໕. ເກສມຸຕ຺ຕິສຸຕ຺ຕໍ

໖໖. ເອວໍ ເມ ສຸຕໍ – ເອກໍ ສມຍໍ ຠຄວາ ໂກສເລສຸ ຈາຣິກໍ ຈຣມາໂນ ມຫຕາ ຠິກ຺ຂຸສງ຺ເຆນ ສທ຺ຘິໍ ເຍນ ເກສມຸຕ຺ຕໍ [ເກສປຸຕ຺ຕໍ (ສີ. ສ຺ຍາ. ກໍ. ປີ.)] ນາມ ກາລາມານໍ ນິຄໂມ ຕທວສຣິ. ອສ຺ໂສສຸໍ ໂຂ ເກສມຸຕ຺ຕິຍາ ກາລາມາ – ‘‘ສມໂຓ ຂລຸ, ໂຠ, ໂຄຕໂມ ສກ຺ຍປຸຕ຺ໂຕ ສກ຺ຍກຸລາ ປພ຺ພຊິໂຕ ເກສມຸຕ຺ຕໍ ອນຸປ຺ປຕ຺ໂຕ. ຕໍ ໂຂ ປນ ຠວນ຺ຕໍ ໂຄຕມໍ ເອວໍ ກລ຺ຍາໂຓ ກິຕ຺ຕິສທ຺ໂທ ອພ຺ຠຸຄ຺ຄໂຕ – ‘ອິຕິປິ ໂສ ຠຄວາ…ເປ… ສາຘຸ ໂຂ ປນ ຕຖາຣູປານໍ ອຣຫຕໍ ທສ຺ສນໍ ໂຫຕີ’’’ຕິ.

ອຖ ໂຂ ເກສມຸຕ຺ຕິຍາ ກາລາມາ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ອປ຺ເປກຈ຺ເຈ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິໍສຸ, ອປ຺ເປກຈ຺ເຈ ຠຄວຕາ ສທ຺ຘິໍ ສມ຺ໂມທິໍສຸ, ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິໍສຸ, ອປ຺ເປກຈ຺ເຈ ເຍນ ຠຄວາ ເຕນຎ຺ຊລິໍ ປຓາເມຕ຺ວາ ເອກມນ຺ຕໍ ນິສີທິໍສຸ, ອປ຺ເປກຈ຺ເຈ ນາມໂຄຕ຺ຕໍ ສາເວຕ຺ວາ ເອກມນ຺ຕໍ ນິສີທິໍສຸ, ອປ຺ເປກຈ຺ເຈ ຕຸຓ຺ຫີຠູຕາ ເອກມນ຺ຕໍ ນິສີທິໍສຸ. ເອກມນ຺ຕໍ ນິສິນ຺ນາ ໂຂ ເຕ ເກສມຸຕ຺ຕິຍາ ກາລາມາ ຠຄວນ຺ຕໍ ເອຕທໂວຈຸໍ –

