(໑໕) ໕. ອາຠາວຄ຺ໂຄ

໑. ອາຠາສຸຕ຺ຕໍ

໑໔໑. ‘‘ຈຕສ຺ໂສ ອິມາ, ຠິກ຺ຂເວ, ອາຠາ. ກຕມາ ຈຕສ຺ໂສ? ຈນ຺ທາຠາ, ສູຣິຍາຠາ, ອຄ຺ຄາຠາ, ປຎ຺ຎາຠາ – ອິມາ ໂຂ, ຠິກ຺ຂເວ, ຈຕສ຺ໂສ ອາຠາ. ເອຕທຄ຺ຄໍ, ຠິກ຺ຂເວ, ອິມາສໍ ຈຕຸນ຺ນໍ [ຈຕສ຺ສນ຺ນໍ (ສ຺ຍາ. ກໍ.) ສທ຺ທນີຕິປທມາລາ ປສ຺ສິຕພ຺ພາ] ອາຠານໍ ຍທິທໍ ປຎ຺ຎາຠາ’’ຕິ. ປຐມໍ.

໒. ປຠາສຸຕ຺ຕໍ

໑໔໒. ‘‘ຈຕສ຺ໂສ ອິມາ, ຠິກ຺ຂເວ, ປຠາ. ກຕມາ ຈຕສ຺ໂສ? ຈນ຺ທປ຺ປຠາ, ສູຣິຍປ຺ປຠາ, ອຄ຺ຄິປ຺ປຠາ, ປຎ຺ຎາປຠາ – ອິມາ ໂຂ, ຠິກ຺ຂເວ, ຈຕສ຺ໂສ ປຠາ. ເອຕທຄ຺ຄໍ, ຠິກ຺ຂເວ, ອິມາສໍ ຈຕຸນ຺ນໍ ປຠານໍ ຍທິທໍ ປຎ຺ຎາປຠາ’’ຕິ. ທຸຕິຍໍ.

໓. ອາໂລກສຸຕ຺ຕໍ

໑໔໓. ‘‘ຈຕ຺ຕາໂຣເມ, ຠິກ຺ຂເວ, ອາໂລກາ. ກຕເມ ຈຕ຺ຕາໂຣ? ຈນ຺ທາໂລໂກ, ສູຣິຍາໂລໂກ, ອຄ຺ຄາໂລໂກ, ປຎ຺ຎາໂລໂກ – ອິເມ ໂຂ, ຠິກ຺ຂເວ, ຈຕ຺ຕາໂຣ ອາໂລກາ. ເອຕທຄ຺ຄໍ, ຠິກ຺ຂເວ, ອິເມສໍ ຈຕຸນ຺ນໍ ອາໂລການໍ ຍທິທໍ ປຎ຺ຎາໂລໂກ’’ຕິ. ຕຕິຍໍ.

໔. ໂອຠາສສຸຕ຺ຕໍ

໑໔໔. ‘‘ຈຕ຺ຕາໂຣເມ, ຠິກ຺ຂເວ, ໂອຠາສາ. ກຕເມ ຈຕ຺ຕາໂຣ? ຈນ຺ໂທຠາໂສ, ສູຣິໂຍຠາໂສ, ອຄ຺ໂຄຠາໂສ, ປຎ຺ໂຎຠາໂສ – ອິເມ ໂຂ, ຠິກ຺ຂເວ, ຈຕ຺ຕາໂຣ ໂອຠາສາ. ເອຕທຄ຺ຄໍ, ຠິກ຺ຂເວ, ອິເມສໍ ຈຕຸນ຺ນໍ ໂອຠາສານໍ ຍທິທໍ ປຎ຺ໂຎຠາໂສ’’ຕິ. ຈຕຸຕ຺ຖໍ.

໕. ປຊ຺ໂຊຕສຸຕ຺ຕໍ

໑໔໕. ‘‘ຈຕ຺ຕາໂຣເມ, ຠິກ຺ຂເວ, ປຊ຺ໂຊຕາ. ກຕເມ ຈຕ຺ຕາໂຣ? ຈນ຺ທປຊ຺ໂຊໂຕ, ສູຣິຍປຊ຺ໂຊໂຕ, ອຄ຺ຄິປຊ຺ໂຊໂຕ, ປຎ຺ຎາປຊ຺ໂຊໂຕ – ອິເມ ໂຂ, ຠິກ຺ຂເວ, ຈຕ຺ຕາໂຣ ປຊ຺ໂຊຕາ. ເອຕທຄ຺ຄໍ, ຠິກ຺ຂເວ, ອິເມສໍ ຈຕຸນ຺ນໍ ປຊ຺ໂຊຕານໍ ຍທິທໍ ປຎ຺ຎາປຊ຺ໂຊໂຕ’’ຕິ. ປຎ຺ຈມໍ.

໖. ປຐມກາລສຸຕ຺ຕໍ

໑໔໖. ‘‘ຈຕ຺ຕາໂຣເມ, ຠິກ຺ຂເວ, ກາລາ. ກຕເມ ຈຕ຺ຕາໂຣ? ກາເລນ ຘມ຺ມສ຺ສວນໍ, ກາເລນ ຘມ຺ມສາກຈ຺ຉາ, ກາເລນ ສມ຺ມສນາ [ກາເລນ ສມໂຖ (ສີ. ສ຺ຍາ. ກໍ. ປີ.)], ກາເລນ ວິປສ຺ສນາ – ອິເມ ໂຂ, ຠິກ຺ຂເວ, ຈຕ຺ຕາໂຣ ກາລາ’’ຕິ. ຉຏ຺ຐໍ.

