໗. ມູສິກສຸຕ຺ຕໍ

໑໐໗. ‘‘ຈຕສ຺ໂສ ອິມາ, ຠິກ຺ຂເວ, ມູສິກາ. ກຕມາ ຈຕສ຺ໂສ? ຄາຘໍ ກຕ຺ຕາ ໂນ ວສິຕາ, ວສິຕາ ໂນ ຄາຘໍ ກຕ຺ຕາ, ເນວ ຄາຘໍ ກຕ຺ຕາ ໂນ ວສິຕາ, ຄາຘໍ ກຕ຺ຕາ ຈ ວສິຕາ ຈ – ອິມາ ໂຂ, ຠິກ຺ຂເວ, ຈຕສ຺ໂສ ມູສິກາ. ເອວເມວໍ ໂຂ, ຠິກ຺ຂເວ, ຈຕ຺ຕາໂຣ ມູສິກູປມາ ປຸຄ຺ຄລາ ສນ຺ໂຕ ສໍວິຊ຺ຊມານາ ໂລກສ຺ມິໍ. ກຕເມ ຈຕ຺ຕາໂຣ? ຄາຘໍ ກຕ຺ຕາ ໂນ ວສິຕາ, ວສິຕາ ໂນ ຄາຘໍ ກຕ຺ຕາ, ເນວ ຄາຘໍ ກຕ຺ຕາ ໂນ ວສິຕາ, ຄາຘໍ ກຕ຺ຕາ ຈ ວສິຕາ ຈ.

‘‘ກຖຎ຺ຈ, ຠິກ຺ຂເວ, ປຸຄ຺ຄໂລ ຄາຘໍ ກຕ຺ຕາ ໂຫຕິ ໂນ ວສິຕາ? ອິຘ, ຠິກ຺ຂເວ, ເອກຈ຺ໂຈ ປຸຄ຺ຄໂລ ຘມ຺ມໍ ປຣິຍາປຸຓາຕິ – ສຸຕ຺ຕໍ, ເຄຍ຺ຍໍ, ເວຍ຺ຍາກຣຓໍ, ຄາຖໍ, ອຸທານໍ, ອິຕິວຸຕ຺ຕກໍ, ຊາຕກໍ, ອພ຺ຠຸຕຘມ຺ມໍ, ເວທລ຺ລໍ. ໂສ ‘ອິທໍ ທຸກ຺ຂ’ນ຺ຕິ ຍຖາຠູຕໍ ນປ຺ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ນປ຺ປຊານາຕິ. ເອວໍ ໂຂ, ຠິກ຺ຂເວ, ປຸຄ຺ຄໂລ ຄາຘໍ ກຕ຺ຕາ ໂຫຕິ, ໂນ ວສິຕາ. ເສຍ຺ຍຖາປິ ສາ, ຠິກ຺ຂເວ, ມູສິກາ ຄາຘໍ ກຕ຺ຕາ, ໂນ ວສິຕາ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ.

‘‘ກຖຎ຺ຈ, ຠິກ຺ຂເວ, ປຸຄ຺ຄໂລ ວສິຕາ ໂຫຕິ, ໂນ ຄາຘໍ ກຕ຺ຕາ? ອິຘ, ຠິກ຺ຂເວ, ເອກຈ຺ໂຈ ປຸຄ຺ຄໂລ ຘມ຺ມໍ ນ ປຣິຍາປຸຓາຕິ – ສຸຕ຺ຕໍ, ເຄຍ຺ຍໍ, ເວຍ຺ຍາກຣຓໍ, ຄາຖໍ, ອຸທານໍ, ອິຕິວຸຕ຺ຕກໍ, ຊາຕກໍ, ອພ຺ຠຸຕຘມ຺ມໍ, ເວທລ຺ລໍ. ໂສ ‘ອິທໍ ທຸກ຺ຂ’ນ຺ຕິ ຍຖາຠູຕໍ ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ. ເອວໍ ໂຂ, ຠິກ຺ຂເວ, ປຸຄ຺ຄໂລ ວສິຕາ ໂຫຕິ, ໂນ ຄາຘໍ ກຕ຺ຕາ. ເສຍ຺ຍຖາປິ ສາ, ຠິກ຺ຂເວ, ມູສິກາ ວສິຕາ ໂຫຕິ, ໂນ ຄາຘໍ ກຕ຺ຕາ; ຕຖູປມາຫໍ, ຠິກ຺ຂເວ, ອິມໍ, ປຸຄ຺ຄລໍ ວທາມິ.

