໑໐. ທຸຕິຍສິກ຺ຂຕ຺ຕຍສຸຕ຺ຕໍ

໙໑. ‘‘ຕິສ຺ໂສ ອິມາ, ຠິກ຺ຂເວ, ສິກ຺ຂາ. ກຕມາ ຕິສ຺ໂສ? ອຘິສີລສິກ຺ຂາ, ອຘິຈິຕ຺ຕສິກ຺ຂາ, ອຘິປຎ຺ຎາສິກ຺ຂາ.

‘‘ກຕມາ ຈ, ຠິກ຺ຂເວ, ອຘິສີລສິກ຺ຂາ? ອິຘ, ຠິກ຺ຂເວ, ຠິກ຺ຂຸ ສີລວາ ໂຫຕິ…ເປ… ສມາທາຍ ສິກ຺ຂຕິ ສິກ຺ຂາປເທສຸ. ອຍໍ ວຸຈ຺ຈຕິ, ຠິກ຺ຂເວ, ອຘິສີລສິກ຺ຂາ.

‘‘ກຕມາ ຈ, ຠິກ຺ຂເວ, ອຘິຈິຕ຺ຕສິກ຺ຂາ? ອິຘ, ຠິກ຺ຂເວ, ຠິກ຺ຂຸ ວິວິຈ຺ເຈວ ກາເມຫິ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ. ອຍໍ ວຸຈ຺ຈຕິ, ຠິກ຺ຂເວ, ອຘິຈິຕ຺ຕສິກ຺ຂາ.

‘‘ກຕມາ ຈ, ຠິກ຺ຂເວ, ອຘິປຎ຺ຎາສິກ຺ຂາ? ອິຘ, ຠິກ຺ຂເວ, ຠິກ຺ຂຸ ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕິ. ອຍໍ ວຸຈ຺ຈຕິ, ຠິກ຺ຂເວ, ອຘິປຎ຺ຎາ ສິກ຺ຂາ. ອິມາ ໂຂ, ຠິກ຺ຂເວ, ຕິສ຺ໂສ ສິກ຺ຂາ’’ຕິ.

‘‘ອຘິສີລໍ ອຘິຈິຕ຺ຕໍ, ອຘິປຎ຺ຎຎ຺ຈ ວີຣິຍວາ;

ຖາມວາ ຘິຕິມາ ຌາຍີ, ສໂຕ ຄຸຕ຺ຕິນ຺ທ຺ຣິໂຍ [ອຸປ຺ປຕ຺ຕິນ຺ທ຺ຣິໂຍ (ກ.)] ຈເຣ.

‘‘ຍຖາ ປຸເຣ ຕຖາ ປຈ຺ຉາ, ຍຖາ ປຈ຺ຉາ ຕຖາ ປຸເຣ;

ຍຖາ ອໂຘ ຕຖາ ອຸທ຺ຘໍ, ຍຖາ ອຸທ຺ຘໍ ຕຖາ ອໂຘ.

‘‘ຍຖາ ທິວາ ຕຖາ ຣຕ຺ຕິໍ, ຍຖາ ຣຕ຺ຕິໍ ຕຖາ ທິວາ;

ອຠິຠຸຍ຺ຍ ທິສາ ສພ຺ພາ, ອປ຺ປມາຓສມາຘິນາ.

‘‘ຕມາຫຸ ເສຂໍ ປຏິປທໍ [ປາຏິປທໍ (?) ມ. ນິ. ໒.໒໗ ປສ຺ສິຕພ຺ພໍ], ອໂຖ ສໍສຸທ຺ຘຈາຣິຍໍ [ສໍສຸທ຺ຘຈາຣຓໍ (ສີ. ປີ.), ສໍສຸທ຺ຘຈາຣິນໍ (ສ຺ຍາ. ກໍ.)];

ຕມາຫຸ ໂລເກ ສມ຺ພຸທ຺ຘໍ, ຘີຣໍ ປຏິປທນ຺ຕຄຸໍ.

‘‘ວິຎ຺ຎາຓສ຺ສ ນິໂຣເຘນ, ຕຓ຺ຫາກ຺ຂຍວິມຸຕ຺ຕິໂນ;

ປຊ຺ໂຊຕສ຺ເສວ ນິພ຺ພານໍ, ວິໂມກ຺ໂຂ ໂຫຕິ ເຈຕໂສ’’ຕິ. ທສມໍ;