‘‘ສນ຺ຕິ, ຠນ຺ເຕ, ເອເກ ສມຓພ຺ຣາຫ຺ມຓາ ເກສມຸຕ຺ຕໍ ອາຄຈ຺ຉນ຺ຕິ. ເຕ ສກໍເຍວ ວາທໍ ທີເປນ຺ຕິ ໂຊເຕນ຺ຕິ, ປຣປ຺ປວາທໍ ປນ ຂຸໍເສນ຺ຕິ ວມ຺ເຠນ຺ຕິ ປຣິຠວນ຺ຕິ ໂອມກ຺ຂິໍ [ໂອປປກ຺ຂິໍ (ສີ. ສ຺ຍາ. ກໍ. ປີ.), ໂອມກ຺ຂິກໍ (ກ.)] ກໂຣນ຺ຕິ. ອປເຣປິ, ຠນ຺ເຕ, ເອເກ ສມຓພ຺ຣາຫ຺ມຓາ ເກສມຸຕ຺ຕໍ ອາຄຈ຺ຉນ຺ຕິ. ເຕປິ ສກໍເຍວ ວາທໍ ທີເປນ຺ຕິ ໂຊເຕນ຺ຕິ, ປຣປ຺ປວາທໍ ປນ ຂຸໍເສນ຺ຕິ ວມ຺ເຠນ຺ຕິ ປຣິຠວນ຺ຕິ ໂອມກ຺ຂິໍ ກໂຣນ຺ຕິ. ເຕສໍ ໂນ, ຠນ຺ເຕ, ອມ຺ຫາກໍ ໂຫເຕວ ກງ຺ຂາ ໂຫຕິ ວິຈິກິຈ຺ຉາ – ‘ໂກ ສຸ ນາມ ອິເມສໍ ຠວຕໍ ສມຓພ຺ຣາຫ຺ມຓານໍ ສຈ຺ຈໍ ອາຫ, ໂກ ມຸສາ’’’ຕິ? ‘‘ອລຎ຺ຫິ ໂວ, ກາລາມາ, ກງ຺ຂິຕຸໍ ອລໍ ວິຈິກິຈ຺ຉິຕຸໍ. ກງ຺ຂນີເຍວ ປນ [ກງ຺ຂນີເຍວ ຈ ປນ (ສໍຍຸຕ຺ຕນິກາເຍ)] ໂວ ຐາເນ ວິຈິກິຈ຺ຉາ ອຸປ຺ປນ຺ນາ’’.

‘‘ເອຖ ຕຸມ຺ເຫ, ກາລາມາ, ມາ ອນຸສ຺ສເວນ, ມາ ປຣມ຺ປຣາຍ, ມາ ອິຕິກິຣາຍ, ມາ ປິຏກສມ຺ປທາເນນ, ມາ ຕກ຺ກເຫຕຸ, ມາ ນຍເຫຕຸ, ມາ ອາກາຣປຣິວິຕກ຺ເກນ, ມາ ທິຏ຺ຐິນິຊ຺ຌານກ຺ຂນ຺ຕິຍາ, ມາ ຠພ຺ພຣູປຕາຍ, ມາ ສມໂຓ ໂນ ຄຣູຕິ. ຍທາ ຕຸມ຺ເຫ, ກາລາມາ, ອຕ຺ຕນາວ ຊາເນຍ຺ຍາຖ – ‘ອິເມ ຘມ຺ມາ ອກຸສລາ, ອິເມ ຘມ຺ມາ ສາວຊ຺ຊາ, ອິເມ ຘມ຺ມາ ວິຎ຺ຎຸຄຣຫິຕາ, ອິເມ ຘມ຺ມາ ສມຕ຺ຕາ ສມາທິນ຺ນາ [ສມາທິຓ຺ຓາ (ກ.)] ອຫິຕາຍ ທຸກ຺ຂາຍ ສໍວຕ຺ຕນ຺ຕີ’’’ຕິ, ອຖ ຕຸມ຺ເຫ, ກາລາມາ, ປຊເຫຍ຺ຍາຖ.

‘‘ຕໍ ກິໍ ມຎ຺ຎຖ, ກາລາມາ, ໂລໂຠ ປຸຣິສສ຺ສ ອຊ຺ຌຕ຺ຕໍ ອຸປ຺ປຊ຺ຊມາໂນ ອຸປ຺ປຊ຺ຊຕິ ຫິຕາຍ ວາ ອຫິຕາຍ ວາ’’ຕິ?

‘‘ອຫິຕາຍ, ຠນ຺ເຕ’’.

