໔. ອຠຍສຸຕ຺ຕໍ

໑໘໔. ອຖ ໂຂ ຊາຓຸສ຺ໂສຓິ ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ຊາຓຸສ຺ໂສຓິ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ –

‘‘ອຫຎ຺ຫິ, ໂຠ ໂຄຕມ, ເອວໍວາທີ ເອວໍທິຏ຺ຐິ – ‘ນຕ຺ຖິ ໂຍ ມຣຓຘມ຺ໂມ ສມາໂນ ນ ຠາຍຕິ, ນ ສນ຺ຕາສໍ ອາປຊ຺ຊຕິ ມຣຓສ຺ສາ’’’ຕິ. ‘‘ອຕ຺ຖິ, ພ຺ຣາຫ຺ມຓ, ມຣຓຘມ຺ໂມ ສມາໂນ ຠາຍຕິ, ສນ຺ຕາສໍ ອາປຊ຺ຊຕິ ມຣຓສ຺ສ; ອຕ຺ຖິ ປນ, ພ຺ຣາຫ຺ມຓ, ມຣຓຘມ຺ໂມ ສມາໂນ ນ ຠາຍຕິ, ນ ສນ຺ຕາສໍ ອາປຊ຺ຊຕິ ມຣຓສ຺ສ.

‘‘ກຕໂມ ຈ, ພ຺ຣາຫ຺ມຓ, ມຣຓຘມ຺ໂມ ສມາໂນ ຠາຍຕິ, ສນ຺ຕາສໍ ອາປຊ຺ຊຕິ ມຣຓສ຺ສ? ອິຘ, ພ຺ຣາຫ຺ມຓ, ເອກຈ຺ໂຈ ກາເມສຸ ອວີຕຣາໂຄ ໂຫຕິ ອວິຄຕຈ຺ຉນ຺ໂທ ອວິຄຕເປໂມ ອວິຄຕປິປາໂສ ອວິຄຕປຣິຬາໂຫ ອວິຄຕຕຓ຺ໂຫ. ຕເມນໍ ອຎ຺ຎຕໂຣ ຄາຬ຺ໂຫ ໂຣຄາຕງ຺ໂກ ຜຸສຕິ. ຕສ຺ສ ອຎ຺ຎຕເຣນ ຄາຬ຺ເຫນ ໂຣຄາຕງ຺ເກນ ຜຸຏ຺ຐສ຺ສ ເອວໍ ໂຫຕິ – ‘ປິຍາ ວຕ ມໍ ກາມາ ຊຫິສ຺ສນ຺ຕິ, ປິເຍ ຈາຫໍ ກາເມ ຊຫິສ຺ສາມີ’ຕິ. ໂສ ໂສຈຕິ ກິລມຕິ ປຣິເທວຕິ, ອຸຣຕ຺ຕາຬິໍ ກນ຺ທຕິ, ສມ຺ໂມຫໍ ອາປຊ຺ຊຕິ. ອຍໍ ໂຂ, ພ຺ຣາຫ຺ມຓ, ມຣຓຘມ຺ໂມ ສມາໂນ ຠາຍຕິ, ສນ຺ຕາສໍ ອາປຊ຺ຊຕິ ມຣຓສ຺ສ.

‘‘ປຸນ ຈປຣໍ, ພ຺ຣາຫ຺ມຓ, ອິເຘກຈ຺ໂຈ ກາເຍ ອວີຕຣາໂຄ ໂຫຕິ ອວິຄຕຈ຺ຉນ຺ໂທ ອວິຄຕເປໂມ ອວິຄຕປິປາໂສ ອວິຄຕປຣິຬາໂຫ ອວິຄຕຕຓ຺ໂຫ. ຕເມນໍ ອຎ຺ຎຕໂຣ ຄາຬ຺ໂຫ ໂຣຄາຕງ຺ໂກ ຜຸສຕິ. ຕສ຺ສ ອຎ຺ຎຕເຣນ ຄາຬ຺ເຫນ ໂຣຄາຕງ຺ເກນ ຜຸຏ຺ຐສ຺ສ ເອວໍ ໂຫຕິ – ‘ປິໂຍ ວຕ ມໍ ກາໂຍ ຊຫິສ຺ສຕິ, ປິຍຎ຺ຈາຫໍ ກາຍໍ ຊຫິສ຺ສາມີ’ຕິ. ໂສ ໂສຈຕິ ກິລມຕິ ປຣິເທວຕິ, ອຸຣຕ຺ຕາຬິໍ ກນ຺ທຕິ, ສມ຺ໂມຫໍ ອາປຊ຺ຊຕິ. ອຍມ຺ປິ ໂຂ, ພ຺ຣາຫ຺ມຓ, ມຣຓຘມ຺ໂມ ສມາໂນ ຠາຍຕິ, ສນ຺ຕາສໍ ອາປຊ຺ຊຕິ ມຣຓສ຺ສ.

