໒. ຄທ຺ຣຠສຸຕ຺ຕໍ

໘໓. ‘‘ເສຍ຺ຍຖາປິ, ຠິກ຺ຂເວ, ຄທ຺ຣໂຠ ໂຄຄຓໍ ປິຏ຺ຐິໂຕ ປິຏ຺ຐິໂຕ ອນຸພນ຺ໂຘ ໂຫຕິ – ‘ອຫມ຺ປິ ທມ຺ໂມ, ອຫມ຺ປິ ທມ຺ໂມ’ຕິ [ອຫມ຺ປິ ໂຄ ອມ຺ຫາ ອຫມ຺ປິ ໂຄ ອມ຺ຫາຕິ (ສີ.), ອຫມ຺ປິ ອມ຺ຫາ ອຫມ຺ປິ ອມ຺ຫາຕິ (ສ຺ຍາ. ກໍ. ປີ.), ອຫມ຺ປິ ໂຄ ອຫມ຺ປິ ໂຄຕິ (?)]. ຕສ຺ສ ນ ຕາທິໂສ ວຓ຺ໂຓ ໂຫຕິ ເສຍ຺ຍຖາປິ ຄຸນ຺ນໍ, ນ ຕາທິໂສ ສໂຣ ໂຫຕິ ເສຍ຺ຍຖາປິ ຄຸນ຺ນໍ, ນ ຕາທິສໍ ປທໍ ໂຫຕິ ເສຍ຺ຍຖາປິ ຄຸນ຺ນໍ. ໂສ ໂຄຄຓໍເຍວ ປິຏ຺ຐິໂຕ ປິຏ຺ຐິໂຕ ອນຸພນ຺ໂຘ ໂຫຕິ – ‘ອຫມ຺ປິ ທມ຺ໂມ, ອຫມ຺ປິ ທມ຺ໂມ’’’ຕິ.

‘‘ເອວເມວໍ ໂຂ, ຠິກ຺ຂເວ, ອິເຘກຈ຺ໂຈ ຠິກ຺ຂຸ ຠິກ຺ຂຸສງ຺ຆໍ ປິຏ຺ຐິໂຕ ປິຏ຺ຐິໂຕ ອນຸພນ຺ໂຘ ໂຫຕິ – ‘ອຫມ຺ປິ ຠິກ຺ຂຸ, ອຫມ຺ປິ ຠິກ຺ຂູ’ຕິ. ຕສ຺ສ ນ ຕາທິໂສ ຉນ຺ໂທ ໂຫຕິ ອຘິສີລສິກ຺ຂາສມາທາເນ ເສຍ຺ຍຖາປິ ອຎ຺ເຎສໍ ຠິກ຺ຂູນໍ, ນ ຕາທິໂສ ຉນ຺ໂທ ໂຫຕິ ອຘິຈິຕ຺ຕສິກ຺ຂາສມາທາເນ ເສຍ຺ຍຖາປິ ອຎ຺ເຎສໍ ຠິກ຺ຂູນໍ, ນ ຕາທິໂສ ຉນ຺ໂທ ໂຫຕິ ອຘິປຎ຺ຎາສິກ຺ຂາສມາທາເນ ເສຍ຺ຍຖາປິ ອຎ຺ເຎສໍ ຠິກ຺ຂູນໍ. ໂສ ຠິກ຺ຂຸສງ຺ຆໍເຍວ ປິຏ຺ຐິໂຕ ປິຏ຺ຐິໂຕ ອນຸພນ຺ໂຘ ໂຫຕິ – ‘ອຫມ຺ປິ ຠິກ຺ຂຸ, ອຫມ຺ປິ ຠິກ຺ຂູ’’’ຕິ.

‘‘ຕສ຺ມາຕິຫ, ຠິກ຺ຂເວ, ເອວໍ ສິກ຺ຂິຕພ຺ພໍ – ‘ຕິພ຺ໂພ ໂນ ຉນ຺ໂທ ຠວິສ຺ສຕິ ອຘິສີລສິກ຺ຂາສມາທາເນ, ຕິພ຺ໂພ ໂນ ຉນ຺ໂທ ຠວິສ຺ສຕິ ອຘິຈິຕ຺ຕສິກ຺ຂາສມາທາເນ, ຕິພ຺ໂພ ໂນ ຉນ຺ໂທ ຠວິສ຺ສຕິ ອຘິປຎ຺ຎາສິກ຺ຂາສມາທາເນ’ຕິ. ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ທຸຕິຍໍ.