‘‘ລຸທ຺ໂຘ ປນາຍໍ, ກາລາມາ, ປຸຣິສປຸຄ຺ຄໂລ ໂລເຠນ ອຠິຠູໂຕ ປຣິຍາທິນ຺ນຈິຕ຺ໂຕ ປາຓມ຺ປິ ຫນຕິ, ອທິນ຺ນມ຺ປິ ອາທິຍຕິ, ປຣທາຣມ຺ປິ ຄຈ຺ຉຕິ, ມຸສາປິ ຠຓຕິ, ປຣມ຺ປິ ຕຖຕ຺ຕາຍ [ຕທຕ຺ຖາຍ (ກ.)] ສມາທເປຕິ, ຍໍ ສ [ຍໍ ຕສ຺ສ (ກ.) ອນນ຺ຕຣສຸຕ຺ເຕ ປນ ‘‘ຍໍ’ ສ’’ ອິຕ຺ເວວ ສພ຺ພຕ຺ຖປິ ທິສ຺ສຕິ] ໂຫຕິ ທີຆຣຕ຺ຕໍ ອຫິຕາຍ ທຸກ຺ຂາຍາ’’ຕິ.

‘‘ເອວໍ, ຠນ຺ເຕ’’.

‘‘ຕໍ ກິໍ ມຎ຺ຎຖ, ກາລາມາ, ໂທໂສ ປຸຣິສສ຺ສ ອຊ຺ຌຕ຺ຕໍ ອຸປ຺ປຊ຺ຊມາໂນ ອຸປ຺ປຊ຺ຊຕິ ຫິຕາຍ ວາ ອຫິຕາຍ ວາ’’ຕິ?

‘‘ອຫິຕາຍ, ຠນ຺ເຕ’’.

‘‘ທຸຏ຺ໂຐ ປນາຍໍ, ກາລາມາ, ປຸຣິສປຸຄ຺ຄໂລ ໂທເສນ ອຠິຠູໂຕ ປຣິຍາທິນ຺ນຈິຕ຺ໂຕ ປາຓມ຺ປິ ຫນຕິ [ຫນ຺ຕິ (ສີ. ປີ.)], ອທິນ຺ນມ຺ປິ ອາທິຍຕິ, ປຣທາຣມ຺ປິ ຄຈ຺ຉຕິ, ມຸສາປິ ຠຓຕິ, ປຣມ຺ປິ ຕຖຕ຺ຕາຍ ສມາທເປຕິ, ຍໍ ສ ໂຫຕິ ທີຆຣຕ຺ຕໍ ອຫິຕາຍ ທຸກ຺ຂາຍາ’’ຕິ.

‘‘ເອວໍ, ຠນ຺ເຕ’’.

‘‘ຕໍ ກິໍ ມຎ຺ຎຖ, ກາລາມາ, ໂມໂຫ ປຸຣິສສ຺ສ ອຊ຺ຌຕ຺ຕໍ ອຸປ຺ປຊ຺ຊມາໂນ ອຸປ຺ປຊ຺ຊຕິ ຫິຕາຍ ວາ ອຫິຕາຍ ວາ’’ຕິ?

‘‘ອຫິຕາຍ, ຠນ຺ເຕ’’.

‘‘ມູຬ຺ໂຫ ປນາຍໍ, ກາລາມາ, ປຸຣິສປຸຄ຺ຄໂລ ໂມເຫນ ອຠິຠູໂຕ ປຣິຍາທິນ຺ນຈິຕ຺ໂຕ ປາຓມ຺ປິ ຫນຕິ, ອທິນ຺ນມ຺ປິ ອາທິຍຕິ, ປຣທາຣມ຺ປິ ຄຈ຺ຉຕິ, ມຸສາປິ ຠຓຕິ, ປຣມ຺ປິ ຕຖຕ຺ຕາຍ ສມາທເປຕິ, ຍໍ ສ ໂຫຕິ ທີຆຣຕ຺ຕໍ ອຫິຕາຍ ທຸກ຺ຂາຍາ’’ຕິ.

‘‘ເອວໍ, ຠນ຺ເຕ’’.

‘‘ຕໍ ກິໍ ມຎ຺ຎຖ, ກາລາມາ, ອິເມ ຘມ຺ມາ ກຸສລາ ວາ ອກຸສລາ ວາ’’ຕິ?

‘‘ອກຸສລາ, ຠນ຺ເຕ’’.

‘‘ສາວຊ຺ຊາ ວາ ອນວຊ຺ຊາ ວາ’’ຕິ?