‘‘ປຸນ ຈປຣໍ, ພ຺ຣາຫ຺ມຓ, ອິເຘກຈ຺ໂຈ ອກຕກລ຺ຍາໂຓ ໂຫຕິ ອກຕກຸສໂລ ອກຕຠີຣຸຕ຺ຕາໂຓ ກຕປາໂປ ກຕລຸທ຺ໂທ ກຕກິພ຺ພິໂສ. ຕເມນໍ ອຎ຺ຎຕໂຣ ຄາຬ຺ໂຫ ໂຣຄາຕງ຺ໂກ ຜຸສຕິ. ຕສ຺ສ ອຎ຺ຎຕເຣນ ຄາຬ຺ເຫນ ໂຣຄາຕງ຺ເກນ ຜຸຏ຺ຐສ຺ສ ເອວໍ ໂຫຕິ – ‘ອກຕໍ ວຕ ເມ ກລ຺ຍາຓໍ, ອກຕໍ ກຸສລໍ, ອກຕໍ ຠີຣຸຕ຺ຕາຓໍ; ກຕໍ ປາປໍ, ກຕໍ ລຸທ຺ທໍ, ກຕໍ ກິພ຺ພິສໍ. ຍາວຕາ, ໂຠ, ອກຕກລ຺ຍາຓານໍ ອກຕກຸສລານໍ ອກຕຠີຣຸຕ຺ຕາຓານໍ ກຕປາປານໍ ກຕລຸທ຺ທານໍ ກຕກິພ຺ພິສານໍ ຄຕິ ຕໍ ຄຕິໍ ເປຈ຺ຈ ຄຈ຺ຉາມີ’ຕິ. ໂສ ໂສຈຕິ ກິລມຕິ ປຣິເທວຕິ, ອຸຣຕ຺ຕາຬິໍ ກນ຺ທຕິ, ສມ຺ໂມຫໍ ອາປຊ຺ຊຕິ. ອຍມ຺ປິ ໂຂ, ພ຺ຣາຫ຺ມຓ, ມຣຓຘມ຺ໂມ ສມາໂນ ຠາຍຕິ, ສນ຺ຕາສໍ ອາປຊ຺ຊຕິ ມຣຓສ຺ສ.

‘‘ປຸນ ຈປຣໍ, ພ຺ຣາຫ຺ມຓ, ອິເຘກຈ຺ໂຈ ກງ຺ຂີ ໂຫຕິ ວິຈິກິຈ຺ຉີ ອນິຏ຺ຐງ຺ຄໂຕ ສທ຺ຘມ຺ເມ. ຕເມນໍ ອຎ຺ຎຕໂຣ ຄາຬ຺ໂຫ ໂຣຄາຕງ຺ໂກ ຜຸສຕິ. ຕສ຺ສ ອຎ຺ຎຕເຣນ ຄາຬ຺ເຫນ ໂຣຄາຕງ຺ເກນ ຜຸຏ຺ຐສ຺ສ ເອວໍ ໂຫຕິ – ‘ກງ຺ຂີ ວຕມ຺ຫິ ວິຈິກິຈ຺ຉີ ອນິຏ຺ຐງ຺ຄໂຕ ສທ຺ຘມ຺ເມ’ຕິ. ໂສ ໂສຈຕິ ກິລມຕິ ປຣິເທວຕິ, ອຸຣຕ຺ຕາຬິໍ ກນ຺ທຕິ, ສມ຺ໂມຫໍ ອາປຊ຺ຊຕິ. ອຍມ຺ປິ ໂຂ, ພ຺ຣາຫ຺ມຓ, ມຣຓຘມ຺ໂມ ສມາໂນ ຠາຍຕິ, ສນ຺ຕາສໍ ອາປຊ຺ຊຕິ ມຣຓສ຺ສ. ອິເມ ໂຂ, ພ຺ຣາຫ຺ມຓ, ຈຕ຺ຕາໂຣ ມຣຓຘມ຺ມາ ສມານາ ຠາຍນ຺ຕິ, ສນ຺ຕາສໍ ອາປຊ຺ຊນ຺ຕິ ມຣຓສ຺ສ.

