໒. ປາຏິໂຠຄສຸຕ຺ຕໍ

໑໘໒. [ກຖາ. ໖໒໔] ‘‘ຈຕຸນ຺ນໍ, ຠິກ຺ຂເວ, ຘມ຺ມານໍ ນຕ຺ຖິ ໂກຈິ ປາຏິໂຠໂຄ – ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິໍ.

‘‘ກຕເມສໍ ຈຕຸນ຺ນໍ? ‘ຊຣາຘມ຺ມໍ ມາ ຊີຣີ’ຕິ ນຕ຺ຖິ ໂກຈິ ປາຏິໂຠໂຄ – ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິໍ; ‘ພ຺ຍາຘິຘມ຺ມໍ ມາ ພ຺ຍາຘິຍີ’ຕິ ນຕ຺ຖິ ໂກຈິ ປາຏິໂຠໂຄ – ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິໍ; ‘ມຣຓຘມ຺ມໍ ມາ ມີຍີ’ຕິ ນຕ຺ຖິ ໂກຈິ ປາຏິໂຠໂຄ – ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິໍ; ‘ຍານິ ໂຂ ປນ ຕານິ ປຸພ຺ເພ ອຕ຺ຕນາ ກຕານິ ປາປການິ ກມ຺ມານິ ສໍກິເລສິການິ ໂປໂນຠວິການິ ສທຣານິ ທຸກ຺ຂວິປາການິ ອາຍຕິໍ ຊາຕິຊຣາມຣຓິການິ, ເຕສໍ ວິປາໂກ ມາ ນິພ຺ພຕ຺ຕີ’ຕິ ນຕ຺ຖິ ໂກຈິ ປາຏິໂຠໂຄ – ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິໍ.

‘‘ອິເມສໍ ໂຂ, ຠິກ຺ຂເວ, ຈຕຸນ຺ນໍ ຘມ຺ມານໍ ນຕ຺ຖິ ໂກຈິ ປາຏິໂຠໂຄ – ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິ’’ນ຺ຕິ. ທຸຕິຍໍ.