‘‘ສາວຊ຺ຊາ, ຠນ຺ເຕ’’.

‘‘ວິຎ຺ຎຸຄຣຫິຕາ ວາ ວິຎ຺ຎຸປ຺ປສຕ຺ຖາ ວາ’’ຕິ?

‘‘ວິຎ຺ຎຸຄຣຫິຕາ, ຠນ຺ເຕ’’.

‘‘ສມຕ຺ຕາ ສມາທິນ຺ນາ ອຫິຕາຍ ທຸກ຺ຂາຍ ສໍວຕ຺ຕນ຺ຕິ, ໂນ ວາ? ກຖໍ ວາ [ກຖໍ ວາ ໂວ (?)] ເອຕ຺ຖ ໂຫຕີ’’ຕິ?

‘‘ສມຕ຺ຕາ, ຠນ຺ເຕ, ສມາທິນ຺ນາ ອຫິຕາຍ ທຸກ຺ຂາຍ ສໍວຕ຺ຕນ຺ຕີຕິ. ເອວໍ ໂນ ເອຕ຺ຖ ໂຫຕີ’’ຕິ.

‘‘ອິຕິ ໂຂ, ກາລາມາ, ຍໍ ຕໍ ອໂວຈຸມ຺ຫາ [ອໂວຈຸມ຺ຫ (ສີ. ສ຺ຍາ. ກໍ. ປີ.) ອ. ນິ. ໔.໑໙໓] – ‘ເອຖ ຕຸມ຺ເຫ, ກາລາມາ! ມາ ອນຸສ຺ສເວນ, ມາ ປຣມ຺ປຣາຍ, ມາ ອິຕິກິຣາຍ, ມາ ປິຏກສມ຺ປທາເນນ, ມາ ຕກ຺ກເຫຕຸ, ມາ ນຍເຫຕຸ, ມາ ອາກາຣປຣິວິຕກ຺ເກນ, ມາ ທິຏ຺ຐິນິຊ຺ຌານກ຺ຂນ຺ຕິຍາ, ມາ ຠພ຺ພຣູປຕາຍ, ມາ ສມໂຓ ໂນ ຄຣູຕິ. ຍທາ ຕຸມ຺ເຫ ກາລາມາ ອຕ຺ຕນາວ ຊາເນຍ຺ຍາຖ – ‘ອິເມ ຘມ຺ມາ ອກຸສລາ, ອິເມ ຘມ຺ມາ ສາວຊ຺ຊາ, ອິເມ ຘມ຺ມາ ວິຎ຺ຎຸຄຣຫິຕາ, ອິເມ ຘມ຺ມາ ສມຕ຺ຕາ ສມາທິນ຺ນາ ອຫິຕາຍ ທຸກ຺ຂາຍ ສໍວຕ຺ຕນ຺ຕີຕິ, ອຖ ຕຸມ຺ເຫ, ກາລາມາ, ປຊເຫຍ຺ຍາຖາ’ຕິ, ອິຕິ ຍໍ ຕໍ ວຸຕ຺ຕໍ, ອິທເມຕໍ ປຏິຈ຺ຈ ວຸຕ຺ຕໍ.

‘‘ເອຖ ຕຸມ຺ເຫ, ກາລາມາ, ມາ ອນຸສ຺ສເວນ, ມາ ປຣມ຺ປຣາຍ, ມາ ອິຕິກິຣາຍ, ມາ ປິຏກສມ຺ປທາເນນ, ມາ ຕກ຺ກເຫຕຸ, ມາ ນຍເຫຕຸ, ມາ ອາກາຣປຣິວິຕກ຺ເກນ, ມາ ທິຏ຺ຐິນິຊ຺ຌານກ຺ຂນ຺ຕິຍາ, ມາ ຠພ຺ພຣູປຕາຍ, ມາ ສມໂຓ ໂນ ຄຣູຕິ. ຍທາ ຕຸມ຺ເຫ, ກາລາມາ, ອຕ຺ຕນາວ ຊາເນຍ຺ຍາຖ – ‘ອິເມ ຘມ຺ມາ ກຸສລາ, ອິເມ ຘມ຺ມາ ອນວຊ຺ຊາ, ອິເມ ຘມ຺ມາ ວິຎ຺ຎຸປ຺ປສຕ຺ຖາ, ອິເມ ຘມ຺ມາ ສມຕ຺ຕາ ສມາທິນ຺ນາ ຫິຕາຍ ສຸຂາຍ ສໍວຕ຺ຕນ຺ຕີ’ຕິ, ອຖ ຕຸມ຺ເຫ, ກາລາມາ, ອຸປສມ຺ປຊ຺ຊ ວິຫເຣຍ຺ຍາຖ.

