໕. ອມ຺ພສຸຕ຺ຕໍ

໑໐໕. ‘‘ຈຕ຺ຕາຣິມານິ, ຠິກ຺ຂເວ, ອມ຺ພານິ. ກຕມານິ ຈຕ຺ຕາຣິ? ອາມໍ ປກ຺ກວຓ຺ຓິ [ປກ຺ກວຓ຺ຓີ (ປຸ. ປ. ໑໕໙)], ປກ຺ກໍ ອາມວຓ຺ຓິ [ອາມວຓ຺ຓີ (ສີ. ສ຺ຍາ. ກໍ. ປີ.)], ອາມໍ ອາມວຓ຺ຓິ, ປກ຺ກໍ ປກ຺ກວຓ຺ຓິ – ອິມານິ ໂຂ, ຠິກ຺ຂເວ, ຈຕ຺ຕາຣິ ອມ຺ພານິ. ເອວເມວໍ ໂຂ, ຠິກ຺ຂເວ, ຈຕ຺ຕາໂຣ ອມ຺ພູປມາ [ປກ຺ກວຓ຺ຓີ (ປຸ. ປ. ໑໕໙)] ປຸຄ຺ຄລາ ສນ຺ໂຕ ສໍວິຊ຺ຊມານາ ໂລກສ຺ມິໍ. ກຕເມ ຈຕ຺ຕາໂຣ? ອາໂມ ປກ຺ກວຓ຺ຓີ, ປກ຺ໂກ ອາມວຓ຺ຓີ, ອາໂມ ອາມວຓ຺ຓີ, ປກ຺ໂກ ປກ຺ກວຓ຺ຓີ.

‘‘ກຖຎ຺ຈ, ຠິກ຺ຂເວ, ປຸຄ຺ຄໂລ ອາໂມ ໂຫຕິ ປກ຺ກວຓ຺ຓີ? ອິຘ, ຠິກ຺ຂເວ, ເອກຈ຺ຈສ຺ສ ປຸຄ຺ຄລສ຺ສ ປາສາທິກໍ ໂຫຕິ ອຠິກ຺ກນ຺ຕໍ ປຏິກ຺ກນ຺ຕໍ ອາໂລກິຕໍ ວິໂລກິຕໍ ສມິຎ຺ຊິຕໍ ປສາຣິຕໍ ສງ຺ຆາຏິປຕ຺ຕຈີວຣຘາຣຓໍ. ໂສ ‘ອິທໍ ທຸກ຺ຂ’ນ຺ຕິ ຍຖາຠູຕໍ ນປ຺ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ນປ຺ປຊານາຕິ. ເອວໍ ໂຂ, ຠິກ຺ຂເວ, ປຸຄ຺ຄໂລ ອາໂມ ໂຫຕິ ປກ຺ກວຓ຺ຓີ. ເສຍ຺ຍຖາປິ ຕໍ, ຠິກ຺ຂເວ, ອມ຺ພໍ ອາມໍ ປກ຺ກວຓ຺ຓິ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ.

‘‘ກຖຎ຺ຈ, ຠິກ຺ຂເວ, ປຸຄ຺ຄໂລ ປກ຺ໂກ ໂຫຕິ ອາມວຓ຺ຓີ? ອິຘ, ຠິກ຺ຂເວ, ເອກຈ຺ຈສ຺ສ ປຸຄ຺ຄລສ຺ສ ນ ປາສາທິກໍ ໂຫຕິ ອຠິກ຺ກນ຺ຕໍ ປຏິກ຺ກນ຺ຕໍ ອາໂລກິຕໍ ວິໂລກິຕໍ ສມິຎ຺ຊິຕໍ ປສາຣິຕໍ ສງ຺ຆາຏິປຕ຺ຕຈີວຣຘາຣຓໍ. ໂສ ‘ອິທໍ ທຸກ຺ຂ’ນ຺ຕິ ຍຖາຠູຕໍ ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ. ເອວໍ ໂຂ, ຠິກ຺ຂເວ, ປຸຄ຺ຄໂລ ປກ຺ໂກ ໂຫຕິ ອາມວຓ຺ຓີ. ເສຍ຺ຍຖາປິ ຕໍ, ຠິກ຺ຂເວ, ອມ຺ພໍ ປກ຺ກໍ ອາມວຓ຺ຓິ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ.

‘‘ກຖຎ຺ຈ, ຠິກ຺ຂເວ, ປຸຄ຺ຄໂລ ອາໂມ ໂຫຕິ ອາມວຓ຺ຓີ? ອິຘ, ຠິກ຺ຂເວ, ເອກຈ຺ຈສ຺ສ ປຸຄ຺ຄລສ຺ສ ນ ປາສາທິກໍ ໂຫຕິ ອຠິກ຺ກນ຺ຕໍ ປຏິກ຺ກນ຺ຕໍ ອາໂລກິຕໍ ວິໂລກິຕໍ ສມິຎ຺ຊິຕໍ ປສາຣິຕໍ ສງ຺ຆາຏິປຕ຺ຕຈີວຣຘາຣຓໍ. ໂສ ‘ອິທໍ ທຸກ຺ຂ’ນ຺ຕິ ຍຖາຠູຕໍ ນປ຺ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ນປ຺ປຊານາຕິ. ເອວໍ ໂຂ, ຠິກ຺ຂເວ, ປຸຄ຺ຄໂລ ອາໂມ ໂຫຕິ ອາມວຓ຺ຓີ. ເສຍ຺ຍຖາປິ ຕໍ, ຠິກ຺ຂເວ, ອມ຺ພໍ ອາມໍ ອາມວຓ຺ຓິ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ.

‘‘ກຖຎ຺ຈ, ຠິກ຺ຂເວ, ປຸຄ຺ຄໂລ ປກ຺ໂກ ໂຫຕິ ປກ຺ກວຓ຺ຓີ? ອິຘ, ຠິກ຺ຂເວ, ເອກຈ຺ຈສ຺ສ ປຸຄ຺ຄລສ຺ສ ປາສາທິກໍ ໂຫຕິ ອຠິກ຺ກນ຺ຕໍ ປຏິກ຺ກນ຺ຕໍ ອາໂລກິຕໍ ວິໂລກິຕໍ ສມິຎ຺ຊິຕໍ ປສາຣິຕໍ ສງ຺ຆາຏິປຕ຺ຕຈີວຣຘາຣຓໍ. ໂສ ‘ອິທໍ ທຸກ຺ຂ’ນ຺ຕິ ຍຖາຠູຕໍ ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ. ເອວໍ ໂຂ, ຠິກ຺ຂເວ, ປຸຄ຺ຄໂລ ປກ຺ໂກ ໂຫຕິ ປກ຺ກວຓ຺ຓີ. ເສຍ຺ຍຖາປິ ຕໍ, ຠິກ຺ຂເວ, ອມ຺ພໍ ປກ຺ກໍ ປກ຺ກວຓ຺ຓິ; ຕຖູປມາຫໍ, ຠິກ຺ຂເວ, ອິມໍ ປຸຄ຺ຄລໍ ວທາມິ. ອິເມ ໂຂ, ຠິກ຺ຂເວ, ຈຕ຺ຕາໂຣ ອມ຺ພູປມາ ປຸຄ຺ຄລາ ສນ຺ໂຕ ສໍວິຊ຺ຊມານາ ໂລກສ຺ມິ’’ນ຺ຕິ. ປຎ຺ຈມໍ.