໗. ອຣກ຺ຂິຕສຸຕ຺ຕໍ

໑໑໐. ອຖ ໂຂ ອນາຖປິຓ຺ຑິໂກ ຄຫປຕິ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອນາຖປິຓ຺ຑິກໍ ຄຫປຕິໍ ຠຄວາ ເອຕທໂວຈ – ‘‘ຈິຕ຺ເຕ, ຄຫປຕິ, ອຣກ຺ຂິເຕ ກາຍກມ຺ມມ຺ປິ ອຣກ຺ຂິຕໍ ໂຫຕິ, ວຈີກມ຺ມມ຺ປິ ອຣກ຺ຂິຕໍ ໂຫຕິ, ມໂນກມ຺ມມ຺ປິ ອຣກ຺ຂິຕໍ ໂຫຕິ. ຕສ຺ສ ອຣກ຺ຂິຕກາຍກມ຺ມນ຺ຕສ຺ສ ອຣກ຺ຂິຕວຈີກມ຺ມນ຺ຕສ຺ສ ອຣກ຺ຂິຕມໂນກມ຺ມນ຺ຕສ຺ສ ກາຍກມ຺ມມ຺ປິ ອວສ຺ສຸຕໍ ໂຫຕິ, ວຈີກມ຺ມມ຺ປິ ອວສ຺ສຸຕໍ ໂຫຕິ, ມໂນກມ຺ມມ຺ປິ ອວສ຺ສຸຕໍ ໂຫຕິ. ຕສ຺ສ ອວສ຺ສຸຕກາຍກມ຺ມນ຺ຕສ຺ສ ອວສ຺ສຸຕວຈີກມ຺ມນ຺ຕສ຺ສ ອວສ຺ສຸຕມໂນກມ຺ມນ຺ຕສ຺ສ ກາຍກມ຺ມມ຺ປິ ປູຕິກໍ ໂຫຕິ, ວຈີກມ຺ມມ຺ປິ ປູຕິກໍ ໂຫຕິ, ມໂນກມ຺ມມ຺ປິ ປູຕິກໍ ໂຫຕິ. ຕສ຺ສ ປູຕິກາຍກມ຺ມນ຺ຕສ຺ສ ປູຕິວຈີກມ຺ມນ຺ຕສ຺ສ ປູຕິມໂນກມ຺ມນ຺ຕສ຺ສ ນ ຠທ຺ທກໍ ມຣຓໍ ໂຫຕິ, ນ ຠທ຺ທິກາ ກາລງ຺ກິຣິຍາ.

‘‘ເສຍ຺ຍຖາປິ, ຄຫປຕິ, ກູຏາຄາເຣ ທຸຈ຺ຉນ຺ເນ ກູຏມ຺ປິ ອຣກ຺ຂິຕໍ ໂຫຕິ, ໂຄປານສິໂຍປິ ອຣກ຺ຂິຕາ ໂຫນ຺ຕິ, ຠິຕ຺ຕິປິ ອຣກ຺ຂິຕາ ໂຫຕິ; ກູຏມ຺ປິ ອວສ຺ສຸຕໍ ໂຫຕິ, ໂຄປານສິໂຍປິ ອວສ຺ສຸຕາ ໂຫນ຺ຕິ, ຠິຕ຺ຕິປິ ອວສ຺ສຸຕາ ໂຫຕິ; ກູຏມ຺ປິ ປູຕິກໍ ໂຫຕິ, ໂຄປານສິໂຍປິ ປູຕິກາ ໂຫນ຺ຕິ, ຠິຕ຺ຕິປິ ປູຕິກາ ໂຫຕິ.

‘‘ເອວເມວໍ ໂຂ, ຄຫປຕິ, ຈິຕ຺ເຕ ອຣກ຺ຂິເຕ ກາຍກມ຺ມມ຺ປິ ອຣກ຺ຂິຕໍ ໂຫຕິ, ວຈີກມ຺ມມ຺ປິ ອຣກ຺ຂິຕໍ ໂຫຕິ, ມໂນກມ຺ມມ຺ປິ ອຣກ຺ຂິຕໍ ໂຫຕິ. ຕສ຺ສ ອຣກ຺ຂິຕກາຍກມ຺ມນ຺ຕສ຺ສ ອຣກ຺ຂິຕວຈີກມ຺ມນ຺ຕສ຺ສ ອຣກ຺ຂິຕມໂນກມ຺ມນ຺ຕສ຺ສ ກາຍກມ຺ມມ຺ປິ ອວສ຺ສຸຕໍ ໂຫຕິ, ວຈີກມ຺ມມ຺ປິ ອວສ຺ສຸຕໍ ໂຫຕິ, ມໂນກມ຺ມມ຺ປິ ອວສ຺ສຸຕໍ ໂຫຕິ. ຕສ຺ສ ອວສ຺ສຸຕກາຍກມ຺ມນ຺ຕສ຺ສ ອວສ຺ສຸຕວຈີກມ຺ມນ຺ຕສ຺ສ ອວສ຺ສຸຕມໂນກມ຺ມນ຺ຕສ຺ສ ກາຍກມ຺ມມ຺ປິ ປູຕິກໍ ໂຫຕິ, ວຈີກມ຺ມມ຺ປິ ປູຕິກໍ ໂຫຕິ, ມໂນກມ຺ມມ຺ປິ ປູຕິກໍ ໂຫຕິ. ຕສ຺ສ ປູຕິກາຍກມ຺ມນ຺ຕສ຺ສ ປູຕິວຈີກມ຺ມນ຺ຕສ຺ສ ປູຕິມໂນກມ຺ມນ຺ຕສ຺ສ ນ ຠທ຺ທກໍ ມຣຓໍ ໂຫຕິ, ນ ຠທ຺ທິກາ ກາລງ຺ກິຣິຍາ.

