໓. ເຂຕ຺ຕສຸຕ຺ຕໍ

໘໔. ‘‘ຕີຓິມານິ, ຠິກ຺ຂເວ, ກສ຺ສກສ຺ສ ຄຫປຕິສ຺ສ ປຸພ຺ເພ ກຣຓີຍານິ. ກຕມານິ ຕີຓິ? ອິຘ, ຠິກ຺ຂເວ, ກສ຺ສໂກ ຄຫປຕິ ປຏິກຈ຺ເຈວ [ປຏິຄຈ຺ເຈວ (ສີ. ປີ.)] ເຂຕ຺ຕໍ ສຸກຏ຺ຐໍ ກໂຣຕິ ສຸມຕິກຕໍ [ສຸມຕ຺ຕິກຕໍ (ກ.), ເອຕ຺ຖ ມຕິສທ຺ໂທ ກຏ຺ຐເຂຕ຺ຕສ຺ສ ສມີກຣຓສາຘເນ ທາຣຸຠຓ຺ເຑ ວຕ຺ຕຕີຕິ ສກ຺ກຕອຠິຘາເນສຸ ອາຄຕໍ. ຕໍ ‘‘ມຕິຍາ ສຸຏ຺ຐຸ ສມີກຕ’’ນ຺ຕິ ອຏ຺ຐກຖາຍ ສເມຕິ]. ປຏິກຈ຺ເຈວ ເຂຕ຺ຕໍ ສຸກຏ຺ຐໍ ກຣິຕ຺ວາ ສຸມຕິກຕໍ ກາເລນ ພີຊານິ ປຕິຏ຺ຐາເປຕິ. ກາເລນ ພີຊານິ ປຕິຏ຺ຐາເປຕ຺ວາ ສມເຍນ ອຸທກໍ ອຠິເນຕິປິ ອປເນຕິປິ. ອິມານິ ໂຂ, ຠິກ຺ຂເວ, ຕີຓິ ກສ຺ສກສ຺ສ ຄຫປຕິສ຺ສ ປຸພ຺ເພ ກຣຓີຍານິ.

‘‘ເອວເມວໍ ໂຂ, ຠິກ຺ຂເວ, ຕີຓິມານິ ຠິກ຺ຂຸສ຺ສ ປຸພ຺ເພ ກຣຓີຍານິ. ກຕມານິ ຕີຓິ? ອຘິສີລສິກ຺ຂາສມາທານໍ, ອຘິຈິຕ຺ຕສິກ຺ຂາສມາທານໍ, ອຘິປຎ຺ຎາສິກ຺ຂາສມາທານໍ – ອິມານິ ໂຂ, ຠິກ຺ຂເວ, ຕີຓິ ຠິກ຺ຂຸສ຺ສ ປຸພ຺ເພ ກຣຓີຍານິ.

‘‘ຕສ຺ມາຕິຫ, ຠິກ຺ຂເວ, ເອວໍ ສິກ຺ຂິຕພ຺ພໍ – ‘ຕິພ຺ໂພ ໂນ ຉນ຺ໂທ ຠວິສ຺ສຕິ ອຘິສີລສິກ຺ຂາສມາທາເນ, ຕິພ຺ໂພ ໂນ ຉນ຺ໂທ ຠວິສ຺ສຕິ ອຘິຈິຕ຺ຕສິກ຺ຂາສມາທາເນ, ຕິພ຺ໂພ ໂນ ຉນ຺ໂທ ຠວິສ຺ສຕິ ອຘິປຎ຺ຎາສິກ຺ຂາສມາທາເນ’ຕິ. ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ຕຕິຍໍ.