໘. ຈວນສຸຕ຺ຕໍ

໘. ‘‘ປຎ຺ຈຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ຈວຕິ, ນປ຺ປຕິຏ຺ຐາຕິ ສທ຺ຘມ຺ເມ. ກຕເມຫິ ປຎ຺ຈຫິ? ອສທ຺ໂຘ, ຠິກ຺ຂເວ, ຠິກ຺ຂຸ ຈວຕິ, ນປ຺ປຕິຏ຺ຐາຕິ ສທ຺ຘມ຺ເມ. ອຫິຣິໂກ, ຠິກ຺ຂເວ, ຠິກ຺ຂຸ ຈວຕິ, ນປ຺ປຕິຏ຺ຐາຕິ ສທ຺ຘມ຺ເມ. ອໂນຕ຺ຕປ຺ປີ, ຠິກ຺ຂເວ, ຠິກ຺ຂຸ ຈວຕິ, ນປ຺ປຕິຏ຺ຐາຕິ ສທ຺ຘມ຺ເມ. ກຸສີໂຕ, ຠິກ຺ຂເວ, ຠິກ຺ຂຸ ຈວຕິ, ນປ຺ປຕິຏ຺ຐາຕິ ສທ຺ຘມ຺ເມ. ທຸປ຺ປຎ຺ໂຎ, ຠິກ຺ຂເວ, ຠິກ຺ຂຸ ຈວຕິ, ນປ຺ປຕິຏ຺ຐາຕິ ສທ຺ຘມ຺ເມ. ອິເມຫິ ໂຂ, ຠິກ຺ຂເວ, ປຎ຺ຈຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ຈວຕິ, ນປ຺ປຕິຏ຺ຐາຕິ ສທ຺ຘມ຺ເມ.

‘‘ປຎ຺ຈຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ນ ຈວຕິ, ປຕິຏ຺ຐາຕິ ສທ຺ຘມ຺ເມ. ກຕເມຫິ ປຎ຺ຈຫິ? ສທ຺ໂຘ, ຠິກ຺ຂເວ, ຠິກ຺ຂຸ ນ ຈວຕິ, ປຕິຏ຺ຐາຕິ ສທ຺ຘມ຺ເມ. ຫິຣີມາ, ຠິກ຺ຂເວ, ຠິກ຺ຂຸ ນ ຈວຕິ, ປຕິຏ຺ຐາຕິ ສທ຺ຘມ຺ເມ. ໂອຕ຺ຕປ຺ປີ, ຠິກ຺ຂເວ, ຠິກ຺ຂຸ ນ ຈວຕິ, ປຕິຏ຺ຐາຕິ ສທ຺ຘມ຺ເມ. ອາຣທ຺ຘວີຣິໂຍ, ຠິກ຺ຂເວ, ຠິກ຺ຂຸ ນ ຈວຕິ, ປຕິຏ຺ຐາຕິ ສທ຺ຘມ຺ເມ. ປຎ຺ຎວາ, ຠິກ຺ຂເວ, ຠິກ຺ຂຸ ນ ຈວຕິ, ປຕິຏ຺ຐາຕິ ສທ຺ຘມ຺ເມ. ອິເມຫິ ໂຂ, ຠິກ຺ຂເວ, ປຎ຺ຈຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ນ ຈວຕິ, ປຕິຏ຺ຐາຕິ ສທ຺ຘມ຺ເມ’’ຕິ. ອຏ຺ຐມໍ.