‘‘ກຕໂມ ຈ, ພ຺ຣາຫ຺ມຓ, ມຣຓຘມ຺ໂມ ສມາໂນ ນ ຠາຍຕິ, ນ ສນ຺ຕາສໍ ອາປຊ຺ຊຕິ ມຣຓສ຺ສ? ອິຘ, ພ຺ຣາຫ຺ມຓ, ເອກຈ຺ໂຈ ກາເມສຸ ວີຕຣາໂຄ ໂຫຕິ ວິຄຕຈ຺ຉນ຺ໂທ ວິຄຕເປໂມ ວິຄຕປິປາໂສ ວິຄຕປຣິຬາໂຫ ວິຄຕຕຓ຺ໂຫ. ຕເມນໍ ອຎ຺ຎຕໂຣ ຄາຬ຺ໂຫ ໂຣຄາຕງ຺ໂກ ຜຸສຕິ. ຕສ຺ສ ອຎ຺ຎຕເຣນ ຄາຬ຺ເຫນ ໂຣຄາຕງ຺ເກນ ຜຸຏ຺ຐສ຺ສ ນ ເອວໍ ໂຫຕິ – ‘ປິຍາ ວຕ ມໍ ກາມາ ຊຫິສ຺ສນ຺ຕິ, ປິເຍ ຈາຫໍ ກາເມ ຊຫິສ຺ສາມີ’ຕິ. ໂສ ນ ໂສຈຕິ ນ ກິລມຕິ ນ ປຣິເທວຕິ, ນ ອຸຣຕ຺ຕາຬິໍ ກນ຺ທຕິ, ນ ສມ຺ໂມຫໍ ອາປຊ຺ຊຕິ. ອຍໍ ໂຂ, ພ຺ຣາຫ຺ມຓ, ມຣຓຘມ຺ໂມ ສມາໂນ ນ ຠາຍຕິ, ນ ສນ຺ຕາສໍ ອາປຊ຺ຊຕິ ມຣຓສ຺ສ.

‘‘ປຸນ ຈປຣໍ, ພ຺ຣາຫ຺ມຓ, ອິເຘກຈ຺ໂຈ ກາເຍ ວີຕຣາໂຄ ໂຫຕິ ວິຄຕຈ຺ຉນ຺ໂທ ວິຄຕເປໂມ ວິຄຕປິປາໂສ ວິຄຕປຣິຬາໂຫ ວິຄຕຕຓ຺ໂຫ. ຕເມນໍ ອຎ຺ຎຕໂຣ ຄາຬ຺ໂຫ ໂຣຄາຕງ຺ໂກ ຜຸສຕິ. ຕສ຺ສ ອຎ຺ຎຕເຣນ ຄາຬ຺ເຫນ ໂຣຄາຕງ຺ເກນ ຜຸຏ຺ຐສ຺ສ ນ ເອວໍ ໂຫຕິ – ‘ປິໂຍ ວຕ ມໍ ກາໂຍ ຊຫິສ຺ສຕິ, ປິຍຎ຺ຈາຫໍ ກາຍໍ ຊຫິສ຺ສາມີ’ຕິ. ໂສ ນ ໂສຈຕິ ນ ກິລມຕິ ນ ປຣິເທວຕິ, ນ ອຸຣຕ຺ຕາຬິໍ ກນ຺ທຕິ, ນ ສມ຺ໂມຫໍ ອາປຊ຺ຊຕິ. ອຍມ຺ປິ ໂຂ, ພ຺ຣາຫ຺ມຓ, ມຣຓຘມ຺ໂມ ສມາໂນ ນ ຠາຍຕິ, ນ ສນ຺ຕາສໍ ອາປຊ຺ຊຕິ ມຣຓສ຺ສ.