‘‘ຕໍ ກິໍ ມຎ຺ຎຖ, ກາລາມາ, ອໂລໂຠ ປຸຣິສສ຺ສ ອຊ຺ຌຕ຺ຕໍ ອຸປ຺ປຊ຺ຊມາໂນ ອຸປ຺ປຊ຺ຊຕິ ຫິຕາຍ ວາ ອຫິຕາຍ ວາ’’ຕິ?

‘‘ຫິຕາຍ, ຠນ຺ເຕ’’.

‘‘ອລຸທ຺ໂຘ ປນາຍໍ, ກາລາມາ, ປຸຣິສປຸຄ຺ຄໂລ ໂລເຠນ ອນຠິຠູໂຕ ອປຣິຍາທິນ຺ນຈິຕ຺ໂຕ ເນວ ປາຓໍ ຫນຕິ, ນ ອທິນ຺ນໍ ອາທິຍຕິ, ນ ປຣທາຣໍ ຄຈ຺ຉຕິ, ນ ມຸສາ ຠຓຕິ, ນ ປຣມ຺ປິ ຕຖຕ຺ຕາຍ ສມາທເປຕິ, ຍໍ ສ ໂຫຕິ ທີຆຣຕ຺ຕໍ ຫິຕາຍ ສຸຂາຍາ’’ຕິ.

‘‘ເອວໍ, ຠນ຺ເຕ’’.

‘‘ຕໍ ກິໍ ມຎ຺ຎຖ, ກາລາມາ, ອໂທໂສ ປຸຣິສສ຺ສ ອຊ຺ຌຕ຺ຕໍ ອຸປ຺ປຊ຺ຊມາໂນ ອຸປ຺ປຊ຺ຊຕິ…ເປ… ອໂມໂຫ ປຸຣິສສ຺ສ ອຊ຺ຌຕ຺ຕໍ ອຸປ຺ປຊ຺ຊມາໂນ ອຸປ຺ປຊ຺ຊຕິ…ເປ… ຫິຕາຍ ສຸຂາຍາ’’ຕິ.

‘‘ເອວໍ ຠນ຺ເຕ’’.

‘‘ຕໍ ກິໍ ມຎ຺ຎຖ, ກາລາມາ, ອິເມ ຘມ຺ມາ ກຸສລາ ວາ ອກຸສລາ ວາ’’ຕິ?

‘‘ກຸສລາ, ຠນ຺ເຕ’’.

‘‘ສາວຊ຺ຊາ ວາ ອນວຊ຺ຊາ ວາ’’ຕິ?

‘‘ອນວຊ຺ຊາ, ຠນ຺ເຕ’’.

‘‘ວິຎ຺ຎຸຄຣຫິຕາ ວາ ວິຎ຺ຎຸປ຺ປສຕ຺ຖາ ວາ’’ຕິ?

‘‘ວິຎ຺ຎຸປ຺ປສຕ຺ຖາ, ຠນ຺ເຕ’’.

‘‘ສມຕ຺ຕາ ສມາທິນ຺ນາ ຫິຕາຍ ສຸຂາຍ ສໍວຕ຺ຕນ຺ຕິ ໂນ ວາ? ກຖໍ ວາ ເອຕ຺ຖ ໂຫຕີ’’ຕິ?

