໑. ເກສິສຸຕ຺ຕໍ

໑໑໑. ອຖ ໂຂ ເກສິ ອສ຺ສທມ຺ມສາຣຖິ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ເກສິໍ ອສ຺ສທມ຺ມສາຣຖິໍ ຠຄວາ ເອຕທໂວຈ – ‘‘ຕ຺ວໍ ໂຂສິ, ເກສິ, ປຎ຺ຎາໂຕ ອສ຺ສທມ຺ມສາຣຖີຕິ [ສຎ຺ຎາໂຕ ອສ຺ສທມ຺ມສາຣຖິ (ສີ. ສ຺ຍາ. ກໍ. ປີ.)]. ກຖໍ ປນ ຕ຺ວໍ, ເກສິ, ອສ຺ສທມ຺ມໍ ວິເນສີ’’ຕິ? ‘‘ອຫໍ ໂຂ, ຠນ຺ເຕ, ອສ຺ສທມ຺ມໍ ສຓ຺ເຫນປິ ວິເນມິ, ຜຣຸເສນປິ ວິເນມິ, ສຓ຺ຫຜຣຸເສນປິ ວິເນມີ’’ຕິ. ‘‘ສເຈ ເຕ, ເກສິ, ອສ຺ສທມ຺ໂມ ສຓ຺ເຫນ ວິນຍໍ ນ ອຸເປຕິ, ຜຣຸເສນ ວິນຍໍ ນ ອຸເປຕິ, ສຓ຺ຫຜຣຸເສນ ວິນຍໍ ນ ອຸເປຕິ, ກິນ຺ຕິ ນໍ ກໂຣສີ’’ຕິ? ‘‘ສເຈ ເມ, ຠນ຺ເຕ, ອສ຺ສທມ຺ໂມ ສຓ຺ເຫນ ວິນຍໍ ນ ອຸເປຕິ, ຜຣຸເສນ ວິນຍໍ ນ ອຸເປຕິ, ສຓ຺ຫຜຣຸເສນ ວິນຍໍ ນ ອຸເປຕິ; ຫນາມິ ນໍ, ຠນ຺ເຕ. ຕໍ ກິສ຺ສ ເຫຕຸ? ມາ ເມ ອາຈຣິຍກຸລສ຺ສ ອວຓ຺ໂຓ ອໂຫສີ’’ຕິ.

‘‘ຠຄວາ ປນ, ຠນ຺ເຕ, ອນຸຕ຺ຕໂຣ ປຸຣິສທມ຺ມສາຣຖິ. ກຖໍ ປນ, ຠນ຺ເຕ, ຠຄວາ ປຸຣິສທມ຺ມໍ ວິເນຕີ’’ຕິ? ‘‘ອຫໍ ໂຂ, ເກສິ, ປຸຣິສທມ຺ມໍ ສຓ຺ເຫນປິ ວິເນມິ, ຜຣຸເສນປິ ວິເນມິ, ສຓ຺ຫຜຣຸເສນປິ ວິເນມິ. ຕຕ຺ຣິທໍ, ເກສິ, ສຓ຺ຫສ຺ມິໍ – ອິຕິ ກາຍສຸຈຣິຕໍ ອິຕິ ກາຍສຸຈຣິຕສ຺ສ ວິປາໂກ, ອິຕິ ວຈີສຸຈຣິຕໍ ອິຕິ ວຈີສຸຈຣິຕສ຺ສ ວິປາໂກ, ອິຕິ ມໂນສຸຈຣິຕໍ ອິຕິ ມໂນສຸຈຣິຕສ຺ສ ວິປາໂກ, ອິຕິ ເທວາ, ອິຕິ ມນຸສ຺ສາຕິ. ຕຕ຺ຣິທໍ, ເກສິ, ຜຣຸສສ຺ມິໍ – ອິຕິ ກາຍທຸຈ຺ຈຣິຕໍ ອິຕິ ກາຍທຸຈ຺ຈຣິຕສ຺ສ ວິປາໂກ, ອິຕິ ວຈີທຸຈ຺ຈຣິຕໍ ອິຕິ ວຈີທຸຈ຺ຈຣິຕສ຺ສ ວິປາໂກ, ອິຕິ ມໂນທຸຈ຺ຈຣິຕໍ ອິຕິ ມໂນທຸຈ຺ຈຣິຕສ຺ສ ວິປາໂກ, ອິຕິ ນິຣໂຍ, ອິຕິ ຕິຣຈ຺ຉານໂຍນິ, ອິຕິ ເປຕ຺ຕິວິສໂຍ’’ຕິ.

