໙. ຕຓ຺ຫາສຸຕ຺ຕໍ

໑໙໙. ຠຄວາ ເອຕທໂວຈ – ‘‘ຕຓ຺ຫໍ ໂວ, ຠິກ຺ຂເວ, ເທເສສ຺ສາມິ ຊາລິນິໍ ສຣິຕໍ ວິສຏໍ ວິສຕ຺ຕິກໍ, ຍາຍ ອຍໍ ໂລໂກ ອຸທ຺ຘສ຺ໂຕ ປຣິໂຍນທ຺ໂຘ ຕນ຺ຕາກຸລກຊາໂຕ ຄຸລາຄຸຓ຺ຐິກຊາໂຕ [ກຸລາຄຸຓ຺ຐິກຊາໂຕ (ສີ. ສ຺ຍາ. ກໍ. ປີ.) ອ. ນິ. ອຏ຺ຐ. ໒.໔.໑໙໙] ມຸຎ຺ຊປພ຺ພຊຠູໂຕ ອປາຍໍ ທຸຄ຺ຄຕິໍ ວິນິປາຕໍ ສໍສາຣໍ ນາຕິວຕ຺ຕຕິ. ຕໍ ສຸຓາຖ, ສາຘຸກໍ ມນສິ ກໂຣຖ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

‘‘ກຕມາ ຈ ສາ, ຠິກ຺ຂເວ, ຕຓ຺ຫາ ຊາລິນີ ສຣິຕາ ວິສຏາ ວິສຕ຺ຕິກາ, ຍາຍ ອຍໍ ໂລໂກ ອຸທ຺ຘສ຺ໂຕ ປຣິໂຍນທ຺ໂຘ ຕນ຺ຕາກຸລກຊາໂຕ ຄຸລາຄຸຓ຺ຐິກຊາໂຕ ມຸຎ຺ຊປພ຺ພຊຠູໂຕ ອປາຍໍ ທຸຄ຺ຄຕິໍ ວິນິປາຕໍ ສໍສາຣໍ ນາຕິວຕ຺ຕຕິ? ອຏ຺ຐາຣສ ໂຂ ປນິມານິ, ຠິກ຺ຂເວ, ຕຓ຺ຫາວິຈຣິຕານິ ອຊ຺ຌຕ຺ຕິກສ຺ສ ອຸປາທາຍ, ອຏ຺ຐາຣສ ຕຓ຺ຫາວິຈຣິຕານິ ພາຫິຣສ຺ສ ອຸປາທາຍ.

‘‘ກຕມານິ ອຏ຺ຐາຣສ ຕຓ຺ຫາວິຈຣິຕານິ ອຊ຺ຌຕ຺ຕິກສ຺ສ ອຸປາທາຍ? ອສ຺ມີຕິ, ຠິກ຺ຂເວ, ສຕິ ອິຕ຺ຖສ຺ມີຕິ ໂຫຕິ, ເອວໍສ຺ມີຕິ [ເອວມສ຺ມິ (ສີ.), ເອວສ຺ມິ (ສ຺ຍາ. ກໍ. ປີ.) ວິຠ. ໙໗໓ ປສ຺ສິຕພ຺ພໍ] ໂຫຕິ, ອຎ຺ຎຖາສ຺ມີຕິ ໂຫຕິ, ອສສ຺ມີຕິ ໂຫຕິ, ສຕສ຺ມີຕິ ໂຫຕິ, ສນ຺ຕິ ໂຫຕິ, ອິຕ຺ຖໍ ສນ຺ຕິ ໂຫຕິ, ເອວໍ ສນ຺ຕິ ໂຫຕິ, ອຎ຺ຎຖາ ສນ຺ຕິ ໂຫຕິ, ອປິຫໍ [ອປິຫ (ສີ. ປີ.), ອປິ (ສ຺ຍາ. ກໍ.)] ສນ຺ຕິ ໂຫຕິ, ອປິຫໍ [ອປິ (ສີ. ສ຺ຍາ. ກໍ. ປີ.)] ອິຕ຺ຖໍ ສນ຺ຕິ ໂຫຕິ, ອປິຫໍ [ອປິ (ສີ. ສ຺ຍາ. ກໍ. ປີ.)] ເອວໍ ສນ຺ຕິ ໂຫຕິ, ອປິຫໍ [ອປິ (ສີ. ສ຺ຍາ. ກໍ. ປີ.)] ອຎ຺ຎຖາ ສນ຺ຕິ ໂຫຕິ, ຠວິສ຺ສນ຺ຕິ ໂຫຕິ, ອິຕ຺ຖໍ ຠວິສ຺ສນ຺ຕິ ໂຫຕິ, ເອວໍ ຠວິສ຺ສນ຺ຕິ ໂຫຕິ, ອຎ຺ຎຖາ ຠວິສ຺ສນ຺ຕິ ໂຫຕິ. ອິມານິ ອຏ຺ຐາຣສ ຕຓ຺ຫາວິຈຣິຕານິ ອຊ຺ຌຕ຺ຕິກສ຺ສ ອຸປາທາຍ.