‘‘ສມຕ຺ຕາ, ຠນ຺ເຕ, ສມາທິນ຺ນາ ຫິຕາຍ ສຸຂາຍ ສໍວຕ຺ຕນ຺ຕິ. ເອວໍ ໂນ ເອຕ຺ຖ ໂຫຕີ’’ຕິ.

‘‘ອິຕິ ໂຂ, ກາລາມາ, ຍໍ ຕໍ ອໂວຈຸມ຺ຫາ – ‘ເອຖ ຕຸມ຺ເຫ, ກາລາມາ! ມາ ອນຸສ຺ສເວນ, ມາ ປຣມ຺ປຣາຍ, ມາ ອິຕິກິຣາຍ, ມາ ປິຏກສມ຺ປທາເນນ, ມາ ຕກ຺ກເຫຕຸ, ມາ ນຍເຫຕຸ, ມາ ອາກາຣປຣິວິຕກ຺ເກນ, ມາ ທິຏ຺ຐິນິຊ຺ຌານກ຺ຂນ຺ຕິຍາ, ມາ ຠພ຺ພຣູປຕາຍ, ມາ ສມໂຓ ໂນ ຄຣູຕິ. ຍທາ ຕຸມ຺ເຫ, ກາລາມາ, ອຕ຺ຕນາວ ຊາເນຍ຺ຍາຖ – ອິເມ ຘມ຺ມາ ກຸສລາ, ອິເມ ຘມ຺ມາ ອນວຊ຺ຊາ, ອິເມ ຘມ຺ມາ ວິຎ຺ຎຸປ຺ປສຕ຺ຖາ, ອິເມ ຘມ຺ມາ ສມຕ຺ຕາ ສມາທິນ຺ນາ ຫິຕາຍ ສຸຂາຍ ສໍວຕ຺ຕນ຺ຕີຕິ, ອຖ ຕຸມ຺ເຫ, ກາລາມາ, ອຸປສມ຺ປຊ຺ຊ ວິຫເຣຍ຺ຍາຖາ’ຕິ, ອິຕິ ຍໍ ຕໍ ວຸຕ຺ຕໍ ອິທເມຕໍ ປຏິຈ຺ຈ ວຸຕ຺ຕໍ.

‘‘ສ ໂຂ ໂສ [ໂຍ ໂຂ (ກ.)], ກາລາມາ, ອຣິຍສາວໂກ ເອວໍ ວິຄຕາຠິຊ຺ໂຌ ວິຄຕພ຺ຍາປາໂທ ອສມ຺ມູຬ຺ໂຫ ສມ຺ປຊາໂນ ປຕິສ຺ສໂຕ [ສໂຕ (ກ.)] ເມຕ຺ຕາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ, ຕຖາ ທຸຕິຍໍ, ຕຖາ ຕຕິຍໍ, ຕຖາ ຈຕຸຕ຺ຖໍ, ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ເມຕ຺ຕາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຌນ ຜຣິຕ຺ວາ ວິຫຣຕິ. ກຣຸຓາສຫຄເຕນ ເຈຕສາ…ເປ… ມຸທິຕາສຫຄເຕນ ເຈຕສາ…ເປ… ອຸເປກ຺ຂາສຫຄເຕນ ເຈຕສາ ເອກໍ ທິສໍ ຜຣິຕ຺ວາ ວິຫຣຕິ, ຕຖາ ທຸຕິຍໍ, ຕຖາ ຕຕິຍໍ, ຕຖາ ຈຕຸຕ຺ຖໍ, ອິຕິ ອຸທ຺ຘມໂຘ ຕິຣິຍໍ ສພ຺ພຘິ ສພ຺ພຕ຺ຕຕາຍ ສພ຺ພາວນ຺ຕໍ ໂລກໍ ອຸເປກ຺ຂາສຫຄເຕນ ເຈຕສາ ວິປຸເລນ ມຫຄ຺ຄເຕນ ອປ຺ປມາເຓນ ອເວເຣນ ອພ຺ຍາປຊ຺ເຌນ ຜຣິຕ຺ວາ ວິຫຣຕິ.