໗. ທຸຕິຍກາລສຸຕ຺ຕໍ

໑໔໗. ‘‘ຈຕ຺ຕາໂຣເມ, ຠິກ຺ຂເວ, ກາລາ ສມ຺ມາ ຠາວິຍມານາ ສມ຺ມາ ອນຸປຣິວຕ຺ຕິຍມານາ ອນຸປຸພ຺ເພນ ອາສວານໍ ຂຍໍ ປາເປນ຺ຕິ. ກຕເມ ຈຕ຺ຕາໂຣ? ກາເລນ ຘມ຺ມສ຺ສວນໍ, ກາເລນ ຘມ຺ມສາກຈ຺ຉາ, ກາເລນ ສມ຺ມສນາ, ກາເລນ ວິປສ຺ສນາ – ອິເມ ໂຂ, ຠິກ຺ຂເວ, ຈຕ຺ຕາໂຣ ກາລາ ສມ຺ມາ ຠາວິຍມານາ ສມ຺ມາ ອນຸປຣິວຕ຺ຕິຍມານາ ອນຸປຸພ຺ເພນ ອາສວານໍ ຂຍໍ ປາເປນ຺ຕິ.

‘‘ເສຍ຺ຍຖາປິ, ຠິກ຺ຂເວ, ອຸປຣິປພ຺ພເຕ ຖຸລ຺ລຜຸສິຕເກ ເທເວ ວສ຺ສນ຺ເຕ ຕໍ ອຸທກໍ ຍຖານິນ຺ນໍ ປວຕ຺ຕມານໍ ປພ຺ພຕກນ຺ທຣປທຣສາຂາ ປຣິປູເຣຕິ; ປພ຺ພຕກນ຺ທຣປທຣສາຂາ ປຣິປູຣາ ກຸໂສພ຺ເຠ ປຣິປູເຣນ຺ຕິ; ກຸໂສພ຺ຠາ ປຣິປູຣາ ມຫາໂສພ຺ເຠ ປຣິປູເຣນ຺ຕິ; ມຫາໂສພ຺ຠາ ປຣິປູຣາ ກຸນ຺ນທິໂຍ ປຣິປູເຣນ຺ຕິ; ກຸນ຺ນທິໂຍ ປຣິປູຣາ ມຫານທິໂຍ ປຣິປູເຣນ຺ຕິ; ມຫານທິໂຍ ປຣິປູຣາ ສມຸທ຺ທໍ [ສມຸທ຺ທໍ ສາຄຣໍ (ສີ. ປີ. ກ.), ສມຸທ຺ທສາຄຣໍ (ສ຺ຍາ. ກໍ.)] ປຣິປູເຣນ຺ຕິ. ເອວເມວໍ ໂຂ, ຠິກ຺ຂເວ, ອິເມ ຈຕ຺ຕາໂຣ ກາລາ ສມ຺ມາ ຠາວິຍມານາ ສມ຺ມາ ອນຸປຣິວຕ຺ຕິຍມານາ ອນຸປຸພ຺ເພນ ອາສວານໍ ຂຍໍ ປາເປນ຺ຕີ’’ຕິ. ສຕ຺ຕມໍ.

໘. ທຸຈ຺ຈຣິຕສຸຕ຺ຕໍ

໑໔໘. ‘‘ຈຕ຺ຕາຣິມານິ, ຠິກ຺ຂເວ, ວຈີທຸຈ຺ຈຣິຕານິ. ກຕມານິ ຈຕ຺ຕາຣິ? ມຸສາວາໂທ, ປິສຸຓາ ວາຈາ, ຜຣຸສາ ວາຈາ, ສມ຺ຜປ຺ປລາໂປ – ອິມານິ ໂຂ, ຠິກ຺ຂເວ, ຈຕ຺ຕາຣິ ວຈີທຸຈ຺ຈຣິຕານີ’’ຕິ. ອຏ຺ຐມໍ.

໙. ສຸຈຣິຕສຸຕ຺ຕໍ

໑໔໙. ‘‘ຈຕ຺ຕາຣິມານິ, ຠິກ຺ຂເວ, ວຈີສຸຈຣິຕານິ. ກຕມານິ ຈຕ຺ຕາຣິ? ສຈ຺ຈວາຈາ, ອປິສຸຓາ ວາຈາ, ສຓ຺ຫາ ວາຈາ, ມນ຺ຕຠາສາ – ອິມານິ ໂຂ, ຠິກ຺ຂເວ, ຈຕ຺ຕາຣິ ວຈີສຸຈຣິຕານີ’’ຕິ. ນວມໍ.

໑໐. ສາຣສຸຕ຺ຕໍ

໑໕໐. ‘‘ຈຕ຺ຕາໂຣເມ, ຠິກ຺ຂເວ, ສາຣາ. ກຕເມ ຈຕ຺ຕາໂຣ? ສີລສາໂຣ, ສມາຘິສາໂຣ, ປຎ຺ຎາສາໂຣ, ວິມຸຕ຺ຕິສາໂຣ – ອິເມ ໂຂ, ຠິກ຺ຂເວ, ຈຕ຺ຕາໂຣ ສາຣາ’’ຕິ. ທສມໍ.

ອາຠາວຄ຺ໂຄ ປຎ຺ຈໂມ.