໓. ສປ຺ປຸຣິສສຸຕ຺ຕໍ

໗໓. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ອສປ຺ປຸຣິໂສ ເວທິຕພ຺ໂພ. ກຕເມຫິ ຈຕູຫິ? ອິຘ, ຠິກ຺ຂເວ, ອສປ຺ປຸຣິໂສ ໂຍ ໂຫຕິ ປຣສ຺ສ ອວຓ຺ໂຓ ຕໍ ອປຸຏ຺ໂຐປິ ປາຕຸ ກໂຣຕິ, ໂກ ປນ ວາໂທ ປຸຏ຺ຐສ຺ສ! ປຸຏ຺ໂຐ ໂຂ ປນ ປຎ຺ຫາຠິນີໂຕ ອຫາເປຕ຺ວາ ອລມ຺ພິຕ຺ວາ ປຣິປູຣໍ ວິຕ຺ຖາເຣນ ປຣສ຺ສ ອວຓ຺ຓໍ ຠາສິຕາ ໂຫຕິ. ເວທິຕພ຺ພເມຕໍ, ຠິກ຺ຂເວ, ອສປ຺ປຸຣິໂສ ອຍໍ ຠວນ຺ຕິ.

‘‘ປຸນ ຈປຣໍ, ຠິກ຺ຂເວ, ອສປ຺ປຸຣິໂສ ໂຍ ໂຫຕິ ປຣສ຺ສ ວຓ຺ໂຓ ຕໍ ປຸຏ຺ໂຐປິ ນ ປາຕຸ ກໂຣຕິ, ໂກ ປນ ວາໂທ ອປຸຏ຺ຐສ຺ສ! ປຸຏ຺ໂຐ ໂຂ ປນ ປຎ຺ຫາຠິນີໂຕ ຫາເປຕ຺ວາ ລມ຺ພິຕ຺ວາ ອປຣິປູຣໍ ອວິຕ຺ຖາເຣນ ປຣສ຺ສ ວຓ຺ຓໍ ຠາສິຕາ ໂຫຕິ. ເວທິຕພ຺ພເມຕໍ, ຠິກ຺ຂເວ, ອສປ຺ປຸຣິໂສ ອຍໍ ຠວນ຺ຕິ.

‘‘ປຸນ ຈປຣໍ, ຠິກ຺ຂເວ, ອສປ຺ປຸຣິໂສ ໂຍ ໂຫຕິ ອຕ຺ຕໂນ ອວຓ຺ໂຓ ຕໍ ປຸຏ຺ໂຐປິ ນ ປາຕຸ ກໂຣຕິ, ໂກ ປນ ວາໂທ ອປຸຏ຺ຐສ຺ສ! ປຸຏ຺ໂຐ ໂຂ ປນ ປຎ຺ຫາຠິນີໂຕ ຫາເປຕ຺ວາ ລມ຺ພິຕ຺ວາ ອປຣິປູຣໍ ອວິຕ຺ຖາເຣນ ອຕ຺ຕໂນ ອວຓ຺ຓໍ ຠາສິຕາ ໂຫຕິ. ເວທິຕພ຺ພເມຕໍ, ຠິກ຺ຂເວ, ອສປ຺ປຸຣິໂສ ອຍໍ ຠວນ຺ຕິ.

‘‘ປຸນ ຈປຣໍ, ຠິກ຺ຂເວ, ອສປ຺ປຸຣິໂສ ໂຍ ໂຫຕິ ອຕ຺ຕໂນ ວຓ຺ໂຓ ຕໍ ອປຸຏ຺ໂຐປິ ປາຕຸ ກໂຣຕິ, ໂກ ປນ ວາໂທ ປຸຏ຺ຐສ຺ສ! ປຸຏ຺ໂຐ ໂຂ ປນ ປຎ຺ຫາຠິນີໂຕ ອຫາເປຕ຺ວາ ອລມ຺ພິຕ຺ວາ ປຣິປູຣໍ ວິຕ຺ຖາເຣນ ອຕ຺ຕໂນ ວຓ຺ຓໍ ຠາສິຕາ ໂຫຕິ. ເວທິຕພ຺ພເມຕໍ, ຠິກ຺ຂເວ, ອສປ຺ປຸຣິໂສ ອຍໍ ຠວນ຺ຕິ. ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ອສປ຺ປຸຣິໂສ ເວທິຕພ຺ໂພ.

‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ສປ຺ປຸຣິໂສ ເວທິຕພ຺ໂພ. ກຕເມຫິ ຈຕູຫິ? ອິຘ, ຠິກ຺ຂເວ, ສປ຺ປຸຣິໂສ ໂຍ ໂຫຕິ ປຣສ຺ສ ອວຓ຺ໂຓ ຕໍ ປຸຏ຺ໂຐປິ ນ ປາຕຸ ກໂຣຕິ, ໂກ ປນ ວາໂທ ອປຸຏ຺ຐສ຺ສ! ປຸຏ຺ໂຐ ໂຂ ປນ ປຎ຺ຫາຠິນີໂຕ ຫາເປຕ຺ວາ ລມ຺ພິຕ຺ວາ ອປຣິປູຣໍ ອວິຕ຺ຖາເຣນ ປຣສ຺ສ ອວຓ຺ຓໍ ຠາສິຕາ ໂຫຕິ. ເວທິຕພ຺ພເມຕໍ, ຠິກ຺ຂເວ, ສປ຺ປຸຣິໂສ ອຍໍ ຠວນ຺ຕິ.

