໘. ພ຺ຍາປນ຺ນສຸຕ຺ຕໍ

໑໑໑. ເອກມນ຺ຕໍ ນິສິນ຺ນໍ ໂຂ ອນາຖປິຓ຺ຑິກໍ ຄຫປຕິໍ ຠຄວາ ເອຕທໂວຈ – ‘‘ຈິຕ຺ເຕ, ຄຫປຕິ, ພ຺ຍາປນ຺ເນ ກາຍກມ຺ມມ຺ປິ ພ຺ຍາປນ຺ນໍ ໂຫຕິ, ວຈີກມ຺ມມ຺ປິ ພ຺ຍາປນ຺ນໍ ໂຫຕິ, ມໂນກມ຺ມມ຺ປິ ພ຺ຍາປນ຺ນໍ ໂຫຕິ. ຕສ຺ສ ພ຺ຍາປນ຺ນກາຍກມ຺ມນ຺ຕສ຺ສ ພ຺ຍາປນ຺ນວຈີກມ຺ມນ຺ຕສ຺ສ ພ຺ຍາປນ຺ນມໂນກມ຺ມນ຺ຕສ຺ສ ນ ຠທ຺ທກໍ ມຣຓໍ ໂຫຕິ, ນ ຠທ຺ທິກາ ກາລງ຺ກິຣິຍາ. ເສຍ຺ຍຖາປິ, ຄຫປຕິ, ກູຏາຄາເຣ ທຸຈ຺ຉນ຺ເນ ກູຏມ຺ປິ ພ຺ຍາປນ຺ນໍ ໂຫຕິ, ໂຄປານສິໂຍປິ ພ຺ຍາປນ຺ນາ ໂຫນ຺ຕິ, ຠິຕ຺ຕິປິ ພ຺ຍາປນ຺ນາ ໂຫຕິ; ເອວເມວໍ ໂຂ, ຄຫປຕິ, ຈິຕ຺ເຕ ພ຺ຍາປນ຺ເນ ກາຍກມ຺ມມ຺ປິ ພ຺ຍາປນ຺ນໍ ໂຫຕິ, ວຈີກມ຺ມມ຺ປິ ພ຺ຍາປນ຺ນໍ ໂຫຕິ, ມໂນກມ຺ມມ຺ປິ ພ຺ຍາປນ຺ນໍ ໂຫຕິ. ຕສ຺ສ ພ຺ຍາປນ຺ນກາຍກມ຺ມນ຺ຕສ຺ສ ພ຺ຍາປນ຺ນວຈີກມ຺ມນ຺ຕສ຺ສ ພ຺ຍາປນ຺ນມໂນກມ຺ມນ຺ຕສ຺ສ ນ ຠທ຺ທກໍ ມຣຓໍ ໂຫຕິ, ນ ຠທ຺ທິກາ ກາລງ຺ກິຣິຍາ.

‘‘ຈິຕ຺ເຕ, ຄຫປຕິ, ອພ຺ຍາປນ຺ເນ ກາຍກມ຺ມມ຺ປິ ອພ຺ຍາປນ຺ນໍ ໂຫຕິ, ວຈີກມ຺ມມ຺ປິ ອພ຺ຍາປນ຺ນໍ ໂຫຕິ, ມໂນກມ຺ມມ຺ປິ ອພ຺ຍາປນ຺ນໍ ໂຫຕິ. ຕສ຺ສ ອພ຺ຍາປນ຺ນກາຍກມ຺ມນ຺ຕສ຺ສ ອພ຺ຍາປນ຺ນວຈີກມ຺ມນ຺ຕສ຺ສ ອພ຺ຍາປນ຺ນມໂນກມ຺ມນ຺ຕສ຺ສ ຠທ຺ທກໍ ມຣຓໍ ໂຫຕິ, ຠທ຺ທິກາ ກາລງ຺ກິຣິຍາ. ເສຍ຺ຍຖາປິ, ຄຫປຕິ, ກູຏາຄາເຣ ສຸຈ຺ຉນ຺ເນ ກູຏມ຺ປິ ອພ຺ຍາປນ຺ນໍ ໂຫຕິ, ໂຄປານສິໂຍປິ ອພ຺ຍາປນ຺ນາ ໂຫນ຺ຕິ, ຠິຕ຺ຕິປິ ອພ຺ຍາປນ຺ນາ ໂຫຕິ; ເອວເມວໍ ໂຂ, ຄຫປຕິ, ຈິຕ຺ເຕ ອພ຺ຍາປນ຺ເນ ກາຍກມ຺ມມ຺ປິ ອພ຺ຍາປນ຺ນໍ ໂຫຕິ, ວຈີກມ຺ມມ຺ປິ ອພ຺ຍາປນ຺ນໍ ໂຫຕິ, ມໂນກມ຺ມມ຺ປິ ອພ຺ຍາປນ຺ນໍ ໂຫຕິ. ຕສ຺ສ ອພ຺ຍາປນ຺ນກາຍກມ຺ມນ຺ຕສ຺ສ…ເປ… ອພ຺ຍາປນ຺ນມໂນກມ຺ມນ຺ຕສ຺ສ ຠທ຺ທກໍ ມຣຓໍ ໂຫຕິ, ຠທ຺ທິກາ ກາລງ຺ກິຣິຍາ’’ຕິ. ອຏ຺ຐມໍ.