‘‘ປຸນ ຈປຣໍ, ພ຺ຣາຫ຺ມຓ, ອິເຘກຈ຺ໂຈ ອກຕປາໂປ ໂຫຕິ ອກຕລຸທ຺ໂທ ອກຕກິພ຺ພິໂສ ກຕກລ຺ຍາໂຓ ກຕກຸສໂລ ກຕຠີຣຸຕ຺ຕາໂຓ. ຕເມນໍ ອຎ຺ຎຕໂຣ ຄາຬ຺ໂຫ ໂຣຄາຕງ຺ໂກ ຜຸສຕິ. ຕສ຺ສ ອຎ຺ຎຕເຣນ ຄາຬ຺ເຫນ ໂຣຄາຕງ຺ເກນ ຜຸຏ຺ຐສ຺ສ ເອວໍ ໂຫຕິ – ‘ອກຕໍ ວຕ ເມ ປາປໍ, ອກຕໍ ລຸທ຺ທໍ, ອກຕໍ ກິພ຺ພິສໍ; ກຕໍ ກລ຺ຍາຓໍ, ກຕໍ ກຸສລໍ, ກຕໍ ຠີຣຸຕ຺ຕາຓໍ. ຍາວຕາ, ໂຠ, ອກຕປາປານໍ ອກຕລຸທ຺ທານໍ ອກຕກິພ຺ພິສານໍ ກຕກລ຺ຍາຓານໍ ກຕກຸສລານໍ ກຕຠີຣຸຕ຺ຕາຓານໍ ຄຕິ ຕໍ ຄຕິໍ ເປຈ຺ຈ ຄຈ຺ຉາມີ’ຕິ. ໂສ ນ ໂສຈຕິ ນ ກິລມຕິ ນ ປຣິເທວຕິ, ນ ອຸຣຕ຺ຕາຬິໍ ກນ຺ທຕິ, ນ ສມ຺ໂມຫໍ ອາປຊ຺ຊຕິ. ອຍມ຺ປິ ໂຂ, ພ຺ຣາຫ຺ມຓ, ມຣຓຘມ຺ໂມ ສມາໂນ ນ ຠາຍຕິ, ນ ສນ຺ຕາສໍ ອາປຊ຺ຊຕິ ມຣຓສ຺ສ.

‘‘ປຸນ ຈປຣໍ, ພ຺ຣາຫ຺ມຓ, ອິເຘກຈ຺ໂຈ ອກງ຺ຂີ ໂຫຕິ ອວິຈິກິຈ຺ຉີ ນິຏ຺ຐງ຺ຄໂຕ ສທ຺ຘມ຺ເມ. ຕເມນໍ ອຎ຺ຎຕໂຣ ຄາຬ຺ໂຫ ໂຣຄາຕງ຺ໂກ ຜຸສຕິ. ຕສ຺ສ ອຎ຺ຎຕເຣນ ຄາຬ຺ເຫນ ໂຣຄາຕງ຺ເກນ ຜຸຏ຺ຐສ຺ສ ເອວໍ ໂຫຕິ – ‘ອກງ຺ຂີ ວຕມ຺ຫິ ອວິຈິກິຈ຺ຉີ ນິຏ຺ຐງ຺ຄໂຕ ສທ຺ຘມ຺ເມ’ຕິ. ໂສ ນ ໂສຈຕິ ນ ກິລມຕິ ນ ປຣິເທວຕິ, ນ ອຸຣຕ຺ຕາຬິໍ ກນ຺ທຕິ, ນ ສມ຺ໂມຫໍ ອາປຊ຺ຊຕິ. ອຍມ຺ປິ ໂຂ, ພ຺ຣາຫ຺ມຓ, ມຣຓຘມ຺ໂມ ສມາໂນ ນ ຠາຍຕິ, ນ ສນ຺ຕາສໍ ອາປຊ຺ຊຕິ ມຣຓສ຺ສ. ອິເມ ໂຂ, ພ຺ຣາຫ຺ມຓ, ຈຕ຺ຕາໂຣ ມຣຓຘມ຺ມາ ສມານາ ນ ຠາຍນ຺ຕິ, ນ ສນ຺ຕາສໍ ອາປຊ຺ຊນ຺ຕິ ມຣຓສ຺ສາ’’ຕິ.

‘‘ອຠິກ຺ກນ຺ຕໍ, ໂຠ ໂຄຕມ, ອຠິກ຺ກນ຺ຕໍ, ໂຠ ໂຄຕມ…ເປ… ອຸປາສກໍ ມໍ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ຈຕຸຕ຺ຖໍ.