‘‘ສ [ສເຈ (ກ.)] ໂຂ ໂສ, ກາລາມາ, ອຣິຍສາວໂກ ເອວໍ ອເວຣຈິຕ຺ໂຕ ເອວໍ ອພ຺ຍາປຊ຺ຌຈິຕ຺ໂຕ ເອວໍ ອສໍກິລິຏ຺ຐຈິຕ຺ໂຕ ເອວໍ ວິສຸທ຺ຘຈິຕ຺ໂຕ. ຕສ຺ສ ທິຏ຺ເຐວ ຘມ຺ເມ ຈຕ຺ຕາໂຣ ອສ຺ສາສາ ອຘິຄຕາ ໂຫນ຺ຕິ. ‘ສເຈ ໂຂ ປນ ອຕ຺ຖິ ປໂຣ ໂລໂກ, ອຕ຺ຖິ ສຸກຕທຸກ຺ກຏານໍ [ສຸກຏທຸກ຺ກຏານໍ (ສີ. ສ຺ຍາ. ກໍ. ປີ.)] ກມ຺ມານໍ ຜລໍ ວິປາໂກ, ອຖາຫໍ [ຐານມຫໍ (ສີ. ປີ.), ຐານເມຕໍ ເຍນາຫໍ (ສ຺ຍາ. ກໍ.)] ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊິສ຺ສາມີ’ຕິ, ອຍມສ຺ສ ປຐໂມ ອສ຺ສາໂສ ອຘິຄໂຕ ໂຫຕິ.

‘‘‘ສເຈ ໂຂ ປນ ນຕ຺ຖິ ປໂຣ ໂລໂກ, ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ອຖາຫໍ [ອິຘາຫໍ (ສີ. ສ຺ຍາ. ກໍ. ປີ.)] ທິຏ຺ເຐວ ຘມ຺ເມ ອເວຣໍ ອພ຺ຍາປຊ຺ຌໍ ອນີຆໍ ສຸຂິໍ [ສຸຂໍ (ສີ.), ສຸຂີ (ສ຺ຍາ. ກໍ.)] ອຕ຺ຕານໍ ປຣິຫຣາມີ’ຕິ, ອຍມສ຺ສ ທຸຕິໂຍ ອສ຺ສາໂສ ອຘິຄໂຕ ໂຫຕິ.

‘‘‘ສເຈ ໂຂ ປນ ກໂຣໂຕ ກຣີຍຕິ ປາປໍ, ນ ໂຂ ປນາຫໍ ກສ຺ສຈິ ປາປໍ ເຈເຕມິ. ອກໂຣນ຺ຕໍ ໂຂ ປນ ມໍ ປາປກມ຺ມໍ ກຸໂຕ ທຸກ຺ຂໍ ຜຸສິສ຺ສຕີ’ຕິ, ອຍມສ຺ສ ຕຕິໂຍ ອສ຺ສາໂສ ອຘິຄໂຕ ໂຫຕິ.

‘‘‘ສເຈ ໂຂ ປນ ກໂຣໂຕ ນ ກຣີຍຕິ ປາປໍ, ອຖາຫໍ ອຸຠເຍເນວ ວິສຸທ຺ຘໍ ອຕ຺ຕານໍ ສມນຸປສ຺ສາມີ’ຕິ, ອຍມສ຺ສ ຈຕຸຕ຺ໂຖ ອສ຺ສາໂສ ອຘິຄໂຕ ໂຫຕິ.

‘‘ສ ໂຂ ໂສ, ກາລາມາ, ອຣິຍສາວໂກ ເອວໍ ອເວຣຈິຕ຺ໂຕ ເອວໍ ອພ຺ຍາປຊ຺ຌຈິຕ຺ໂຕ ເອວໍ ອສໍກິລິຏ຺ຐຈິຕ຺ໂຕ ເອວໍ ວິສຸທ຺ຘຈິຕ຺ໂຕ. ຕສ຺ສ ທິຏ຺ເຐວ ຘມ຺ເມ ອິເມ ຈຕ຺ຕາໂຣ ອສ຺ສາສາ ອຘິຄຕາ ໂຫນ຺ຕີ’’ຕິ.