‘‘ກຖຎ຺ຈ, ຠິກ຺ຂເວ, ປຸຄ຺ຄໂລ ເນວ ຄາຘໍ ກຕ຺ຕາ ໂຫຕິ ໂນ ວສິຕາ? ອິຘ, ຠິກ຺ຂເວ, ເອກຈ຺ໂຈ ປຸຄ຺ຄໂລ ຘມ຺ມໍ ນ ປຣິຍາປຸຓາຕິ – ສຸຕ຺ຕໍ, ເຄຍ຺ຍໍ, ເວຍ຺ຍາກຣຓໍ, ຄາຖໍ, ອຸທານໍ, ອິຕິວຸຕ຺ຕກໍ, ຊາຕກໍ, ອພ຺ຠຸຕຘມ຺ມໍ, ເວທລ຺ລໍ. ໂສ ‘ອິທໍ ທຸກ຺ຂ’ນ຺ຕິ ຍຖາຠູຕໍ ນປ຺ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ນປ຺ປຊານາຕິ. ເອວໍ ໂຂ, ຠິກ຺ຂເວ, ປຸຄ຺ຄໂລ ເນວ ຄາຘໍ ກຕ຺ຕາ ໂຫຕິ, ໂນ ວສິຕາ. ເສຍ຺ຍຖາປິ ສາ, ຠິກ຺ຂເວ, ມູສິກາ ເນວ ຄາຘໍ ກຕ຺ຕາ ໂຫຕິ, ໂນ ວສິຕາ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ.

‘‘ກຖຎ຺ຈ, ຠິກ຺ຂເວ, ປຸຄ຺ຄໂລ ຄາຘໍ ກຕ຺ຕາ ຈ ໂຫຕິ ວສິຕາ ຈ? ອິຘ, ຠິກ຺ຂເວ, ເອກຈ຺ໂຈ ປຸຄ຺ຄໂລ ຘມ຺ມໍ ປຣິຍາປຸຓາຕິ – ສຸຕ຺ຕໍ, ເຄຍ຺ຍໍ, ເວຍ຺ຍາກຣຓໍ, ຄາຖໍ, ອຸທານໍ, ອິຕິວຸຕ຺ຕກໍ, ຊາຕກໍ, ອພ຺ຠຸຕຘມ຺ມໍ, ເວທລ຺ລໍ. ໂສ ‘ອິທໍ ທຸກ຺ຂ’ນ຺ຕິ ຍຖາຠູຕໍ ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ. ເອວໍ ໂຂ, ຠິກ຺ຂເວ, ປຸຄ຺ຄໂລ ຄາຘໍ ກຕ຺ຕາ ຈ ໂຫຕິ ວສິຕາ ຈ. ເສຍ຺ຍຖາປິ ສາ, ຠິກ຺ຂເວ, ມູສິກາ ຄາຘໍ ກຕ຺ຕາ ຈ ໂຫຕິ ວສິຕາ ຈ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ. ອິເມ ໂຂ, ຠິກ຺ຂເວ, ຈຕ຺ຕາໂຣ ມູສິກູປມາ ປຸຄ຺ຄລາ ສນ຺ໂຕ ສໍວິຊ຺ຊມານາ ໂລກສ຺ມິ’’ນ຺ຕິ. ສຕ຺ຕມໍ.