‘‘ຈິຕ຺ເຕ, ຄຫປຕິ, ຣກ຺ຂິເຕ ກາຍກມ຺ມມ຺ປິ ຣກ຺ຂິຕໍ ໂຫຕິ, ວຈີກມ຺ມມ຺ປິ ຣກ຺ຂິຕໍ ໂຫຕິ, ມໂນກມ຺ມມ຺ປິ ຣກ຺ຂິຕໍ ໂຫຕິ. ຕສ຺ສ ຣກ຺ຂິຕກາຍກມ຺ມນ຺ຕສ຺ສ ຣກ຺ຂິຕວຈີກມ຺ມນ຺ຕສ຺ສ ຣກ຺ຂິຕມໂນກມ຺ມນ຺ຕສ຺ສ ກາຍກມ຺ມມ຺ປິ ອນວສ຺ສຸຕໍ ໂຫຕິ, ວຈີກມ຺ມມ຺ປິ ອນວສ຺ສຸຕໍ ໂຫຕິ, ມໂນກມ຺ມມ຺ປິ ອນວສ຺ສຸຕໍ ໂຫຕິ. ຕສ຺ສ ອນວສ຺ສຸຕກາຍກມ຺ມນ຺ຕສ຺ສ ອນວສ຺ສຸຕວຈີກມ຺ມນ຺ຕສ຺ສ ອນວສ຺ສຸຕມໂນກມ຺ມນ຺ຕສ຺ສ ກາຍກມ຺ມມ຺ປິ ອປູຕິກໍ ໂຫຕິ, ວຈີກມ຺ມມ຺ປິ ອປູຕິກໍ ໂຫຕິ, ມໂນກມ຺ມມ຺ປິ ອປູຕິກໍ ໂຫຕິ. ຕສ຺ສ ອປູຕິກາຍກມ຺ມນ຺ຕສ຺ສ ອປູຕິວຈີກມ຺ມນ຺ຕສ຺ສ ອປູຕິມໂນກມ຺ມນ຺ຕສ຺ສ ຠທ຺ທກໍ ມຣຓໍ ໂຫຕິ, ຠທ຺ທິກາ ກາລງ຺ກິຣິຍາ.

‘‘ເສຍ຺ຍຖາປິ, ຄຫປຕິ, ກູຏາຄາເຣ ສຸຈ຺ຉນ຺ເນ ກູຏມ຺ປິ ຣກ຺ຂິຕໍ ໂຫຕິ, ໂຄປານສິໂຍປິ ຣກ຺ຂິຕາ ໂຫນ຺ຕິ, ຠິຕ຺ຕິປິ ຣກ຺ຂິຕາ ໂຫຕິ; ກູຏມ຺ປິ ອນວສ຺ສຸຕໍ ໂຫຕິ, ໂຄປານສິໂຍປິ ອນວສ຺ສຸຕາ ໂຫນ຺ຕິ, ຠິຕ຺ຕິປິ ອນວສ຺ສຸຕາ ໂຫຕິ; ກູຏມ຺ປິ ອປູຕິກໍ ໂຫຕິ, ໂຄປານສິໂຍປິ ອປູຕິກາ ໂຫນ຺ຕິ, ຠິຕ຺ຕິປິ ອປູຕິກາ ໂຫຕິ.

ເອວເມວໍ ໂຂ, ຄຫປຕິ, ຈິຕ຺ເຕ ຣກ຺ຂິເຕ ກາຍກມ຺ມມ຺ປິ ຣກ຺ຂິຕໍ ໂຫຕິ, ວຈີກມ຺ມມ຺ປິ ຣກ຺ຂິຕໍ ໂຫຕິ, ມໂນກມ຺ມມ຺ປິ ຣກ຺ຂິຕໍ ໂຫຕິ. ຕສ຺ສ ຣກ຺ຂິຕກາຍກມ຺ມນ຺ຕສ຺ສ ຣກ຺ຂິຕວຈີກມ຺ມນ຺ຕສ຺ສ ຣກ຺ຂິຕມໂນກມ຺ມນ຺ຕສ຺ສ ກາຍກມ຺ມມ຺ປິ ອນວສ຺ສຸຕໍ ໂຫຕິ, ວຈີກມ຺ມມ຺ປິ ອນວສ຺ສຸຕໍ ໂຫຕິ, ມໂນກມ຺ມມ຺ປິ ອນວສ຺ສຸຕໍ ໂຫຕິ. ຕສ຺ສ ອນວສ຺ສຸຕກາຍກມ຺ມນ຺ຕສ຺ສ ອນວສ຺ສຸຕວຈີກມ຺ມນ຺ຕສ຺ສ ອນວສ຺ສຸຕມໂນກມ຺ມນ຺ຕສ຺ສ ກາຍກມ຺ມມ຺ປິ ອປູຕິກໍ ໂຫຕິ, ວຈີກມ຺ມມ຺ປິ ອປູຕິກໍ ໂຫຕິ, ມໂນກມ຺ມມ຺ປິ ອປູຕິກໍ ໂຫຕິ. ຕສ຺ສ ອປູຕິກາຍກມ຺ມນ຺ຕສ຺ສ ອປູຕິວຈີກມ຺ມນ຺ຕສ຺ສ ອປູຕິມໂນກມ຺ມນ຺ຕສ຺ສ ຠທ຺ທກໍ ມຣຓໍ ໂຫຕິ, ຠທ຺ທິກາ ກາລງ຺ກິຣິຍາ’’ຕິ. ສຕ຺ຕມໍ.