‘‘ເອວເມຕໍ, ຠຄວາ, ເອວເມຕໍ, ສຸຄຕ! ສ ໂຂ ໂສ, ຠນ຺ເຕ, ອຣິຍສາວໂກ ເອວໍ ອເວຣຈິຕ຺ໂຕ ເອວໍ ອພ຺ຍາປຊ຺ຌຈິຕ຺ໂຕ ເອວໍ ອສໍກິລິຏ຺ຐຈິຕ຺ໂຕ ເອວໍ ວິສຸທ຺ຘຈິຕ຺ໂຕ. ຕສ຺ສ ທິຏ຺ເຐວ ຘມ຺ເມ ຈຕ຺ຕາໂຣ ອສ຺ສາສາ ອຘິຄຕາ ໂຫນ຺ຕິ. ‘ສເຈ ໂຂ ປນ ອຕ຺ຖິ ປໂຣ ໂລໂກ, ອຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ອຖາຫໍ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊິສ຺ສາມີ’ຕິ, ອຍມສ຺ສ ປຐໂມ ອສ຺ສາໂສ ອຘິຄໂຕ ໂຫຕິ.

‘‘‘ສເຈ ໂຂ ປນ ນຕ຺ຖິ ປໂຣ ໂລໂກ, ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ອຖາຫໍ ທິຏ຺ເຐວ ຘມ຺ເມ ອເວຣໍ ອພ຺ຍາປຊ຺ຌໍ ອນີຆໍ ສຸຂິໍ ອຕ຺ຕານໍ ປຣິຫຣາມີ’ຕິ, ອຍມສ຺ສ ທຸຕິໂຍ ອສ຺ສາໂສ ອຘິຄໂຕ ໂຫຕິ.

‘‘ສເຈ ໂຂ ປນ ກໂຣໂຕ ກຣີຍຕິ ປາປໍ, ນ ໂຂ ປນາຫໍ – ກສ຺ສຈິ ປາປໍ ເຈເຕມິ, ອກໂຣນ຺ຕໍ ໂຂ ປນ ມໍ ປາປກມ຺ມໍ ກຸໂຕ ທຸກ຺ຂໍ ຜຸສິສ຺ສຕີ’ຕິ, ອຍມສ຺ສ ຕຕິໂຍ ອສ຺ສາໂສ ອຘິຄໂຕ ໂຫຕິ.

‘‘ສ ໂຂ ໂສ, ຠນ຺ເຕ, ອຣິຍສາວໂກ ເອວໍ ອເວຣຈິຕ຺ໂຕ ເອວໍ ອພ຺ຍາປຊ຺ຌຈິຕ຺ໂຕ ເອວໍ ອສໍກິລິຏ຺ຐຈິຕ຺ໂຕ ເອວໍ ວິສຸທ຺ຘຈິຕ຺ໂຕ. ຕສ຺ສ ທິຏ຺ເຐວ ຘມ຺ເມ ອິເມ ຈຕ຺ຕາໂຣ ອສ຺ສາສາ ອຘິຄຕາ ໂຫນ຺ຕິ.

‘‘ອຠິກ຺ກນ຺ຕໍ, ຠນ຺ເຕ…ເປ… ເອເຕ ມຍໍ, ຠນ຺ເຕ, ຠຄວນ຺ຕໍ ສຣຓໍ ຄຈ຺ຉາມ ຘມ຺ມຎ຺ຈ ຠິກ຺ຂຸສງ຺ຆຎ຺ຈ. ອຸປາສເກ ໂນ, ຠນ຺ເຕ, ຠຄວາ ຘາເຣຕຸ ອຊ຺ຊຕຄ຺ເຄ ປາຓຸເປເຕ ສຣຓໍ ຄເຕ’’ຕິ. ປຎ຺ຈມໍ.