໑໐. ຈກ຺ກວຕ຺ຕິອຈ຺ຉຣິຍສຸຕ຺ຕໍ

໑໓໐. ‘‘ຈຕ຺ຕາໂຣເມ, ຠິກ຺ຂເວ, ອຈ຺ຉຣິຍາ ອພ຺ຠຸຕາ ຘມ຺ມາ ຣຎ຺ເຎ ຈກ຺ກວຕ຺ຕິມ຺ຫິ. ກຕເມ ຈຕ຺ຕາໂຣ? ສເຈ, ຠິກ຺ຂເວ, ຂຕ຺ຕິຍປຣິສາ ຣາຊານໍ ຈກ຺ກວຕ຺ຕິໍ ທສ຺ສນາຍ ອຸປສງ຺ກມຕິ, ທສ຺ສເນນປິ ສາ ອຕ຺ຕມນາ ໂຫຕິ. ຕຕ຺ຣ ເຈ ຣາຊາ ຈກ຺ກວຕ຺ຕີ ຠາສຕິ, ຠາສິເຕນປິ ສາ ອຕ຺ຕມນາ ໂຫຕິ. ອຕິຕ຺ຕາວ, ຠິກ຺ຂເວ, ຂຕ຺ຕິຍປຣິສາ ໂຫຕິ, ອຖ ຣາຊາ ຈກ຺ກວຕ຺ຕີ ຕຸຓ຺ຫີ ຠວຕິ.

‘‘ສເຈ, ຠິກ຺ຂເວ, ພ຺ຣາຫ຺ມຓປຣິສາ ຣາຊານໍ ຈກ຺ກວຕ຺ຕິໍ ທສ຺ສນາຍ ອຸປສງ຺ກມຕິ, ທສ຺ສເນນປິ ສາ ອຕ຺ຕມນາ ໂຫຕິ. ຕຕ຺ຣ ເຈ ຣາຊາ ຈກ຺ກວຕ຺ຕີ ຠາສຕິ, ຠາສິເຕນປິ ສາ ອຕ຺ຕມນາ ໂຫຕິ. ອຕິຕ຺ຕາວ, ຠິກ຺ຂເວ, ພ຺ຣາຫ຺ມຓປຣິສາ ໂຫຕິ, ອຖ ຣາຊາ ຈກ຺ກວຕ຺ຕີ ຕຸຓ຺ຫີ ຠວຕິ.

‘‘ສເຈ, ຠິກ຺ຂເວ, ຄຫປຕິປຣິສາ ຣາຊານໍ ຈກ຺ກວຕ຺ຕິໍ ທສ຺ສນາຍ ອຸປສງ຺ກມຕິ, ທສ຺ສເນນປິ ສາ ອຕ຺ຕມນາ ໂຫຕິ. ຕຕ຺ຣ ເຈ ຣາຊາ ຈກ຺ກວຕ຺ຕີ ຠາສຕິ, ຠາສິເຕນປິ ສາ ອຕ຺ຕມນາ ໂຫຕິ. ອຕິຕ຺ຕາວ, ຠິກ຺ຂເວ, ຄຫປຕິປຣິສາ ໂຫຕິ, ອຖ ຣາຊາ ຈກ຺ກວຕ຺ຕີ ຕຸຓ຺ຫີ ຠວຕິ.

‘‘ສເຈ, ຠິກ຺ຂເວ, ສມຓປຣິສາ ຣາຊານໍ ຈກ຺ກວຕ຺ຕິໍ ທສ຺ສນາຍ ອຸປສງ຺ກມຕິ, ທສ຺ສເນນປິ ສາ ອຕ຺ຕມນາ ໂຫຕິ. ຕຕ຺ຣ ເຈ ຣາຊາ ຈກ຺ກວຕ຺ຕີ ຠາສຕິ, ຠາສິເຕນປິ ສາ ອຕ຺ຕມນາ ໂຫຕິ. ອຕິຕ຺ຕາວ, ຠິກ຺ຂເວ, ສມຓປຣິສາ ໂຫຕິ, ອຖ ຣາຊາ ຈກ຺ກວຕ຺ຕີ ຕຸຓ຺ຫີ ຠວຕິ. ອິເມ ໂຂ, ຠິກ຺ຂເວ, ຈຕ຺ຕາໂຣ ອຈ຺ຉຣິຍາ ອພ຺ຠຸຕາ ຘມ຺ມາ ຣຎ຺ເຎ ຈກ຺ກວຕ຺ຕິມ຺ຫິ.

‘‘ເອວເມວໍ ໂຂ, ຠິກ຺ຂເວ, ຈຕ຺ຕາໂຣ [ຈຕ຺ຕາໂຣເມ (ກ.)] ອຈ຺ຉຣິຍາ ອພ຺ຠຸຕາ ຘມ຺ມາ ອານນ຺ເທ. ກຕເມ ຈຕ຺ຕາໂຣ? ສເຈ, ຠິກ຺ຂເວ, ຠິກ຺ຂຸປຣິສາ ອານນ຺ທໍ ທສ຺ສນາຍ ອຸປສງ຺ກມຕິ, ທສ຺ສເນນປິ ສາ ອຕ຺ຕມນາ ໂຫຕິ. ຕຕ຺ຣ ເຈ ອານນ຺ໂທ ຘມ຺ມໍ ຠາສຕິ, ຠາສິເຕນປິ ສາ ອຕ຺ຕມນາ ໂຫຕິ. ອຕິຕ຺ຕາວ, ຠິກ຺ຂເວ, ຠິກ຺ຂຸປຣິສາ ໂຫຕິ, ອຖ ອານນ຺ໂທ ຕຸຓ຺ຫີ ຠວຕິ.

‘‘ສເຈ, ຠິກ຺ຂເວ, ຠິກ຺ຂຸນິປຣິສາ…ເປ… ສເຈ, ຠິກ຺ຂເວ, ອຸປາສກປຣິສາ…ເປ… ສເຈ, ຠິກ຺ຂເວ, ອຸປາສິກາປຣິສາ ອານນ຺ທໍ ທສ຺ສນາຍ ອຸປສງ຺ກມຕິ, ທສ຺ສເນນປິ ສາ ອຕ຺ຕມນາ ໂຫຕິ. ຕຕ຺ຣ ເຈ ອານນ຺ໂທ ຘມ຺ມໍ ຠາສຕິ, ຠາສິເຕນປິ ສາ ອຕ຺ຕມນາ ໂຫຕິ. ອຕິຕ຺ຕາວ, ຠິກ຺ຂເວ, ອຸປາສິກາປຣິສາ ໂຫຕິ, ອຖ ອານນ຺ໂທ ຕຸຓ຺ຫີ ຠວຕິ. ອິເມ ໂຂ, ຠິກ຺ຂເວ, ຈຕ຺ຕາໂຣ ອຈ຺ຉຣິຍາ ອພ຺ຠຸຕາ ຘມ຺ມາ ອານນ຺ເທ’’ຕິ. ທສມໍ.

ຠຍວຄ຺ໂຄ ຕຕິໂຍ.