອິເມ ອາສວາ’ຕິ ຍຖາຠູຕໍ ປຊານາຕິ, ‘ອຍໍ ອາສວສມຸທໂຍ’ຕິ ຍຖາຠູຕໍ ປຊານາຕິ, ‘ອຍໍ ອາສວນິໂຣໂຘ’ຕິ ຍຖາຠູຕໍ ປຊານາຕິ, ‘ອຍໍ ອາສວນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ. ຕສ຺ສ ເອວໍ ຊານໂຕ ເອວໍ ປສ຺ສໂຕ ກາມາສວາປິ ຈິຕ຺ຕໍ ວິມຸຈ຺ຈຕິ, ຠວາສວາປິ ຈິຕ຺ຕໍ ວິມຸຈ຺ຈຕິ, ອວິຊ຺ຊາສວາປິ ຈິຕ຺ຕໍ ວິມຸຈ຺ຈຕິ, ວິມຸຕ຺ຕສ຺ມິໍ ວິມຸຕ຺ຕມິຕິ ຎາຓໍ ໂຫຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕິ. ອິທມສ຺ສ ສງ຺ຄາມວິຊຍສ຺ມິໍ.

‘‘ເສຍ຺ຍຖາປິ ໂສ, ຠິກ຺ຂເວ, ໂຍຘາຊີໂວ ສຫຕິ ຣຊຄ຺ຄໍ, ສຫຕິ ຘຊຄ຺ຄໍ, ສຫຕິ ອຸສ຺ສາຣຓໍ, ສຫຕິ ສມ຺ປຫາຣໍ, ໂສ ຕໍ ສງ຺ຄາມໍ ອຠິວິຊິນິຕ຺ວາ ວິຊິຕສງ຺ຄາໂມ ຕເມວ ສງ຺ຄາມສີສໍ ອຊ຺ຌາວສຕິ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ. ເອວຣູໂປປິ, ຠິກ຺ຂເວ, ອິເຘກຈ຺ໂຈ ປຸຄ຺ຄໂລ ໂຫຕິ. ອຍໍ, ຠິກ຺ຂເວ, ປຎ຺ຈໂມ ໂຍຘາຊີວູປໂມ ປຸຄ຺ຄໂລ ສນ຺ໂຕ ສໍວິຊ຺ຊມາໂນ ຠິກ຺ຂູສຸ. ອິເມ ໂຂ, ຠິກ຺ຂເວ, ປຎ຺ຈ ໂຍຘາຊີວູປມາ ປຸຄ຺ຄລາ ສນ຺ໂຕ ສໍວິຊ຺ຊມານາ ຠິກ຺ຂູສູ’’ຕິ. ປຎ຺ຈມໍ.