‘‘ຕຕ຺ຣິທໍ, ເກສິ, ສຓ຺ຫຜຣຸສສ຺ມິໍ – ອິຕິ ກາຍສຸຈຣິຕໍ ອິຕິ ກາຍສຸຈຣິຕສ຺ສ ວິປາໂກ, ອິຕິ ກາຍທຸຈ຺ຈຣິຕໍ ອິຕິ ກາຍທຸຈ຺ຈຣິຕສ຺ສ ວິປາໂກ, ອິຕິ ວຈີສຸຈຣິຕໍ ອິຕິ ວຈີສຸຈຣິຕສ຺ສ ວິປາໂກ, ອິຕິ ວຈີທຸຈ຺ຈຣິຕໍ ອິຕິ ວຈີທຸຈ຺ຈຣິຕສ຺ສ ວິປາໂກ, ອິຕິ ມໂນສຸຈຣິຕໍ ອິຕິ ມໂນສຸຈຣິຕສ຺ສ ວິປາໂກ, ອິຕິ ມໂນທຸຈ຺ຈຣິຕໍ ອິຕິ ມໂນທຸຈ຺ຈຣິຕສ຺ສ ວິປາໂກ, ອິຕິ ເທວາ, ອິຕິ ມນຸສ຺ສາ, ອິຕິ ນິຣໂຍ, ອິຕິ ຕິຣຈ຺ຉານໂຍນິ, ອິຕິ ເປຕ຺ຕິວິສໂຍ’’ຕິ.

‘‘ສເຈ ເຕ, ຠນ຺ເຕ, ປຸຣິສທມ຺ໂມ ສຓ຺ເຫນ ວິນຍໍ ນ ອຸເປຕິ, ຜຣຸເສນ ວິນຍໍ ນ ອຸເປຕິ, ສຓ຺ຫຜຣຸເສນ ວິນຍໍ ນ ອຸເປຕິ, ກິນ຺ຕິ ນໍ ຠຄວາ ກໂຣຕີ’’ຕິ? ‘‘ສເຈ ເມ, ເກສິ, ປຸຣິສທມ຺ໂມ ສຓ຺ເຫນ ວິນຍໍ ນ ອຸເປຕິ, ຜຣຸເສນ ວິນຍໍ ນ ອຸເປຕິ, ສຓ຺ຫຜຣຸເສນ ວິນຍໍ ນ ອຸເປຕິ, ຫນາມິ ນໍ, ເກສີ’’ຕິ. ‘‘ນ ໂຂ, ຠນ຺ເຕ, ຠຄວໂຕ ປາຓາຕິປາໂຕ ກປ຺ປຕິ. ອຖ ຈ ປນ ຠຄວາ ເອວມາຫ – ‘ຫນາມິ, ນໍ ເກສີ’’’ຕິ! ‘‘ສຈ຺ຈໍ, ເກສິ! ນ ຕຖາຄຕສ຺ສ ປາຓາຕິປາໂຕ ກປ຺ປຕິ. ອປິ ຈ ໂຍ ປຸຣິສທມ຺ໂມ ສຓ຺ເຫນ ວິນຍໍ ນ ອຸເປຕິ, ຜຣຸເສນ ວິນຍໍ ນ ອຸເປຕິ, ສຓ຺ຫຜຣຸເສນ ວິນຍໍ ນ ອຸເປຕິ, ນ ຕໍ ຕຖາຄໂຕ ວຕ຺ຕພ຺ພໍ ອນຸສາສິຕພ຺ພໍ ມຎ຺ຎຕິ, ນາປິ ວິຎ຺ຎູ ສພ຺ຣຫ຺ມຈາຣີ ວຕ຺ຕພ຺ພໍ ອນຸສາສິຕພ຺ພໍ ມຎ຺ຎນ຺ຕິ. ວໂຘ ເຫໂສ, ເກສິ, ອຣິຍສ຺ສ ວິນເຍ – ຍໍ ນ ຕຖາຄໂຕ ວຕ຺ຕພ຺ພໍ ອນຸສາສິຕພ຺ພໍ ມຎ຺ຎຕິ, ນາປິ ວິຎ຺ຎູ ສພ຺ຣຫ຺ມຈາຣີ ວຕ຺ຕພ຺ພໍ ອນຸສາສິຕພ຺ພໍ ມຎ຺ຎນ຺ຕີ’’ຕິ.

‘‘ໂສ ຫິ ນູນ, ຠນ຺ເຕ, ສຸຫໂຕ ໂຫຕິ – ຍໍ ນ ຕຖາຄໂຕ ວຕ຺ຕພ຺ພໍ ອນຸສາສິຕພ຺ພໍ ມຎ຺ຎຕິ, ນາປິ ວິຎ຺ຎູ ສພ຺ຣຫ຺ມຈາຣີ ວຕ຺ຕພ຺ພໍ ອນຸສາສິຕພ຺ພໍ ມຎ຺ຎນ຺ຕີຕິ. ອຠິກ຺ກນ຺ຕໍ, ຠນ຺ເຕ, ອຠິກ຺ກນ຺ຕໍ, ຠນ຺ເຕ…ເປ… ອຸປາສກໍ ມໍ, ຠນ຺ເຕ, ຠຄວາ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ປຐມໍ.