‘‘ກຕມານິ ອຏ຺ຐາຣສ ຕຓ຺ຫາວິຈຣິຕານິ ພາຫິຣສ຺ສ ອຸປາທາຍ? ອິມິນາສ຺ມີຕິ, ຠິກ຺ຂເວ, ສຕິ ອິມິນາ ອິຕ຺ຖສ຺ມີຕິ ໂຫຕິ, ອິມິນາ ເອວໍສ຺ມີຕິ ໂຫຕິ, ອິມິນາ ອຎ຺ຎຖາສ຺ມີຕິ ໂຫຕິ, ອິມິນາ ອສສ຺ມີຕິ ໂຫຕິ, ອິມິນາ ສຕສ຺ມີຕິ ໂຫຕິ, ອິມິນາ ສນ຺ຕິ ໂຫຕິ, ອິມິນາ ອິຕ຺ຖໍ ສນ຺ຕິ ໂຫຕິ, ອິມິນາ ເອວໍ ສນ຺ຕິ ໂຫຕິ, ອິມິນາ ອຎ຺ຎຖາ ສນ຺ຕິ ໂຫຕິ, ອິມິນາ ອປິຫໍ ສນ຺ຕິ ໂຫຕິ, ອິມິນາ ອປິຫໍ ອິຕ຺ຖໍ ສນ຺ຕິ ໂຫຕິ, ອິມິນາ ອປິຫໍ ເອວໍ ສນ຺ຕິ ໂຫຕິ, ອິມິນາ ອປິຫໍ ອຎ຺ຎຖາ ສນ຺ຕິ ໂຫຕິ, ອິມິນາ ຠວິສ຺ສນ຺ຕິ ໂຫຕິ, ອິມິນາ ອິຕ຺ຖໍ ຠວິສ຺ສນ຺ຕິ ໂຫຕິ, ອິມິນາ ເອວໍ ຠວິສ຺ສນ຺ຕິ ໂຫຕິ, ອິມິນາ ອຎ຺ຎຖາ ຠວິສ຺ສນ຺ຕິ ໂຫຕິ. ອິມານິ ອຏ຺ຐາຣສ ຕຓ຺ຫາວິຈຣິຕານິ ພາຫິຣສ຺ສ ອຸປາທາຍ.

‘‘ອິຕິ ອຏ຺ຐາຣສ ຕຓ຺ຫາວິຈຣິຕານິ ອຊ຺ຌຕ຺ຕິກສ຺ສ ອຸປາທາຍ, ອຏ຺ຐາຣສ ຕຓ຺ຫາວິຈຣິຕານິ ພາຫິຣສ຺ສ ອຸປາທາຍ. ອິມານິ ວຸຈ຺ຈນ຺ຕິ, ຠິກ຺ຂເວ, ຉຕ຺ຕິໍສ ຕຓ຺ຫາວິຈຣິຕານິ. ອິຕິ ເອວຣູປານິ ອຕີຕານິ ຉຕ຺ຕິໍສ ຕຓ຺ຫາວິຈຣິຕານິ, ອນາຄຕານິ ຉຕ຺ຕິໍສ ຕຓ຺ຫາວິຈຣິຕານິ, ປຈ຺ຈຸປ຺ປນ຺ນານິ ຉຕ຺ຕິໍສ ຕຓ຺ຫາວິຈຣິຕານິ. ເອວໍ ອຏ຺ຐສຕໍ ຕຓ຺ຫາວິຈຣິຕໍ ໂຫນ຺ຕິ.

‘‘ອຍໍ ໂຂ ສາ, ຠິກ຺ຂເວ, ຕຓ຺ຫາ ຊາລິນີ ສຣິຕາ ວິສຏາ ວິສຕ຺ຕິກາ, ຍາຍ ອຍໍ ໂລໂກ ອຸທ຺ຘສ຺ໂຕ ປຣິໂຍນທ຺ໂຘ ຕນ຺ຕາກຸລກຊາໂຕ ຄຸລາຄຸຓ຺ຐິກຊາໂຕ ມຸຎ຺ຊປພ຺ພຊຠູໂຕ ອປາຍໍ ທຸຄ຺ຄຕິໍ ວິນິປາຕໍ ສໍສາຣໍ ນາຕິວຕ຺ຕຕີ’’ຕິ. ນວມໍ.