໔. ວຊ຺ຊິປຸຕ຺ຕສຸຕ຺ຕໍ

໘໕. ເອກໍ ສມຍໍ ຠຄວາ ເວສາລິຍໍ ວິຫຣຕິ ມຫາວເນ ກູຏາຄາຣສາລາຍໍ. ອຖ ໂຂ ອຎ຺ຎຕໂຣ ວຊ຺ຊິປຸຕ຺ຕໂກ ຠິກ຺ຂຸ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ໂສ ວຊ຺ຊິປຸຕ຺ຕໂກ ຠິກ຺ຂຸ ຠຄວນ຺ຕໍ ເອຕທໂວຈ – ‘‘ສາຘິກມິທໍ, ຠນ຺ເຕ, ທິຍຑ຺ຒສິກ຺ຂາປທສຕໍ [ທິຍຑ຺ຒໍ ສິກ຺ຂາປທສຕໍ (ສີ.)] ອນ຺ວທ຺ຘມາສໍ ອຸທ຺ເທສໍ ອາຄຈ຺ຉຕິ. ນາຫໍ, ຠນ຺ເຕ, ເອຕ຺ຖ ສກ຺ໂກມິ ສິກ຺ຂິຕຸ’’ນ຺ຕິ. ‘‘ສກ຺ຂິສ຺ສສິ ປນ ຕ຺ວໍ, ຠິກ຺ຂຸ, ຕີສຸ ສິກ຺ຂາສຸ ສິກ຺ຂິຕຸໍ – ອຘິສີລສິກ຺ຂາຍ, ອຘິຈິຕ຺ຕສິກ຺ຂາຍ ອຘິປຎ຺ຎາສິກ຺ຂາຍາ’’ຕິ? ‘‘ສກ຺ໂກມຫໍ, ຠນ຺ເຕ, ຕີສຸ ສິກ຺ຂາສຸ ສິກ຺ຂິຕຸໍ – ອຘິສີລສິກ຺ຂາຍ, ອຘິຈິຕ຺ຕສິກ຺ຂາຍ, ອຘິປຎ຺ຎາສິກ຺ຂາຍາ’’ຕິ. ‘‘ຕສ຺ມາຕິຫ ຕ຺ວໍ, ຠິກ຺ຂຸ, ຕີສຸ ສິກ຺ຂາສຸ ສິກ຺ຂສ຺ສຸ – ອຘິສີລສິກ຺ຂາຍ, ອຘິຈິຕ຺ຕສິກ຺ຂາຍ, ອຘິປຎ຺ຎາສິກ຺ຂາຍ’’.

‘‘ຍໂຕ ໂຂ ຕ຺ວໍ, ຠິກ຺ຂຸ, ອຘິສີລມ຺ປິ ສິກ຺ຂິສ຺ສສິ, ອຘິຈິຕ຺ຕມ຺ປິ ສິກ຺ຂິສ຺ສສິ, ອຘິປຎ຺ຎມ຺ປິ ສິກ຺ຂິສ຺ສສິ, ຕສ຺ສ ຕຸຍ຺ຫໍ ຠິກ຺ຂຸ ອຘິສີລມ຺ປິ ສິກ຺ຂໂຕ ອຘິຈິຕ຺ຕມ຺ປິ ສິກ຺ຂໂຕ ອຘິປຎ຺ຎມ຺ປິ ສິກ຺ຂໂຕ ຣາໂຄ ປຫີຍິສ຺ສຕິ, ໂທໂສ ປຫີຍິສ຺ສຕິ, ໂມໂຫ ປຫີຍິສ຺ສຕິ. ໂສ ຕ຺ວໍ ຣາຄສ຺ສ ປຫານາ ໂທສສ຺ສ ປຫານາ ໂມຫສ຺ສ ປຫານາ ຍໍ ອກຸສລໍ ນ ຕໍ ກຣິສ຺ສສິ, ຍໍ ປາປໍ ນ ຕໍ ເສວິສ຺ສສີ’’ຕິ.

ອຖ ໂຂ ໂສ ຠິກ຺ຂຸ ອປເຣນ ສມເຍນ ອຘິສີລມ຺ປິ ສິກ຺ຂິ, ອຘິຈິຕ຺ຕມ຺ປິ ສິກ຺ຂິ, ອຘິປຎ຺ຎມ຺ປິ ສິກ຺ຂິ. ຕສ຺ສ ອຘິສີລມ຺ປິ ສິກ຺ຂໂຕ ອຘິຈິຕ຺ຕມ຺ປິ ສິກ຺ຂໂຕ ອຘິປຎ຺ຎມ຺ປິ ສິກ຺ຂໂຕ ຣາໂຄ ປຫີຍິ, ໂທໂສ ປຫີຍິ, ໂມໂຫ ປຫີຍິ. ໂສ ຣາຄສ຺ສ ປຫານາ ໂທສສ຺ສ ປຫານາ ໂມຫສ຺ສ ປຫານາ ຍໍ ອກຸສລໍ ຕໍ ນາກາສິ, ຍໍ ປາປໍ ຕໍ ນ ເສວີຕິ. ຈຕຸຕ຺ຖໍ.