໗. ອາຣກ຺ຂສຸຕ຺ຕໍ

໑໑໗. ‘‘ຈຕູສຸ, ຠິກ຺ຂເວ, ຐາເນສຸ ອຕ຺ຕຣູເປນ ອປ຺ປມາໂທ ສຕິ ເຈຕໂສ ອາຣກ຺ໂຂ ກຣຓີໂຍ. ກຕເມສຸ ຈຕູສຸ? ‘ມາ ເມ ຣຊນີເຍສຸ ຘມ຺ເມສຸ ຈິຕ຺ຕໍ ຣຊ຺ຊີ’ຕິ ອຕ຺ຕຣູເປນ ອປ຺ປມາໂທ ສຕິ ເຈຕໂສ ອາຣກ຺ໂຂ ກຣຓີໂຍ; ‘ມາ ເມ ໂທສນີເຍສຸ ຘມ຺ເມສຸ ຈິຕ຺ຕໍ ທຸສ຺ສີ’ຕິ ອຕ຺ຕຣູເປນ ອປ຺ປມາໂທ ສຕິ ເຈຕໂສ ອາຣກ຺ໂຂ ກຣຓີໂຍ; ‘ມາ ເມ ໂມຫນີເຍສຸ ຘມ຺ເມສຸ ຈິຕ຺ຕໍ ມຸຍ຺ຫີ’ຕິ ອຕ຺ຕຣູເປນ ອປ຺ປມາໂທ ສຕິ ເຈຕໂສ ອາຣກ຺ໂຂ ກຣຓີໂຍ; ‘ມາ ເມ ມທນີເຍສຸ ຘມ຺ເມສຸ ຈິຕ຺ຕໍ ມຊ຺ຊີ’ຕິ ອຕ຺ຕຣູເປນ ອປ຺ປມາໂທ ສຕິ ເຈຕໂສ ອາຣກ຺ໂຂ ກຣຓີໂຍ.

‘‘ຍໂຕ ໂຂ, ຠິກ຺ຂເວ, ຠິກ຺ຂຸໂນ ຣຊນີເຍສຸ ຘມ຺ເມສຸ ຈິຕ຺ຕໍ ນ ຣຊ຺ຊຕິ ວີຕຣາຄຕ຺ຕາ, ໂທສນີເຍສຸ ຘມ຺ເມສຸ ຈິຕ຺ຕໍ ນ ທຸສ຺ສຕິ ວີຕໂທສຕ຺ຕາ, ໂມຫນີເຍສຸ ຘມ຺ເມສຸ ຈິຕ຺ຕໍ ນ ມຸຍ຺ຫຕິ ວີຕໂມຫຕ຺ຕາ, ມທນີເຍສຸ ຘມ຺ເມສຸ ຈິຕ຺ຕໍ ນ ມຊ຺ຊຕິ ວີຕມທຕ຺ຕາ, ໂສ ນ ຉມ຺ຠຕິ ນ ກມ຺ປຕິ ນ ເວຘຕິ ນ ສນ຺ຕາສໍ ອາປຊ຺ຊຕິ, ນ ຈ ປນ ສມຓວຈນເຫຕຸປິ ຄຈ຺ຉຕີ’’ຕິ. ສຕ຺ຕມໍ.