‘‘ປຸນ ຈປຣໍ, ຠິກ຺ຂເວ, ສປ຺ປຸຣິໂສ ໂຍ ໂຫຕິ ປຣສ຺ສ ວຓ຺ໂຓ ຕໍ ອປຸຏ຺ໂຐປິ ປາຕຸ ກໂຣຕິ, ໂກ ປນ ວາໂທ ປຸຏ຺ຐສ຺ສ! ປຸຏ຺ໂຐ ໂຂ ປນ ປຎ຺ຫາຠິນີໂຕ ອຫາເປຕ຺ວາ ອລມ຺ພິຕ຺ວາ ປຣິປູຣໍ ວິຕ຺ຖາເຣນ ປຣສ຺ສ ວຓ຺ຓໍ ຠາສິຕາ ໂຫຕິ. ເວທິຕພ຺ພເມຕໍ, ຠິກ຺ຂເວ, ສປ຺ປຸຣິໂສ ອຍໍ ຠວນ຺ຕິ.

‘‘ປຸນ ຈປຣໍ, ຠິກ຺ຂເວ, ສປ຺ປຸຣິໂສ ໂຍ ໂຫຕິ ອຕ຺ຕໂນ ອວຓ຺ໂຓ ຕໍ ອປຸຏ຺ໂຐປິ ປາຕຸ ກໂຣຕິ, ໂກ ປນ ວາໂທ ປຸຏ຺ຐສ຺ສ! ປຸຏ຺ໂຐ ໂຂ ປນ ປຎ຺ຫາຠິນີໂຕ ອຫາເປຕ຺ວາ ອລມ຺ພິຕ຺ວາ ປຣິປູຣໍ ວິຕ຺ຖາເຣນ ອຕ຺ຕໂນ ອວຓ຺ຓໍ ຠາສິຕາ ໂຫຕິ. ເວທິຕພ຺ພເມຕໍ, ຠິກ຺ຂເວ, ສປ຺ປຸຣິໂສ ອຍໍ ຠວນ຺ຕິ.

‘‘ປຸນ ຈປຣໍ, ຠິກ຺ຂເວ, ສປ຺ປຸຣິໂສ ໂຍ ໂຫຕິ ອຕ຺ຕໂນ ວຓ຺ໂຓ ຕໍ ປຸຏ຺ໂຐປິ ນ ປາຕຸ ກໂຣຕິ, ໂກ ປນ ວາໂທ ອປຸຏ຺ຐສ຺ສ! ປຸຏ຺ໂຐ ໂຂ ປນ ປຎ຺ຫາຠິນີໂຕ ຫາເປຕ຺ວາ ລມ຺ພິຕ຺ວາ ອປຣິປູຣໍ ອວິຕ຺ຖາເຣນ ອຕ຺ຕໂນ ວຓ຺ຓໍ ຠາສິຕາ ໂຫຕິ. ເວທິຕພ຺ພເມຕໍ, ຠິກ຺ຂເວ, ສປ຺ປຸຣິໂສ ອຍໍ ຠວນ຺ຕິ. ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ສປ຺ປຸຣິໂສ ເວທິຕພ຺ໂພ.

‘‘ເສຍ຺ຍຖາປິ, ຠິກ຺ຂເວ, ວຘຸກາ ຍຎ຺ຎເທວ ຣຕ຺ຕິໍ ວາ ທິວໍ ວາ ອານີຕາ ໂຫຕິ, ຕາວເທວສ຺ສາ ຕິພ຺ພໍ ຫິໂຣຕ຺ຕປ຺ປໍ ປຈ຺ຈຸປຏ຺ຐິຕໍ ໂຫຕິ ສສ຺ສຸຍາປິ ສສຸເຣປິ ສາມິເກປິ ອນ຺ຕມໂສ ທາສກມ຺ມກຣໂປຣິເສສຸ. ສາ ອປເຣນ ສມເຍນ ສໍວາສມນ຺ວາຍ ວິສ຺ສາສມນ຺ວາຍ ສສ຺ສຸມ຺ປິ ສສຸຣມ຺ປິ ສາມິກມ຺ປິ ເອວມາຫ – ‘ອເປຖ, ກິໍ ປນ ຕຸມ຺ເຫ ຊານາຖາ’ຕິ! ເອວເມວໍ ໂຂ, ຠິກ຺ຂເວ, ອິເຘກຈ຺ໂຈ ຠິກ຺ຂຸ ຍຎ຺ຎເທວ ຣຕ຺ຕິໍ ວາ ທິວໍ ວາ ອຄາຣສ຺ມາ ອນຄາຣິຍໍ ປພ຺ພຊິໂຕ ໂຫຕິ, ຕາວເທວສ຺ສ ຕິພ຺ພໍ ຫິໂຣຕ຺ຕປ຺ປໍ ປຈ຺ຈຸປຏ຺ຐິຕໍ ໂຫຕິ ຠິກ຺ຂູສຸ ຠິກ຺ຂຸນີສຸ ອຸປາສເກສຸ ອຸປາສິກາສຸ ອນ຺ຕມໂສ ອາຣາມິກສມຓຸທ຺ເທເສສຸ. ໂສ ອປເຣນ ສມເຍນ ສໍວາສມນ຺ວາຍ ວິສ຺ສາສມນ຺ວາຍ ອາຈຣິຍມ຺ປິ ອຸປຊ຺ຌາຍມ຺ປິ ເອວມາຫ – ‘ອເປຖ, ກິໍ ປນ ຕຸມ຺ເຫ ຊານາຖາ’ຕິ! ຕສ຺ມາຕິຫ, ຠິກ຺ຂເວ, ເອວໍ ສິກ຺ຂິຕພ຺ພໍ – ‘ອຘຸນາຄຕວຘຸກາສເມນ ເຈຕສາ ວິຫຣິສ຺ສາມາ’ຕິ. ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ຕຕິຍໍ.