໘. ທຸຕິຍຕຖາຄຕອຈ຺ຉຣິຍສຸຕ຺ຕໍ

໑໒໘. ‘‘ຕຖາຄຕສ຺ສ, ຠິກ຺ຂເວ, ອຣຫໂຕ ສມ຺ມາສມ຺ພຸທ຺ຘສ຺ສ ປາຕຸຠາວາ ຈຕ຺ຕາໂຣ ອຈ຺ຉຣິຍາ ອພ຺ຠຸຕາ ຘມ຺ມາ ປາຕຸຠວນ຺ຕິ. ກຕເມ ຈຕ຺ຕາໂຣ? ອາລຍາຣາມາ [ອາລຍຣາມາ (ອຎ຺ຎສຸຕ຺ເຕສຸ)], ຠິກ຺ຂເວ, ປຊາ ອາລຍຣຕາ ອາລຍສມ຺ມຸທິຕາ; ສາ ຕຖາຄເຕນ ອນາລເຍ ຘມ຺ເມ ເທສິຍມາເນ ສຸສ຺ສູສຕິ ໂສຕໍ ໂອທຫຕິ ອຎ຺ຎາ ຈິຕ຺ຕໍ ອຸປຏ຺ຐເປຕິ. ຕຖາຄຕສ຺ສ, ຠິກ຺ຂເວ, ອຣຫໂຕ ສມ຺ມາສມ຺ພຸທ຺ຘສ຺ສ ປາຕຸຠາວາ ອຍໍ ປຐໂມ ອຈ຺ຉຣິໂຍ ອພ຺ຠຸໂຕ ຘມ຺ໂມ ປາຕຸຠວຕິ.

‘‘ມານາຣາມາ, ຠິກ຺ຂເວ, ປຊາ ມານຣຕາ ມານສມ຺ມຸທິຕາ. ສາ ຕຖາຄເຕນ ມານວິນເຍ ຘມ຺ເມ ເທສິຍມາເນ ສຸສ຺ສູສຕິ ໂສຕໍ ໂອທຫຕິ ອຎ຺ຎາ ຈິຕ຺ຕໍ ອຸປຏ຺ຐເປຕິ. ຕຖາຄຕສ຺ສ, ຠິກ຺ຂເວ, ອຣຫໂຕ ສມ຺ມາສມ຺ພຸທ຺ຘສ຺ສ ປາຕຸຠາວາ ອຍໍ ທຸຕິໂຍ ອຈ຺ຉຣິໂຍ ອພ຺ຠຸໂຕ ຘມ຺ໂມ ປາຕຸຠວຕິ.

‘‘ອນຸປສມາຣາມາ, ຠິກ຺ຂເວ, ປຊາ ອນຸປສມຣຕາ ອນຸປສມສມ຺ມຸທິຕາ. ສາ ຕຖາຄເຕນ ໂອປສມິເກ ຘມ຺ເມ ເທສິຍມາເນ ສຸສ຺ສູສຕິ ໂສຕໍ ໂອທຫຕິ ອຎ຺ຎາ ຈິຕ຺ຕໍ ອຸປຏ຺ຐເປຕິ. ຕຖາຄຕສ຺ສ, ຠິກ຺ຂເວ, ອຣຫໂຕ ສມ຺ມາສມ຺ພຸທ຺ຘສ຺ສ ປາຕຸຠາວາ ອຍໍ ຕຕິໂຍ ອຈ຺ຉຣິໂຍ ອພ຺ຠຸໂຕ ຘມ຺ໂມ ປາຕຸຠວຕິ.

‘‘ອວິຊ຺ຊາຄຕາ, ຠິກ຺ຂເວ, ປຊາ ອຓ຺ຑຠູຕາ ປຣິໂຍນທ຺ຘາ. ສາ ຕຖາຄເຕນ ອວິຊ຺ຊາວິນເຍ ຘມ຺ເມ ເທສິຍມາເນ ສຸສ຺ສູສຕິ ໂສຕໍ ໂອທຫຕິ ອຎ຺ຎາ ຈິຕ຺ຕໍ ອຸປຏ຺ຐເປຕິ. ຕຖາຄຕສ຺ສ, ຠິກ຺ຂເວ, ອຣຫໂຕ ສມ຺ມາສມ຺ພຸທ຺ຘສ຺ສ ປາຕຸຠາວາ ອຍໍ ຈຕຸຕ຺ໂຖ ອຈ຺ຉຣິໂຍ ອພ຺ຠຸໂຕ ຘມ຺ໂມ ປາຕຸຠວຕິ. ຕຖາຄຕສ຺ສ, ຠິກ຺ຂເວ, ອຣຫໂຕ ສມ຺ມາສມ຺ພຸທ຺ຘສ຺ສ ປາຕຸຠາວາ ອິເມ ຈຕ຺ຕາໂຣ ອຈ຺ຉຣິຍາ ອພ຺ຠຸຕາ ຘມ຺ມາ ປາຕຸຠວນ຺ຕີ’’ຕິ. ອຏ຺ຐມໍ.