໕. ອຸປວາຓສຸຕ຺ຕໍ

໑໗໕. ອຖ ໂຂ ອາຍສ຺ມາ ອຸປວາໂຓ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມຕາ ສາຣິປຸຕ຺ເຕນ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ອຸປວາໂຓ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ –

‘‘ກິໍ ນຸ ໂຂ, ອາວຸໂສ ສາຣິປຸຕ຺ຕ, ວິຊ຺ຊາຍນ຺ຕກໂຣ ໂຫຕີ’’ຕິ?

‘‘ໂນ ຫິທໍ, ອາວຸໂສ’’.

‘‘ກິໍ ປນາວຸໂສ ສາຣິປຸຕ຺ຕ, ຈຣເຓນນ຺ຕກໂຣ ໂຫຕີ’’ຕິ?

‘‘ໂນ ຫິທໍ, ອາວຸໂສ’’.

‘‘ກິໍ ປນາວຸໂສ ສາຣິປຸຕ຺ຕ, ວິຊ຺ຊາຈຣເຓນນ຺ຕກໂຣ ໂຫຕີ’’ຕິ?

‘‘ໂນ ຫິທໍ, ອາວຸໂສ’’.

‘‘ກິໍ ປນາວຸໂສ ສາຣິປຸຕ຺ຕ, ອຎ຺ຎຕ຺ຣ ວິຊ຺ຊາຈຣເຓນນ຺ຕກໂຣ ໂຫຕີ’’ຕິ?

‘‘ໂນ ຫິທໍ, ອາວຸໂສ’’.

‘‘‘ກິໍ ນຸ ໂຂ, ອາວຸໂສ ສາຣິປຸຕ຺ຕ, ວິຊ຺ຊາຍນ຺ຕກໂຣ ໂຫຕີ’ຕິ, ອິຕິ ປຸຏ຺ໂຐ ສມາໂນ – ‘ໂນ ຫິທໍ, ອາວຸໂສ’ຕິ ວເທສິ. ‘ກິໍ ປນາວຸໂສ ສາຣິປຸຕ຺ຕ, ຈຣເຓນນ຺ຕກໂຣ ໂຫຕີ’ຕິ, ອິຕິ ປຸຏ຺ໂຐ ສມາໂນ – ‘ໂນ ຫິທໍ, ອາວຸໂສ’ຕິ ວເທສິ. ‘ກິໍ ປນາວຸໂສ ສາຣິປຸຕ຺ຕ, ວິຊ຺ຊາຈຣເຓນນ຺ຕກໂຣ ໂຫຕີ’ຕິ, ອິຕິ ປຸຏ຺ໂຐ ສມາໂນ – ‘ໂນ ຫິທໍ, ອາວຸໂສ’ຕິ ວເທສິ. ‘ກິໍ ປນາວຸໂສ ສາຣິປຸຕ຺ຕ, ອຎ຺ຎຕ຺ຣ ວິຊ຺ຊາຈຣເຓນນ຺ຕກໂຣ ໂຫຕີ’ຕິ, ອິຕິ ປຸຏ຺ໂຐ ສມາໂນ – ‘ໂນ ຫິທໍ, ອາວຸໂສ’ຕິ ວເທສິ. ຍຖາ ກຖໍ ປນາວຸໂສ, ອນ຺ຕກໂຣ ໂຫຕີ’’ຕິ?

‘‘ວິຊ຺ຊາຍ ເຈ, ອາວຸໂສ, ອນ຺ຕກໂຣ ອຠວິສ຺ສ, ສອຸປາທາໂນວ ສມາໂນ ອນ຺ຕກໂຣ ອຠວິສ຺ສ. ຈຣເຓນ ເຈ, ອາວຸໂສ, ອນ຺ຕກໂຣ ອຠວິສ຺ສ, ສອຸປາທາໂນວ ສມາໂນ ອນ຺ຕກໂຣ ອຠວິສ຺ສ. ວິຊ຺ຊາຈຣເຓນ ເຈ, ອາວຸໂສ, ອນ຺ຕກໂຣ ອຠວິສ຺ສ, ສອຸປາທາໂນວ ສມາໂນ ອນ຺ຕກໂຣ ອຠວິສ຺ສ. ອຎ຺ຎຕ຺ຣ ວິຊ຺ຊາຈຣເຓນ ເຈ, ອາວຸໂສ, ອນ຺ຕກໂຣ ອຠວິສ຺ສ, ປຸຖຸຊ຺ຊໂນ ອນ຺ຕກໂຣ ອຠວິສ຺ສ. ປຸຖຸຊ຺ຊໂນ ຫິ, ອາວຸໂສ, ອຎ຺ຎຕ຺ຣ ວິຊ຺ຊາຈຣເຓນ. ຈຣຓວິປນ຺ໂນ ໂຂ, ອາວຸໂສ, ຍຖາຠູຕໍ ນ ຊານາຕິ ນ ປສ຺ສຕິ. ຈຣຓສມ຺ປນ຺ໂນ ຍຖາຠູຕໍ ຊານາຕິ ປສ຺ສຕິ. ຍຖາຠູຕໍ ຊານໍ ປສ຺ສໍ ອນ຺ຕກໂຣ ໂຫຕີ’’ຕິ. ປຎ຺ຈມໍ.